Bhukhanda 48
Bhūkhaṇḍa 48
- Language
- Sanskrit
Contents
- 48.54 — 1 part
48.1
brāhmaṇauvāca—
ekadā tu mahābhāga gatā sā parvatottamam | ramaṇīyaṃ vanaṃ dṛṣṭvā kadalīkhaṇḍamaṇḍitam
48.2
śālaistālaistamālaiśca nālikeraistathotkaṭaiḥ | pūgīphalairmātuluṅgairnāraṅgaiścārujambukaiḥ
48.3
campakaiḥ pāṭalaiḥ puṃṇyaiḥ puṣpitaiḥ ketakairvaraiḥ | aśokavakulopetaṃ nānāvṛkṣairalaṃkṛtam
48.4
parvataṃ puṣpavantaṃ ca puṣpitaiśca nagottamaiḥ | sarvatra śobhitaṃ ramyaṃ nānādhātusamākulam
48.5
[❊gauraramyataraṃ dṛṣṭvā tadeva vanamuttamam ] | taḍāgaṃ sarvato bhadraṃ puṇyatoyena pūritam
48.6
kamalaiḥ puṣpitaiścānyaiḥ sugandhaiḥ kanakotpalaiḥ | śvetotpalairvibhāsantaṃ raktotpalasupuṣpitaiḥ
48.7
nīlotpalaiśca kahlārairhaṃsaiśca jalakukkuṭaiḥ | pakṣibhirjalajaiścānyairnānādhātusamākulam
48.8
taḍāgaṃ sarvataḥ śubhraṃ nānāpakṣimaṇairyutam | kokilānāṃ rutaiḥ puṇyaiḥ susvaraiḥ pariśobhitam
48.9
mayūrāṇāṃ tathā śabdaiḥ sarvaṃ ca madhurāyate | ṣaṭpadānāṃ sunādena sarvatra pariśobhate
48.10
evaṃvidhaṃ giriṃ ramyaṃ tadeva vanamuttamam | taḍāgaṃ sarvato bhadraṃ dadṛśe nṛpanandinī
48.11
vaidarbhī krīḍamānā sā sakhībhiḥ sahitā tadā | samālokya vanaṃ puṇyaṃ sarvatra kusumākulam
48.12
cāpalyena prabhāvena strībhāvena ca līlayā | padmāvatī sarastīre sakhībhiḥ sahitā tadā
48.13
jalakrīḍāsamālīnā ham̐sate gāyate punaḥ | sukhena ramamāṇā sā tasminsarasi bhāminī
48.14
evaṃ vipra tadā sā tu sukhena parivartate | gobhilo nāma vai daityo bhṛtyo vaiśravaṇasya ca
48.15
divyenāpi vimānena sarvabhogapariṣkṛtaḥ | yāti cā''kāśamārgeṇa taḍāgasyordhvamāgataḥ
48.16
tena dṛṣṭā viśālākṣī vaidarbhī nirbhayā tadā | sarvayoṣidvarā sā hi ugrasenasya vai priyā
48.17
rūpeṇāpratimā loke sarvāṅgeṣu virājate | ratirvai manmathasyāpi kiṃ vā'pīyaṃ haripriyā
48.20
kiṃ vā'pi pārvatī devī śacī kiṃ vā bhaviṣyati | yādṛśī dṛśyate ceyaṃ nārīṇāmuttamā varā 18
anyā caivaidṛśī nāsti dvitīyā kṣitimaṇḍale | nakṣatreṣu yathā candraḥ saṃpūrṇī bhāti śobhanaḥ 19
guṇarūpakalābhistu tathā bhāti varānanā | puṣkareṣu yathā haṃsastatheyaṃ cāruhāsinī
48.21
aho rūpamaho bhāvamasyāstu paridṛśyate | kā kasya śobhanā bālā cāruvṛttapayodharā
48.23
vipaśya gobhilo daityaḥ padmāvatīṃ varānanām | cintayitvā kṣaṇaṃ vipra kā kasyāpi bhaviṣyati
jñānena mahatā jñātvā vaidarbhīti na saṃśayaḥ | dayitā ugrasenasya pativrataparāyaṇā
48.24
ātmabalena tiṣṭhantī duṣprāpyā puruṣairapi | ugraseno mahāmūrkhaḥ preṣitā yena vai varā
48.25
piturgehamiyaṃ bālā sa tu bhāgyena varjitaḥ | anayā vinā sa jīvecca kathaṃ kūṭamatiḥ sadā
48.27
kiṃvā napuṃsako rājā enāṃ yo hi parityajet | tāṃ dṛṣṭvā sa tu kāmātmā saṃjātastatkṣaṇādapi
iyaṃ pativratā bālā duṣprāpyā puruṣairapi | kathaṃ bhokṣyāmyahaṃ gatvā kāmo'ti mama pīḍayet
48.28
abhuktvā'haṃ yadā yāsye mṛtyurmama tadā bhavet| adyaiva hi na saṃdeho yataḥ kāmo mahābalaḥ
48.29
iticintāparo bhūtvā upāyaṃ sasṛje tadā | kṛtvā māyāmayaṃ rūpamugrasenasya bhūpateḥ
48.30
yādṛśastvagrasenaśca sāṅgopāṅgo mahānṛpaḥ | gobhilastādṛśo bhūtvā gatyā ca svarabhāṣayā
48.31
yathāvastro yathāveṣo vayasā ca tathā punaḥ | divyamālyāmbaradharo divyagandhānulepanaḥ
48.32
sarvābharaṇaśobhāṅgo yādṛśo māthureśvaraḥ | bhūtvā ca tādṛśo daitya ugrasenamayastadā
48.33
māyayā parayā yukto rūpatāruṇyasaṃyutaḥ | parvatāgre aśokasya chāyāmāśritya saṃsthitaḥ
48.34
śilātalastho duṣṭātmā vīṇāṃ daṇḍena vāra(da)kaḥ | susvaraṃ gāyamānastu gītaṃ viśvapramodanam
48.35
tālamānakriyopetaṃ saptasvaravibhūṣitam | gītaṃ gāyati duṣṭātmā tasyā rūpeṇa mohitaḥ
48.36
parvatāgre sthito vipra harṣeṇa mahatā'nvitaḥ | sakhīmadhyagatā sā tu padmāvatī varānanā
48.37
śuśruve susvaraṃ gītaṃ tālamānalayānvitam | ko'yaṃ gāyati dharmātmā mahatsaukhyapradāyakam
48.38
gītaṃ hi satkriyopetaṃ sarvabhāvasamanvitam | sakhībhiḥ sahitā gatvā autsukyena nṛpātmajā
48.39
aśokacchāyāmāśritya vimale'tha śilātale | dṛṣṭvā bhūpālaveṣeṇa gobhilaṃ dānavādhamam
48.40
puṣpamālāmbaradharaṃ divyagandhānulepanam | sarvālaṃkaraṇaśobhāḍhyaṃ padmāvatī pativratā
48.41
māthureśaḥ samāyātaḥ kadā dharmaparāyaṇaḥ | mama nātho mahātmā vai rājyaṃ tyaktvā pradūrataḥ
48.42
yāvadvicintayetsā ca tāvatpāpena tena sā | samāhūtā suvastrā ca ehi tvaṃ hi priye mama
48.44
cakitā śaṅkitā sā ca kathaṃ bhartā samāgataḥ | lajjitā duḥkhitā jātā adhaḥ kṛtvā tato mukham 43
ahaṃ pāpā durācārā niḥśaṅkā parivartitā | kopamevaṃ mahābhāgaḥ kariṣyati na saṃśayaḥ
48.45
yāvaddhi cintayetsā ca tāvattenāpi pāpinā | samāhūtā svayaṃ sā ca ehyehi tvaṃ mama priye
48.46
tvayā vinā kṛto devi prāṇāndhartuṃ varānane | na hi śaknomyahaṃ kānte jīvitaṃ priyamave ca
tava snehena mugdho'smi tvāṃ tyaktvā notsahe bhṛśam
48.48
brāhmaṇyuvāca—
evamuktvā(ktā) gatā tasya saṃmukhī lajjayā'nvitā | samāliṅgya tato daityaṃ satī padmāvatī tadā 47
ekāntaṃ tu samānītā subhuktā svecchayā tataḥ | daityena gobhilenāpi satyaketoḥ sutā tadā
48.49
sukalovāca—
sukhasthāne'sya saṃketaṃmavindantī varānanā | svavastraṃ sā parigṛhya śaṅkitā duḥkhitā'bhavat
48.50
sā sakrodhamuvācātha gobhilaṃ dānavādhamam | kastvaṃ pāpasamācāro nirghṛṇo donavākṛtiḥ
48.51
śaptukāmā samudyuktā duḥkhinā''kulitekṣaṇā | vepamānā tadā rājanduḥkhabhāreṇa pīḍitā
48.52
mama kāntacchalenaivaṃ tvamāgato durātmavān | nāśitaṃ dharmavatkāryaṃ pativratamanuttamam
48.53
susvaraṃ ruditaṃ kṛtvā mama janma tvayā hṛtam | [ paśya me balamatraiva śāpaṃ dāsye sudāruṇam]
48.54
evaṃ saṃbhāṣamāṇāṃ tāṃ śaptukāmāṃ sa gobhilaḥ
48.54.p1
iti śrīmadbhāpurāṇe pādme bhūmikhaṇḍe venopākhyāne sukalācarita ekonapañcāśattamo'dhyāyaḥ || 49
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit