Pramāṇa · Search · About · API

Bhukhanda 70

Bhūkhaṇḍa 70

Language
Sanskrit

70.1

pippala uvāca—
mātaleśca vacaḥ śrutvā sa rājā nahuṣātmajaḥ| kiṃ cakāra mahāprājñastanme vistarato vada

70.2

sarvapuṇyamayī puṇyāṃ kathayaṃ pāpanāśinī| śrotumicchāmyahaṃ prājña naiva tṛpto'smi sarvathā

70.3

sukarmovāca—
sarvadharmabhṛtāṃ śreṣṭho yayātirnṛpasattamaḥ| tamuvācā''gataṃ dūtaṃ mātaliṃ cendrasārathim

70.4

yayātiruvāca—
śarīraṃ naiva tyakṣyāmi na gamiṣye puraṃdaram| śarīreṇa vinā dūta pārthivena na saṃśayaḥ

70.5

yadyapīha mahādoṣāḥ kāyasyaivaṃ prakīrtitāḥ| pūrvaṃ cāpi tvayā me'dya sarvamuktaṃ guṇāguṇam

70.6

nāhaṃ tyaṃktvā śarīraṃ vai gamiṣye tridivaṃ punaḥ| ityācakṣva ito gatvā devadevaṃ puraṃdaram

70.7

ekākinā'pi jīvena kāyenāpi mahāmate| naiva siddhiṃ prayātyeva sāṃsārikīmihaiva hi

70.8

naiva prāṇaṃ vinā kāyo jīvaḥ kāyaṃ vinā na hi| ubhayoścāpi mitratvaṃ nayiṣye nāśameva na

70.9

yasya prasādbhāvāddhai sukhamaśnāti kevalam| śarīrasyāpyayaṃ prāṇo bhogāṃnanyānmanogutān

70.10

ainaṃ tyaktvā svargabhogaṃ bhokṣye'haṃ devadūta na| saṃbhavanti mahāduṣṭā vyādhayo duḥkhadāyakāḥ

70.11

mātale kilbiṣāccaiva jarādoṣādi jāyate| paśya me puṇyasaṃyuktaṃ kāyaṃ ṣoḍaśavārṣikam

70.12

janmaprabhṛti me kāyaḥ śatārthaṃ ca prayāti hi| tathā'pi nūtano bhāvaḥ kāyasyāpi prajāyate
mama kālo gato dūta abdalakṣamanuttamam

70.13

yathā ṣoḍaśavarṣasya kāyaḥ puṃsaḥ praśobhate| tathā me śobhate deho balavīryasamanvitaḥ

70.14

naiva glānirna me hānirna bhramo vyādhayo na ca| mātale mama kāyo hi dharmotsāhena vardhate

Linked texts (2)