Pramāṇa · Search · About · API

Bhukhanda 79

Bhūkhaṇḍa 79

Language
Sanskrit

Contents

79.1

sukarmovācaevaṃ cintayate yāvadrājā paramadhārmikaḥ | tāvatprovāca sā devī ratiputrī varānanā

79.2

kiṃ tvaṃ cintayase rājaṃstvamadyaiva mahāmate | prāyeṇāpi striyaḥ sarvāścapalāḥ syurna saṃśayaḥ

79.3

nāhaṃ cāpalyabhāvena tvāmevaṃ viniyojaye | nāhaṃ hi kārayāmyadya bhavatpārśve nṛpottama

79.5

anyāḥ striyo yathā loke cāpalyāccodayanti ca | akāryaṃ rājarājendra mohāllobhācca lampaṭāḥ
lokānāṃ darśanāyaiva jātā śraddhā mamorasi | devānāṃ darśanaṃ puṇyaṃ durlabhaṃ hi sumānuṣaiḥ

79.6

teṣāṃ ca darśanaṃ rājainkārayāmi vadasva me | doṣapāpakaraṃ yattu matsaṅgādiha yadbhavet

79.7

kathaṃ cintayase duḥkhaṃ yathā'nyaḥ prākṛto janaḥ | mahābhayādyathā bhīto mohagarbhe gato yathā

79.8

tyaja cintāṃ mahārāja gantavyaṃ hi tvayā divi | yenoddeśena duḥkhaṃ tu tanna kāryaṃ mayā kadā

79.9

evamuktastayā rājā tāmuvāca varāṅganām | cintitaṃ yanmayā devi tanme tvaṃ śṛṇu sāṃpratam

79.10

mānabhaṅgo mayā dṛṣṭo mayaiva cā''tmanaḥ priye | mayi svarge gate kānte prajā dīnā bhaviṣyati

79.12

trāsayiṣyati duṣṭātmā yamastu vyādhibhiḥ prajām | tvayā sārdhaṃ prayāsyāmi svarlokaṃ ca varānane
evamābhāṣya tāṃ rājā samāhūya sutottamam | puruṃ taṃ sarvadharmajñaṃ jarāyuktaṃ mahāmatim

79.14

[† ehohi sarvadharmajña dharmaṃ jānāsi niścitam ] | mamā''jñayā hi dharmātmandharmaḥ saṃpālitastvayā
jarā me dīyatāṃ tāta tāruṇyaṃ gṛhya cā''tmanaḥ

79.15

rājyaṃ kuru mamedaṃ tvaṃ sakośabalavāhanam | āsamudraṃ prabhuruṅkṣva tvaṃ vasupūrṇāṃ vasuṃdharām

79.16

mayā dattāṃ mahābhāga saṃgrāmavanapattanām | prajānāṃ pālanaṃ puṇyaṃ kartavyaṃ sarvadā tvayā

79.17

duṣkṛtāṃ śāsanaṃ nityaṃ sādhūnāṃ pratipālanam | kartavyaṃ ca tvayā tāta dharmaśāstrapramāṇataḥ

79.18

brahmaṇyena prabhāvena vidhidṛṣṭena karmaṇā | bhaktānāṃ pālanaṃ kāryaṃ yasmātpūjyā jagattraye

79.19

pañcame saptame ghasre kośaṃ paśya vipaścitai | kāryaiṣāṃ nityadā pūjā prasādya dhanabhojanaiḥ

79.22

[ cāracakṣurbhavasva tvaṃ nityaṃ dānarato bhavam̐] | mā bhava tvaṃ rataḥ śatrau sadā gopyastu paṇḍitaiḥ 20
niyatātmā bhavasva tvaṃ mā gaccha mṛgayāṃ suta | viśvāsastu tvayā tyājyaḥ strīṣu kośe bale ripau
pāṃtrāṇāṃ caiva sarveṣāṃ velānāṃ saṃgrahaṃ kuru | yajñairyaja hṛṣīkeśaṃ puṇyātmā bhava sarvadā

79.23

prajānāṃ vāñchitaṃ sarvamarpayasva dine dine | prajāsaukhyaṃ [ prakartavyaṃ prajāṃ poṣaya putraka

79.24

svīyavaṃśaḥ] prakartavyaḥ paradāreṣu mā kṛthāḥ | matiṃ duṣṭāṃ parasveṣu ripūṇāṃ balameva ca
[ cintayasva sadā vatsa madvākye nirato bhava

79.26

vedānāṃ hi sadā cintā śāstrāṇāṃ hi ca sarvadā | kuruṣvaivaṃ sadā vatsa śastrābhyāsarato bhava 25
saṃtuṣṭaḥ sarvadā vatsa svaśayyānirato bhava | gajābhyāsastu kartavyaḥ syandanasya ca sarvadā]

79.27

evamādiśya taṃ putramāśīrbhirabhinandya ca | svahastena paristhāpyai svāsane nṛpasattamaḥ

79.28

svāṃ jarāṃ tu samāśritya dattvā tāruṇyamasya ca | gantukāmastadā svargaṃ yayātiḥ pṛthivīpatiḥ

79.28.p1

iti śrīmahāpurāṇe pādme bhūmikhaṇḍe venopākhyāne pitṛtīrthe yayāticarite aśītitamo'dhyāyaḥ || 82

Linked texts (2)