Bhukhanda 18: athaikonaviṃśo'dhyāyaḥ
Bhūkhaṇḍa 18
- Language
- Sanskrit
athaikonaviṃśo'dhyāyaḥ
18.1
hariruvāca —
tapasā'nena puṇyena satyenānena te dvija | stotreṇa pāvanenāpi tuṣṭo'smi vriyatāṃ varaḥ
18.2
varaṃ dadmi mahābhāga yaste manasi durlabhaḥ | yaṃ yamicchasi kāmaṃ tvaṃ taṃ taṃ te pūrayāmyaham
18.3
somaśarmovācaprathamaṃ dehi me kṛṣṇa varamekaṃ suniścitam | suprasannena manasā yadyasti sudayā mama
18.4
janmajanmāntaraṃ prāpya tava bhaktiṃ karomyaham | darśayasva paraṃ sthānamacalaṃ mokṣadāyakam
18.5
svavaṃśatārakaṃ putraṃ divyalakṣaṇasaṃyuktam | viṣṇubhaktiparaṃ nityaṃ mama vaṃśapradhārakam
18.6
sarvajñaṃ sarvadaṃ dāntaṃ tapastejaḥsamanvitam | devabrāhmaṇalokānāṃ pālakaṃ pūjakaṃ śubham
18.7
devamitraṃ puṇyabhāvaṃ dātāraṃ jñānapaṇḍitam | dehi me īdṛśaṃ putraṃ dāridryaṃ hara keśava
bhavatvevaṃ na saṃdeho varamenaṃ vṛṇomyaham
18.8
hariruvāca —
evameva dvijaśreṣṭha bhaviṣyati na saṃśayaḥ | matprasādātsuputrastu tava vaṃśapratārakaḥ
18.9
bhokṣyasi tvaṃ varānbhogāndivyānvai mānuṣāniha | samādāya paraṃ saukhyaṃ manaḥsaṃbhavajaṃ śubham
18.11
yāvajjīvasi vipra tvaṃ tāvadduḥkhaṃ na paśyasi | dātā bhoktā guṇagrāhī bhaviṣyasi na saṃśayaḥ 10
sutīrthe maraṇaṃ vipra yāsyasi tvaṃ parāṃ gatim | evaṃ varaṃ harirdattvā sapriyāya dvijāya saḥ
18.12
antardhānaṃ gato devaḥ svapnavatparidṛśyate | tadā sumanayā yuktaḥ somaśarmā dvijottamaḥ
18.13
sutīrthe pāvane tasminrevātīre supuṇyade | amarakaṇṭake vipro dānapuṇyaṃ karoti saḥ
18.14
gate bahutere kāle tasya vai somaśarmaṇaḥ | kapilārevayoḥ saṅge snānaṃ kṛtvā sa nirgataḥ
18.15
purato dṛṣṭavānvipraḥ śvetamekaṃ hi kuñjaram | suprabhaṃ supadaṃ divyaṃ sundaraṃ cārulakṣaṇam
18.16
nānābharaṇaśobhāṅgaṃ bahulakṣaṇasaṃyutam | sindūrakuṅkumairasya kumbhasthale vircacite
18.17
karṇanīlotpalayutaṃ patākādaṇḍasaṃyuktam | nāgoparisthito divyaḥ puruṣo dṛṣṭamantrakaḥ
18.18
divyalakṣaṇasaṃpannaḥ sarvābharaṇabhūṣitaḥ | divyamālyāmbaradharo divyagandhānulepanaḥ
18.19
susaumyaṃ somavatpūrṇacchatracāmarasaṃyutam | nāgārūḍhaṃ prayāntaṃ taṃ punaḥ paśyati sattamaḥ
18.20
siddhacāraṇagandharvaiḥ stūyamānaṃ sumaṅgalam | sagajaṃ sundaraṃ dṛṣṭvā puruṣaṃ divyalakṣaṇam
18.21
vyatarkayattasomaśarmā vismayāviṣṭamānasaḥ | ko'yaṃ prayāti divyāṅgaḥ panthānaṃ prāpya suvrataḥ
18.22
evaṃ cintayatastasya sa gataḥ prāptavāngṛham | prāviśantaṃ gṛhadvāri devarūpaṃ manoharam
18.23
harṣeṇa mahatā''viṣṭaḥ somaśarmā dvijottamaḥ | svagṛhaṃ prati dharmātmā tvaramāṇaḥ prayāti ca
gṛhadvāraṃ gato yāvattāvattaṃ tu na paśyati
18.24
patitāni ca puṣpāṇi prekṣya tāni mahāmatiḥ | divyāni gandhayuktāni prāṅgaṇe dvijasattamaḥ
18.25
candanaiḥ kusumaiḥ puṇyaiḥ sugandhaiśca vilepitam | svakīyaṃ prāṅgaṇaṃ dṛṣṭvā dūrvāṅkurasamanvitam
18.26
sa evaṃ vismayāviṣṭaścintayānaḥ punaḥ punaḥ | dadarśa sumanāṃ prājño divyamaṅgalasaṃyutām
18.27
somaśarmovāca—
kena dattāni divyāni hyetānyābharaṇāni ca | śṛṅgāraṃ rūpasaubhāgyaṃ vastrālaṃkārabhūṣaṇam
18.28
tanme tvaṃ kāraṇaṃ bhadre kathayasvāviśeṣataḥ | evaṃ saṃbhāvya tāṃ bhāryā virarāma dvijottamaḥ
18.29
sumanovāca—
śṛṇu kānta samāyātaḥ kaściddevavarottamaḥ | śvetanāgaṃ samārūḍho divyābharaṇabhūṣaṇaḥ
18.31
divyagandhānuliptāṅgo divyaśriyā samanvitaḥ | na jāne ko hi devo'sau vipragandharvasevitaḥ30
stūyamānaḥ samāyāto devakiṃnaracāraṇaiḥ | yoṣitaḥ puṇyarūpāstu rūpaśṛṅgārasaṃyutāḥ
18.32
sarvābharaṇaśobhāḍhyāḥ sarvāḥ pūrṇamanorathāḥ | tābhiḥ saha samakṣaṃ me puruṣeṇa mahātmanā
18.33
catuṣkaṃ pūritaṃ dravyaiḥ sarvaśobhāsamanvitam | tatrāhamāsane puṇye sthāpitā strīgaṇaiḥ kila
18.34
vastrālaṃkārabhūṣāṃ me daduste sarvameva hi | tathā maṅgalamantraistu śāstragītaiśca puṇyadaiḥ
18.35
abhiṣiktā'smi taiḥ sarvairantardhānaṃ punargatāḥ | māmevaṃ [ paritaḥ sarve punarūcurdvijottama
18.36
tava gehe vayaṃ bhadre ] vasiṣyāmaḥ sadaiva hi | śucirbhavasva kalyāṇi bhartrā sārdhaṃ sadaiva hi
18.37
evamuktvā gatāḥ sarva evaṃ dṛṣṭaṃ mayaiva hi | tayā yatkathitaṃ sarvaṃ samākarṇya mahāmatiḥ
18.38
punaścintāṃ prapanno'sau kimidaṃ devanirmitam | vicintayitvā'tha tadā somaśarmā mahāmatiḥ
18.39
brahmakarmaṇi saṃyuktaḥ sādharmyaṃ dharmamuttamam | tasmādgarbhaṃ mahābhāgā dadhāra vrataśālinī
18.40
tena garbheṇa sā devī hyadhikaṃ śuśubhe tadā | suputraṃ dīptisaṃyuktaṃ tejojvālāsamākulam
18.41
sā hi jajñe mahābhāgā tanayaṃ devasaṃnibham | antarikṣe tadā nedurdevadundubhayo muhuḥ
18.42
śaṅkhāndadhmurmahādevā gandharvā lalitaṃ jaguḥ | apsarasastadā sarvā nanṛtustā mudā'nvitāḥ
18.43
atha brahmā suraiḥ sārdhaṃ samāyāto dvijottama | cakāra nāma tasyaiva suvrateti samāhitaḥ
18.44
nāma kṛtvā tato devā jagmuḥ svargaṃ mahaujasaḥ | gateṣu teṣu deveṣu somaśarmā sutasya ca
jātakarmādikaṃ karma cakāra dvijasattamaḥ
18.45
jāte putre mahābhāge suvrate devanirmite | tasya gehe mahālakṣmīrdhanadhānyasamākulā
18.46
gajāśvamahiṣīgāvaḥ kāñcanaṃ ratnameva ca | yathā kuberabhavanaṃ śuśubhe ratnasaṃcayaiḥ
18.47
tatsaumaśarmaṇo gehaṃ saṃpannaṃ parirarājate | dānapuṇyādikaṃ dharmaṃ cakāra dvijasattamaḥ
18.48
tīrthayātrāṃ gato vipro nānāpuṇyasamākulaḥ | anyāni yāni puṇyāni dānāni dvijasattamaḥ
[ †cakāra tatra medhāvī jñānapuṇyasamanvitaḥ
18.49
evaṃ sādhayate dharmaṃ pālayecca punaḥ punaḥ | putrasya jātakarmādi karmāṇi dvijasattamaḥ ]
18.50
vivāhaṃ kārayāmāsa harṣeṇa mahatā kila | putrasya putrāḥ saṃjātāḥ supuṇyā lakṣaṇānvitāḥ
18.51
satyadharmatapopetā dānadharmaratāḥ sadā | sa teṣāṃ puṇyakarmāṇi somaśarmā cakāra ha
18.52
pautrāṇāṃ tu mahābhāgasteṣāṃ saukhyena modate | sarvasaukhyaṃ sa bubhuje tejasā rājarājavat
18.53
pañcaviṃśābdiko yadvattadvatkāyastu tasya hi | sūryatejaḥpratīkāśaḥ somaśarmā mahāmatiḥ
18.54
sā cāpi śuśubhe devī sumanā puṇyamaṅgalaiḥ | putrapautrairmahābhāgā dānavrataiśca saṃyamaiḥ
18.55
atibhāti viśālākṣī puṇyaiḥ pativratādibhiḥ | tāruṇyena samāyuktā yathā ṣoḍaśavārṣikī
18.56
modamānau mahābhāgau daṃpatī cārudarśanau | harṣeṇa ca samāyuktau modamānau mahodayau
18.57
evaṃ tayostu vṛttāntaṃ puṇyādhikasamanvitam | suvratasya pravakṣyāmi tapaścaryāṃ dvijottamāḥ
18.58
yathā tena samārādhya nārāyaṇamanāmayam
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit