Bhukhanda 59
Bhūkhaṇḍa 59
- Language
- Sanskrit
59.1
kukala uvāca —
kathaṃ me jāyate siddhiḥ kathaṃ pitṛvimocanam | tanme suvistareṇāpi dharmarāja vadādhunā
59.2
dharmarāja uvāca —
gaccha gehaṃ mahābhāga tvāṃ vinā duḥkhitā'bhavat | saṃbodhaya tvaṃ sukalāṃ supuṇyāṃ dharmacāriṇīm
śrāddhadānaṃ gṛhaṃ gatvā tasyā hastena vai kuru
59.3
smṛtvā puṇyāni tīrthāni pūjaya tvaṃ surottamān | tīrthayātrākṛtā siddhistava caiva bhaviṣyati
59.4
bhāryāṃ vinā hi yo loko dharmaṃ sādhitumicchati | vilopya dharmaṃ gārhasthyamekākī vicaredvanam
viphalo jāyate loke nānnahmaśnanti devatāḥ
59.5
yajñāḥ siddhiṃ na cā''yānti gṛhiṇīrahite gṛhe | sa ekākī samartho na dharmārthasādhanāya ca
59.6
viṣṇuruvāca —
evamuktvā gato dharmo yathā''yātastathā punaḥ | kṛkalo'pi sa dharmātmā svagṛhaṃ prati prasthitaḥ
59.7
svagṛhaṃ prāpya medhāvī dṛṣṭvā tāṃ ca pativratām | sārthavāhena tenāpi mumude vā'ntarātmanā
59.8
tayā samāgataṃ dṛṣṭvā bhartāraṃ dharmakovidam | kṛtaṃ sumaṅgalaṃ karma bharturāgapane tadā
59.9
samācaṣṭe sa dharmātmā dharmasyāpi viceṣṭitam | samākarṇya mahābhāgā bharturvākyaṃ mudāvaham
dharmavākyaṃ praśasyātha anumene ca taṃ tathā
59.10
athāsau kṛkalaścāpi tayā sārdhaṃ supuṇyakam | cakāra śraddhayā śrāddhaṃ devapūjāṃ gṛhe sthitaḥ
59.11
pitaro devagandharvā vimānaiśca samāgatāḥ | tuṣṭuvustau mahātmānau daṃpatī munayastathā
59.13
ahaṃ cāpi tathā brahmā devyā yukto maheśvaraḥ| sarve devāḥ sagandharvāstasyāḥ satyena toṣitāḥ 12
ūṃcustau tu mahātmānau dharmajñau satyapaṇḍitau | bhāryayā saha bhadraṃ te varaṃ varaya suvrata
59.14
kukala uvāca—
kasya puṇyasya saṅgena tapasaśca surottamāḥ | sabhāryāya varaṃ dātuṃ bhavanto hi samāgatāḥ
59.15
indra uvāca—
eṣā satī mahābhāgā sukalā cārumaṅgalā | asyāḥ satyena tuṣṭāḥ sma dātukāmā varaṃ tava
59.16
samāsena tu saṃproktaṃ sarvavṛttāntameva ca | tasyāścaritamāhātmyaṃ śrutvā bhartā sa harṣitaḥ
59.17
tayā saha sa dharmātmā harṣavyākulalocanaḥ | nanāma devatāḥ sarvā daṇḍavacca punaḥ punaḥ
59.19
yā tu tuṣṭiṃ mahābhāgāstrayo devāḥ sanātanāḥ | anye ca ṛṣayaḥ puṇyāḥ kṛpāṃ kṛtvā mamopari 18
janmajanmani devānāṃ bhaktimevaṃ karomyaham | dharme satye ratiḥ syānme bhavatāṃ hi prasādataḥ
59.20
paścāddhi vaiṣṇavaṃ lokaṃ sabhāryaḥ sapitāmahaḥ | gantumicchāmyahaṃ devā yadi tuṣṭā mahaujasaḥ
59.21
devā ūcuḥ—
evamastu mahābhāga sarvaṃ tava bhaviṣyati | sukaleyaṃ mahāpuṇyā tava patnī yaśasvinī
59.22
viṣṇuruvāca—
ityuktvā puṣpavṛṣṭiṃ tāṃ tayorupari bhūpate | cakrurjaguḥ puṇyagītaṃ lalitaṃ madhuraṃ tataḥ
59.23
gandharvā gītatattvajñā nanṛtuścāpsarogaṇāḥ | tato devāḥ sagandharvāḥ svaṃ svaṃ sthānaṃ nṛpottama
59.24
varaṃ dattvā prajagmuste stūyamānāḥ pativratām | nārītīrthaṃ samākhyātamanyatkiṃ pravadāmi te
59.25
etatte sarvamākhyātaṃ puṇyākhyānamanuttamam | yaḥ śṛṇoti naro rājansarvapāpaiḥ pramucyate
59.26
śraddhayā śṛṇuyānnārī sukalākhyānamuttamam | saubhāgyena susatyena putrapautraiśca yujyate
59.27
modate dhanadhānyaiśca saha bhartrā sukhī bhavet | pativratā bhavetsā ca janmajanmani nānyathā
59.28
brāhmaṇo vedavidbhūyātkṣatriyo vijayī bhavet | [ dhanadhānyaṃ bhavettasya vaiśyagehe na saṃśayaḥ
59.29
dharmajño jāyate rājansadācāraḥ sukhī bhavet | śūdraḥ sukhamavāpnoti putrapautraiḥ pravardhate
vipulā jāyate lakṣmīrdhanadhānyairalaṃkṛtaḥ]
Linked texts (4)
- Padmapurāṇa — Vyāsa, Sanskrit
- Southern recension — Sanskrit
- Bhūmikhaṇḍa — Sanskrit
- Puruṣārthasudhānidhi — Sāyaṇācārya, Sanskrit