Bhukhanda 9: atha navamo'dhyāyaḥ
Bhūkhaṇḍa 9
- Language
- Sanskrit
Contents
- 9.19 — 1 part
atha navamo'dhyāyaḥ
9.1
kaśyapa uvāca—
evaṃ saṃbodhitastatra hyātmā dhyānādikaistadā | moktukāmaḥ sa tatkāryaṃ pañcātmakaṃ subuddhimān
9.2
nimittāni prapaśyettu prārthitaṃ na prayāti saḥ | vihāya kāryaṃ nirlakṣaṃ patitaṃ naiva paśyati
9.3
sadaiva hitayornāsti saṃbandhaḥ prāṇadehayoḥ | dhanaputrakalatraiśca saṃbandhaḥ kena hetunā
9.4
evaṃ jñātvā śamaṃ gaccha klaibyaṃ mā gaccha supriye | ayameva paraṃ brahma hyayameva sanātanaḥ
9.5
ayamātmasvarūpeṇa daityadeveṣu saṃsthitaḥ | ayaṃ brahmā hyayaṃ rudro hyayaṃ viṣṇuḥ sanātanaḥ
9.6
ayaṃ sṛjati viśvāni hyayaṃ pālayate prajāḥ | saṃharatyeṣa dharmātmā dharmarūpo janārdanaḥ
9.7
anenotpāditā devā dānavāścaiva supriye | devāśca dharmasaṃyuktā dharmahīnāḥ sutāstava
9.8
dharmo'yaṃ mādhavasyāṅgaṃ sarvadaivaiśca pālitam | dharmaṃ ca cintayeddevi dharmaṃ caiva prapālayet
tasya viṣṇuḥ sa dharmātmā sarvadaiva prasādavān
9.9
dharmeṇa vartitā devāḥ satyena tapasā kila | yeṣāṃ viṣṇuḥ prasanno vai dharmastairiha pālitaḥ
9.10
viṣṇoḥ kauyamidaṃ dharmaḥ satyaṃ hṛdayameva ca | yastau pālayate nityaṃ tasya viṣṇuḥ prasīdati
9.11
dūṣayedyaḥ satyadharmau pāpameva prapālayet | tasya viṣṇuḥ prakupyeta nāśayedativīryavān
9.12
vaiṣṇavaiḥ pālitaṃ dharmaṃ tapaḥsatyenasaṃsthitaiḥ | teṣāṃ prasanno dharmātmā rakṣāmeva karoti ca
9.13
tava putrā danoḥ putrāḥ saiṃhikeyāstathaiva ca | adharmeṇāpi pāpena vartitāḥ pāpacetasaḥ
sūditā vāsudevena samare cakrapāṇinā
9.14
yo'sāvātmā mayā proktaḥ pūrvameva tavāgrataḥ | so'yaṃ viṣṇuna saṃdehodharmātmā sarvapālakaḥ
9.15
daityakāyeṣu yaḥ svasthaḥ pāpameva samāsthitaiḥ | jaghnivāndānavāndevi sa ca kruddho mahāmatiḥ
9.16
sa bāhyābhyantare bhūtvā tava putrā nipātitāḥ | yena cotpāditā devi tenaiva vinipātitāḥ
9.17
teṣāṃ moho na kartavyo bhavatyā vacanaṃ śṛṇu | pāpena vartate yo'sau sa evaṃ nidhanaṃ vrajet
9.18
tasmānmohaṃ parityajya sadā dharmaṃ samāśraya | evamastu mahābhāga kariṣye vacanaṃ tava
9.19
kaśyapaṃ ca muniśreṣṭhamevamābhāṣya duḥkhitā | saṃbodhitā sā muninā duḥkhaṃ saṃtyajya saṃsthitā
9.19.p1
iti śrīmahāpurāṇe pādme bhūmikhaṇḍe devāsuraprakaraṇe ditisaṃbodhanaṃ nāma navamo'dhyāyaḥ || 9
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit