Bhukhanda 85: athāṣṭāśītitamo'dhyāyaḥ

Bhūkhaṇḍa 85

Language: Sanskrit

athāṣṭāśītitamo'dhyāyaḥ

85.1

kuñjala uvāca —
vrataṃ stotraṃ mahādhyānaṃ jñānaṃ caiva suputraka | mayā''khyātaṃ tavāgre ca viṣṇoḥ pāpapraṇāśanam

85.2

evaṃ catuṣṭayaṃ sau hi sadā puṇyaṃ samācaret | prayāti vaiṣṇavaṃ lokaṃ sarvasaukhyapradāyakam

85.3

ito gatvā bhavānvatsa divyādevīṃ prabodhaya | aśūnyaśayanaṃ nāma vratarājaṃ vadasva tām
samuddhara mahāpāpādrājakanyāṃ yaśasvinīm

tvayā pṛṣṭaṃ mayā''khyātaṃ puṇyadaṃ pāpanāśanam | gaccha gaccha mahābhāga ityuktvā virarāma saḥ 4
viṣṇuruvāca —
evamuktaścojjvalastu supitrā kuñjalena hi | praṇamya pādau dharmātmā mātāpitrormahāmatiḥ
jagāma tvarito rājanplakṣadvīpaṃ sa ujjvalaḥ

85.6

taṃ giriṃ sarvatobhadraṃ nānādhātusamākulam | nānāratnamayaistuṅgaiḥ śikharairupaśobhitam

85.7

nānāpravāhasaṃpūrṇairudakairnirmalairnṛpa | [ nadyaḥ santi viśālāstāstasmingirivarottame

85.8

kinnarāstatra gāyanti gandharvāḥ susvaraṃ nṛpa ] | apsarobhiḥ samākīrṇaṃ devavṛndaiḥ samāśritam

85.9

siddhacāraṇasaṃyuktaṃ munivṛndairūpāsitam | nānāpakṣininādaiśca sarvatra parināditam

85.10

evaṃ giriṃ samāsādya ujjvalo laghuvikramaḥ | susvareṇāpi tāṃ divyādevīṃ tatra samāsthitām

85.11

rūrūyamāṇāṃ tāṃ prājño vacanaṃ cedamabravīt | kā tvaṃ bhavasi kasyāsi kasmādrodiṣi sāṃpratam

85.12

kasmātkhinnā mahābhāge kena te vipriyaṃ kṛtam | samācakṣva tvamanaghe sarvaṃ duḥkhasya kāraṇam

85.13

divyādevyuvāca —
vipāko hi mahābhāga karmaṇāṃ mama sāṃpratam | iha tiṣṭhāmi duḥkhena vaidhavyena samanvitā

85.14

[ bhavānko hi mahābhāga kṛpayā mama pīḍitaḥ | pakṣirūpadharo bhadra susvaraṃ paribhāṣase

85.15

evamākarṇya tatsarvaṃ bhāṣitaṃ rājakanyayā | ahaṃ pakṣī mahābhāge na siddho nāpi jñānavān

85.16

rudamānāṃ mahālāpaistvāṃ dṛṣṭvā tu mayā iha | tadā pṛcchāmyahaṃ devi vada me kāraṇaṃ tviha]

85.17

piturgṛhe yathāvṛttamātmavṛttāntameva hi | tayā cā''veditaṃ sarvaṃ yathāsaṃkhyena duḥkhadam

85.18

tadākarṇya samāsena ujjvalo hi mahāmanāḥ | tāmuvāca mahāpakṣī divyādevīṃ suduḥkhitām

85.19

yathā tava vivāhe ca bhartāro maraṇaṃ gatāḥ | svayaṃvaranimittena kṣayaṃ gataṃ ca kṣatriyam

85.20

etatte ceṣṭitaṃ sarvaṃ mayā pitari bhāṣitam | anyajanmakṛtaṃ karma tava pāpaṃ sulocane

85.22

mama pitrā mamā sarvaṃ tvatkarma paribhāṣitam | [ tena doṣeṇa samyaktvaṃ liptā'si tu varānane 21
etāvatkāraṇaṃ sarvaṃ śukasya paripṛcchitam | pūrvaṃ karmavipākaṃ ca bhuṅkṣva tvaṃ ca svamāśu ca]

85.23

atha sā tadvacaḥ śrutvā nṛpakanyojjvalasya tu | pratyuvāca mahātmānaṃ bruvantaṃ pakṣiṇaṃ śubham

85.24

mānanīyo'si me pakṣinkṛpāṃ kuru mayi prabho | kathayasva prasādena tasya pāpasya niṣkṛtim

85.25

prāyaścittaṃ supuṇyaṃ ca mama pātakaśodhanam | yena prāpnomyahaṃ puṇyaṃ viśuddhāśeṣakilbiṣā
[†prāyaścittaṃ mahāprājña vadasva tvaṃ prasādataḥ ]

85.26

ujjvala uvāca —
tvadarthaṃ tu mahābhāge kuñjalaḥ pṛcchito mayā | samākhyātaṃ tu tenāpi prāyaścittamanuttamam

85.27

tatkuruṣva mahābhāge sarvapātakaśodhanam | dhyāyasva hi hṛṣīkeśaṃ śatanāmajapaṃ kuru

85.28

japayajñena vai devi kuru vratamanuttamam | aśūnyaśayanaṃ nāma mahāpātakaśodhanam

85.29

samācaṣṭe sa dharmātmā sarvajñānaprakāśakam | dhyānaṃ stotraṃ svarūpaṃ ca viṣṇoścaiva mahātmanaḥ

85.30

viṣṇuruvāca —
tasmātsā jagṛhe sarvaṃ saṃsthitā nirjane vane | sarvadvaṃdvavinirmuktā saṃjātā tapasi sthitā

85.31

[ vrataṃ cakre jitāhārā nirādhārā suduḥkhitā ] | kāmakrodhavihīnā ca vargaṃ saṃyamya nityaśaḥ
indriyāṇāṃ mahārāja mahāmohaṃ nirasya ca

85.32

abde caturthake prāpte suprasanno janārdanaḥ | tasyai saṃdarśayāmāsa svarūpaṃ varadaḥ prabhuḥ

85.33

sūta uvāca —
indranīlaghanaśyāmaṃ śaṅkhacakragadādharam | sarvābharaṇaśobhāḍhyaṃ padmahastaṃ maheśvaram

85.34

baddhāñjalipuṭā bhūtvā vepamānā nirāśrayā | uvāca gadgadairvākyairnānāma madhusūdanam

85.35

tejasā tava divyena dhyātuṃ śaknomi naiva hi | divyarūpo bhavānkastvaṃ tadvad kṛpayā prabho

85.36

[†kathayasva prasādena kimatra tava kāraṇam | sarvameva prasādena prabravīhi mahāmate

85.38

devameva vijānāmi tejasā iṅgitaistava | jñānahīnā jagannātha na jāne rūpanāmanī
kiṃ ca brahmā bhavānviṣṇuḥ kiṃ vā śaṃkara eva vā ||] 37
evamuktvā praṇamyaiva daṇḍavaddharaṇīṃ gatā | tāmuvāca jagannāthaḥ praṇatāṃ rājanandinīm

85.39

śrībhagavānuvāca —
trayāṇāmapi devānāmāntaraṃ nāsti śobhane | brahmā samaciṃto yena śaṃkaro vā varānane
tenāhamarcito nityaṃ nātra kāryā vicāraṇā̍

85.40

etau mamābhinnatarau nityaṃ cāpi trirūpavān | ahaṃ devi hṛṣīkeśaḥ kṛpayā tava cā''gataḥ

85.41

stavenānena puṇyena vratena niyamena ca | saṃjātā kalmaṣaihīṃnā varaṃ varaya śobhane

85.42

divyādevyuvāca —
jayājita hṛṣīkeśa kṛṣṇa kleśāpahāraka | namāmi te padadvaṃdvaṃ māmuddhara bhavārṇavāt̍

85.43

eṣa evāsti me kāmo varaṇīyaḥ prasīda me | tava pādau bhajiṣyāmi bhaktiṃ dehi mamānagha

85.44

darśayasva jagannātha mokṣamārgaṃ nirāmayam | dāsatvaṃ dehi vaikuṇṭhe yadi tuṣṭo janārdana

85.45

bhagavānuvāca —
evamastu mahābhāge nirdhūtāśeṣakilbiṣā | vaiṣṇavaṃ paramaṃ lokaṃ durlabhaṃ yogināṃ sadā

85.46

gaccha gaccha mahālokaṃ prasādānmama sāṃpratam | evamuktā mahābhāgā mādhavena mahātmanā

85.47

divyādevī babhūva divyā sūryatejaḥsamaprabhā | paśyatāṃ sarvalokānāṃ divyābharaṇabhūṣitā

85.48

divyamālānvitā sā caiṃ muktāhāravilambinī | gatā sā vaiṣṇavaṃ lokaṃ dāhapralayavarjitam

85.49

ujjvalastu samāyātaḥ svagṛhaṃ harṣasaṃyutaḥ | tatsarvaṃ kathayāmāsa pitaraṃ prati sattamaḥ

Linked texts (2)

Padmapurāṇa — Vyāsa, Sanskrit
Bhūmikhaṇḍa — Sanskrit