Bhukhanda 90: atha trinavatitamo'dhyāyaḥ
Bhūkhaṇḍa 90
- Language
- Sanskrit
Contents
- 90.38 — 1 part
atha trinavatitamo'dhyāyaḥ
90.1
kuñjala uvāca—
kiṃ vijvala tvayā dṛṣṭamadbhutaṃ bhramatā mahīm | āścaryeṇa samāyuktaṃ tanme kathaya suvrata
90.2
itaḥ prayāsi yaṃ deśamāhārārthaṃ tu sāṃpratam | tatra dṛṣṭaṃ mamā''cakṣva citraṃ kautukameva vā
90.3
vijvala uvāca—
asti merugireḥ pṛṣṭha ānandaṃ nāma kānanam | divyavṛkṣaiḥ samākīrṇaṃ phalapuṣpamayaiḥ sadā
90.4
devavṛndaiḥ samākīrṇaṃ munisiddhasamanvitam | apsarobhiḥ surūpābhirgandharvaiḥ kiṃnarogaiḥ
90.5
vāpīkūpataḍāgaiśca nadīprasravaṇaistathā | ānandakānanaṃ puṇyaṃ divyabhāvaiḥ prabhāsate
90.6
vimānaiḥ koṭisaṃkhyābhirhaṃsakundendusaṃnibhaiḥ | gītakolāhalai ramyairmaighadhvaninināditam
90.7
ṣaṭpadānāṃ ninādaiśca sarvatra madhurāstate | candanaiśca suvṛkṣaiśca campakaiḥ puṣpitairvṛtam
90.8
nānāvṛkṣaiḥ prabhātyevamānandavanamuttamam | nānāpakṣininādaiśca vanaṃ kolāhalānvitam
90.9
evamānandakaṃ dṛṣṭaṃ mayā tatra suśobhanam | vimalaṃ ca sarastāta śobhate sāgaropamam
90.10
saṃpūrṇa puṇyatoyena padmasorgandhikaiḥ śubhaiḥ | jalajantusamāyuktaṃ haṃsakāraṇḍavānvitam
90.11
[ evamāsītsarastasya sumaddhye kānanasya hi | devagandharvasaṃbādhairmunibṛndairalaṃkṛtam]
90.12
[+kiṃnarogandhavaiścāraṇaiśca suśobhate | tatrā''ścaryaṃ mayā dṛṣṭaṃ tāta vaktuṃ na śakyate]
90.13
vimāne divyabhogāḍhye kalaśairupaśobhite | chatradaṇḍapatākābhī rājamāno'tha tatra hi
90.15
[ sarvabhogayutenā(taścā)pi gīyamāno'tha kiṃnaraiḥ | gandharvaiścāpsarobhiśca śobhamāno'tha suvrata]14
stūyamāno mahāsiddhairṛṣibhistattvavedibhiḥ | rūpeṇāpratimo loke na dṛṣṭastādṛśaḥ kvacit
90.16
sarvābharaṇaśobhāṅgo divyamālāvibhūṣitaḥ | mahāratnakṛtā mālā tasyorasi virājate
90.17
tatsamīpe sthitā caikā nārī dṛṣṭā varānanā | muktāhāraiḥ samāyuktā valayaiḥ kaṅkaṇairyutā
90.18
divyavastraparīdhānā candanādyanulepanā | stūyamānā gīyamānā puruṣeṇa sahā''sthitā
90.19
ratirūpā varārohā pīnaśroṇipayodharā | sarvābharaṇaśobhāṅgī tādṛśī rūpasaṃpadā
90.20
dvāvetau tu mayā dṛṣṭau vimānenāpi cā''gatau | rūpalāvaṇyamādhuryyasaṃyuktau hṛṣṭamānasau
90.21
samuttīryya vimānāttu gatau tau saraso'ntike | snātau tatra mahātmānau strīpuṃsau kamalekṣaṇau
90.22
pragṛhya tau mahāśastrau daṃpatī ca parasparam | tādṛśau ca śavau tatra patitau sarasastaṭe
90.23
[ prabhāsete tadā tau tu strīpuṃsau kamalekṣaṇau | rūpeṇāpi mahābhāga tādṛśāveva tau śavau
90.24
devarūpopamastāta yathāpūrvaṃ tathā punaḥ |] yathā rūpaṃ hi tasyāsti tādṛśaḥ sa ca dṛśyate
yādṛgrūpā ca sā nārī śavarūpā ca tādṛśī
90.25
strīśavasya ca yanmāṃsaṃ śastreṇotkīrya sā tataḥ | bhakṣate tasya māṃsāni raktāplutāni yāni ca
90.26
puruṣo bhakṣate tadvacchavamāṃsaṃ samāturaḥ | kṣudhayā pīḍyamānau tau bhakṣete piśitaṃ tayoḥ
90.27
yāvattṛptiṃ samāyātau tāvanmāṃsaṃ prabhakṣitam | sarasaśca jalaṃ pītvā saṃjātau sukhitau pitaḥ
kiyatkālaṃ sthitau tatra vimānena gatau punaḥ
90.28
anye dve ca striyau tāta mayā dṛṣṭe ca tatra vai | rūpasaubhāgyasaṃpanne te striyau cārulakṣaṇe
90.29
tābhyāṃ prabhakṣitaṃ māṃsaṃ yadā tāta mahāvane | sahasā te tadā te dve hāsyairaṭṭāṭṭakaiḥ punaḥ
bhakṣete ca svamāṃsāni dvāvetau parinityaśaḥ
90.30
kṛtvā snānādikaṃ māṃsaṃ paśyato mama tatra hi | anye striyau mahābhāga raudrākārasamanvite
90.31
daṃṣṭrākarālavadane tatraivātivibhīṣaṇe | ūcatuḥ khādamāne tu dehi dehīti vai punaḥ
90.32
evaṃ dṛṣṭaṃ mayā tāta āścaryaṃ sarasastaṭe | nityaṃmuttīrya tāvevaṃ te cāpyanye ca vai pitaḥ
kurvanti sadṛśīṃ ceṣṭāṃ pūrvoktāṃ mama paśyataḥ
90.33
bhavatā pṛcchitaṃ tāta yatkathāścaryameva ca | mayā proktaṃ tavāgre vai sarvasaṃdehakāraṇam
90.34
[+kathayasva prasādācca prīyamāṇena cetasā | vimānenā''gato yo'sau striyā sārdhaṃ dvijottama
90.35
divyarūpadharo yastu sa kastu kamalekṣaṇaḥ | kā ca nārī mahābhāga mahāmāṃsaṃ prabhakṣati
90.36
sa kaścāpyāgatastāta sā caivā''gatya bhakṣati | prahasete tadā te dve striyo tāta vadasva naḥ]
90.37
tau daṃpatī samācakṣva dve striyau cāpi tatpare | dehi dehīti vādinyau saṃśayaṃ chindhi suvrata
90.38
evaṃ pṛṣṭastṛtīyena vijvalenā''tmajena saḥ | provāca sarvaṃ vṛttāntaṃ cyavanasyāpi śṛṇvataḥ
90.38.p1
iti śrīmahāpurāṇe pādme bhūmikhaṇḍe venopākhyāne gurutīrthe trinavatitamo'dhyāyaḥ || 93
Linked texts (2)
- Padmapurāṇa — Vyāsa, Sanskrit
- Bhūmikhaṇḍa — Sanskrit