Bhukhanda 51: atha dvipañcāśattamo'dhyāyaḥ
Bhūkhaṇḍa 51
- Language
- Sanskrit
Contents
- 51.47 — 1 part
atha dvipañcāśattamo'dhyāyaḥ
51.1
śivaśarmovācamaṅgale śrūyatāṃ vākyaṃ yadi pṛcchasi sāṃpratam | yadarthaṃ hi tvayā pṛṣṭaṃ tannibodha varānane
51.2
iyaṃ hi sāṃprataṃ prāptā varākī bhikṣurūpiṇī | vasudattasya viprasya suteyaṃ cārulocane
51.3
sudevā nāma bhadreyaṃ mama jāyā priyā sadā | kenāpi kāraṇenaiva deśaṃ tyaktvā samāgatā
51.4
mama duḥkhena dagdhveyaṃ viyogena varānane | māṃ jñātvā sā samāyātā bhikṣurūpeṇa te gṛham
51.5
evaṃ jñātvā tvayā bhadra ātithyaṃ pariśobhanam | kartavyaṃ ca na saṃdeha īcchantyā mama supriyam
51.6
bharturvākyaṃ niśamyaiva maṅgalā patidevatā | harṣeṇa mahatā''viṣṭā svayameva sumaṅgalā
51.7
snānācchādanabhojyaṃ ca mama cakre varānane | ratnakāñcanayuktaiśca bharaṇaiśca pativratā
51.8
ahaṃ hi bhūṣitā bhadre tathaiva patikāmyayā | tayā'haṃ sukhitā devi mānasnānaiśca bhojanaiḥ
51.9
bhartrā'haṃ mānitā bhadre jātaṃ duḥkhamanantakam | mamorasi mahattīvraṃ sarvaprāṇavināśanam
51.11
tasyā mānaṃ mayā dṛṣṭvātmanaśca suduṣkṛtam | cintā me dāruṇā jātā yairyā prāṇā vrajanti me 10
kadā suvacanaṃ dattaṃ na mayā pāpayā bhṛśam | asyaiva vipravaryasya hyācarantyā ca duṣkṛtam
51.12
pādaprakṣālanaṃ naiva cāṅgasaṃvāhanaṃ na hi | ekāntaṃ na mayā dattaṃ tasyaiva hi mahātmanaḥ
51.13
kathaṃ saṃbhāṣyamasyaiva kariṣye pāpaniścayā | rātrau caiva tadā tatra patitā duḥkhasāgare
51.14
evaṃ hi cintamānāyāḥ sphuṭitaṃ hṛdayaṃ mama | gatāḥ prāṇāḥ śarīraṃ me tyaktvā tatra varānane
51.16
atha dūtāḥ samāyātā dharmarājasya vai tadā | [ vīrāśca dāruṇāḥ krūrā gadācakrāsidhāriṇaḥ 15
taistu baddhā mahābhāge śṛṅkhalairdṛḍhabandhanaiḥ | nītā yamapuraṃ taistu rudamānā suduḥkhitā
51.17
mudgaraistāḍyamānā'haṃ durgamārgeṇa pīḍitā | bhartsyamānā yamasyāgre taistatrāhaṃ praveśitā
51.18
dṛṣṭā'haṃ yamarājena sakrodhena mahātmanā | aṅgārasaṃcaye kṣiptā kṣiptā narakasaṃcaye
51.19
lohasya puruṣaṃ kṛtvā agninā paritāpitaḥ | mamorasi samutkṣipto nijabhartuśca vañcanāt
51.20
nānāpīḍābhisaṃtaptā narakāgnipratāpitā | tailadroṇyāṃ parikṣiptā karambhavrālukopari]
51.21
asipatraiśca saṃchinnā jalayantreṇa bhrāmitā | kūṭaśālmalivṛkṣeṣu kṣiptā'nena mahātmanā
51.22
sarveṣveva narakeṣu kṣiptā'haṃ nṛpanandini | pīḍāyukteṣu tīvreṣu tenaivāpi mahātmanā
51.23
pūyaśoṇitaviṣṭhāyāṃ pātitā kṛmisaṃkule | karapatraiḥ pāṭitā'haṃ śaktibhistāḍitā bhṛśam
51.24
anyeṣveva narakeṣu pātitā nṛpanandini | yonivaktre prakṣiptā'smi pātitā duḥkhakaṇṭake
