[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.12 # Brahmandapurana 1.12 Brahmāṇḍapurāṇa 1.12 - **Language:** Sanskrit ## Contents - [1.12.53](https://indike.org/pramana/in.purana.brahmanda.1.12.53) — 1 part ### [1.12.1](https://indike.org/pramana/in.purana.brahmanda.1.12.1) sūta uvāca yo 'sāvagne rabhimānī smṛtaḥ svāyaṃbhuve 'ntare / brahmaṇo mānasaḥ putrastasmātsvāhā vyajāyata // ### [1.12.2](https://indike.org/pramana/in.purana.brahmanda.1.12.2) pāvakaṃ pavamānaṃ ca śuciragniśca yaḥ smṛtaḥ / nirmathyaḥ pavamānastu vaidyutaḥ pāvakaḥ smṛtaḥ // ### [1.12.3](https://indike.org/pramana/in.purana.brahmanda.1.12.3) śuciḥ saurastu vijñeyaḥ svāhāputrāstu te trayaḥ / nirmathyaḥ pavamānastu śuciḥ saurastu yaḥ smṛtaḥ // ### [1.12.4](https://indike.org/pramana/in.purana.brahmanda.1.12.4) abyonirvaidyutaścaiva teṣāṃ sthānāni tāni vai / pavamānātmajaścaiva kavyavāhana ucyate // ### [1.12.5](https://indike.org/pramana/in.purana.brahmanda.1.12.5) pāvakiḥ saharakṣastu havyavāhaḥ śuceḥ sutaḥ / devānāṃ havyavāho 'gniḥ pitṝṇāṃ kavyavāhanaḥ // ### [1.12.6](https://indike.org/pramana/in.purana.brahmanda.1.12.6) saha rakṣo 'surāṇāṃ tu trayāṇāṃ tu trayo 'gnayaḥ / eteṣāṃ putrapautrāstu catvāriṃśanna vaiva tu // ### [1.12.7](https://indike.org/pramana/in.purana.brahmanda.1.12.7) vakṣyāmi nāmabhisteṣāṃ pravibhāgaṃ pṛthakpṛthak / viśrupto laukiko 'gnistu prathamo brahmaṇaḥ sutaḥ // ### [1.12.8](https://indike.org/pramana/in.purana.brahmanda.1.12.8) brahmo dattāgnisa tputro bharato nāma viśrutaḥ / vaiśvānaraḥ sutastasya vahan havyaṃ samāḥ śatam // ### [1.12.9](https://indike.org/pramana/in.purana.brahmanda.1.12.9) saṃbhṛto 'tharvaṇā pūrvamedhitiḥ puṣkarodadhau / sotharvā laukiko 'gnistu darpahātharvaṇaḥ smṛtaḥ // ### [1.12.10](https://indike.org/pramana/in.purana.brahmanda.1.12.10) atharvā tu bhṛgurjajñe hyagnirātharvaṇaḥ smṛtaḥ / tasmātsa laukiko 'gnistu dadhyaṅṅātharvaṇo mataḥ // ### [1.12.11](https://indike.org/pramana/in.purana.brahmanda.1.12.11) ātharvaḥ pavamānastu nirmathyaḥ kavibhiḥ smṛtaḥ / sa jñeyo gārhapatyo 'gnistasya putradvayaṃ smṛtam // ### [1.12.12](https://indike.org/pramana/in.purana.brahmanda.1.12.12) śaṃsyastvāha vanīyo 'gneḥ smṛto yo havyavāhanaḥ / dvitīyastu sutaḥ proktaḥ śuko 'gniryaḥ praṇīyate // ### [1.12.13](https://indike.org/pramana/in.purana.brahmanda.1.12.13) tathā savyāpasavyau ca śaṃsyasyāgneḥ sutāvubhau / śaṃsyastu ṣoḍaśa nadīścakame havyavāhanaḥ // ### [1.12.14](https://indike.org/pramana/in.purana.brahmanda.1.12.14) yo sāvāhavanīyo 'gnirabhimānī dvijaiḥ smṛtaḥ / kāverīṃ kṛṣṇaveṇāṃ ca narmadāṃ yamunāṃ tathā // ### [1.12.15](https://indike.org/pramana/in.purana.brahmanda.1.12.15) godāvarīṃ vitastāṃ ca candrabhāgāmirāvatīm / vipāśāṃ kauśikīñcaiva śatadrūṃ sarayūṃ tathā // ### [1.12.16](https://indike.org/pramana/in.purana.brahmanda.1.12.16) sītāṃ sarasvatīṃ caiva hrādinīṃ pāvanīntathā / tāsu ṣoḍaśadhāmānaṃ pravibhajya pṛthakpṛthak // ### [1.12.17](https://indike.org/pramana/in.purana.brahmanda.1.12.17) ātmānaṃ vyadadhāttāsu dhiṣṇīṣvatha babhūva saḥ / kṛttikācāriṇī dhiṣṇī jajñire tāśca dhiṣṇayaḥ // ### [1.12.18](https://indike.org/pramana/in.purana.brahmanda.1.12.18) dhiṣṇīṣu jajñire yasmād dhiṣṇayastena kīrttitāḥ / ityete vai nadīputrā dhiṣṇīṣvevaṃ vijajñire // ### [1.12.19](https://indike.org/pramana/in.purana.brahmanda.1.12.19) teṣāṃ viharaṇīyā ye upastheyāśca ye 'gnayaḥ / tāñśṛṇudhvaṃ samāsena kīrtyamānānyathātatham // ### [1.12.20](https://indike.org/pramana/in.purana.brahmanda.1.12.20) vibhuḥ pravāhaṇo gnīdhrastatrasthā dhiṣṇayo 'pare / vidhīyante yathāsthānaṃ sūtyāhe savane kramāt // ### [1.12.21](https://indike.org/pramana/in.purana.brahmanda.1.12.21) anuddeśya nivāsyānāmagnīnāṃ śṛṇuta kramam / samrāḍagni kṛśānuryo dvitīyoṃ'taravedikaḥ // ### [1.12.22](https://indike.org/pramana/in.purana.brahmanda.1.12.22) samrāḍagnamukhānaṣṭau upatiṣṭhanti tān dvijān / pariṣatpavamānastu dvitīya so 'nudiśyate // ### [1.12.23](https://indike.org/pramana/in.purana.brahmanda.1.12.23) pratalkānyo nabhonāma catvaresau vibhāvyate / havyastato hyasaṃmṛṣṭaḥ śāmitre 'gnau vibhāvyate // ### [1.12.24](https://indike.org/pramana/in.purana.brahmanda.1.12.24) ṛtudhāmā ca sujyotirauduṃbaryaḥ prakīrtyate / viśvavyacāḥ samudro 'gnirbrahmasthāne sa kīrtyate // ### [1.12.25](https://indike.org/pramana/in.purana.brahmanda.1.12.25) brahmajyotirvasurdhāmā brahmasthāne sa ucyate / acaukapādupastho yaḥ sa vai śālāsukhīyakaḥ // ### [1.12.26](https://indike.org/pramana/in.purana.brahmanda.1.12.26) anuheśyo hyahirbudhnyo so 'grirgṛhapatiḥ smṛtaḥ / śaṃsyasyaite sutāḥ sarve upastheyā dvijaiḥ smṛtāḥ // ### [1.12.27](https://indike.org/pramana/in.purana.brahmanda.1.12.27) tato viharaṇīyāṃśca vakṣyāmyaṣṭau ca tatsutān / vibhuḥ pravāhaṇo 'gnīdhrasteṣāṃ dhiṣṇyastathā pare // ### [1.12.28](https://indike.org/pramana/in.purana.brahmanda.1.12.28) vidhīyante yathāsthānaṃ sautye 'hni savane kramāt / hotrīyastu smṛte hyagnirvahniryo havyavāhanaḥ // ### [1.12.29](https://indike.org/pramana/in.purana.brahmanda.1.12.29) praśānto 'gniḥ pracetāstu dvitīyaścātra nāmakaḥ / tato 'gnirvaiśvadevastu brāhmaṇācchaṃsirucyate // ### [1.12.30](https://indike.org/pramana/in.purana.brahmanda.1.12.30) uśigagniḥ kaviryastu poto 'gniḥ sa vibhāvyate / āvāriragnirvābhārirvaiṣṭhīyaḥ sa vibhāvyate // ### [1.12.31](https://indike.org/pramana/in.purana.brahmanda.1.12.31) avasphūrjo vivasvāṃstu āsthāṃścaiva sa ucyate / aṣṭamaḥ sudhyuragniryomārjālīyaḥ sa ucyante // ### [1.12.32](https://indike.org/pramana/in.purana.brahmanda.1.12.32) dhiṣṇyāvāharaṇā hyete sautyehnījyanta vai dvijaiḥ / apāṃ yoniḥ smṛto 'sau sa hyapsunāmā vibhāvyate // ### [1.12.33](https://indike.org/pramana/in.purana.brahmanda.1.12.33) tato yaḥ pāvako nāmnā abjo yo garbha ucyate / agniḥ so 'vabhṛthe jñeyo varuṇena sahejyate // ### [1.12.34](https://indike.org/pramana/in.purana.brahmanda.1.12.34) tdṛcchayastatsuto hyagnirjaṭhare yo nṛṇāṃ pacan / mṛtyumāñ jāṭharasyāgnervidvānāgniḥ sutaḥ smṛtaḥ // ### [1.12.35](https://indike.org/pramana/in.purana.brahmanda.1.12.35) parasparotthitaḥ so 'gnirbhūtānīha vinirdahet / putrastvagnermanyumato ghoraḥ saṃvartakaḥ smṛtaḥ // ### [1.12.36](https://indike.org/pramana/in.purana.brahmanda.1.12.36) pibannavaḥ sa vasati samudre vaḍavāmukhaḥ / samudravāsinaḥ putraḥ sāharakṣo vibhāvyate // ### [1.12.37](https://indike.org/pramana/in.purana.brahmanda.1.12.37) saharakṣasutaḥ kṣāmo gṛhāṇāṃ dahate nṛṇām / kravyādagniḥ sutastasya puruṣānatti yo mṛtān // ### [1.12.38](https://indike.org/pramana/in.purana.brahmanda.1.12.38) ityete pāvakasyāgneḥ putrā eva prakīrttitāḥ / tataḥ śucistu vai sauro gandharvairāyurāhutaḥ // ### [1.12.39](https://indike.org/pramana/in.purana.brahmanda.1.12.39) mathito yastvaraṇyāṃ ca so 'gniragniṃ samindhati / āyurnāmnā tu bhagavānasau yastu praṇīyate // ### [1.12.40](https://indike.org/pramana/in.purana.brahmanda.1.12.40) āyuṣo mahiṣaḥ putraḥ sahaso nāma tatsutaḥ / pākayajñeṣvabhīmānī sognistu sahasaḥ smṛtaḥ // ### [1.12.41](https://indike.org/pramana/in.purana.brahmanda.1.12.41) putraśca sahasasyāgneradbhutaḥ sa mahāyaśāḥ / vividhiścādbhutasyāpi putro 'gnestumāhānsmṛtaḥ // ### [1.12.42](https://indike.org/pramana/in.purana.brahmanda.1.12.42) prāyaścitteṣvabhīmānī hutaṃ bhuṅkte haviḥ sadā / vividhestu suto hyarkka stasya cāgneḥ sutā ime // ### [1.12.43](https://indike.org/pramana/in.purana.brahmanda.1.12.43) anīkavān vājasṛk ca rakṣohā caṣṭikṛttathā / surabhirvasurannādo praviṣṭo yaḥ sa rukamarāṭ // ### [1.12.44](https://indike.org/pramana/in.purana.brahmanda.1.12.44) śuceragneḥ prajā hyeṣā vahnayaśca caturddaśa / ityete cāgnayaḥ proktāḥ praṇīyantedhvareṣu vai // ### [1.12.45](https://indike.org/pramana/in.purana.brahmanda.1.12.45) ādisarge vyatītā vai yāmaiḥ saha surottamaiḥ / svāyaṃbhuve 'ntare pūrvamagnayastebhimāninaḥ // ### [1.12.46](https://indike.org/pramana/in.purana.brahmanda.1.12.46) ete viharaṇīyeṣu cetanācetaneṣu vai / sthānābhimānino loke prāgāsanhavyavāhanāḥ // ### [1.12.47](https://indike.org/pramana/in.purana.brahmanda.1.12.47) kāmyanai mittikā yajñeṣvete karmasvavasthitāḥ / pūrvamanvataṃre 'tītāḥ śukairyāgaiśca taiḥ saha // ### [1.12.48](https://indike.org/pramana/in.purana.brahmanda.1.12.48) devairmahātmabhiḥ puṇyaiḥ prathamasyāntare manoḥ / ityetāni majoktāni sthānāni sthāninaśca ha // ### [1.12.49](https://indike.org/pramana/in.purana.brahmanda.1.12.49) taireva tu prasaṃkhyātamatītānāgateṣviha / sanvantareṣu sarveṣu lakṣaṇaṃ jātavedasām // ### [1.12.50](https://indike.org/pramana/in.purana.brahmanda.1.12.50) sarve tapasvino hyete sarve brahmabhṛtastathā / prajānāṃ patayaḥ sarve jyotiṣmantaśca te smṛtāḥ // ### [1.12.51](https://indike.org/pramana/in.purana.brahmanda.1.12.51) svārociṣādiṣu jñeyāḥ sāvarṇyaṃ teṣu saptasu / manvantareṣu sarveṣu nāmarūpaprayojanaiḥ // ### [1.12.52](https://indike.org/pramana/in.purana.brahmanda.1.12.52) varttante varttamānaiśca yāmaidevaiḥ sahāgnayaḥ / anāgataiḥ suraiḥ sārddhaṃ vartsyante 'nāgatāgnayaḥ // ### [1.12.53](https://indike.org/pramana/in.purana.brahmanda.1.12.53) ityeṣa nicayo 'gnīnāmanukrānto yathākramam / vistareṇānupurvyā ca pitṝṇāṃ vakṣyate punaḥ // ### [1.12.53.p1](https://indike.org/pramana/in.purana.brahmanda.1.12.53.p1) iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde agninicayo nāma dvādaśo 'dhyāyaḥ ## Linked texts (2) - [Vāyupurāṇa](https://indike.org/pramana/in.purana.vayu.1.29.2) — Vyāsa, Sanskrit - [Matsyapurāṇa](https://indike.org/pramana/in.purana.matsya.51.12) — Vyāsa, Sanskrit --- Source: [https://indike.org/pramana/in.purana.brahmanda.1.12](https://indike.org/pramana/in.purana.brahmanda.1.12) · Pramāṇa