Brahmandapurana 1.17
Brahmāṇḍapurāṇa 1.17
- Language
- Sanskrit
Contents
- 1.17.37 — 1 part
1.17.1
ṛṣaya ūcuḥ
yacca kiṃpuruṣaṃ varṣaṃ harivarṣaṃ tathaiva ca /
ācakṣva no yathātattvaṃ kīrttitaṃ bhārataṃ tvayā //
1.17.2
sūta uvāca
śuśrūṣā yatra vo viprāstacchṛṇudhvamatandritāḥ /
plakṣakhaṇḍaḥ kiṃpuruṣe sumahānnandanopamaḥ //
1.17.3
daśavarṣasahasrāṇi sthitiḥ kiṃpuruṣe smṛtā /
suvarṇavarṇāḥ puruṣāḥ striyaścāpsaraso pamāḥ //
1.17.4
anāmayā aśokāśca nityaṃ muditamānasāḥ /
jāyante mānavāstatra nistaptakanakaprabhāḥ //
1.17.5
varṣe kiṃpuruṣe puṇye vṛkṣo madhuvahaḥ śubhaḥ /
tasya kiṃpuruṣāḥ sarve 'piban hi rasamuttamam //
1.17.6
tataḥ paraṃ kiṃpuruṣo harivarṣaḥ pracakṣate /
mahārajatasaṃkāśā jāyante tatra mānavāḥ //
1.17.7
devalokacyutāḥ sarve devānūkāśca sarveśaḥ /
harivarṣe narāḥ sarve pibantīkṣurasaṃ śupham //
1.17.8
ekādaśa sahasrāṇi varṣāṇāṃ tu nirāmayāḥ /
harivarṣe tu jīvanti sarve muditamānasāḥ //
1.17.9
na jarā bādhate tatra na mriyante ca te 'cirāt /
madhyamaṃ yanmayā proktaṃ nāmnā varṣamilāvṛtam //
1.17.10
na tatra sūryastapati na tu jīryanti mānavāḥ /
candrasūryai sanakṣatrau na prakāśāvilā vṛte //
1.17.11
padmaprabhāḥ padbavarṇāstathā padbanibhekṣaṇāḥ /
padmapatrasugandhāśca jāyante tatra mānavāḥ //
1.17.12
jaṃbūphalarasāhārā aniṣyandāḥ sugandhinaḥ /
manasvino bhuktabhogāḥ satkarmaphalabhoginaḥ //
1.17.13
devalokacyatāścaiva mahārajatavāsasaḥ /
trayodaśasahasrāṇi varṣāṇāṃ te narottamāḥ //
1.17.14
āyuḥ pramāṇaṃ jīvanti ye tu varṣa ilāvṛte /
meroḥ pratidiśaṃ yacca navasāhasravistṛtam //
1.17.15
yojanānāṃ sahasrāṇi ṣaṭtriṃśattasya vistaraḥ /
yaturasraṃ samantācca śarāvākārasaṃsthitam //
1.17.16
meroḥ paścimabhāge tu navasāhasrasammite /
catustriṃśatsahasrāṇi gandhamādanaparvataḥ //
1.17.17
udagdakṣiṇataścaiva ānīlaniṣadhāyataḥ /
catvāriṃśatsahasrāṇi parivṛddho mahītalāt //
1.17.18
sahasramavagāḍhaśca tāvadeva ca vistṛtaḥ /
pūrveṇa mālyavāñchailastatpramāṇaḥ prakīrttitaḥ //
1.17.19
dakṣiṇena tu nīlaśca niṣadhaścottareṇa tu /
teṣāṃ madhye mahāmeruḥ svaiḥ pramāṇaiḥ pratiṣṭhitaḥ //
1.17.20
sarveṣāmeva śailānāmavagāḍho yathā bhavet /
vistarastatpramāṇaḥ syādāyāmo niyutaṃ smṛtaḥ //
1.17.21
vṛttabhāvāssamudrasya mahīmaṇḍalabhāvataḥ /
āyāmāḥ parihīyante caturasrasamāḥ smṛtāḥ //
1.17.22
ilāvṛtaṃ catuṣkoṇaṃ bhindantī madhyabhāgataḥ /
prabhinnāñjanasaṃkāśā jambūrasavatī nadī //
1.17.23
merostu dakṣiṇe pārśve niṣadhasyottareṇa ca /
sudarśano nāma mahāñjambūvṛkṣaḥ sanātanaḥ //
1.17.24
nityapuṣpaphalopetaḥ siddhacāraṇasevitaḥ /
tasya nāmnā samā khyāto jambūdvīpo vanaspateḥ //
1.17.25
yojanānāṃ sahasraṃ ca śataṃ cānyanmahātmanaḥ /
utsedho vṛkṣarājasya divaṃ spṛśati sarvataḥ //
1.17.26
aratnīnāṃ śatānyaṣṭāvekaṣaṣṭyadhikāni tu /
phalapramāṇaṃ saṃkhyātamṛṣibhistattvadarśibhiḥ //
1.17.27
patamānāni tānyurvyāṃ kurvanti vipulaṃ svanam /
tasyā jambvāḥ phalaraso nadī bhūtvā prasarppati //
1.17.28
meruṃ pradakṣiṇaṃ kṛtvā jambūmūlaṃ viśatyadhaḥ /
taṃ pibanti sadā tdṛṣṭā jaṃbūrasamilāvṛte //
1.17.29
jaṃbūphalarase pīte na jarā bādhate tu tān /
na kṣudhā na śramaścāpi na mṛtyurna ca tandri tam //
1.17.30
tatra jāṃbūnadaṃ nāma kanakaṃ devabhūṣamam /
indragopakasaṃkāśaṃ jāyate bhāsvaraṃ tu tat //
1.17.31
sarveṣāṃ varṣavṛkṣāṇāṃ śubhaḥ phalarasaḥ stutaḥ /
skannaṃ bhavati tacchubhraṃ kanakaṃ devabhūṣaṇam //
1.17.32
teṣāṃ mūtraṃ purīṣaṃ ca dikṣu sarvāsu sarvaśaḥ /
īśvarānugrahādbhūmirmṛtāśca grasate tu tān //
1.17.33
rakṣaḥpiśācayakṣāśca sarve haimavataḥ smṛtāḥ /
hemakūṭe tu gandharvā vijñeyāḥ sāpsarogaṇāḥ //
1.17.34
sarve nāgastu niṣadhe śeṣavāsukitakṣakāḥ /
mahāmerau trayastriṃśatkrīḍante yajñiyāḥ surāḥ //
1.17.35
nīle tu vaidūryamaye siddhā brahmarṣayo 'malāḥ /
daityānāṃ dānavānāṃ car śvetaḥ parvata ucyate //
1.17.36
śṛṅgavānparvataśreṣṭhaḥ pitṝṇāṃ pratisaṃcaraḥ /
navasveteṣu varṣeṣu yathābhāgaṃ sthiteṣu vai //
1.17.37
bhūtānyupaniviṣṭāni gatimanti dhruvāṇi ca /
teṣāṃ vivṛddhirbahudhā dṛśyate divyamānuṣī /
na saṃkhyā parisaṃkhyātuṃ śraddheyā tu bubhūṣatām //
1.17.37.p1
iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde kiṃpuruṣādivarṣavarṇanaṃ nāma saptadaśo 'dhyāyaḥ
Linked texts (6)
- Vāyupurāṇa — Vyāsa, Sanskrit
- Matsyapurāṇa — Vyāsa, Sanskrit
- Critical edition (BORI) — Sanskrit
- Liṅgapurāṇa — Vyāsa, Sanskrit
- Mārkaṇḍeyapurāṇa — Vyāsa, Sanskrit
- Liṅgapurāṇa — Ativīrarāma Pāṇṭiyar 1500, Sanskrit