Bhukhanda 92: atha pañcanavatitamo'dhyāyaḥ
Bhūkhaṇḍa 92
- Language
- Sanskrit
Contents
- 92.31 — 1 part
atha pañcanavatitamo'dhyāyaḥ
92.1
subāhuruvāca—
svargasya me guṇānbrūhi sāṃprataṃ vai dvijottama | etatsarvaṃ dvijaśreṣṭha kariṣyāmi sabhādikam
92.2
jaiminiruvāca—
nandanādīni divyāni ramyāṇi vividhāni ca | tatrodyānāni puṇyāni sarvakāmapradāni ca
92.3
sarvakāmaphalairvṛkṣaiḥ śobhanāni samantataḥ | vimānāni sudivyāni sevitānyapsarogaṇaiḥ
92.4
sarvatraiva vicitrāṇi kāmagāni vaśāni ca | taruṇādityavarṇāni muktājālāntarāṇi ca
candramaṇḍalaśubhrāṇi hemaśayyāsanāni ca
92.5
sarvakāmasamṛddhāśca sarvaduḥkhavivarjitāḥ | narāḥ sukṛtinasteṣu vicaranti yathāsukham
92.6
na tatra nāstikā yānti na stenā nājitendriyāḥ | na nṛśaṃsā na piśunāḥ kṛtaghnā na ca māninaḥ
92.7
satyāśrayasthitāḥ śūrā dayāvantaḥ kṣamāparāḥ | yajvāno dānaśīlāśca tatra gacchanti mānavāḥ
92.8
na rogā na jarā mṛtyurna śoko na himātapau | na tatra kṣutpipāsā ca na glāniścāpi kasyacit
92.9
ete cānye ca bahavo guṇāḥ svargasya bhūpate | doṣāstatraiva ye santi tāñśṛṇuṣva ca bhūpate
92.10
śubhasya karmaṇaḥ kṛtsnaṃ phalaṃ tatraiva bhujyate | na cātra kriyate bhūpa doṣastatra mahānayam
92.11
asaṃtoṣaśca bhavati dṛṣṭvā'nyeṣāṃ parāṃ śriyam | sukhavyāptamanaskānāṃ sahasā patanaṃ tathā
92.12
iha yatkriyate karma phalaṃ tatraiva bhujyate | karmabhūmiriyaṃ rājanphalabhūmiśca sā smṛtā
92.13
subāhuruvāca—
mahāntastu ime doṣāstvayā svargasya kīrtitāḥ | nirdoṣāḥ śāśvatā ye'nye tāṃstvaṃ lokānvada dvija
92.14
jaiminiruvāca—
ābrahmasadnādeva doṣāḥ santi ca vai nṛpa | ata eva hi necchanti svargaprāptiṃ manīṣiṇaḥ
92.15
ā brahmasadnādūrdhvaṃ tadviṣṇoḥ paramaṃ padam | śubhaṃ sanātanaṃ jyotiḥ paraṃ brahmeti tadviduḥ
92.16
na tatra mūḍhā gacchanti puruṣā viṣayātmakāḥ | dambhalobhabhayakrodhadrohadveṣairabhidrutāḥ
92.17
nirmamā nirahaṃkārā nirdvandvāḥ saṃyatendriyāḥ | dhyānayogaratāścaiva tatra gacchanti sādhavaḥ
92.18
etattve sarvamākhyātaṃ yattvayā paripṛcchitam
92.19
kuñjala uvāca —
evaṃ svargaguṇānchrutvā subāhuḥ pṛthivīpatiḥ | tamuvāca mahātmānaṃ jaiminiṃ vadatāṃ varam
92.20
subāhuruvāca —
nāhaṃ svargaṃ gamiṣyāmi naiva icchāmyahaṃ mune | yasmācca patanaṃ proktaṃ na tatkarma karomyaham
92.21
dānamekaṃ mahābhāga nāhaṃ dāsye kadā dhruvam | dānasya phalalobhācca tasmātpāto na saṃśayaḥ
92.22
ityevamuktvā dharmātmā subāhuḥ pṛthivīpatiḥ | dhyānayogena deveśaṃ yajiṣye kamalāpriyam
dāhapralayasaṃvarjyaṃ viṣṇulokaṃ vrajāmyaham
92.23
jaiminiruvāca —
satyamuktaṃ tvayā bhūpa sarvaśreyaḥsamākulam | rājāno dānaśīlāśca mahāyajñairyajanti te
92.24
sarvadānāni dīyante yajñeṣu nṛpanandana | ādāvannaṃ suyajñeṣu vastraṃ tāmbūlameva ca
92.25
kāñcanaṃ bhūmidānaṃ ca godānaṃ pravadanti ca| suyajñairvaiṣṇavaṃ lokaṃ sukṛtena prayānti te
92.26
[ dānena tṛptimāyānti saṃtuṣṭāḥ santi bhūmipa | tapasvino mahātmāno nityameva vrajanti te]
92.27
subhikṣāṃ yācayitvā tu svasthānaṃ tu samāgatāḥ | bhikṣāprāptasya bhāgāni prakurvanti ca bhūpate
92.28
brāhmaṇāya vibhāgaikaṃ gogrāsaṃ tu mahāmate | pārśvavartina ekaṃ ye prayacchanti tapodhanāḥ
92.29
tasyānrasya pradānena phalaṃ bhuñjanti mānavāḥ | kṣudhātṛṣāvihīnāśca viṣṇulokaṃ vrajanti te
92.31
tasmāttvamapi rājendra dehi nyāyārjitaṃ dhanam | dānājjñānaṃ tataḥ prāpya jñānātsiddhiṃ ca yāsyasi
ya idaṃ śṛṇuyānmartyaḥ puṇyākhyānamanuttamam | vimuktaḥ sarvapāpebhyo viṣṇulokaṃ sa gacchati
92.31.p1
iti śrīmahāpurāṇe pādme bhūmikhaṇḍe venopākhyāne gurutīrthe pañcanavatitamo'dhyāyaḥ || 95
Linked texts (4)
- Padmapurāṇa — Vyāsa, Sanskrit
- Southern recension — Sanskrit
- Itihāsasamuccaya — Sanskrit
- Bhūmikhaṇḍa — Sanskrit