Bhukhanda 19
Bhūkhaṇḍa 19
- Language
- Sanskrit
Contents
- 19.34 — 1 part
19.1
sūta uvāca-ekadā vyāsadevo'sau brahmāṇaṃ jagataḥ patim | suvratākhyānakaṃ sarvaṃ papracchātīva vismitaḥ
19.2
vyāsa uvāca -
lokātmam̐llokavinyāsa devadeva mahāprabho | suvratasyātha caritaṃ śrotumicchāmi sāṃpratam
19.3
brahmovāca -
pārāśarya mahābhāga śrūyatāṃ puṇyasattama | suvratasya suviprasya tapaścaryāṃ vadāmi te
19.4
suvrato nāma medhāvī bālyādviṣṇumacintayat | garbhe nārāyaṇaṃ devaṃ dṛṣṭavānpuruṣottamam
19.5
pūrvakarmānubhāvena harerdhyānaṃ gatastadā | śaṅkhacakradharaṃ devaṃ padmanābhaṃ supuṇyadam
19.6
dhyāyate cintayannevaṃ gīte jñāne prapāṭhane | evaṃ devaṃ hariṃ dhyāyansadaiva dvijasattamaḥ
19.7
krīḍatyevaṃ sadā ḍimbhaiḥ sārdhaṃ vai bālakottamaḥ | bālakānāṃ svakaṃ nāma hareścaiva mahātmanaḥ
19.8
cakārāsau hi medhāvī puṇyātmā puṇyavatsalaḥ | samāhvayati vai mitraṃ harernāmnā mahāmuniḥ
19.9
bho bhoḥ keśava ehyehi pāhi mādhava cakrabhṛt | krīḍasva ca mayā sārdhaṃ tvameva puruṣottama
19.10
vanameva pragantavyamāvābhyāṃ madhusūdana | evameva samāhvānaṃ nāmabhiśca harerdvijaḥ
19.11
krīḍane paṭhane hāsye śayane gītaprekṣaṇe | yāne ca hyāsane dhyāne mantre jñāne sukarmasu
19.12
[ paśyatyevaṃ vadatyevaṃ jagannāthaṃ janārdanam | sa dhyāyate tamekaṃ hi viśvanāthaṃ maheśvaram
19.13
tṛṇe kāṣṭhe ca pāṣāṇe śuṣke sāndre hi keśavam | ] paśyatyevaṃ sa dharmātmā govindaṃ kamalekṣaṇam
ākāśe bhūmimadhye tu parvateṣu vaneṣu ca | jale sthale ca pāṣāṇe jīveṣu ca mahāmatiḥ
19.14
nṛsiṃhaṃ paśyate vipraḥ suvrataḥ sumanāsutaḥ | bālakrīḍāṃ samāsādya ramatyevaṃ dine dine
19.15
gītaiśca gāyate kṛṣṇaṃ surāgairmadhurākṣaraiḥ | tālairlayasamāyuktaiḥ susvarairmūrchanānvitaiḥ
19.16
suvrata uvāca —
dhyāyanti devāḥ satataṃ murāriṃ yasyāṅgamadhye sakalaṃ niviṣṭam
yogeśvaraṃ pāpavināśanaṃ ca bhaje śaraṇyaṃ madhusūdanākhyam
19.17
lokeṣu yo hi sakaleṣu vibodhi̱to'pi yo lokagaśca guṇino nivasanti yatra
doṣairvihīnamakhilaiḥ parameśvaraṃ taṃ saṃcintya pādayugalaṃ satataṃ namāmi
19.18
nārāyaṇaṃ guṇanidhānamanantavīryaṃ vedāntaśuddhamatayaḥ prapaṭhanti nityam
saṃsārasāgaramapāramanantadurgamuttāraṇārthamakhilaṃ śaraṇaṃ prapadye
19.19
yogīndramānasamasarovararājahaṃsaṃ śuddhaṃ prabhāvamakhilaṃ satataṃ hi yasya
tasyaiva pādayugalaṃ hyamalaṃ namāmi dīnasya me'śubhabhayātkuru deva rakṣām
19.20
lokasya pālanakṛte pariṇītadharmaṃ satyānvitaṃ sakalalokaguruṃ sureśam
gāyāmyahaṃ surasaṃgītakatālamānaiḥ śrīvatsamaikamakhilaṃ bhuvanasya devam
19.21
dhyāye'khilasya bhuvanasya patiṃ ca devaṃ duḥkhāndhakāradalanārthamihaiva candram
ajñānanāśaka(ma)malaṃ ca dineśatulyamānandakandamakhilaṃ mahimāsametam
sampūrṇamevamamṛtasya kalānidhānaṃ taṃ gītakauśalamananyarasaiḥ pragāye
19.22
yuktaṃ suyogakaraṇaiḥ paramārthadṛṣṭiṃ viśvaṃ sa paśyati carācaramaikamittham
paśyanti naiva yamihātha supāpalokāstaṃ keśavaṃ śaraṇamekamupaimi nityam
19.23
karābhyāṃ vādyamānastu tālaṃ tālasamanvitam | gītena gāyate kṛṣṇaṃ bālakaiḥ saha modate
19.24
evaṃ tu krīḍate nityaṃ bālabhāvena vai tadā | suvrataḥ sumanāputro viṣṇudhyānaparāyaṇaḥ
19.25
krīḍamānaṃ prāha mātā suvrataṃ cārulakṣaṇam | bhojanaṃ kuru me vatsa kṣudhā tvāṃ paripīḍayet
19.26
tāmuvāca tadā prājñaḥ sumanāṃ mātaraṃ punaḥ | mahāmṛtena tṛpto'smi haridhyānarasena vai
bhojanāsanamārūḍho miṣṭamannaṃ prapaśyati
19.27
idamannaṃ svayaṃ viṣṇurātmā hyannaṃ samāśritaḥ | ātmarūpeṇa yo viṣṇuścānnenānena tṛpyatu
19.28
kṣīrasāgarasaṃvāso yasyaiva parisaṃsthitaḥ | jalenānena puṇyena tṛptimāyātu keśavaḥ
19.29
tāmbūlacandanairgandhairebhiḥ puṣpairmanoharaiḥ | ātmarūpeṇa govindastṛptimāyātu keśavaḥ
19.30
śayanaṃ yāti dharmātmā tadā kṛṣṇaṃ pracintayet | yoganidrāyutaṃ kṛṣṇaṃ tamahaṃ śaraṇaṃ gataḥ
19.31
bhojanācchādaneṣvevamāsane śayane dvijaḥ | cintayedvāsudevaṃ taṃ tasmai sarvaṃ prakalpayet
19.32
tāruṇyaṃ prāpya dharmātmā kāmabhogānvihāya vai | saṃyuktaḥ keśavadhyāne vaiḍūrye parvatottame
19.33
yatra siddheśvaraṃ liṅgaṃ vaiṣṇavaṃ pāpanāśanam | rudramoṃkārasaṃjñaṃ ca dhyātvā caivaṃ maheśvaram
19.34
brahmāṇaṃ viddhi taṃ devaṃ narmadādakṣiṇe taṭe | siddheśvaraṃ samāśritya tapobhāvaṃ vyacintayat
19.34.p1
iti śrīmahāpurāṇe pādme bhūmikhaṇḍe sumanopākhyāne viṃśo'dhyāyaḥ || 20
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit