Bhukhanda 39

Bhūkhaṇḍa 39

Language: Sanskrit

39.45 — 1 part

39.1

vena uvāca —
nityadāne phalaṃ caiva tvattaḥ pūrvaṃ mayā śrutam | naimittikasya dānasya dattasyāpi hi yatphalam

39.2

tatsarvaṃ hi samācakṣva prasādājjagadīśvara | śṛṇvaṃstṛptiṃ na gacchāmi śrotuṃ śraddhā pravartate

39.3

viṣṇuruvāca —
naimittikaṃ pravakṣyāmi dānameva nṛpottama | mahāparvaṇi saṃprāpte yena dānāni śraddhayā

39.4

satpātrebhyaḥ pradattāni tasya puṇyaphalaṃ śṛṇu | gajaṃ rathaṃ pradatte yo hyaśvaṃ cāpi nṛpottama

39.5

sam̐ ca bhṛtyaistu saṃyuktaḥ puṇyadeśe nṛpottamaḥ| jāyate hi mahārāja matprasādānna saṃśayaḥ

39.6

rājā bhavati dharmātmā jñānavānbalavānsudhīḥ | ajeyaḥ sarvabhūtānāṃ mahātejāḥ prajāyate

39.7

mahāparvaṇi saṃprāpte bhūmidānaṃ dadāti yaḥ | godānaṃ vā mahārāja sarvabhogapatirbhavet

39.8

brāhmaṇāya supuṇyāya dānaṃ dadyātprayatnataḥ| mahādānaṃ tu yo dadyāttīrthe parvaṇi cā''gate

39.9

[ teṣāṃ cihnaṃ pravakṣyāmi bhūpatitvaṃ prajāyate |] tīrthe parvaṇi saṃprāpte guptadānaṃ dadāti yaḥ

39.10

nidhīnāmāśu saṃprāptirakṣarā parijāyate | mahāparvaṇi saṃprāpte tīrtheṣu brāhmaṇāya ca

39.11

sucelaṃ ca mahādānaṃ kāñcanena samanvitam | puṇyaṃ phalaṃ pravakṣyāmi tasya dānasya bhūpate

39.12

jāyante bahavaḥ putrāḥ sadguṇā vedapāragāḥ | āyuṣmantaḥ prajāvanto yaśaḥpuṇyasamanvitāḥ

39.13

vipulāścaiva yajvāno jñātatattvā mahāmate | saukhyaṃ ca labhate puṇyaṃ dharmavānparijāyate

39.14

mahāparvaṇi saṃprāpte tīrthaṃ saṃprāpya yatnataḥ | kapilāṃ kāñcanīṃ dadyādbrāhmaṇāya mahātmane

39.15

tasya puṇyaṃ pravakṣyāmi dānasyāsya mahāmate | kapilādā mahārāja mahāsaukhyaṃ prabhuñjate

39.16

yāvadromā prajīveta tāvattiṣṭhanti sarvaśaḥ | mahāparvaṇi saṃprāpte hyalaṃkṛtya ca gāṃ tadā

39.17

kāñcanenāpi saṃyuktāṃ vastrālaṃkārabhūṣaṇaiḥ | tasya dānasya rājendra phalaṃbhogaṃ vadāmyaham

39.18

vipulā jāyate lakṣmīrdānabhogasamākulā | sarvavidyāpatirbhūtvā viṣṇubhakto bhavetkila

39.19

viṣṇuloke vasenmartyo yāvattiṣṭhati medinī | tīrthaṃ gatvā tu yo dadyādbrāhmaṇeṣu vibhūṣaṇam

39.20

bhuktvā tu vipulāmbhogāmindreṇa saha modate | mahāparvāṇi saṃprāpte vastraṃ ca dvijapuṅgave

39.21

dattvā'nnaṃ bhūmisaṃyuktaṃ pātre śraddhāsamanvitaḥ | modate sa tu vaikuṇṭhe viṣṇuṃtulyaparākramaḥ

39.22

savastraṃ kāñcanaṃ dattvā dvijāya pariśīline | svecchayā hyagnisadṛśo vaikuṇṭhe vasate dhruvam

39.23

suvarṇasya sukumbhaṃ ca ghṛtena [ paripūrayet | pidhānaṃ raupyaṃ kartavyaṃ vastrahārairalaṃkṛtam

39.24

puṣpamālānvitaṃ kuryādbrahmasūtreṇa śobhitam | pratiṣṭhāpyeddevamaistaṃ saṃpūjya ] mahāmate

39.25

upacārairvaraiścaiva ṣoḍaśaiḥ paripūjayet | svalaṃkṛtya tato dadyādbrāhmaṇāya mahāmate

39.27

ṣoḍaśaiva tato gāvaḥ savastrāḥ kāṃsyadohinīḥ | kumbhairyuktāśca catvāro dakṣiṇāṃ ca sakāñcanām 26
tathā dvādaśakā gāvo vastrālaṃkārabhūṣaṇāḥ | pṛthagbhūtāya viprāya dātavyā nātra saṃśayaḥ

39.28

evamādīni dānāni hyanyāni nṛpanandana | tīrthakālaṃ susaṃprāpya pātrasaṃpattimeva ca
śraddhābhāvena dātavyaṃ bahupuṇyakaraṃ bhavet

39.29

viṣṇumuddiśya yaddānaṃ kāmanāparikalpitam | tasya dānasya bhāvena bhāvena paribhāvitaḥ

39.30

tādṛkphalaṃ samaśnāti mānuṣo nātra saṃśayaḥ | ābhyudayikaṃ pravakṣyāmi yajñādiṣu pradīyate

39.31

tena dānena tasyāpi śuddhena ca nṛpottama | bhrātṛvṛddhimavāpnoti naiva duḥkhaṃ ca vindati

39.33

bhogānbhuṅkte sa dharmātmā jīvamānastu sāṃpratam | aindrāṃstu bhuṅkte'sau bhogāndātā divyagatiḥpunaḥ32
svakulaṃ nayate svargaṃ kalpānāṃ ca sahasrakam | evamābhyudayaṃ proktamanyānyaṃ te vadāmyaham

39.34

kāyasya saṃkṣayaṃ jñātvā jarayā paripīḍitam | dānaṃ tena pradātavyamāśāṃ kasya na kārayet

39.35

mṛte mayi ca me putrā anye svajanabāndhavāḥ | kathamete bhaviṣyanti māṃ vinā suhṛdo mama

teṣāṃ mohātmamugdho'pi na dadāti sa kiṃcana | mṛtyuṃ prayāti mohātmā rudanti mitrabāndhavāḥ 36
duḥkhena pīḍitāḥ sarve māyāmohena pīḍitāḥ | saṃkalpayanti dānāni mokṣaṃ vai cintayanti ca 37
tasminmṛte mahārāja māyāmohe gate sati | vismaranti ca dānāni lobhātmāno dadanti na

Linked texts (2)

Padmapurāṇa — Vyāsa, Sanskrit
Bhūmikhaṇḍa — Sanskrit

Bhukhanda 39

Contents

Linked texts (2)