Pramāṇa · Search · About · API

Bhukhanda 30

Bhūkhaṇḍa 30

Language
Sanskrit

Contents

30.1

sūta uvāca—
atha tveṅgo mahātejā dṛṣṭvā cendrasya saṃpadam | bhogāṃścaiva vilāsaṃ ca līlāṃ tasya mahātmanaḥ

30.2

kathaṃ vā īdṛśaḥ putro mama syāddharmasaṃyutaḥ | cintayitvā kṣaṇaṃ caiva sa cāṅgaḥ khedasaṃyutaḥ

30.3

[†svakaṃ gehaṃ samāyātaḥ sa tveṅgaḥ satyatatparaḥ] | atriṃ papraccha pitaraṃ praṇato namrakaṃdharaḥ

30.4

ko'yaṃ puṇyasamācāra indratvaṃ prāptavānmahān | kasya dharmasya vai vyuṣṭiḥ kiṃ kṛtaṃ karma cedṛśam

30.5

[ kaḥ kṛto dharma etena kamārādhitavānmune] | tanme tvaṃ vistareṇāpi vada satyavatāṃ vara

30.6

atriruvāca—
sādhu pṛṣṭaṃ mahābhāga tvayā vai dharmakāraṇam | caritaṃ tasya devasya tanme nigadataḥ śṛṇu

30.7

suvrato nāma medhāvī purā brāhmaṇasattamaḥ | tena kṛṣṇo hṛṣīkeśastapasā caiva toṣitaḥ

30.8

puṇyagarbhamataḥ prāpto adityāṃ kaśyapātkila | viṣṇoścaiva prasādena devarājo babhūva saḥ

30.9

aṅga uvāca—
kathamindrasamaḥ putro mama syātputravatsala | tadupāyaṃ samācakṣva bhavāñjñānavatāṃ varaḥ

30.10

atriruvāca—
samāsenāpi tasyaiva suvratasya mahātmanaḥ | caritramakhilaṃ puṇyaṃ niśāmaya mahāmate

30.12

suvrato nāma medhāvī purā''rādhitavānharim | tasya bhāvaṃ subhaktiṃ ca dhyānaṃ caiva mahātmanaḥ 11
samālokya jagannātho dattavānvai mahatpadam | sa aindraṃ sarvabhogārḍhyaṃ trailokyaṃ sacarācaram

30.13

viṣṇoścaiva prasādāddhi cānubhuṅkte trilokadhṛk | evaṃ te sarvamākhyātamindrasyāpi viceṣṭitam

30.15

bhaktyā tuṣyati govindo bhāvadhyānena sattama | sarvaṃ dadāti satataṃ bhaktyā saṃtoṣito hariḥ 14
tasmādārādhya govindaṃ sarvadaṃ sarvasaṃbhavam | sarvajñaṃ sarvavettāraṃ sarveśaṃ puruṣaṃ param
tasmātprāpsyasi sarvaṃ tvaṃ yadyadicchasi nandana

30.16

sukhasya dātā paramārthadātā mokṣasya dātā jagatāmiheśaḥ
tasmāttamārādhaya gaccha putra saṃprāpsyase hīndrasamaṃ hi putram

30.17

ākarṇya vākyaṃ paramārthayuktaṃ mahātmanā'sau ṛṣiṇā hi tena
saṃgṛhya tattvaṃ vacanaṃ hi tasyai ārādhituṃ śāśvatamavyayaṃ saḥ

30.18

āmantrya coṅgaḥ pitaraṃ mahātmā brahmātmajaṃ brahmasamānameva
saṃprāptavānmerugirestu śṛṅgaṃ tatkāñcanai ratnamayaiḥ sametam

30.18.p1

iti śrīmahāpurāṇe pādme bhūmikhaṇḍe venopākhyāne triṃśo'dhyāyaḥ || 30

Linked texts (2)