Bhukhanda 34
Bhūkhaṇḍa 34
- Language
- Sanskrit
34.1
rambhovācabrahmā hyavyaktasaṃbhūtastasmājjajñe prajāpatiḥ | atrirnāma sa dharmātmā tasya putro mahāmanāḥ
34.2
aṅgo nāma ayaṃ bhadre nandanaṃ vanamāgataḥ | indrasya saṃpadaṃ dṛṣṭvā nānātejaḥsamanvitām
34.3
kṛtā spṛhā tvanenāpi indrasya sadṛśe pade | īdṛśo hi yadā putro mama syādvaṃśavardhanaḥ
34.4
suśreyo me bhavejjanma yaśaḥkīrtisamanvitam | ārādhito hṛṣīkeśastapobhirniyamaistataḥ
34.5
suprasanne hṛṣīkeśe varaṃ yācitavānayam | indrasya sadṛśaṃ putraṃ viṣṇutejaḥparākramam
34.6
vaiṣṇavaṃ sarvapāpaghnaṃ dehi me madhusūdana | datta evaṃ mayā putra īdṛśaḥ rpārapālakaḥ
34.7
tadāprabhṛti viprendraḥ puṇyāṃ kanyāṃ prapaśyati | yathā tvaṃ cārusarvāṅgī tathā'yaṃ paripaśyati
34.8
enaṃ gaccha varatvena asmātputro bhaviṣyati| puṇyātmā sarvadharmajño viṣṇutejaḥparākramaḥ
34.9
etattve sarvamākhyātaṃ yathā tvaṃ paripṛcchasi| ayaṃ bhartā tava śreṣṭho bhaveddevi na saṃśayaḥ
34.10
suśaṅkhasyāpi yaḥ śāpo vṛthā so'pi bhaviṣyati| evaṃ jāte mahābhāge putre dharmapracāriṇi
34.11
bhaviṣyati sukhaṃ bhadre satyaṃ satyaṃ vadāmyaham| sukṣetre karṣako yādṛgbījaṃ vapati tatparaḥ
34.12
sa tathā bhuñjate devi yathā bījaṃ tathā phalam| anyathā naiva jāyeta tatsarvaṃ sadṛśaṃ bhavet
34.13
ayameva mahābhāgastapasvī puṇyavīryavān| asya vīryātsamutpanno hyasyaiva guṇasaṃpadā
34.14
yuktaḥ putro mahātejāḥ sarvadharmabhṛtāṃ varaḥ| bhaviṣyati mahābhāgo yuktātmā yogatattvavit
34.15
evaṃ hi vākyaṃ suniśamya bālā rambhāprayuktaṃ śivadāyakaṃ tat
vicintya buddhyā hi sakhīmukhodgataṃ mene'tha sarvaṃ parisatyameva hi
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit