Bhukhanda 89
Bhūkhaṇḍa 89
- Language
- Sanskrit
Contents
- 89.35 — 1 part
89.1
kuñjala uvāca —
kālañjaraṃ samāsādya nivasanti suduḥkhitāḥ | mahāpāpaistu saṃdagdhā hāhābhūtā vicetanāḥ
89.2
tatra kaścitsamāyātaḥ siddharūpī dvijottamaḥ | tena pṛṣṭāḥ suduḥkhārtā bhavantaḥ kena duḥkhitāḥ
89.3
sa taiḥ prokto mahāprājñaḥ sarvajñānaviśāradaḥ | teṣāṃ jñātvā mahāpāpānkṛpāṃ cakre supuṇyabhāk
89.4
siddha uvāca —
amāsomasamāyoge prayāgaḥ puṣkarastathā | sarvatīrthastṛtīyastu vārāṇasī caturthikā
89.5
gacchathaiṣu ca vai yūyaṃ catvāraḥ pāpakāriṇaḥ | gaṅgāmbhasi yadā snātāstadā muktā bhaviṣyatha
pātakebhyo na saṃdeho nirmalatvaṃ gamiṣyatha
89.6
ādiṣṭāstena te sarve praṇemustaṃ prayatnataḥ | kālañjarāttato jagmuḥ satvaraṃ pāpapīḍitāḥ
89.7
vārāṇasīṃ samāsādya snātvā caiva dvijottama | prayāgaṃ puṣkaraṃ caiva sarvatīrthaṃ tu satvarāḥ
amāsomasamāyoge jagyuste pāpakṛttamāḥ
89.8
viduraścandraśarmā ca vedaśarmā tṛtīyakaḥ | goghno'tha vañjulaścaiva surāpaḥ pāpacetanaḥ
89.9
tasminparvaṇi saṃprāpte snātā gaṅgāmbhasi dvija | snānamātreṇa muktāstu govadhādyaistu kilbiṣaiḥ
89.10
brahmahatyāguruhatyāsurāpānādipātakaiḥ | liptāni tāni tīrthāni paribhramanti medinīm
89.11
puṣkaraḥ sarvatīrthaśca prayāgaḥ pāpanāśanaḥ | vārāṇasī caturthī tu liptā pāpairdvijottama
89.12
kṛṣṇatvaṃ pedire sarve haṃsarūpeṇa babhramuḥ | sarveṣveva sutīrtheṣu snānaṃ cakrurdvijottamāḥ
89.13
kṛṣṇatvaṃ mucyate naiva teṣāṃ pāpena cā''gatam | sutīrtheṣu mahārāja snātāḥ sarveṣu vai punaḥ
89.14
yadyattīrthaṃ prayāntyete sarve tīrthā dvijottama | haṃsarūpeṇa te yānti taiśca sārdhaṃ suduḥkhitāḥ
89.15
bhāryāḥ pātakarūpāśca bhramanti paritastathā | aṣṭaṣaṣṭiḥ sutīrthāni haṃsarūpeṇa babhramuḥ
89.16
taiśca sārdhaṃ mahārāja mahātīrthasamaṃ punaḥ | mānasaṃ ca gatāste ca pātakākulamānasāḥ
tatra snātā mahārāja na jahāti ca pātakam
89.17
lajjayā''viṣṭamanasā mānaso haṃsarūpadhṛk | saṃjātaḥ kṛṣṇakāyaśca yaṃ tvaṃ vai dṛṣṭavānpurā
89.18
revātīraṃ tato jagmustvatsārthaṃ pāpanāśanam | revāyāḥ saṃgame puṇye surasiddhaniṣevite
89.19
snānamātreṇa muktāste pāpebhyo dvijasattama | vihāya evaṃ taṃ varṇaṃ śuddhatvaṃ pratijagmire
89.20
yaṃ yaṃ tīrthaṃ prayāntyete gatvā snānaṃ pracakramuḥ| jahasustāḥ striyo dṛṣṭvā kṛṣṇatvaṃ naiva gacchati
89.21
toyānalena kubjāyāḥ pātakaṃ parameva ca | bhasmāvaśeṣaṃ saṃjātaṃ tadā mṛtāstu tāḥ striyaḥ
89.22
brahmahatyāguruhatyāsurāpānāgamāgamāḥ | bhasmabhūtāstu saṃjātā revayā kubjayā hatāḥ
89.23
tāstu hatā mahābhāga yā mṛtāstu sarittaṭe | aṣṭaṣaṣṭistu tīrthānāṃ (ni) haṃsarūpeṇaṃ babhramuḥ
89.24
sārdhaṃ haṃsaḥ samāyāto viddhi tvaṃ ttattu mānasam | kṛṣṇahaṃsāstu catvārasteṣāṃ nāmāni me śṛṇu
89.25
prayāgaḥ puṣkaraścaiva sarvatīrthastathaiva ca | vārāṇasī caturthī ca putra jātā'ghanāśanā
89.26
brahmahatyābhibhūtāśca babhramuḥ sarvato mahīm | tīrthānyetāni duḥkhena tīrtheṣu ca mahāmate
89.27
na gataṃ pātakaṃ ghoraṃ teṣāṃ ca bhramatāṃ suta | kubjāyāḥ saṃgame śuddhā vimuktāḥ kilbiṣātkila
89.28
tīrthānāmeva sarveṣāṃ puṇyānāmiha saṃmataḥ | rājā prayāgaḥ saṃjāta indrasya purataḥ kila
89.29
tāvadbhrājanti tīrthāni yāvadrevā na dṛśyate | tāvadbharjanti tīrthāni yāvadrevā na dṛśyate
89.30
brahmahatyādikānāṃ tu nāśane sā pratiṣṭhitā | kapilāsaṃgame puṇye revāyāḥ saṃgame tathā
89.31
meghanādasamāyoge tathā caivorusaṃgame | mahāpuṇyā mahādhanyā revā sarvatra durlabhā
89.32
sairvoṃkāre bhṛgukṣetre narmadā kubjasaṃgame | duṣprāpyā sā narai revā māhiṣmatyāṃ sutottama
89.33
viṭaṅkāsaṃgame puṇye kīṭake maṅgaleśvare | sarvatra durlabhā revā surapuṇyasamākulā
89.34
tīrthamātā mahādevī agharāśivināśinī | ubhayoḥ kūlayormadhye yatra tatra naraḥ sudhīḥ
aśvamedhaphalaṃ bhuṅkte snānenaikena mānavaḥ
89.35
etatte sarvamākhyātaṃ yattvayā paripṛcchitam | sarvapāpāpahaṃ puṇyaṃ gatidaṃ cāpi śṛṇvatām
89.35.p1
iti śrīmadbhāgapurāṇe pādme bhūmikhaṇḍe venopākhyāne gurutīrthe cyavanopākhyāne dvinavatitamo'dhyāyaḥ || 92
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit