[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.22 # Brahmandapurana 1.22 Brahmāṇḍapurāṇa 1.22 - **Language:** Sanskrit ## Contents - [1.22.84](https://indike.org/pramana/in.purana.brahmanda.1.22.84) — 1 part ### [1.22.1](https://indike.org/pramana/in.purana.brahmanda.1.22.1) sūta uvāca svāyaṃbhūvanisarge tu vyākhyātānyantarāṇi ca / bhaviṣyāṇi ca sarvāṇi teṣāṃ vakṣyāmyanukramam // ### [1.22.2](https://indike.org/pramana/in.purana.brahmanda.1.22.2) etacchrutavā tu munayaḥ papracchū romaharṣaṇam / sūryācandramasoścāraṃ grahāṇāṃ caiva sarvaśaḥ // ### [1.22.3](https://indike.org/pramana/in.purana.brahmanda.1.22.3) ṛṣaya ṛcuḥ / bhramanti kathametāni jyotīṣi divamaṇḍalam / avyūhena ca sarvāṇi tathaivāsaṃkareṇa vā // ### [1.22.4](https://indike.org/pramana/in.purana.brahmanda.1.22.4) kaścidbhāmayate tāni bhramante yadi vā svayam / etadveditumicchāmastanno nigada sattama // ### [1.22.5](https://indike.org/pramana/in.purana.brahmanda.1.22.5) sūta uvāca bhūtasaṃmohanaṃ hyetadvadato me nibodhata / pratyakṣamapi dṛśyaṃ ca saṃmohayati yatprajāḥ // ### [1.22.6](https://indike.org/pramana/in.purana.brahmanda.1.22.6) yo 'yaṃ caturddiśaṃ pucche śaiśumāre vyavasthitaḥ / uttānapādaputro 'sau meḍhībhūto dhruvo divi // ### [1.22.7](https://indike.org/pramana/in.purana.brahmanda.1.22.7) sa vai bhrāmayate nityaṃ candrādityau grahaiḥ saha / bhramantamanugacchanti nakṣatrāṇi ca cakravat // ### [1.22.8](https://indike.org/pramana/in.purana.brahmanda.1.22.8) dhruvasya manasā cāsau sarvate jyotiṣāṃ gaṇaḥ / sūryācandramasau tārā nakṣatrāṇi grahaiḥ saha // ### [1.22.9](https://indike.org/pramana/in.purana.brahmanda.1.22.9) vātānīkamayairbandhairdhruve baddhāni tāni vai / teṣāṃ yogaśca bhedaśca kālaścārastathaiva ca // ### [1.22.10](https://indike.org/pramana/in.purana.brahmanda.1.22.10) astodayau tathotpātā ayane dakṣaṇottare / viṣuvadgrahavarṇāśca druvātsarvaṃ pravarttate // ### [1.22.11](https://indike.org/pramana/in.purana.brahmanda.1.22.11) varṣā gharmo himaṃ rātriḥ saṃdhyā caiva dinaṃ tathā / śubhāśubhaṃ prajānāṃ ca dhruvātsarvaṃ pravarttate // ### [1.22.12](https://indike.org/pramana/in.purana.brahmanda.1.22.12) dhruveṇādhiṣṭitaścaiva sūryo 'po gṛhya varṣati / tadeṣa dīpta kiraṇaḥ sa kālagnirdivākaraḥ // ### [1.22.13](https://indike.org/pramana/in.purana.brahmanda.1.22.13) parivarttakramādviprā bhābhirālokayan diśaḥ / sūryaḥ kiramajālena vāyuyuktena sarvaśaḥ // ### [1.22.14](https://indike.org/pramana/in.purana.brahmanda.1.22.14) jagato jalamādatte kṛtsnasya dvijasattamāḥ / ādityapītaṃ sakalaṃ somaḥ saṃkramate jalam // ### [1.22.15](https://indike.org/pramana/in.purana.brahmanda.1.22.15) nāḍībhirvāyuyuktābhirlokadhārā pravarttate / yatsomātsravate hyaṃbu tadanneṣveva tiṣṭhati // ### [1.22.16](https://indike.org/pramana/in.purana.brahmanda.1.22.16) meghā vāyuvighātena visṛjanti jalaṃ bhūvi / evamutkṣipyate caiva patate cāsakṛjjalam // ### [1.22.17](https://indike.org/pramana/in.purana.brahmanda.1.22.17) na nāśa udakasyāsti tadeva parivarttate / saṃdhāraṇārthaṃ lokānāṃ māyaiṣā viśvanirmitā // ### [1.22.18](https://indike.org/pramana/in.purana.brahmanda.1.22.18) anyā māyayā vyāptaṃ trailokyaṃ sacarācaram / viśveśo lokakṛddevaḥ sahasrākṣaḥ prajāpatiḥ // ### [1.22.19](https://indike.org/pramana/in.purana.brahmanda.1.22.19) dhātā kṛtsnasya lokasya prabhaviṣṇurdivākaraḥ / sārvalokikamaṃbho yattatsomānnabhasaśvyutam // ### [1.22.20](https://indike.org/pramana/in.purana.brahmanda.1.22.20) somādhāraṃ jagatsarvametattathyaṃ prakīrtitam / sūryāduṣṇaṃ nisravate somācchītaṃ pravarttate // ### [1.22.21](https://indike.org/pramana/in.purana.brahmanda.1.22.21) śītoṣṇavīryauṃ dvāvetau yuktyā dhārayato jagat / somādhārā nadī gaṅgā pavitrā vimalodakā // ### [1.22.22](https://indike.org/pramana/in.purana.brahmanda.1.22.22) bhadrasomapurogāśca mahānadyo dvijottamāḥ / sarvabhūtaśarīreṣu hyāpo hyanusṛtāśca yāḥ // ### [1.22.23](https://indike.org/pramana/in.purana.brahmanda.1.22.23) teṣu saṃdahyamāneṣu jaṅgamasthāvareṣu ca / dhūmabhūtāstu tā hyāpo niṣkāmantīha sarvaśaḥ // ### [1.22.24](https://indike.org/pramana/in.purana.brahmanda.1.22.24) tena cābhrāṇi jāyante sthānamabhramayaṃ smṛtam / tejor'kaḥ sarvabhūtebhya ādatte raśmibhirjalam // ### [1.22.25](https://indike.org/pramana/in.purana.brahmanda.1.22.25) samudrādvāyusaṃyogādvahantyāpo gabhastayaḥ / saṃjīvanaṃ ca sasyānāmaṃbhastadamṛtopamam // ### [1.22.26](https://indike.org/pramana/in.purana.brahmanda.1.22.26) tatastvṛtuvaśātkāle parivatya divākaraḥ / yacchatyāpo hi meghebhyaḥ ghuklāśuklairgabhastibhiḥ // ### [1.22.27](https://indike.org/pramana/in.purana.brahmanda.1.22.27) abhrasthāḥ prapatantyāpo vāyunā samudīritāḥ / sarvabhūtahitārthāya vāyumiśrāḥ samantataḥ // ### [1.22.28](https://indike.org/pramana/in.purana.brahmanda.1.22.28) tato varṣati ṣaṇmāsānsarvabhūtavivṛddhaye / vāyavyaṃ stanitaṃ caiva vaidyutaṃ cāgnisaṃbhavam // ### [1.22.29](https://indike.org/pramana/in.purana.brahmanda.1.22.29) mehanācca mihedhātomaghatvaṃ vyajayanti hi / na bhraśyanti yataścāpastadabhaṃ kavayo viduḥ // ### [1.22.30](https://indike.org/pramana/in.purana.brahmanda.1.22.30) meghānāṃ punarutpattiśtrividhā yonirucyate / āgneyā brahmajāścaiva pakṣajāśca pṛthagvidhāḥ // ### [1.22.31](https://indike.org/pramana/in.purana.brahmanda.1.22.31) tridhā meghāḥ samākhyātāsteṣāṃ vakṣyāmi saṃbhavam / āgneyā stūṣṇajāḥ proktāsteṣāṃ dhūmapravarttanam // ### [1.22.32](https://indike.org/pramana/in.purana.brahmanda.1.22.32) śītadurdinavātā ye svaguṇāste vyavasthitāḥ / mahiṣāśca vārāhāśca mattamātaṅgarūpiṇaḥ // ### [1.22.33](https://indike.org/pramana/in.purana.brahmanda.1.22.33) bhūtvā dharaṇimabhyetya ramante vicaranti ca / jīmūtā nāma te meghā hyetebhyo jīvasaṃbhavaḥ // ### [1.22.34](https://indike.org/pramana/in.purana.brahmanda.1.22.34) vidyudguṇavihīnāśca jaladhārā vilaṃbinaḥ / mūkameghā mahākāyā āvahasya vaśānugāḥ // ### [1.22.35](https://indike.org/pramana/in.purana.brahmanda.1.22.35) krośamātrācca varṣanti krośārddhādapi vā punaḥ / parvatāgra nitaṃbeṣu varṣati ca rasaṃti ca // ### [1.22.36](https://indike.org/pramana/in.purana.brahmanda.1.22.36) balākāgarbhadāścaiva balākāgarbhadhāriṇaḥ / brahmajā nāma te meghā brahmaniśvāsasaṃbhavāḥ // ### [1.22.37](https://indike.org/pramana/in.purana.brahmanda.1.22.37) te hi vidyudguṇopetāstanayitnupriyasvanāḥ / teṣāṃ śaśrvatpraṇādena bhūmiḥ svāṅgarūhodbhavā // ### [1.22.38](https://indike.org/pramana/in.purana.brahmanda.1.22.38) rājñī rājyābhiṣikteva punaryauṃvanamaśnute / teṣviyaṃ prāvṛḍāsaktā bhūtānāṃ jīvitodbhavā // ### [1.22.39](https://indike.org/pramana/in.purana.brahmanda.1.22.39) dvitīyaṃ pravahaṃ vāyuṃ meghāste tu samāśritāḥ / etaṃ yojanamātrācca sādhyarddhā niṣkṛtādapi // ### [1.22.40](https://indike.org/pramana/in.purana.brahmanda.1.22.40) vṛṣṭirgarbhastridhā teṣāṃ dhārāsāraḥ prakīrttitaḥ / puṣkarāvarttakā nāma te meghāḥ pakṣasaṃbhavāḥ // ### [1.22.41](https://indike.org/pramana/in.purana.brahmanda.1.22.41) śakreṇa pakṣacchinnā ye parvatānāṃ mahaujasām / kāmāgānāṃ pravṛddhānāṃ bhūtānāṃ śivamicchatā // ### [1.22.42](https://indike.org/pramana/in.purana.brahmanda.1.22.42) puṣkarā nāma te meghā bṛṃhantastoyamatsarāḥ / puṣkarāvarttakāstena kāraṇeneha śabditāḥ // ### [1.22.43](https://indike.org/pramana/in.purana.brahmanda.1.22.43) nānārūpadharāścaiva mahāghorasvanāśca te / kalpāntavṛṣṭeḥ sraṣṭāraḥ saṃvartāgne rniyāmakāḥ // ### [1.22.44](https://indike.org/pramana/in.purana.brahmanda.1.22.44) varṣantyete yugānteṣu tṛtīyāste prakīrttitāḥ / anekarūpasaṃsthānāḥ pūrayanto mahītalam // ### [1.22.45](https://indike.org/pramana/in.purana.brahmanda.1.22.45) vāyuṃ purā vahantaḥ syurāśritāḥ kalpasādhakāḥ / yānyaṇḍasya tu bhinnasya prākṛtasyābhavaṃstadā // ### [1.22.46](https://indike.org/pramana/in.purana.brahmanda.1.22.46) yasminbrahmā samutpannaścaturvaktraḥ svayaṃprabhuḥ / tānyevāṇḍakapālāni sarve meghāḥ prakīrttitāḥ // ### [1.22.47](https://indike.org/pramana/in.purana.brahmanda.1.22.47) teṣāmāpyāyanaṃ dhūmaḥ sarveṣāmaviśeṣataḥ / teṣāṃ śreṣṭhastu parjanyaścatvāraścaiva diggajāḥ // ### [1.22.48](https://indike.org/pramana/in.purana.brahmanda.1.22.48) gajānāṃ parvatānāṃ ca meghānāṃ bhogibhiḥ saha / kulamekaṃ pṛthagbhūtaṃ yonirekā jalaṃ smṛtam // ### [1.22.49](https://indike.org/pramana/in.purana.brahmanda.1.22.49) parjanyo diggajā ścaiva hemante śītasaṃbhavāḥ / tuṣāravṛṣṭiṃ varṣanti śiṣṭaḥ sasyapravṛddhaye // ### [1.22.50](https://indike.org/pramana/in.purana.brahmanda.1.22.50) ṣaṣṭhaḥ parivaho nāma teṣāṃ vāyurapāśrayaḥ / yo 'sau bibartti bhagavāngaṅgāmākāśagocarām // ### [1.22.51](https://indike.org/pramana/in.purana.brahmanda.1.22.51) divyāmṛtajalā puṇyāṃ tridhāsvātipathe sthitām / tasyā niṣyandatoyāni diggajāḥ pṛthubhiḥ karaiḥ // ### [1.22.52](https://indike.org/pramana/in.purana.brahmanda.1.22.52) śīkaraṃ saṃpramuñcanti nīhāra iti sa smṛtaḥ / dakṣiṇena giriryo 'sau hemakūṭa iti smṛtaḥ // ### [1.22.53](https://indike.org/pramana/in.purana.brahmanda.1.22.53) udagghimavataḥ śaila uttaraprāyadakṣiṇe / puṇḍraṃ nāma samākhyātaṃ nagaraṃ tatra vistṛtam // ### [1.22.54](https://indike.org/pramana/in.purana.brahmanda.1.22.54) tasminnipatitaṃ varṣaṃ tattuṣārasamudbhavam / tatastadā vaho vāyurhemavantaṃ samudvahan // ### [1.22.55](https://indike.org/pramana/in.purana.brahmanda.1.22.55) ānayatyātmayogena siṃcamāno mahāgirim / himavantamatikramya vṛṣṭiśeṣaṃ tataḥ param // ### [1.22.56](https://indike.org/pramana/in.purana.brahmanda.1.22.56) ihābhyeti tataḥ paścādaparāntavivṛddhaye / varṣadvayaṃ samākhyātaṃ sasyadvayavivṛddhaye // ### [1.22.57](https://indike.org/pramana/in.purana.brahmanda.1.22.57) meghāścāpyāyanaṃ caiva sarvametatprakīrttitam / sūrya eva tu vṛṣṭīnāṃ sraṣṭā samupadiśyate // ### [1.22.58](https://indike.org/pramana/in.purana.brahmanda.1.22.58) sūryamūlā ca vai vṛṣṭirjalaṃ sūryātpravartate / dhruveṇādhiṣṭhitaḥ sūryastasyāṃ vṛṣṭau pravarttate // ### [1.22.59](https://indike.org/pramana/in.purana.brahmanda.1.22.59) dhruveṇādhiṣṭito vāyurvṛṣṭiṃ saṃharate punaḥ / graho niḥsṛtya sūryāttu kṛtsne nakṣatramaṇḍale // ### [1.22.60](https://indike.org/pramana/in.purana.brahmanda.1.22.60) caritvānte viśatyarkaṃ dhruveṇa samādhiṣṭhitam / tataḥ sūryarathasyātha sanniveśaṃ nibodhata // ### [1.22.61](https://indike.org/pramana/in.purana.brahmanda.1.22.61) saṃsthitenaikacakreṇa pañcāreṇa trinābhinā / hiraṇmayena bhagavāṃstathaiva haridarvaṇā // ### [1.22.62](https://indike.org/pramana/in.purana.brahmanda.1.22.62) aṣṭāpadanibaddhena ṣaṭprakāraikaneminā / cakreṇa bhāsvatā sūryaḥ syandanena prasarpati // ### [1.22.63](https://indike.org/pramana/in.purana.brahmanda.1.22.63) daśayojanasāhasro vistārāyāmataḥ smṛtaḥ / dviguṇo 'sya rathopasthādīṣādaṇḍaḥ pramāṇataḥ // ### [1.22.64](https://indike.org/pramana/in.purana.brahmanda.1.22.64) sa tasya brahmaṇā sṛṣṭo ratho hyarthavaśena tu / asaṃgaḥ kāñcano divyo yuktaḥ pavanagairhayaiḥ // ### [1.22.65](https://indike.org/pramana/in.purana.brahmanda.1.22.65) chandobhirvājirūpaistu yataścakraṃ tataḥ sthitaiḥ / vāruṇasyandanasyeha lakṣaṇaiḥ sadṛśastu saḥ // ### [1.22.66](https://indike.org/pramana/in.purana.brahmanda.1.22.66) tenāsau sarvate vyomni bhāsvatā tu divākaraḥ / athaitāni tu sūryasya pratyaṅgāni rathasya ha // ### [1.22.67](https://indike.org/pramana/in.purana.brahmanda.1.22.67) saṃvatsarasyāvayavaiḥ kalpi tasya yathākramam / ahastu nābhiḥ saurasya ekacakrasya vai smṛtaḥ // ### [1.22.68](https://indike.org/pramana/in.purana.brahmanda.1.22.68) arāḥ pañcārttavāṃstasya nemiḥ ṣaḍṛtavaḥ smṛtaḥ / rathanīḍaḥ smṛto hyeṣa cāyane kūbarāvubhau // ### [1.22.69](https://indike.org/pramana/in.purana.brahmanda.1.22.69) muhūrttā bandhurāstasya ramyāścāsya kalāḥ smṛtāḥ / tasya kāṣṭhā smṛtā ghoṇā akṣadaṇḍaḥ kṣaṇastu vai // ### [1.22.70](https://indike.org/pramana/in.purana.brahmanda.1.22.70) nimeṣaścānukarṣo 'sya hīṣā cāsya lavāḥsmṛtāḥ / rātrirvarūtho dharmo 'sya dhvaja ūrddhva samucchritaḥ // ### [1.22.71](https://indike.org/pramana/in.purana.brahmanda.1.22.71) yugākṣakoḍī te tasya arthakāmāvubhau smṛtau / saptāśvarūpāśchandāsi vahanto vāmato dhuram // ### [1.22.72](https://indike.org/pramana/in.purana.brahmanda.1.22.72) gāyatrī caiva triṣṭupya hyanuṣṭubjagatī tathā / paṅktiśca bṛhatī caiva hyuṣṇikcaiva tu saptamī // ### [1.22.73](https://indike.org/pramana/in.purana.brahmanda.1.22.73) cakramakṣe nibaddhaṃ tu dhruve cākṣaḥ samarpitaḥ / sahacakro bhramatyakṣaḥ sahakṣo bhramate dhruvaḥ // ### [1.22.74](https://indike.org/pramana/in.purana.brahmanda.1.22.74) akṣeṇa saha cakreśo bhramate 'sau dhruveritaḥ / evamarthavaśāttasya sanniveśo rathasya tu // ### [1.22.75](https://indike.org/pramana/in.purana.brahmanda.1.22.75) tathā saṃyogabhāvena saṃsiddho bhāsuro rathaḥ / tenāsau taraṇirdevo bhāsvatā sarpate divi // ### [1.22.76](https://indike.org/pramana/in.purana.brahmanda.1.22.76) yugākṣakoṭisannaddhau dvau raśmī syandanasya tu / dhruve tau bhrāmyate raśmī ca cakrayugayostu vai // ### [1.22.77](https://indike.org/pramana/in.purana.brahmanda.1.22.77) bhramato maṇḍalānyasya khecarasya rathasya tu / yugākṣakoṭī te tasya dakṣiṇe syandanasya hi // ### [1.22.78](https://indike.org/pramana/in.purana.brahmanda.1.22.78) dhruveṇa pragṛhīte vai vicakrama turakṣavat / bhramantamanugacchetāṃ dhruvaṃ raśmī tu tāvubhau // ### [1.22.79](https://indike.org/pramana/in.purana.brahmanda.1.22.79) yugākṣakoṭistattasya raśmibhiḥ syandanasya tu / kīlāsaktā yathā rajjurbhraṃmate sarvato diśam // ### [1.22.80](https://indike.org/pramana/in.purana.brahmanda.1.22.80) hrasatastasya raśmī tu maṇḍaleṣūttarāyaṇe / varddhate dakṣiṇe caiva bhramato maṇḍalāni tu // ### [1.22.81](https://indike.org/pramana/in.purana.brahmanda.1.22.81) yugākṣakoṭisaṃbaddhau raśmī dvau syandanasya tu / dhruveṇa pragṛhītau vai tau raśmī nayato ravim // ### [1.22.82](https://indike.org/pramana/in.purana.brahmanda.1.22.82) ākṛṣyete yadā tau vai dhruveṇa sama dhiṣṭhitau / tadā so 'bhyantare sūryo bhramate maṇḍalāni tu // ### [1.22.83](https://indike.org/pramana/in.purana.brahmanda.1.22.83) aśītirmaṇḍalaśataṃ kāṣṭhayorantaraṃ smṛtam / dhruveṇa mucyamānābhyāṃ raśmibhyāṃ punareva tu // ### [1.22.84](https://indike.org/pramana/in.purana.brahmanda.1.22.84) tathaiva bāhyataḥ sūryo bhramate maṇḍalāni tu / udveṣāṭayansa vegena maṇḍalāni tu gacchati // ### [1.22.84.p1](https://indike.org/pramana/in.purana.brahmanda.1.22.84.p1) iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde devagrahānukīrtanaṃ nāma dvāviṃśatitamo 'dhyāyaḥ ## Linked texts (6) - [Vāyupurāṇa](https://indike.org/pramana/in.purana.vayu.1.51.2) — Vyāsa, Sanskrit - [Matsyapurāṇa](https://indike.org/pramana/in.purana.matsya.125.3) — Vyāsa, Sanskrit - [Liṅgapurāṇa](https://indike.org/pramana/in.purana.linga.1.54.67) — Vyāsa, Sanskrit - [Sāmbapurāṇa](https://indike.org/pramana/in.purana.upa.surya.samba.20.5) — Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.2.9.10) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.60.67) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.brahmanda.1.22](https://indike.org/pramana/in.purana.brahmanda.1.22) · Pramāṇa