51.25
dharmarājena tenāhaṃ narakeṣu nipātitā | bahulāṃ yonimāsādya bhuktaṃ duḥkhaṃ sudāruṇam
51.26
gatā'haṃ kroṣṭukīṃ yoniṃ śvānayoniṃ punargatā | sarpakukkuṭamārjārīmākhuyoniṃ gatā hyaham
51.27
evaṃ yoniviśeṣeṣu pāpayoniṣu tena ca | kṣiptā'smi dharmarājñā vai pīḍāsu sarvayoniṣu
51.28
tenaivāhaṃ kṛtā bhūmau śūkarī nṛpanandini | tava haste mahābhāge santi tīrthānyanekaṃśaḥ
51.29
tenodakena siktā'smi tvayaiva varavarṇini | mama pāpaṃ gataṃ devi prasādāttava sundari
51.30
tavaiva tejaḥpuṇyena jātaṃ jñānaṃ varānane | idānīmuddhara tvaṃ māṃ patitāṃ narkasaṃkaṭāt
51.31
yadā noddharase devi punaryāsyāmi dāruṇām | narkayoniṃ mahābhāge trāhi māṃ duḥkhabhāginīm
gatā'haṃ pāpabhāvena dīnā'haṃ ca nirāśrayā
51.32
kiṃ kṛtaṃ hi mayā bhadre sukṛtaṃ puṇyasaṃbhavam | yenāhamuddhare tvāṃ vai tanme vadam̐sva sāṃpratam
51.33
ayaṃ rājā mahābhāga ikṣvākurmununandanaḥ | viṣṇureṣa mahāprājño bhavatī śrīrhi nānyathā
51.34
pativratā mahābhāgā pativrataparāyaṇā | tvaṃ satī sarvadā bhadre sarvatīrthamayī priyā
51.35
devī sarvamayī nityaṃ devī sarvamayī sadā | mahāpativratā loka aikā tvaṃ nṛpateḥ priyā
51.36
yathā śuśrūṣito bhartā bhavatyām̐ hi na saṃśayaḥ | ekasya divasasyāpi puṇyaṃ dehi varānane
51.37
patiśuśrūṣitasyāpi yadi me kuruṣe priyam | mama mātā pitāṃ tvaṃ vai tvaṃ me guruḥ sanātanaḥ
51.38
ahaṃ pāpā durācārā am̐satyā jñānavarjitā | māmuddhara mahābhāge bhītā'haṃ yamatāḍanāt
51.39
evaṃ śrutvā tadā rājñī samālokya nṛpaṃ tadā | kiṃ karomi mahārāja eṣā kiṃ vadate prabho
51.40
ikṣvākuruvāca —
etāṃ duḥkhāṃ varākoṃ vai pāpayoniṃ gatāṃ śubhe | samuddhara svapuṇyaistvaṃ mahacchreyo bhaviṣyati
51.41
evamuktāṃ varā nārī suśravā cārumaṅgalā | varṣaikasya supuṇyaṃ te mayā dattaṃ varānane
51.42
evamuktena vākyena tayā devyā hi tatkṣaṇāt | rūpayauvanasaṃpannā divyamālāvibhūṣitā
51.43
divyadehā ca saṃbhūtā tejotvālāsamākulā | sarvabhūṣaṇaśobhāḍhyā nānāratnaiśca śobhitā
51.44
saṃjjātā divyarūprā sā divyagandhānulepanā | divyaṃ vimānamārūḍhā antarikṣaṃ gatā satī
51.45
tāmuvāca tato rājñīṃ praṇatā natakandharā | svastyastu te mahābhāge prasādāttava sundari
51.46
vrajāmi pātakānmuktā svargaṃ puṇyatamaṃ śubham | praṇamyaiva gatā svargaṃ sudevā śṛṇu sattama
51.47
etatte sarvamākhyātaṃ sukalāyā niveditam
51.47.p1
iti śrīmahāpurāṇe pādme bhūmikhaṇḍe venopākhyāne sukalācarite sudevāsvargārohaṇaṃ nāma dvipañcāśattamo'dhyāyaḥ || 52
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit