Bhukhanda 72: atha pañcasaptatitamo'dhyāyaḥ
Bhūkhaṇḍa 72
- Language
- Sanskrit
atha pañcasaptatitamo'dhyāyaḥ
72.1
sukarmovācakṛṣṇaṃ viṣṇuṃ hariṃ rāmaṃ mukundaṃ madhusūdanam | nārāyaṇaṃ hṛṣīkeśaṃ nārasiṃhaṃ tamacyutam
72.2
keśavaṃ padmanābhaṃ tu vāsudevaṃ ca vāmanam | vārāhaṃ kamaṭhaṃ matsyaṃ kapilaṃ ca surādhipam
72.3
[ viśveśaṃ viśvarūpaṃ ca hyanantamaghaṃ śucim | puruṣaṃ puṣkarākṣaṃ ca śrīdharaṃ śrīpatiṃ harim
śrīdaṃ śrīśaṃ śrīnivāsaṃ sumokṣaṃ mokṣadaṃ prabhum ]
72.4
ityevamuccaranto hi nāmāni mānavā bhuvi | prabhajanti janāḥ sarve bālavṛddhakumārakāḥ
72.5
praṇamanti hariṃ nāryo gṛhakarmaratāḥ sadā | āsane śayane yāne dhyāne jñāne ca mādhavam
72.6
krīḍamānāstathā bālā govindaṃ praṇamanti ca | divā rātrau sumadhuraṃ bruvanti harināma ca
72.7
viṣṇūccāro hi sarvatra śrūyate hi dvijottama | vaiṣṇavena prabhāvena martyā vartanti bhūtale
72.8
prāsādakalaśāgreṣu devatāyataneṣu ca | yathā sūryasya vimbāni tathā cakrāṇi bhānti vai
72.9
kṛṣṇasya dṛśyate bhāvaḥ sarvatra jagatītale | tenarājñā kṛtaṃ vipra puṇyaṃ cāpi mahātmanā
72.10
viṣṇulokasya samatāṃ tathā nītaṃ mahītalam | nahuṣasyāpi putreṇa vaiṣṇavena yayātinā
72.11
ubhayorlokayorbhāvamekībhūtaṃ mahītale | bhūtalasyāpi viṣṇośca hyantaraṃ naiva dṛśyate
72.12
viṣṇūccāraṃ hi vaikuṇṭhe prakurvanti ca vaiṣṇavāḥ | bhūtale tādṛśoccāraṃ prakurvanti ca mānavāḥ
72.13
ubhayorlokayorbhāva eko hi vipra dṛśyate | jarārogabhayaṃ nāsti mṛtyuhīnā narā yataḥ
72.14
dānabhogaprabhāvastu adhiko dṛśyate bhuvi | putrāṇāṃ ca sukhaṃ puṇyamadhikaṃ pautrajaṃ tathā
72.15
svānbhokṣyanti sukhaināpi mānavā bhuvi sattamāḥ | viṣṇoḥ prasādadānena upadeśena tasya ca
72.16
sarvavyādhivinirmuktā mānavā vaiṣṇavāstathā | svargalokatiraskāraḥ kṛto rājñā mahītale
72.17
pañcaviṃśapramāṇeṇa varṣāṇāṃ nṛpasattamai | vedavijñā narāḥ sarve jñānadhyānaparāyaṇāḥ
72.18
yajñadānaparāḥ sarve dayābhāvāśca mānavāḥ | upakāraratāḥ sarve puṇyā dhanyāḥ śubhā narāḥ
72.19
sarve dharmaparā vipra viṣṇupyānaparāyaṇāḥ | rājñā tenopadiṣṭāste saṃjātā vaiṣṇavā bhuvi
72.20
viṣṇuruvāca —
śrūyatāṃ nṛpaśārdūla caritraṃ tasya bhūpateḥ | sarvadharmaparo nityaṃ viṣṇubhaktaśca nāhuṣiḥ
72.21
abdānāṃ caiva lakṣaikaṃ tasyāpi sugataṃ bhuvi | nūtano dṛśyate kāyaḥ pañcaviṃśābdako yathā
72.22
pañcaviṃśātmako bhāti rūpeṇa vayasā tadā | praśastaḥ prauḍhisaṃpannaḥ prasādāttasya cakriṇaḥ
72.23
mānavā bhūmilokasthā yamaṃ naivānuyānti te | rāgaidoṣavinirmuktāḥ kāmapāśavivarjitāḥ
72.24
sukhitā dānaputraiśca sarvadharmaparāyaṇāḥ | vistāraṃ te janāḥ sarve saṃtatyā'pi gatā nṛpa
72.25
yathā dūrvā vaṭāścaiva vistāraṃ yānti bhūtale | tathā te mānavāḥ sarve putrapautraiḥ pravistṛtāḥ
72.26
mṛtyudoṣavihīnāṃste ciraṃ jīvanti te janāḥ | sthirakāyāśca sukhino jarārogavivarjitāḥ
72.27
pañcaviṃśābdikāḥ sarve narā dṛśyanti bhūtale | satyācāraparāḥ sarve viṣṇudhyānaparāyaṇāḥ
72.28
evaṃ hi sarve martyāste prasādāttasya cakriṇaḥ | saṃjātā mānavāḥ sarve dānabhogaparāyaṇāḥ
72.29
mṛto na śrūyate loke sarvasmiñjagatītale | śokaṃ naiva prapaśyanti doṣaṃ naiva prayānti te
72.30
svargalokasya yadrūpaṃ tadrūpaṃ bhūtalsya ca | saṃjātām̐ viṣṇubhaktāste prasādāttasya cakriṇaḥ
72.31
yamadūtā vidhibhraṣṭā viṣṇudūtaistu tāḍitāḥ | rudamānā gatāḥ sarve dharmarājaṃ parasparam
72.32
tatsarvaṃ kathitaṃ dūtaiśceṣṭitaṃ bhūtale ca taiḥ | amṛtyu bhūtalaṃ jātaṃ dānabhogena bhāskare
72.33
[ nahuṣasyā''tmajenāpi kṛtaṃ deva yayātinā | viṣṇubhaktena puṇyena svargarūpaṃ pradarśitam
72.34
evamākarṇitaṃ sarvaṃ dharmarājena vai tadā |] dharmarājastadā tatra dūtebhyaḥ śrutavistaraḥ
cintayāmāsa saityārthaṃ kṣaṇaikaṃ nṛpaceṣṭitam
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit