Bhukhanda 71
Bhūkhaṇḍa 71
- Language
- Sanskrit
Contents
- 71.27 — 1 part
71.1
sukarmovācadūtāstu grāmeṣu vadanti sarve deśeṣu dvīpeṣvatha pattaneṣu
lokāḥ śṛṇudhvaṃ nṛpatestathā''jñāṃ sarvaprabhāvairharimarcayantu
71.2
dānaiśca yajñairbahubhiḥ sukarmabhirdharmādibhirvā yajanairmanobhiḥ
dhyāyantu lokā madhusūdanaṃ tamādeśamevaṃ nṛpatestu tasya
71.3
evaṃ prakṛṣṭaṃ sakalaṃ supuṇyamākarṇitaṃ bhūmitale sulokaiḥ
tadāprabhṛtyetra samastamartyā dhyāyanti gāyanti murārimekam
71.4
japanti tapyanti yajanti caiva vedapraṇītaiśca susūktamantraiḥ
śrotraikapuṇyairamṛtopamānaiḥ śrīkeśavaṃ tadgatamānasāste
71.5
vratopavāsairniyamaiśca dānairvihāya doṣānviṣayānsamastān
[ lakṣmīnivāsaṃ jagatāṃ nivāsaṃ lokāstu bhaktyā paripūjayanti
71.6
ityājñā tasya bhūpasya vartate kṣitimaṇḍale | vaiṣṇavena prabhāvena janāḥ] sarve yajanti te
71.7
nāmabhiḥ karmabhirviṣṇuṃ yajante yajñakovidāḥ | taddhyānāstadvyavasitā viṣṇupūjāparāyaṇāḥ
71.8
yāvadbhūmaṇḍalaṃ sarvaṃ yāvattapati tigmaguḥ | tāvaddhi mānavā lokāḥ sarve bhāgavatāstu te
71.9
viṣṇoścaiva prabhāvena pūjāstotraiśca nāmabhiḥ | ādhihīnāśca te bhūmau saṃjātā mānavāstadā
71.10
vītaśokāśca puṇyāśca sarve caiva tapodhanāḥ | saṃjātā vaiṣṇavā vipra prasādāttasya cakriṇaḥ
71.11
āmayaiśca vihīnāste doṣai roṣaiśca varjitāḥ | [ sarvaiśvaryasamāpannāḥ sarvarogavivarjitāḥ]
prasādāttasya devasya saṃjātā mānavāstadā
71.12
amarā nirjarāḥ sarve dhanadhānyasamanvitāḥ | mahāviṣṇuprasādena putrapautrairalaṃkṛtāḥ
71.13
teṣāmeva mahābhāga gṛhadvāreṣu nityadā | kalpadrumāḥ supuṇyāste sarvakāmaphalapradāḥ
71.14
sarvakāmadudhā gāvaḥ sacintāmaṇayastathā | santi teṣāṃ gṛhe puṇyāḥ sarvakāmapradāyakāḥ
71.15
amarā mānavā jātāḥ putrapautrairalaṃkṛtāḥ | sarvadoṣavihīnāste viṣṇoścaiva prasādataḥ
71.16
sarvasaubhāgyasaṃpannāḥ puṇyamaṅgalasaṃyutāḥ | supuṇyā dānasaṃpannā jñānadhyānaparāyaṇāḥ
71.17
na durbhikṣaṃ na ca vyādhirnākālamaraṇaṃ nṛṇām | tasmiñchāsati dharmajñe yayātau nṛpatau tadā
71.18
vaiṣṇavā mānavāḥ sarve viṣṇuvrataparāyaṇāḥ | taddhyānāstajjapāḥ sarve saṃjātā bhāvatatparāḥ
71.20
teṣāṃ gṛhāṇi divyāni puṇyāni dvijasattama | patākābhistu śubhrābhiḥ śaṅkhayuktāni tāni ca 19
gadāṅkitadhvajāścitracakrāṅkitāni nityaṃ vai | padmāṅkitāni bhāsvanti vimānapratimāni ca
gṛhāṇi bhittibhāgeṣu citritāni sucitrakaiḥ
71.21
sarvatra gṛhadvāreṣu puṇyasthāneṣu sarvaśaḥ | vanāni santi divyāni śraddhālābhayutāni ca
71.23
tulasyā ca dvijaśreṣṭha yuktāni harimandiraiḥ | bhāsvanti guṇadivyāni gṛhāṇi prāṇināṃ sadā 22
sarvatra vaiṣṇavo bhāvo maṅgalaṃ bahu dṛśyate | [ śaṅkhaśabdāśca bhūloke mithaḥ sphoṭakarai ravaiḥ
śrūyante tatra viprendra doṣapāpavināśakāḥ]
71.24
śaṅkhasvastikapadmāni gṛhadvāreṣu tāni ca | viṣṇubhaktābhinārībhirlikhitāni dvijottama
71.25
gītarāgaiśca tānaiśca mūrcchanātālasusvaraiḥ | gāyanti keśavaṃ lokā viṣṇudhyānaparāyaṇāḥ
71.26
hariṃ murāriṃ pravadanti kecicchrīśācyutaṃ mādhavameva cānye
śrīnārasiṃhaṃ kamalekṣaṇaṃ taṃ govindamekaṃ kamalāpatiṃ ca
71.27
kṛṣṇaṃ ca rāmaṃ śaraṇaṃ vrajanti japanti jāpyaiḥ paripūjayanti
daṇḍapraṇāmaiḥ praṇamanti viṣṇuṃ taddhyānayuktāḥ parivaiṣṇavāste
71.27.p1
iti śrīmadbhāgavate pādme venopākhyāne yayāticarite catuḥsaptatitamo'dhyāyaḥ || 74
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit