Bhukhanda 84
Bhūkhaṇḍa 84
- Language
- Sanskrit
84.1
kuñjala uvāca—
vratabhedānpravakṣyāmi yaiśca ārādhyate hariḥ | jayā ca vijayā caiva jayantī pāpanāśinī
84.2
triḥspṛśā vañjulī cānyā tilagandhā tathā'parā | akhaṇḍā dvādaśī cānyā manorakṣā suputrakai
84.3
divyaprabhāvāḥ santyanyāstithayaḥ putrapautradāḥ | aśūnyaśayanaṃ cānyajjanmāṣṭamīmahāvratam
84.4
etairvrataiḥ samācīrṇaiḥ pāpaṃ dūraṃ prayāti ca | prāṇināṃ nātra saṃdehaḥ satyaṃ satyaṃ vadāmyaham
84.5
stotraṃ tasya pravakṣyāmi pāparāśiprāśanam | suputra śatanāmārūyaṃ narāṇāṃ gatidāyakam
84.6
tasya devasya kṛṣṇasya śatanāmārakhyamuttamam | saṃpratyeva pravakṣyāmi tacchṛṇuṣva suputraka
84.7
viṣṇornāmaśatasyāpi ṛṣiṃ chando vadāmyaham | devaṃ caiva mahābhāga sarvapātakaśoṣaṇam
84.8
[ viṣṇornāmaśatasyāpi ṛṣirbrahmā prakīrtitaḥ | oṃkāro devatā proktaśchando'nuṣṭubhtathaiva ca
sarvakāmikasaṃsiddhyai mokṣe ca viniyogakaḥ
84.9
namāmyahaṃ hṛṣīkeśaṃ keśavaṃ madhusūdanam | sūdanaṃ sarvadaityānāṃ nārāyaṇamanāmayam
84.10
jayantaṃ vijayaṃ kṛṣṇamanantaṃ vāmanaṃ tathā | viṣṇuṃ viśveśvaraṃ puṇyaṃ viśvātmānaṃ surārcitam
84.11
anaghaṃ tvaghahartāraṃ nārasiṃhaṃ śriyaḥ priyam | śrīpatiṃ śrīdharaṃ śrīdaṃ śrīnivāsaṃ mahodayam
84.12
śrīrāmaṃ mādhavaṃ mokṣaṃ kṣamārūpaṃ janārdanam | sarvajñaṃ sarvavettāraṃ sarveśaṃ sarvadāyakam
84.13
hariṃ murāriṃ govindaṃ padmanābhaṃ prajāpatim | ānandaṃ jñānasaṃpannaṃ jñānadaṃ jñānadāyakam
84.14
acyutaṃ sabalaṃ candravaktraṃ vyāsaparāvaram | yogeśvaraṃ jagadyoniṃ brahmarūpaṃ maheśvaram
84.15
mukundaṃ cāpi vaikuṇṭhamekarūpaṃ kaviṃ dhruvam | [ vāsudevaṃ mahādevaṃ brahmaṇyaṃ brāhmaṇapriyam
84.16
gopriyaṃ gohitaṃ yajñaṃ yajñāṅgaṃ yajñavardhanam | yajñasyāpi subhoktāraṃ vedavedāṅgapāragam
84.17
vedajñaṃ vedarūpaṃ taṃ vidyāvāsaṃ sureśvaram ] | pratyakṣaṃ ca mahāhaṃsaṃ śaṅkhapāṇiṃ purātanam
84.18
puṣkaraṃ puṣkarākṣaṃ ca vārāhaṃ dharaṇīdharam | pradyumnaṃ kāmapālaṃ ca vyāsadhyātaṃ maheśvaram
84.19
sarvasaukhyaṃ mahāsaukhyaṃ sāṃkhyaṃ ca puruṣottamam | yogarūpaṃ mahājñānaṃ yogīśamajitaṃ priyam
84.20
asurāriṃ lokanāthaṃ padma hastaṃ gadādharam | guhāvāsaṃ sarvavāsaṃ puṇyavāsaṃ mahājanam
84.21
[ vṛndānāthaṃ bṛhatkāyaṃ pāvanaṃ pāpanāśanam | gopīnāthaṃ gopasakhaṃ gopālaṃ gogaṇāśrayam
84.22
parātmānaṃ parādhīśaṃ kapilaṃ kāryamānuṣam ] | namāmi nikhilaṃ nityaṃ manovākkāyakarmabhiḥ
84.23
nāmnāṃ śatenāpi tu puṇyakartā yaḥ stauti kṛṣṇaṃ manasā sthireṇa
sa yāti lokaṃ madhusūdanasya vihāya doṣāniha puṇyabhūtaḥ
84.24
nāmnāṃ śataṃ mahāpuṇyaṃ sarvapātakaśodhanam | ananyamanasā dhyāyejjapeddhyānasamanvitaḥ
84.25
nityameva naraḥ puṇyaṃ gaṅgāsnānaphalaṃ labhet | tasmāttu susthiro bhūtvā samāhitamanā japet
84.26
trikālaṃ yo japenmartyo niyato niyame sthitaḥ | aśvamedhaphalaṃ tasya jāyate nātra saṃśayaḥ
84.27
ekādaśyāmupoṣyaiva purato mādhavasya yaḥ | jāgare prajapenmartyastasya puṇyaṃ vadāmyaham
puṇḍarīkasya yajñasya phalamāpnoti mānavaḥ
84.28
tulasīsaṃnidhau sthitvā manasā yo japennaraḥ | rājasūyaphalaṃ bhuṅkte varṣeṇāpi ca mānavaḥ
84.29
śālagrāmaśilā yatra yatra dvārāvatīśilā | ubhayoḥ saṃnidhau jāpyaṃ kartavyaṃ sukhamicchatā
84.30
bahusaukhyaṃ prabhuktvaiva kulānāṃ śatameva ca | ekena cādhikaṃ martya ātmanā saha tārayet
84.31
kārtike snānakartā yaḥ pūjayenmadhusūdanam | paṭhettatpurataḥ stotraṃ sa yāti paramāṃ gatim
84.32
māghasnāyī hi saṃpūjya bhaktyā ca madhusūdanam | dhyāyeccaiva hṛṣīkeśaṃ japedvā'tha śṛṇoti ca
84.33
surāpānādipāpāni vihāya paramaṃ padam | vinā vighnaṃ naraḥ putra saṃprayāti janārdanam
84.34
śrāddhakāle hi yo martyo bhuñjatāṃ ca dvijanmanām | yo japecca śataṃ nāmnāṃ stavaṃ pāpavināśanam
pitarastuṣṭimāyānti tṛptā yānti parāṃ gatim
84.35
brāhmaṇo vedaviccaiva kṣatriyo vijayī bhavet | dhanedhānyaṃ prabhañjīta vaiśyo japati yaḥ sadā
84.36
śūdraḥ sukhaṃ prabhuṅke ca brāhmaṇatvaṃ ca gacchati | prāpya janmāntaraṃ vatsa vedavidyāṃ pravindati
84.37
sukhadaṃ mokṣadaṃ stotraṃ japtavyaṃ ca na saṃśayaḥ | keśavasya prasādena sarvasiddho bhavennaraḥ
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit