[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.19 # Brahmandapurana 1.19 Brahmāṇḍapurāṇa 1.19 - **Language:** Sanskrit ## Contents - [1.19.197](https://indike.org/pramana/in.purana.brahmanda.1.19.197) — 1 part ### [1.19.1](https://indike.org/pramana/in.purana.brahmanda.1.19.1) sūta uvāca plakṣadvīpaṃ pravakṣyāmi yathāvadiha saṃgrahāt / śṛṇutemaṃ yathātattvaṃ bruvato me dvijottamāḥ // ### [1.19.2](https://indike.org/pramana/in.purana.brahmanda.1.19.2) jaṃbūdvīpasya vistārāddviguṇāstasya vistaraḥ / vistarāddviguṇaścāsya pariṇāhaḥ samantataḥ // ### [1.19.3](https://indike.org/pramana/in.purana.brahmanda.1.19.3) tenāvṛtaḥ samudro vai dvīpena lavaṇodakaḥ / tatra puṇyā janapadāścirānna mriyate janaḥ // ### [1.19.4](https://indike.org/pramana/in.purana.brahmanda.1.19.4) kṛta eva ca durbhikṣaṃ jarāvyādhibhayaṃ kutaḥ / tatrāpi parvatāḥ puṇyāḥ saptaiva maṇibhūṣaṇāḥ // ### [1.19.5](https://indike.org/pramana/in.purana.brahmanda.1.19.5) ratnākarāstathā nadyastāsāṃ nāmāni ca buve / blakṣadvīpādiṣu tveṣu sapta sapta tu pañcasu // ### [1.19.6](https://indike.org/pramana/in.purana.brahmanda.1.19.6) ṛjvāyatāḥ pratidiśaṃ niviṣṭā varṣaparvatāḥ / plakṣadvīpe tu vakṣyāmi saptadvīpān mahā balān // ### [1.19.7](https://indike.org/pramana/in.purana.brahmanda.1.19.7) gomedako 'tra prathamaḥ parvato meghasannibhaḥ / khyāyate yasya nāmnā tu varṣaṃ gomedasaṃjñitam // ### [1.19.8](https://indike.org/pramana/in.purana.brahmanda.1.19.8) dvitīyaḥ parvataścandraḥ sarvauṃṣa dhisamanvitaḥ / aśvibhyāmamṛtasyārthamoṣadhyo yatra saṃbhṛtāḥ // ### [1.19.9](https://indike.org/pramana/in.purana.brahmanda.1.19.9) tṛtīyo nārado nāma durgaśailo mahoccayaḥ / tatrācale samutpannau pūrvaṃ nāradaparvatau // ### [1.19.10](https://indike.org/pramana/in.purana.brahmanda.1.19.10) caturthastatra vai śailo duduṃbhirnnāma nāmataḥ / chandamṛtyuḥ purā tasmindundubhiḥ sāditaḥ suraiḥ // ### [1.19.11](https://indike.org/pramana/in.purana.brahmanda.1.19.11) rajjudolorukāmaṃ yaḥ śālmaliścāsurāntakṛt / pañcamaḥ somako nāma devairyatrāmṛtaṃ purā // ### [1.19.12](https://indike.org/pramana/in.purana.brahmanda.1.19.12) saṃbhṛtaṃ cāhṛtaṃ caiva māturarthe garutmatā / ṣaṣṭastu sumanā nāma saptamarṣabha ucyate // ### [1.19.13](https://indike.org/pramana/in.purana.brahmanda.1.19.13) hiraṇyakṣo varāheṇa tasmiñchaile niṣūditaḥ / vaibhrājaḥ saptamastatra bhrājiṣṇuḥ sphāṭiko mahān // ### [1.19.14](https://indike.org/pramana/in.purana.brahmanda.1.19.14) arcirbhirbhrājate yasmādvaibhrājastena saṃsmṛtaḥ / teṣāṃ varṣāṇi vakṣyāmi nāmatastu yathākramam // ### [1.19.15](https://indike.org/pramana/in.purana.brahmanda.1.19.15) gomedaṃ prathamaṃ varṣaṃ nāmnāśāntabhayaṃ smṛtam / candrasya śiśiraṃ nāma nāradasya sukhodayam // ### [1.19.16](https://indike.org/pramana/in.purana.brahmanda.1.19.16) ānandaṃ dundubhervarṣaṃ somakasyaśivaṃ smṛtam / kṣemakaṃ vṛṣabhasyāpi vaibhrājasya dhruvaṃ tathā // ### [1.19.17](https://indike.org/pramana/in.purana.brahmanda.1.19.17) eteṣu devagandharvāḥ siddhāśca saha cāraṇaiḥ / viharanti ramante ca dṛśyamānāśca taiḥ saha // ### [1.19.18](https://indike.org/pramana/in.purana.brahmanda.1.19.18) teṣāṃ nadyastu saptaiva prativarṣaṃ samudragāḥ / nāmatastāḥ pravakṣyāmi saptagaṅgāstapodhanāḥ // ### [1.19.19](https://indike.org/pramana/in.purana.brahmanda.1.19.19) anutaptāsukhī caiva vipāśā tridivā kramuḥ / amṛtā sukṛtā caiva saptaitāḥ saritāṃ varāḥ // ### [1.19.20](https://indike.org/pramana/in.purana.brahmanda.1.19.20) abhigacchanti tā nadyastābhyaścānyāḥ sahasraśaḥ / bahūdakā hyoghavatyo yato varṣati vāsavaḥ // ### [1.19.21](https://indike.org/pramana/in.purana.brahmanda.1.19.21) tāḥ pibanti sadā hṛṣṭā nadījanapadāstu te / śubhāḥ śāntabhayāścaiva pramudaṃ śaiśirāḥ śivāḥ // ### [1.19.22](https://indike.org/pramana/in.purana.brahmanda.1.19.22) ānandāśca sukhāścaiva kṣemakāśca dhruvaiḥ saha / varṇāśramācārayutā prajāsteṣvavadhiṣṭhitāḥ // ### [1.19.23](https://indike.org/pramana/in.purana.brahmanda.1.19.23) sarve tvarogāḥ subalāḥ prajāścāmayava rjitāḥ / avasarpiṇī na teṣvasti tathaivotsarpiṇī na ca // ### [1.19.24](https://indike.org/pramana/in.purana.brahmanda.1.19.24) na tatrāsti yugāvasthā caturyugakṛtā kvacit / tretāyugasamaḥ kālaḥ sarvadā tatra varttate // ### [1.19.25](https://indike.org/pramana/in.purana.brahmanda.1.19.25) plakṣadvīpādiṣu jñeyaḥ pañcasveteṣu sarvaśaḥ / deśasyānuvidhānena kālasyānuvidhāḥ smṛtāḥ // ### [1.19.26](https://indike.org/pramana/in.purana.brahmanda.1.19.26) pañcavarṣasahasrāṇi teṣu jīvanti mānavāḥ / surūpāśca suveṣāśca hyarogā balinastathā // ### [1.19.27](https://indike.org/pramana/in.purana.brahmanda.1.19.27) sukhamāyurbalaṃ rupamārogyaṃ dharma eva ca / plakṣadvīpādiṣu jñeyaḥ śākadvīpāntikeṣu vai // ### [1.19.28](https://indike.org/pramana/in.purana.brahmanda.1.19.28) prakṣadvīpaḥ pṛthuḥ śrīmānsarvato dhanadhānyavān / divyauṣadhiphalopetaḥ sarvauṃṣadhivanaspatiḥ // ### [1.19.29](https://indike.org/pramana/in.purana.brahmanda.1.19.29) āvṛtaḥ paśubhiḥ sarvairgrāmyāraṇyaiḥ sahasraśaḥ / jaṃbūvṛkṣema saṃkhyātastasya madhye dvijottamāḥ // ### [1.19.30](https://indike.org/pramana/in.purana.brahmanda.1.19.30) plakṣo nāma mahāvṛkṣastasya nāmnā sa ucyate / sa tatra pūjyate sthāne madhye janapadasya ha // ### [1.19.31](https://indike.org/pramana/in.purana.brahmanda.1.19.31) sa cāpīkṣurasodena prakṣadvīpaḥ samāvṛtaḥ / plakṣadvīpasamenaiva vaipulyadvistareṇa tu // ### [1.19.32](https://indike.org/pramana/in.purana.brahmanda.1.19.32) ityevaṃ saṃniveśo vaḥ plakṣadvīpasya kīrtitaḥ / ānupūrvyātsamāsena śālmalaṃ tu nibodhata // ### [1.19.33](https://indike.org/pramana/in.purana.brahmanda.1.19.33) tatastṛtīyaṃ vakṣyāmi śālmalaṃ dvīpasuttamam / śālmalena samudrastu dvīpenekṣurasodakaḥ // ### [1.19.34](https://indike.org/pramana/in.purana.brahmanda.1.19.34) plakṣadvīpasya vistārāddviguṇena samāvṛtaḥ / tatrāpi parvatāḥ sapta vijñeyā ratnayonayaḥ // ### [1.19.35](https://indike.org/pramana/in.purana.brahmanda.1.19.35) ratnākarāstathā nadyasteṣāṃ varṣeṣu saptasu / prathamaḥ sūryasaṃkāśaḥ kumudo nāma parvataḥ // ### [1.19.36](https://indike.org/pramana/in.purana.brahmanda.1.19.36) sarvadhātumayaiḥ śṛṅgaiḥ śilājālasamākulaiḥ / dvitīyaḥ parvataścātra hyuttamo nāma viśrutaḥ // ### [1.19.37](https://indike.org/pramana/in.purana.brahmanda.1.19.37) haritālamayaiḥ śṛṅgairdivamāvṛtya tiṣṭhati / tṛtiyaḥ parvatastatra balāhaka iti śrutaḥ // ### [1.19.38](https://indike.org/pramana/in.purana.brahmanda.1.19.38) jātyañjanamayaiḥ śṛṅgairdivamāvṛtya tiṣṭhati / caturthaḥ parvato droṇo yatra sā vai sahoṣadhiḥ // ### [1.19.39](https://indike.org/pramana/in.purana.brahmanda.1.19.39) viśalyakaraṇī caiva mṛtasañjīvinī tathā / kaṅkastu pañcamastatra parvataḥ sumahodayaḥ // ### [1.19.40](https://indike.org/pramana/in.purana.brahmanda.1.19.40) nityapuṣpaphalopeto vṛkṣavīrutsamāvṛtaḥ / ṣaṣṭhastu parvatastatra mahiṣo meghasannibhaḥ // ### [1.19.41](https://indike.org/pramana/in.purana.brahmanda.1.19.41) yasminso 'gnirnivasati mahiṣo nāma vārijaḥ / saptamaḥ parvatastatra kakudmānnāma bhāṣyate // ### [1.19.42](https://indike.org/pramana/in.purana.brahmanda.1.19.42) tatra ratnānyanekāni svayaṃ rakṣati vāsavaḥ / prajāpatimupādāya prajābhyo vidhivatsvayam // ### [1.19.43](https://indike.org/pramana/in.purana.brahmanda.1.19.43) ityete parvatāḥ sapta śālmale maṇibhūṣaṇāḥ / teṣāṃ varṣāṇi vakṣyāmi sarpaiva tu śubhāni vai // ### [1.19.44](https://indike.org/pramana/in.purana.brahmanda.1.19.44) kumudasya smṛtaṃ śvetamuttamasya ca lohitam / balāhakasya jīmūtaṃ droṇasya haritaṃ smṛtam // ### [1.19.45](https://indike.org/pramana/in.purana.brahmanda.1.19.45) kaṅkasya vaidyutaṃ nāma mahiṣasya ca mānasam / kakudaḥ supradaṃ nāma saptaitāni tu saptadhā // ### [1.19.46](https://indike.org/pramana/in.purana.brahmanda.1.19.46) varṣāṇi parvatāścaiva nadīsteṣu nibodhata / jyotiḥ śāntistathā tuṣṭā candrā śukrā vimocanī // ### [1.19.47](https://indike.org/pramana/in.purana.brahmanda.1.19.47) nivṛttiḥ saptamī tāsāṃ prativarṣaṃ tu tāḥ smṛtāḥ / tāsāṃ samīpagāścānyāḥ śataśo 'tha sahasraśaḥ // ### [1.19.48](https://indike.org/pramana/in.purana.brahmanda.1.19.48) na saṃkhyāṃ parisaṃkhyātuṃ śaknuyātko 'pi mānavaḥ / ityeṣa saṃniveśo vaḥ śālmalasya prakīrttitaḥ // ### [1.19.49](https://indike.org/pramana/in.purana.brahmanda.1.19.49) plakṣavṛkṣeṇa saṃkhyātastasya madhye mahā drumaḥ / śālmalirvipulaskandhastasya nāmnā sa ucyate // ### [1.19.50](https://indike.org/pramana/in.purana.brahmanda.1.19.50) śālmalastu samudreṇa surodena samāvṛtaḥ / vistarācchālmalasvaiva same na tu samantataḥ // ### [1.19.51](https://indike.org/pramana/in.purana.brahmanda.1.19.51) uttareṣu tu dharmajñādvīpeṣu śṛṇuta prajāḥ / yathāśrutaṃ yathānyāyaṃ bruvato me nibodhata // ### [1.19.52](https://indike.org/pramana/in.purana.brahmanda.1.19.52) kuśadvīpaṃ pravakṣyāmi caturthaṃ tu samāsataḥ / surodakaḥ parivṛtaḥ kuśadvīpena sarvataḥ // ### [1.19.53](https://indike.org/pramana/in.purana.brahmanda.1.19.53) śālmalasya tu vistārāddviguṇena samantataḥ / saptaiva ca girīṃstatra varṇyamānānnibodhata // ### [1.19.54](https://indike.org/pramana/in.purana.brahmanda.1.19.54) kuśadvīpe tu vijñeyaḥ parvato vidrumaśca yaḥ / dvīpasya prathamastasya dvitīyo hemaparvataḥ // ### [1.19.55](https://indike.org/pramana/in.purana.brahmanda.1.19.55) tṛtīyo dyutimānnāma jīmūtasadṛśo giriḥ / caturthaḥ puṣpavānnāma pañcamastu kuśeśayaḥ // ### [1.19.56](https://indike.org/pramana/in.purana.brahmanda.1.19.56) ṣaṣṭho harigirirnāma saptamo mandaraḥ smṛtaḥ / mandā iti hyapā nāma mandaro dāraṇādayam // ### [1.19.57](https://indike.org/pramana/in.purana.brahmanda.1.19.57) teṣāmantaraviṣakaṃbho dviguṇaḥ pravibhāgataḥ / udbhidaṃ prathamaṃ varṣaṃ dvitīyaṃ veṇumaṇḍalam // ### [1.19.58](https://indike.org/pramana/in.purana.brahmanda.1.19.58) tṛtīyaṃ vai rathākāraṃ caturthaṃ lavaṇaṃ samṛtam / pañcamaṃ dhṛtimadvarṣaṃ ṣaṣṭhaṃ varṣaṃ prabhākaram // ### [1.19.59](https://indike.org/pramana/in.purana.brahmanda.1.19.59) saptamaṃ kapilaṃ nāma sarve te varṣa bhāvakāḥ / eteṣu devagandharvāḥ prajāstu jagadīśvarāḥ // ### [1.19.60](https://indike.org/pramana/in.purana.brahmanda.1.19.60) viharanti ramante ca hṛṣyamāṇāstu sarvaśaḥ / na teṣu dasyavaḥ saṃti mleccha jātaya eva ca // ### [1.19.61](https://indike.org/pramana/in.purana.brahmanda.1.19.61) gauraprāyo janaḥ sarvaḥ kramācca mriyate tathā / tatrāpi nadyaḥ saptaiva dhūtapāpāśivā tathā // ### [1.19.62](https://indike.org/pramana/in.purana.brahmanda.1.19.62) pavitrā saṃtatiścaiva vidyuddaṃbhā mahī tathā / anyāstābhyo 'parijñātāḥ śataśo 'tha sahasraśaḥ // ### [1.19.63](https://indike.org/pramana/in.purana.brahmanda.1.19.63) abhigacchanti tāḥ sarvā yato varṣati vāsavaḥ / ghṛtodena kuśadvīpo bāhyataḥ parivāritaḥ // ### [1.19.64](https://indike.org/pramana/in.purana.brahmanda.1.19.64) vijñeyaḥ sa tu vistārātkuśadvīpasamena tu / ityeṣa sanniveśo vaḥ kuśadvīpasya kīrttitaḥ // ### [1.19.65](https://indike.org/pramana/in.purana.brahmanda.1.19.65) kraiñcadvīpasya vistāraṃ vakṣyāmyahamataḥ param / kuśadvīpasya vistārāddviguṇaḥ sa tu vai smṛtaḥ // ### [1.19.66](https://indike.org/pramana/in.purana.brahmanda.1.19.66) ghṛtodakasamudro vai kraiñca dvīpena saṃyutaḥ / tasmindvīpe nagaśreṣṭhaḥ kraiñcastu prathamo giriḥ // ### [1.19.67](https://indike.org/pramana/in.purana.brahmanda.1.19.67) kraiñcātparo vāmanako vāmanādandhakārakaḥ / andhakārātparaścāpi divāvṛnnāma parvataḥ // ### [1.19.68](https://indike.org/pramana/in.purana.brahmanda.1.19.68) divāvṛtaḥ paraścāpi dvivido girisattamaḥ / dvividātparataścāpi puṇḍarīko mahāgiriḥ // ### [1.19.69](https://indike.org/pramana/in.purana.brahmanda.1.19.69) puṇḍarīkātparaścāpi procyate dundubhisvanaḥ / ete ratnamayāḥ sapta kraiñcadvīpasya parvatāḥ // ### [1.19.70](https://indike.org/pramana/in.purana.brahmanda.1.19.70) bahupuṣpaphalopetanānāvṛkṣalatāvṛtāḥ / paraspareṇa dviguṇā vistṛtā harṣavarddhanāḥ // ### [1.19.71](https://indike.org/pramana/in.purana.brahmanda.1.19.71) varṣāṇi tatra vakṣyāmi nāmatastānnibodhata / kraiñcasya kuśalo deśo vāmanasya manonugaḥ // ### [1.19.72](https://indike.org/pramana/in.purana.brahmanda.1.19.72) manonugātparaścoṣṇastṛtīyaṃ varṣamucyate / uṣṇātparaḥ pīvarakaḥ pīvarādandhakārakaḥ // ### [1.19.73](https://indike.org/pramana/in.purana.brahmanda.1.19.73) andhakārātparaścāpi munideśaḥ smṛto budhaiḥ / munideśātparaścaiva procyate dundubhisvanaḥ // ### [1.19.74](https://indike.org/pramana/in.purana.brahmanda.1.19.74) siddhacāraṇasaṃkīrṇo gauraprayo janaḥ smataḥ / tatrāpi nadyaḥ saptaiva prativarṣa smṛtāḥ śubhāḥ // ### [1.19.75](https://indike.org/pramana/in.purana.brahmanda.1.19.75) gaurī kumudvatī caiva saṃdhyā rātrirmanojavā / khyātiśca puṇḍarīkā ca gaṅgāḥ saptavidhāḥ smṛtāḥ // ### [1.19.76](https://indike.org/pramana/in.purana.brahmanda.1.19.76) tāsāṃ sahasraśaścānyā nadyo yāstu samīpagāḥ / abhigacchanti tāḥ sarvā vipulāḥ subahūdakāḥ // ### [1.19.77](https://indike.org/pramana/in.purana.brahmanda.1.19.77) kraiñcadvīpaḥ samudreṇa dadhimaṇḍaudakena tu / āvṛtaḥ sarvataḥ śrīmānkraiñcadvīpasamena tu // ### [1.19.78](https://indike.org/pramana/in.purana.brahmanda.1.19.78) plakṣadvīpādayo hyete samāsena prakīrttitāḥ / teṣāṃ nisargodvīpānāmānupūrvyeṇa sarvaśaḥ // ### [1.19.79](https://indike.org/pramana/in.purana.brahmanda.1.19.79) na śakyo vistarādvaktuṃ divyavarṣaśatairapi / nisargo yaḥ prajānāṃ tu saṃhāro yaśca tāsu vai // ### [1.19.80](https://indike.org/pramana/in.purana.brahmanda.1.19.80) śākadvīpaṃ pravakṣyāmi yathāvadiha niścayāt / śṛṇudhvaṃ tu yathātathyaṃ bruvato me yathārthavat // ### [1.19.81](https://indike.org/pramana/in.purana.brahmanda.1.19.81) kraiñcadvīpasya vistārāddviguṇāstasya vistaraḥ / parivārya samudraṃ sa dadhimaṇḍodakaṃ sthitaḥ // ### [1.19.82](https://indike.org/pramana/in.purana.brahmanda.1.19.82) tatra puṇyā janapadāścirāttu mriyate janaḥ / kuta eva ca durbhikṣaṃ jarāvyādhibhayaṃ kutaḥ // ### [1.19.83](https://indike.org/pramana/in.purana.brahmanda.1.19.83) tatrāpi parvatāḥ śabhrāḥ saptaiva maṇibhūṣaṇāḥ / ratnākarāstathā nadyasteṣāṃ nāmāni me śṛṇu // ### [1.19.84](https://indike.org/pramana/in.purana.brahmanda.1.19.84) devarṣigandharvayutaḥ prathamo merurucyate / prāgāyataḥ sa sauvarṇo hyudayo nāma parvataḥ // ### [1.19.85](https://indike.org/pramana/in.purana.brahmanda.1.19.85) vṛṣṭyarthaṃ jaladāstatra prabhaṃvati ca yānti ca / tasyāpareṇa sumahāñjaladhāro mahāgiriḥ // ### [1.19.86](https://indike.org/pramana/in.purana.brahmanda.1.19.86) yato nityamupādatte vāsavaḥ paramaṃ jalam / tato varṣaṃ prabhavati varṣākāle prajāsviha // ### [1.19.87](https://indike.org/pramana/in.purana.brahmanda.1.19.87) tasyottare raivatako yatra nityaṃ pratiṣṭhitam / revatī divi nakṣatraṃ pitāmahakṛto vidhiḥ // ### [1.19.88](https://indike.org/pramana/in.purana.brahmanda.1.19.88) tasyāpareṇa sumahān śyāmo nāma mahāgiriḥ / tasmācchyāmatvamāpannāḥ prajāḥ pūrvamimāḥ kila // ### [1.19.89](https://indike.org/pramana/in.purana.brahmanda.1.19.89) tasyāpareṇa sumahānnājato 'stagiriḥ smṛtaḥ / tasyāpare cāṃbikeyo durgaśailo mahāgiriḥ // ### [1.19.90](https://indike.org/pramana/in.purana.brahmanda.1.19.90) aṃbikeyātparo ramyaḥ sarvauṃṣadhisamanvitaḥ / kesarī kesarayuto yato vāyuḥ prajāpatiḥ // ### [1.19.91](https://indike.org/pramana/in.purana.brahmanda.1.19.91) udayātprathamaṃ varṣaṃ mahāttajjaladaṃ smṛtam / dvitīyaṃ jaladhārasya sukumāramiti smṛtam // ### [1.19.92](https://indike.org/pramana/in.purana.brahmanda.1.19.92) raivatasya tu kaumāraṃ śyāmasya ca maṇīvakam / astasyāpi śubhaṃ varṣaṃ vijñeyaṃ kusumottaram // ### [1.19.93](https://indike.org/pramana/in.purana.brahmanda.1.19.93) ambikeyasya modākaṃ kesarasya mahādrumam / dvīpasya parimāṇaṃ tu hrasvadīrghatvameva ca // ### [1.19.94](https://indike.org/pramana/in.purana.brahmanda.1.19.94) kraiñcadvīpena vikhyātaṃ tasya keturmahādrumaḥ / śāko nāma mahotsedhastasya pūjyā mahānugāḥ // ### [1.19.95](https://indike.org/pramana/in.purana.brahmanda.1.19.95) tatra puṇyā janapadāścāturvarṇyasamanvitāḥ / nadyaścāpi mahāpuṇyā gaṅgāḥ saptavidhāstathā // ### [1.19.96](https://indike.org/pramana/in.purana.brahmanda.1.19.96) sukumārī kumārī ca nalinī veṇukā ca yā / ikṣuśca veṇukā caiva gabhastiḥ saptamī tathā // ### [1.19.97](https://indike.org/pramana/in.purana.brahmanda.1.19.97) nadyaścānyāḥ puṇyajalāḥ śītatoyavahāḥ śubhāḥ / sahasraśaḥ samākhyātā yato varṣati vāsavaḥ // ### [1.19.98](https://indike.org/pramana/in.purana.brahmanda.1.19.98) na tāsāṃ nāmadheyāni parimāṇaṃ tathaiva ca / śakyaṃ vai parisaṃkhyātuṃ puṇyāstāḥ sariduttamāḥ // ### [1.19.99](https://indike.org/pramana/in.purana.brahmanda.1.19.99) tāḥ pibanti sadā hṛṣṭā nadīrjanapadāstu te / śāṃśapāyanavistīrṇo dvīpo 'sau cakrasaṃsthitaḥ // ### [1.19.100](https://indike.org/pramana/in.purana.brahmanda.1.19.100) nadījalaiḥ praticchannaḥ parvataiścābhrasannibhaiḥ / sarvadhātuvicitraiśca maṇividrumabhūṣitaiḥ // ### [1.19.101](https://indike.org/pramana/in.purana.brahmanda.1.19.101) nagaraiścaiva vividhaiḥ sphītairjanapadairapi / vṛkṣaiḥ puṣpaphalopetaiḥ samantāddhanadhānyavān // ### [1.19.102](https://indike.org/pramana/in.purana.brahmanda.1.19.102) kṣīrodena samudreṇa sarvataḥ parivāritaḥ / śākadvīpasya vistārātsamena tu samaṃntataḥ // ### [1.19.103](https://indike.org/pramana/in.purana.brahmanda.1.19.103) tasmiñjanapadāḥ puṇyāḥ parvatāḥ saritaḥ śubhāḥ / varṇāśramasamākīrṇā deśāste sapta vai smṛtāḥ // ### [1.19.104](https://indike.org/pramana/in.purana.brahmanda.1.19.104) na saṃkaraśca teṣvasti varṇāśramakṛtaḥ kvacit / dharmasya cāvyabhīcārādekāntasukhitāḥ prajāḥ // ### [1.19.105](https://indike.org/pramana/in.purana.brahmanda.1.19.105) na teṣu lobho māyā vā hīrṣāsūyākṛtaḥ kutaḥ / viparyayo na teṣvasti kālātsvābhāvikaṃ param // ### [1.19.106](https://indike.org/pramana/in.purana.brahmanda.1.19.106) karāvāptirna teṣvasti na daṇḍo na ca daṇḍyakāḥ / svadharmeṇaiva dharma jñāste rakṣanti parasparam // ### [1.19.107](https://indike.org/pramana/in.purana.brahmanda.1.19.107) etāvadeva śakyaṃ vai tasmindvīpe prabhāṣitum / etāvadeva śrotavyaṃ śākadvīpanivāsinām // ### [1.19.108](https://indike.org/pramana/in.purana.brahmanda.1.19.108) puṣkaraṃ saptamaṃ dvīpaṃ pravakṣyāmi nibodhata / puṣkareṇa tu dvīpena vṛtaḥ kṣīrodako bahiḥ // ### [1.19.109](https://indike.org/pramana/in.purana.brahmanda.1.19.109) śākadvīpasya vistārāddviguṇena saṃmatataḥ / puṣkare parvataḥ śrīmāneka eva mahāśilaḥ // ### [1.19.110](https://indike.org/pramana/in.purana.brahmanda.1.19.110) citrairmaṇimayaiḥ śṛṅgaiḥ śilājālaiḥ samucchritaḥ / dvīpasya tasya pūrvarddhe citrasānuḥ sthito mahān // ### [1.19.111](https://indike.org/pramana/in.purana.brahmanda.1.19.111) sa maṇḍalasahasrāṇi vistīrṇaḥ pañcaviṃśatiḥ / urddhaṃ caiva catustriṃśatsahasrāṇi mahītalāt // ### [1.19.112](https://indike.org/pramana/in.purana.brahmanda.1.19.112) dvīpardhasya parikṣiptaḥ parvato mānasottaraḥ / sthito velāsamīpe tu navacandra ivoditaḥ // ### [1.19.113](https://indike.org/pramana/in.purana.brahmanda.1.19.113) yojanānāṃ sahasrāṇi ūrdhvaṃ pañcāśaducchritaḥ / tāvadeva ca vistīrṇaḥ sarvataḥ parimaṇḍalaḥ // ### [1.19.114](https://indike.org/pramana/in.purana.brahmanda.1.19.114) sa eva dvīpapaścārddhe mānasaḥ pṛthivīdharaḥ / eka eva mahāsāraḥ sanniveśo dvidhā kṛtaḥ // ### [1.19.115](https://indike.org/pramana/in.purana.brahmanda.1.19.115) svādūdakenodadhinā sarvataḥ parivāritaḥ / puṣkaradvīpavistārādvistīrṇo 'sau samantataḥ // ### [1.19.116](https://indike.org/pramana/in.purana.brahmanda.1.19.116) tasmindvīpe smṛtau dvau tu puṇyau janapadau śubhau / abhito mānasasyātha parvatasya tu maṇḍale // ### [1.19.117](https://indike.org/pramana/in.purana.brahmanda.1.19.117) mahāvītaṃ tu yadvarṣa bāhyato mānasasya tat / tsyaivābhyantareṇāpi dhātakīkhaṇḍamucyate // ### [1.19.118](https://indike.org/pramana/in.purana.brahmanda.1.19.118) daśavarṣasahasrāṇi tatra jīvati mānavāḥ / arogāḥ sukhabāhulyā mānasīṃ siddhimāsthitāḥ // ### [1.19.119](https://indike.org/pramana/in.purana.brahmanda.1.19.119) masasāyuśca rūpaṃ ca tasminvarṣadvaye smṛtam / adhamottamā na teṣvasti tulyāste rūpaśīlataḥ // ### [1.19.120](https://indike.org/pramana/in.purana.brahmanda.1.19.120) na tatra dasyurdamako nerṣyāsūyā bhayaṃ tathā / nigraho na ca daṇḍo 'sti na lobho na parigrahaḥ // ### [1.19.121](https://indike.org/pramana/in.purana.brahmanda.1.19.121) satyānṛtaṃ na tatrāsti dharmādharmauṃ tathaiva ca / varṇāśramau vā vārtā vā pāśupālyaṃ vaṇikpathaḥ // ### [1.19.122](https://indike.org/pramana/in.purana.brahmanda.1.19.122) trayī vidyā daṇḍanītiḥ śuśrūṣā śilpameva ca / varṣadvaye sarvametatpuṣkarasya na vidyate // ### [1.19.123](https://indike.org/pramana/in.purana.brahmanda.1.19.123) na tatra varṣaṃ nadyo vā śītoṣṇaṃ vāpi vidyate / udbhidānyudakānyatra giriprasravaṇāni ca // ### [1.19.124](https://indike.org/pramana/in.purana.brahmanda.1.19.124) uttarāṇāṃ kurūṇāṃ ca tulyakālo janastathā / sarvarttususukhastatra jarākramavivarjitaḥ // ### [1.19.125](https://indike.org/pramana/in.purana.brahmanda.1.19.125) ityeṣa dhātakīkhaṇḍe mahā vīte tathaiva ca / ānupūrvyādvidhiḥ kṛtsnaḥ puṣkarasya prakīrttitaḥ // ### [1.19.126](https://indike.org/pramana/in.purana.brahmanda.1.19.126) svādūdakenodadhinā puṣkaraḥ parivāritaḥ / vistārānmaṇḍalāccaiva puṣkarasya samena tu // ### [1.19.127](https://indike.org/pramana/in.purana.brahmanda.1.19.127) evaṃ dvīpāḥ samudraistu sapta saptabhirāvṛtāḥ / dvīpasyānantaro yastu sāmudrastatsamastu saḥ // ### [1.19.128](https://indike.org/pramana/in.purana.brahmanda.1.19.128) evaṃ dvīpasamudrāṇāṃ vṛddhirjñeyā parasparāt / apāṃ caiva samudrekātsāmudra iti saṃjñitaḥ // ### [1.19.129](https://indike.org/pramana/in.purana.brahmanda.1.19.129) viśantirnivasaṃtyasminprajā yasmāccaturvidhāḥ / tasmādvarṣamiti proktaṃ prajānāṃ sukhadaṃ yataḥ // ### [1.19.130](https://indike.org/pramana/in.purana.brahmanda.1.19.130) ṛṣa ityeṣa ramaṇe vṛṣaśaktiprabandhane / ratiprabadhanātmiddhaṃ varṣaṃ tatteṣu tena vai // ### [1.19.131](https://indike.org/pramana/in.purana.brahmanda.1.19.131) śuklapakṣe candravṛddhyā samudraḥ pūryate sadā / prakṣīyamāṇe bahule kṣīyate 'stamite khage // ### [1.19.132](https://indike.org/pramana/in.purana.brahmanda.1.19.132) āpūryamāṇo hyudadhiḥ svata evābhipūryate / tathopakṣīyamāṇe 'pi svātmanyevāvakṛṣyate // ### [1.19.133](https://indike.org/pramana/in.purana.brahmanda.1.19.133) ukhāsthamagnisaṃyogādudriktaṃ dṛśyate yathā / mahodadhigataṃ toyaṃ svata udricyate tathā // ### [1.19.134](https://indike.org/pramana/in.purana.brahmanda.1.19.134) anyūnānatiriktāṃśca varndvatyāpo hrasaṃti ca / udayāstamaye tvindau pakṣayoḥ śuklakṛṣṇayoḥ // ### [1.19.135](https://indike.org/pramana/in.purana.brahmanda.1.19.135) kṣayavṛddhatvamudadheḥ somavṛddhikṣayātpunaḥ / daśottarāṇi pañcaiva hyaṅgulāni śatāni ca // ### [1.19.136](https://indike.org/pramana/in.purana.brahmanda.1.19.136) apāṃ vṛddhiḥ kṣayo dṛṣṭaḥ sāmudrīṇāṃ tu parvasu / dvirāpkatvātsmṛtā dvīpāḥ sarvataścodakāvṛtāḥ // ### [1.19.137](https://indike.org/pramana/in.purana.brahmanda.1.19.137) udakasyāyanaṃ yasmāttasmādudadhirucyate / aparvāṇastu girayaḥ parvabhiḥ parvatāḥ smṛtāḥ // ### [1.19.138](https://indike.org/pramana/in.purana.brahmanda.1.19.138) plakṣadvīpe tu gomedaḥ parvatastena caucyate / śālmaliḥ śālmale dvīpe pūjyate sumahāvrataiḥ // ### [1.19.139](https://indike.org/pramana/in.purana.brahmanda.1.19.139) kuśadvīpe kuśastaṃbastasyanāmnā sa ucyate / kraiñcadvīpe giriḥ kaiñco madhye janapadasya ha // ### [1.19.140](https://indike.org/pramana/in.purana.brahmanda.1.19.140) śākadvīpe drumaḥ śākastasya nāmnā sa ucyate / nyagrodhaḥ puṣkaradvīpe tatratyaiḥ sa namaskṛtaḥ // ### [1.19.141](https://indike.org/pramana/in.purana.brahmanda.1.19.141) mahādevaḥ pūjyate tu brahmā tribhuvaneśvaraḥ / tasminni vasati brahmā sādhyaiḥ sārddhaṃ prajāpatiḥ // ### [1.19.142](https://indike.org/pramana/in.purana.brahmanda.1.19.142) upāsaṃte tatra devāstrayastriṃśanmaharṣibhiḥ / sa tatra pūjyate caiva deverdevotamotamaḥ // ### [1.19.143](https://indike.org/pramana/in.purana.brahmanda.1.19.143) jaṃbūdvīpātpravarttante ratnāni vividhāni ca / dvīpeṣu teṣu sarveṣu prajānāṃ kramatastu vai // ### [1.19.144](https://indike.org/pramana/in.purana.brahmanda.1.19.144) sarvaśo brahmavaryeṇa satyena ca damena ca / ārogyayuḥpramāṇābhyāṃ pramāṇaṃ dviguṇaṃ tataḥ // ### [1.19.145](https://indike.org/pramana/in.purana.brahmanda.1.19.145) etasminpuṣkaradvīpe yaduktaṃ varṣakadvayam / gopāyati prajāstatra svayaṃbhūrjaḍa paṇḍitāḥ // ### [1.19.146](https://indike.org/pramana/in.purana.brahmanda.1.19.146) īśvaro daṇḍasudyamya brahmā tribhuvaneśvaraḥ / sa viṣṇoḥ sacivo devaḥ sa pitā sa pitāmahaḥ // ### [1.19.147](https://indike.org/pramana/in.purana.brahmanda.1.19.147) bhojanaṃ cāprayatnena tatra svayamupasthitam / ṣaḍrasaṃ sumahāvīryaṃ bhuñjate tu prajāḥ sadā // ### [1.19.148](https://indike.org/pramana/in.purana.brahmanda.1.19.148) pareṇa puṣkarasyārddhe āvṛtyāvasthito mahān / svādūdakaḥ samudrastu samantātpariveṣṭya tam // ### [1.19.149](https://indike.org/pramana/in.purana.brahmanda.1.19.149) pareṇa tasya mahatī dṛśyate lokasaṃsthitiḥ / kāñcanī dviguṇā bhūmiḥ sarvāhyekaśilopamā // ### [1.19.150](https://indike.org/pramana/in.purana.brahmanda.1.19.150) tasyāpareṇa śailaśca paryāsātpasmiṇḍalaḥ / prakāśaścāprakāśaśca lokālokaḥ sa ucyate // ### [1.19.151](https://indike.org/pramana/in.purana.brahmanda.1.19.151) ālokastasya cārvaktu nirālokastataḥ param / yojanānāṃ sahasrāṇi daśa tasyocchrayaḥ samṛtaḥ // ### [1.19.152](https://indike.org/pramana/in.purana.brahmanda.1.19.152) tāvāṃśca vistarastasya pṛthivyāṃ kāmagaśca saḥ / āloko lokavṛttistho nirāloko hyalaukikaḥ // ### [1.19.153](https://indike.org/pramana/in.purana.brahmanda.1.19.153) lokārddhe saṃmitā lokā nirālokāstu bāhyataḥ / lokavistāramātraṃ tu hyalokaḥ sarvato bahiḥ // ### [1.19.154](https://indike.org/pramana/in.purana.brahmanda.1.19.154) paricchinnaḥ samantācca udakenāvṛtastu saḥ / ālokātparataścāpi hyaṇḍamā vṛtya tiṣṭhati // ### [1.19.155](https://indike.org/pramana/in.purana.brahmanda.1.19.155) aṇḍasyāntastvime lokāḥ saptadvīpā ca medinī / bhūrloko 'tha bhuvarllokaḥ svarloko 'tha mahastathā // ### [1.19.156](https://indike.org/pramana/in.purana.brahmanda.1.19.156) janastapastathā satyametāvāṃllokasaṃgrahaḥ / etāvāneva vijñeyo lokāntaścaiva yaḥ paraḥ // ### [1.19.157](https://indike.org/pramana/in.purana.brahmanda.1.19.157) kuṃbhasthāyī bhavedyādṛvapratīcyāṃ diśi candramāḥ / āditaḥ śuklapakṣasya vapuścāṇḍasya tadvidham // ### [1.19.158](https://indike.org/pramana/in.purana.brahmanda.1.19.158) aṇḍānāmīdṛśānāṃ tu koṭyo jñeyāḥ sahasraśaḥ / tiryagūrdhvamadho vāpi kāraṇasyāvyayātmanaḥ // ### [1.19.159](https://indike.org/pramana/in.purana.brahmanda.1.19.159) dharaṇaiḥ prākṛtaistattadāvṛtaṃ prati saptabhiḥ / daśādhikyena cānyonyaṃ dhārayanti parasparam // ### [1.19.160](https://indike.org/pramana/in.purana.brahmanda.1.19.160) parasparāvṛtāḥ sarve utpannāśca parasparam / aṇḍasyāsya samantāttu sanniviṣṭo ghanodadhiḥ // ### [1.19.161](https://indike.org/pramana/in.purana.brahmanda.1.19.161) samantāttu vanodena dhāryamāṇaḥ sa tiṣṭati / bāhyato ghanato yasya tiryagūrddhvaṃ tu maṇḍalam // ### [1.19.162](https://indike.org/pramana/in.purana.brahmanda.1.19.162) dhāryamāṇaṃ samantāttu tiṣṭhate yattu tejasā / ayoguḍanibho vāhnaḥ samantā nmaṇḍalākṛtiḥ // ### [1.19.163](https://indike.org/pramana/in.purana.brahmanda.1.19.163) samantāddhanavātena dhāryamāṇaḥ sa tiṣṭhati / ghanavātaṃ tathākāśo dadhānaḥ khalu tiṣṭhati // ### [1.19.164](https://indike.org/pramana/in.purana.brahmanda.1.19.164) bhūtādiśca tathā kāśaṃ bhūtādiścāpyasau mahān / mahāśca so 'pyanantena hyavyaktena tu dhāryate // ### [1.19.165](https://indike.org/pramana/in.purana.brahmanda.1.19.165) anantamaparivyaktaṃ daśadhā sūkṣmameva ca / anantama kṛtātmānamanādinidhanaṃ ca yat // ### [1.19.166](https://indike.org/pramana/in.purana.brahmanda.1.19.166) anityaṃ parato 'ghoramanālaṃbamanāmayam / naikayojanasāhasraṃ viprakṛṣṭamanāvṛtam // ### [1.19.167](https://indike.org/pramana/in.purana.brahmanda.1.19.167) tama eva nirālokamamaryyādamadaiśikam / devānāmapyaviditaṃ vyavahāravivarjitam // ### [1.19.168](https://indike.org/pramana/in.purana.brahmanda.1.19.168) tamasoṃte ca viśyātamākāśānte hyabhāsvaram / maryādāyāmanantasya devasyāyatanaṃ mahat // ### [1.19.169](https://indike.org/pramana/in.purana.brahmanda.1.19.169) tridaśānāmagamyaṃ tatasthānaṃ divyamiti śrutiḥ / mahato devadevasya maryādā yā vyavasthitāḥ // ### [1.19.170](https://indike.org/pramana/in.purana.brahmanda.1.19.170) candrādityāvadhastāttu ye lokāḥ prathitā budhaiḥ / te lokā ityabhihitā jagatasca na saṃśayaḥ // ### [1.19.171](https://indike.org/pramana/in.purana.brahmanda.1.19.171) rasātalatalāḥ saptasaptaivorddhvatalāśca ye / saptaskandhastathā vāyoḥ sabrahmasadanā dvijāḥ // ### [1.19.172](https://indike.org/pramana/in.purana.brahmanda.1.19.172) āpātālāddivaṃ yāvadatra pañcavidhā gatiḥ / pramāṇametajjagata eṣa saṃsārasāgaraḥ // ### [1.19.173](https://indike.org/pramana/in.purana.brahmanda.1.19.173) anādyantāṃ vrajantyeva naikajātisamudbhavāḥ / vicitrā jagataḥ sā vai prakṛtirbrahmaṇaḥ sthitā // ### [1.19.174](https://indike.org/pramana/in.purana.brahmanda.1.19.174) yaccaiha daivikaṃ vātha nisargaṃ bahuvistaraḥ / atīndriyermahābhāgaiḥ siddhairapi na lakṣitaḥ // ### [1.19.175](https://indike.org/pramana/in.purana.brahmanda.1.19.175) pṛthivyaṃbvagnivāyūnāṃ nabhasastamasastathā / mānasasya tu dehasya anantasya dvijottamāḥ // ### [1.19.176](https://indike.org/pramana/in.purana.brahmanda.1.19.176) kṣayo vā pariṇāmo vā anto vāpi na vidyate / ananta eṣa sarvatra evaṃ jñāneṣu paṭhyate // ### [1.19.177](https://indike.org/pramana/in.purana.brahmanda.1.19.177) tasya coktaṃ mayā pūrva tasminnāmānukīrtane / yaḥ padmanābhanāmnā tu tatkārtsnyena ca kīrttitaḥ // ### [1.19.178](https://indike.org/pramana/in.purana.brahmanda.1.19.178) sa eva sarvatra gataḥ sarvasthāneṣu pūjyate / bhūmau rasātale caiva ākāśe pavane 'nale // ### [1.19.179](https://indike.org/pramana/in.purana.brahmanda.1.19.179) arṇaveṣu ca sarveṣu divi caiva na saṃśayaḥ / tathā tamasi vijñeya eṣa eva mahādyutiḥ // ### [1.19.180](https://indike.org/pramana/in.purana.brahmanda.1.19.180) anekadhā vibhaktāṅgo mahāyogī janārdanaḥ / sarvalokeṣu lokeśa ijyate bahudhā prabhuḥ // ### [1.19.181](https://indike.org/pramana/in.purana.brahmanda.1.19.181) evaṃ parasparotpanna dhāryante ca parasparam / ādhārādheyabhāvena vikārāste 'vikāriṇaḥ // ### [1.19.182](https://indike.org/pramana/in.purana.brahmanda.1.19.182) pṛthvyādayo vikārāste paricchinnāḥ parasparam / parasparadhikāścaiva praviṣṭāste parasparam // ### [1.19.183](https://indike.org/pramana/in.purana.brahmanda.1.19.183) yasmātsṛṣaṭāstu te 'nyonyaṃ tasmātsthairyamupāgatāḥ / prāgāsannaviśeṣāstu viśeṣo 'nyaviśeṣaṇāt // ### [1.19.184](https://indike.org/pramana/in.purana.brahmanda.1.19.184) pṛthivyādyāstu vādyantāparicchinnāstrayastu te / guṇopacayasāreṇa paricchedo viśeṣataḥ // ### [1.19.185](https://indike.org/pramana/in.purana.brahmanda.1.19.185) śeṣāṇāṃ tu paricchedaḥ saukṣmyānneha vibhāvyate / bhūtebhyaḥ paratastebhyo vyālokā sā dharā smṛtā // ### [1.19.186](https://indike.org/pramana/in.purana.brahmanda.1.19.186) bhūtānyāloka ākāśe paricchinnāni sarvaśaḥ / pātre mahati pātrāṇi yathaivāntargatāni tu // ### [1.19.187](https://indike.org/pramana/in.purana.brahmanda.1.19.187) bhavantyanyonyahīnāni parasparasamāśrayāt / tathā hyāloka ākāśe bhedāstvantargatā matāḥ // ### [1.19.188](https://indike.org/pramana/in.purana.brahmanda.1.19.188) kṛttnānyetāni catvāri hyanyonyasyādhikāni tu / yāvadetāni bhūtāni tāvadutpattirucyate // ### [1.19.189](https://indike.org/pramana/in.purana.brahmanda.1.19.189) tantunāmiva saṃtāro bhūteṣvantargato mataḥ / pratyā khyāya tu bhūtāni kāryotparttina vidyate // ### [1.19.190](https://indike.org/pramana/in.purana.brahmanda.1.19.190) tasmātparimitā bhedāḥ smṛtāḥ kāryyātmakāstu te / kāraṇātmakāstathaika syurbhedā ye mahadādayaḥ // ### [1.19.191](https://indike.org/pramana/in.purana.brahmanda.1.19.191) ityeṣa saṃniveśo vai mayā prokto vibhāgaśaḥ / saptadvīpasamudrāḍyo yāthātathyana vai dvijāḥ // ### [1.19.192](https://indike.org/pramana/in.purana.brahmanda.1.19.192) vistarānmaṇḍalāścaiva prasaṃkhyānena caiva hi / vaiśvarūpradhānasya pariṇāmaikadeśikaḥ // ### [1.19.193](https://indike.org/pramana/in.purana.brahmanda.1.19.193) adhiṣṭhitaṃ bhagavatā yasya sarvamidaṃ jagat / evaṃbhūtagaṇāḥ sapta sanniviṣṭāḥ parasparam // ### [1.19.194](https://indike.org/pramana/in.purana.brahmanda.1.19.194) etāvānsaṃniveśastu mayā śakyaḥ prabhāṣitum / etāvadeva śrotavyaṃ saṃniveśe tu pārtheve // ### [1.19.195](https://indike.org/pramana/in.purana.brahmanda.1.19.195) sapta prakṛtayastvetā dhārayanti parasparam / tāstvahaṃ parimāṇena naṃ saṃkhyātumihotsahe // ### [1.19.196](https://indike.org/pramana/in.purana.brahmanda.1.19.196) asaṃkhyātāḥ prakṛtayastiryyagūrddhvamadhastathā / tārakāsaṃniveśaśca yāvaddivyānumaṇḍalam // ### [1.19.197](https://indike.org/pramana/in.purana.brahmanda.1.19.197) paryyā yasanniveśastu bhūmestadanu maṇḍalaḥ / ata ūrdhvaṃ pravakṣyāmi kṛthivyā vai vicakṣaṇāḥ // ### [1.19.197.p1](https://indike.org/pramana/in.purana.brahmanda.1.19.197.p1) iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde plakṣādidvīpavarṇanaṃ nāmaikonaviṃśatitamo 'dhyāyaḥ ## Linked texts (14) - [Vāyupurāṇa](https://indike.org/pramana/in.purana.vayu.1.49.7) — Vyāsa, Sanskrit - [Matsyapurāṇa](https://indike.org/pramana/in.purana.matsya.122.7) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.53.2) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.vyasa*crit.6.12.15) — Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.4.11) — Sanskrit - [Garuḍapurāṇa](https://indike.org/pramana/in.purana.garuda.1.56.4) — Vyāsa, Sanskrit - [Varāhapurāṇa](https://indike.org/pramana/in.purana.varaha.87.1) — Vyāsa, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.59.2) — Ativīrarāma Pāṇṭiyar 1500, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.14.9) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.14.9) — Basava, Sanskrit - [Caturvargacintāmaṇi](https://indike.org/pramana/in.niti.dharma.nibandha.mahanibandha.caturvargacintamani.21.p2.2) — Hemādri, Sanskrit - [Ṣoḍaśamahādānavidhi (Hemādri)](https://indike.org/pramana/in.niti.dharma.dana.mahadana.sodasamahadanavidhi-hemadri.21.p2.2) — Hemādri, Sanskrit - [Dānakhaṇḍa](https://indike.org/pramana/in.niti.dharma.nibandha.hemadri.danakhanda.23.p1.2) — Hemādri, Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p190) — Mitramiśra, Sanskrit --- Source: [https://indike.org/pramana/in.purana.brahmanda.1.19](https://indike.org/pramana/in.purana.brahmanda.1.19) · Pramāṇa