[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.31 # Brahmandapurana 1.31 Brahmāṇḍapurāṇa 1.31 - **Language:** Sanskrit ## Contents - [1.31.127](https://indike.org/pramana/in.purana.brahmanda.1.31.127) — 1 part ### [1.31.1](https://indike.org/pramana/in.purana.brahmanda.1.31.1) sūta uvāca ata ūrddhaṃ pravakṣyāmi dvāparasya vidhiṃ punaḥ / tatra tretāyuge kṣīṇe dvāparaṃ pratipadyate // ### [1.31.2](https://indike.org/pramana/in.purana.brahmanda.1.31.2) dvāparādau prajānāṃ tu siddhistretāyuge tu yā / parivṛtte yuge tasmiṃstatastābhiḥ praṇaśyati // ### [1.31.3](https://indike.org/pramana/in.purana.brahmanda.1.31.3) tataḥ pravarttate tāsāṃ prajānāṃ dvāpare punaḥ / saṃbhedaścaiva varṇānāṃ kāryāṇāṃ ca viparyayaḥ // ### [1.31.4](https://indike.org/pramana/in.purana.brahmanda.1.31.4) yajñāvadhāraṇaṃ daṇḍo mado daṃbhaḥ kṣamā balam / eṣā rajastamoyuktā pravṛttirdvāpare smṛtā // ### [1.31.5](https://indike.org/pramana/in.purana.brahmanda.1.31.5) ādye kṛte yo dharmo 'sti sa tretāyāṃ pravarttate / dvāpare vyākulībhūtvā praṇaśyati kalau yuge // ### [1.31.6](https://indike.org/pramana/in.purana.brahmanda.1.31.6) varṇānāṃ viparidhvaṃsaḥ saṃkīyata tathāśramāḥ / dvaividhyaṃ pratipadyeteyuge tasmiñchruti smṛtī // ### [1.31.7](https://indike.org/pramana/in.purana.brahmanda.1.31.7) dvaidhāttathā śrutismṛtyorniścayo nādhigamyate / aniścayādhigamanāddharmatattvaṃ na vidyate // ### [1.31.8](https://indike.org/pramana/in.purana.brahmanda.1.31.8) dharmāsattvena mitrāṇāṃ matibhedo bhavennṛṇām / parasparavibhinnaistaidṛṣṭīnāṃ vibhrameṇa ca // ### [1.31.9](https://indike.org/pramana/in.purana.brahmanda.1.31.9) ayaṃ dharmo hyayaṃ neti niścayo nādhigamyate / kāraṇānāṃ ca vaikalpyātkāryāṇāṃ cāpyaniścayāt // ### [1.31.10](https://indike.org/pramana/in.purana.brahmanda.1.31.10) matibhedena teṣāṃ vai dṛṣṭīnāṃ vibhramo bhavet / tato dṛṣṭivibhannaistu kṛtaṃ śāstrākulaṃ tvidam // ### [1.31.11](https://indike.org/pramana/in.purana.brahmanda.1.31.11) eko vedaścatuṣpāddhi tretāsviha vidhīyate / saṃkṣayādāyupaścaiva vyasyate dvāpareṣu ca // ### [1.31.12](https://indike.org/pramana/in.purana.brahmanda.1.31.12) ṛṣimantrātpunarbhedādbhidyate dṛṣṭivibhramaiḥ / mantrabrāhmaṇavinyāsaiḥ svaravarṇaviparyayaiḥ // ### [1.31.13](https://indike.org/pramana/in.purana.brahmanda.1.31.13) saṃhitā ṛgyajuḥsāmnāṃ saṃpaṭhyante maharṣibhiḥ / sāmānyā vaikṛtāścaiva dṛṣṭibhinne kvacitkvacit // ### [1.31.14](https://indike.org/pramana/in.purana.brahmanda.1.31.14) brāhmaṇaṃ kalpasūtrāṇi mantrapravacanāni ca / anye 'pi prasthitāstānvai kecittānpratyavasthitāḥ // ### [1.31.15](https://indike.org/pramana/in.purana.brahmanda.1.31.15) dvāpareṣu pravarttante nivarttante kalau yuge / ekamādhvaryavaṃ tvāsītpunardvaidhamajāyata // ### [1.31.16](https://indike.org/pramana/in.purana.brahmanda.1.31.16) sāmānyaviparītārthaiḥ kṛtaśāstrākulaṃ tvidam / ādhvaryavasya prasthānairbahudhā vyākulīkṛtaiḥ // ### [1.31.17](https://indike.org/pramana/in.purana.brahmanda.1.31.17) tathaivātharvaṛksāmnāṃ vikalpaiścāpi saṃjñayā / vyākuledvāpare nityaṃ kriyate bhinna darśanaiḥ // ### [1.31.18](https://indike.org/pramana/in.purana.brahmanda.1.31.18) teṣāṃ bhedāḥ pratībhedā vikalpāścāpi saṃkhyāyā / dvāpare saṃpravarttate vinaśyanti tataḥ kalau // ### [1.31.19](https://indike.org/pramana/in.purana.brahmanda.1.31.19) teṣāṃ viparyayotpannā bhavanti dvāpare punaḥ / avṛṣṭirmaraṇaṃ caiva tathaiva vyādhyupadravāḥ // ### [1.31.20](https://indike.org/pramana/in.purana.brahmanda.1.31.20) vāṅmanaḥ karmarjeduḥkhairnirvedo jāyate punaḥ / nirvedājjāyate teṣāṃ duḥkhamokṣavicāraṇā // ### [1.31.21](https://indike.org/pramana/in.purana.brahmanda.1.31.21) vicāraṇācca vairāgyaṃ vairāgyāddoṣadarśanam / doṣadarśanatascaiva dvāpare 'jñānasaṃbhavaḥ // ### [1.31.22](https://indike.org/pramana/in.purana.brahmanda.1.31.22) teṣāma jñānināṃ pūrvamādye svāyaṃbhuve 'ntare / utpadyante hi śāstrāṇāṃ dvāpare paripanthinaḥ // ### [1.31.23](https://indike.org/pramana/in.purana.brahmanda.1.31.23) āyurvedavikalpaśca hyagānāṃ jyotiṣasya ca / arthaśāstravikalpāśca hetuśāstravikalpanam // ### [1.31.24](https://indike.org/pramana/in.purana.brahmanda.1.31.24) prakriyākalpasūtrāṇāṃ bhāṣyavidyāvikalpanam / smṛtiśāstraprabhedaśca prasthānāni pṛthakpṛthak // ### [1.31.25](https://indike.org/pramana/in.purana.brahmanda.1.31.25) dvāpareṣvabhivarttante matibhedāśrayānnṛṇām / manasā karmaṇā vācā kṛcchrādvārtā prasiddhyati // ### [1.31.26](https://indike.org/pramana/in.purana.brahmanda.1.31.26) dvāpare sarvabhūtānāṃ kāyakleśapuraskṛtā / lobho vṛttirvaṇikpūrvā tattvānāmaviniścayaḥ // ### [1.31.27](https://indike.org/pramana/in.purana.brahmanda.1.31.27) vedaśāstrapraṇayanaṃ dharmāṇāṃ saṃkarastathā / varṇāśramaparidhvaṃsaḥ kāmakrodhau tathaiva ca // ### [1.31.28](https://indike.org/pramana/in.purana.brahmanda.1.31.28) dvāpareṣu pravarttante rāgo lobho vadhastathā / vedaṃ vyāsaścaturddhā tu vyasyate dvāparādiṣu // ### [1.31.29](https://indike.org/pramana/in.purana.brahmanda.1.31.29) niḥśeṣe dvāpare tasmiṃstasya saṃdhyā tu yādṛśī / pratiṣṭhate guṇairhīno dharmo 'sau dvāparasya tu // ### [1.31.30](https://indike.org/pramana/in.purana.brahmanda.1.31.30) tathaiva saṃdhyā pādena hyaṅgaḥ saṃdhyā itīṣyate / dvāparasyāvaśeṣeṇa tiṣyasya tu nibodhata // ### [1.31.31](https://indike.org/pramana/in.purana.brahmanda.1.31.31) dvāparasyāśaseṣaṇa pratipattiḥ kalerapi / hiṃsāsūyānṛtaṃ māyā vadhaścaiva tapasvinām // ### [1.31.32](https://indike.org/pramana/in.purana.brahmanda.1.31.32) ete svabhāvāstiṣyasya sādhayanti ca vai prajāḥ / eṣa dharmaḥ kṛtaḥ kṛtsno dharmaśca parihīyate // ### [1.31.33](https://indike.org/pramana/in.purana.brahmanda.1.31.33) manasā karmaṇā stutyā vārtā sidhyati vā na vā / kalau pramārakī rogaḥ satataṃ kṣudbhayāni ca // ### [1.31.34](https://indike.org/pramana/in.purana.brahmanda.1.31.34) anāvṛṣṭibhayaṃ ghoraṃ deśānāṃ ca viparyayaḥ / na pramāṇaṃ smṛterasti tiṣye lokeṣu vai yuge // ### [1.31.35](https://indike.org/pramana/in.purana.brahmanda.1.31.35) garbhastho mriyate kaścidyauva nasthastathāparaḥ / sthavirāḥ ke 'pi kaumāre mriyante vai kalau prajāḥ // ### [1.31.36](https://indike.org/pramana/in.purana.brahmanda.1.31.36) duriṣṭairduradhītaiśca duṣkṛtaiśca durāgamaiḥ / viprāṇāṃ karmadoṣaistaiḥ prajānāṃ jāyate bhayam // ### [1.31.37](https://indike.org/pramana/in.purana.brahmanda.1.31.37) hiṃsā māyā tatherṣyā ca krodho 'sūyā kṣamā nṛṣu / tiṣye bhavanti jantūnāṃ rāgo lobhaśca sarvaśaḥ // ### [1.31.38](https://indike.org/pramana/in.purana.brahmanda.1.31.38) saṃkṣobho jāyate 'tyathai karimāsādya vai yugam / pūrṇe varṣasahasre vai paramāyustadā nṛṇām // ### [1.31.39](https://indike.org/pramana/in.purana.brahmanda.1.31.39) nādhīyate tadā vedānna yajaṃ te dvijātayaḥ / utsīdanti narāścaiva kṣatriyāśca viśaḥ kramāt // ### [1.31.40](https://indike.org/pramana/in.purana.brahmanda.1.31.40) śūdrāṇāmantyayonestu saṃbandhā brāhmaṇaiḥ saha / bhavantīha kalau tasmiñchayanāsanabhojanaiḥ // ### [1.31.41](https://indike.org/pramana/in.purana.brahmanda.1.31.41) rājānaḥ śūdrabhūyiṣṭhāḥ pākhaṇḍānāṃ pravarttakāḥ / guṇahīnāḥ prajāścaiva tadā vai saṃpravarttate // ### [1.31.42](https://indike.org/pramana/in.purana.brahmanda.1.31.42) āyurmedhā balaṃ rūpaṃ kulaṃ caiva praṇaśyati / śūdrāśca brāhmaṇācārāḥ śūdrācārāśca brāhmaṇāḥ // ### [1.31.43](https://indike.org/pramana/in.purana.brahmanda.1.31.43) rājavṛttāḥ sthitāścorā ścorācārāśca pārthivāḥ / bhṛtyā ete hyasubhṛto yugānte samavasthite // ### [1.31.44](https://indike.org/pramana/in.purana.brahmanda.1.31.44) aśīlinyo 'nṛtāścaiva striyo madyāmiṣapriyāḥ / māyāvinyo bhaviṣyanti yugānte munisattama // ### [1.31.45](https://indike.org/pramana/in.purana.brahmanda.1.31.45) ekapatnyo na śiṣyanti yugānte munisattama / śvāpadaprabalatvaṃ ca gavāṃ caiva hyupakṣayaḥ // ### [1.31.46](https://indike.org/pramana/in.purana.brahmanda.1.31.46) sādhūnāṃ vinivṛttiṃ ca vidyāstasminyugakṣaye / tadā dharmo mahodarke durlabho dānamūlavān // ### [1.31.47](https://indike.org/pramana/in.purana.brahmanda.1.31.47) cāturāśramaśaithilyo dharmaḥ pravicariṣyati / tadā hyalpaphalā bhūmiḥ kvaciccāpi mahāphalā // ### [1.31.48](https://indike.org/pramana/in.purana.brahmanda.1.31.48) na rakṣitāro boktāro balibhāgasya pārthivāḥ / yugānte ca bhaviṣyanti svarakṣaṇaparāyaṇāḥ // ### [1.31.49](https://indike.org/pramana/in.purana.brahmanda.1.31.49) arakṣitāro rājāno viprāḥ śūdropajīvinaḥ / śūdrābhivādinaḥ sarve yugānte dvijasattamāḥ // ### [1.31.50](https://indike.org/pramana/in.purana.brahmanda.1.31.50) adṛśūlā janapadāḥ śivaśūlā dvijāstathā / pramadāḥ keśaśūlāśca yugānte samupasthite // ### [1.31.51](https://indike.org/pramana/in.purana.brahmanda.1.31.51) tapoyajñaphalānāṃ ca vikretāro dvijottamāḥ / yatayaśca bhaviṣyanti bahavo 'sminkalau yuge // ### [1.31.52](https://indike.org/pramana/in.purana.brahmanda.1.31.52) citravarṣī yadā devastadā prāhuryugakṣayam / sarve vāṇijakāścā pi bhaviṣyantyadhame yuge // ### [1.31.53](https://indike.org/pramana/in.purana.brahmanda.1.31.53) bhūyiṣṭhaṃ kūṭamānaiśca paṇyaṃ vikrīṇate janāḥ / kuśīlacaryāpākhaṇḍairvyādharūpaiḥ samāvṛtam // ### [1.31.54](https://indike.org/pramana/in.purana.brahmanda.1.31.54) puruṣālpaṃ bahustrīkaṃ yugānte samupasthite / bāhuyācanako loko bhaviṣyati parasparam // ### [1.31.55](https://indike.org/pramana/in.purana.brahmanda.1.31.55) avyākartā krūravākyā nārjavo nānasūyakaḥ / na kṛte pratikarttā ca yuge kṣīṇe bhaviṣyati // ### [1.31.56](https://indike.org/pramana/in.purana.brahmanda.1.31.56) aśaṅkā caiva patite yugānte tasya lakṣaṇam / tataḥ śūnya vasumatī bhaviṣyati vasundharā // ### [1.31.57](https://indike.org/pramana/in.purana.brahmanda.1.31.57) goptāraścāpyagoptāraḥ prabhaviṣyanti śāsakāḥ / harttāraḥ pararatnānāṃ paradāravimarśakāḥ // ### [1.31.58](https://indike.org/pramana/in.purana.brahmanda.1.31.58) kāmātmāno durātmāno hyadhamāḥ sāhasapriyāḥ / pranaṣṭaceṣṭanā dhūrttā muktakeśāsttvaśūlinaḥ // ### [1.31.59](https://indike.org/pramana/in.purana.brahmanda.1.31.59) ūnaṣoḍaśavarṣāśca prajā yante yugakṣaye / śukladantā jitākṣāśca muṇḍāḥ kāṣāyavāsasaḥ // ### [1.31.60](https://indike.org/pramana/in.purana.brahmanda.1.31.60) śūdrā dharmaṃ cariṣyati yugānte samupasthite / sasyacorā bhaviṣyanti tathā cailāpahāriṇaḥ // ### [1.31.61](https://indike.org/pramana/in.purana.brahmanda.1.31.61) corāccorāśca harttāro harturharttā tathāparaḥ / jñānakarmamyuparate loke niṣkriyatāṃ gate // ### [1.31.62](https://indike.org/pramana/in.purana.brahmanda.1.31.62) kīṭamūṣakasarpāśca dharṣayiṣyanti mānavān / abhīkṣṇaṃ kṣemamārogyaṃ sāmarthyaṃ durlabhaṃ tathā // ### [1.31.63](https://indike.org/pramana/in.purana.brahmanda.1.31.63) kauśikānprativatsyanti deśāḥ kṣudbhayapīḍitāḥ / duḥkhenābhiplutānāṃ ca paramāyuḥ śataṃ tadā // ### [1.31.64](https://indike.org/pramana/in.purana.brahmanda.1.31.64) dṛśyante ca na dṛśyante vedā kaliyuge 'khilāḥ / tatsīdante tathā yajñāḥ kevalādharmapīḍitāḥ // ### [1.31.65](https://indike.org/pramana/in.purana.brahmanda.1.31.65) kāṣāyiṇo 'tha nirgranthā tathā kāpālikāśca ha / vedavikrayimaścanye tīrthavikrayiṇo 'pare // ### [1.31.66](https://indike.org/pramana/in.purana.brahmanda.1.31.66) varṇāśramāṇāṃ ye cānye pākhaṇḍāḥ paripanthinaḥ / utpadyante tadā te vai saṃprāpte tu kalau yuge // ### [1.31.67](https://indike.org/pramana/in.purana.brahmanda.1.31.67) adhīyate tadā vedāñchūdrā dharmārtha kovidāḥ / yajante cāśvamedhena rājānaḥ śūdrayonayaḥ // ### [1.31.68](https://indike.org/pramana/in.purana.brahmanda.1.31.68) strībālagovadhaṃ kṛtvā hatvānye ca parasparam / apahatya tathānyonyaṃ sādhayanti tadā prajāḥ // ### [1.31.69](https://indike.org/pramana/in.purana.brahmanda.1.31.69) duḥkhapravacanālpāyurdehālpāyuśca rogataḥ / adharmābhiniveśitvāttamovṛttaṃ kalau smṛtam // ### [1.31.70](https://indike.org/pramana/in.purana.brahmanda.1.31.70) prajāsu bhrūṇahatyā ca tadā vairātpravarttate / tasmādāyurbalaṃ rūpaṃ kaliṃ prāpya prahīyate // ### [1.31.71](https://indike.org/pramana/in.purana.brahmanda.1.31.71) tadā cālpena kālena siddhiṃ gacchanti mānavāḥ / dhanyā dharmaṃ cariṣyanti yugānte dvijasattamāḥ // ### [1.31.72](https://indike.org/pramana/in.purana.brahmanda.1.31.72) śrutismṛtyuditaṃ dharmaṃ ye carantyanasūyakāḥ / tretāyāmābdiko dharmo dvāpare māsikaḥ smṛtaḥ // ### [1.31.73](https://indike.org/pramana/in.purana.brahmanda.1.31.73) yathāśakti caranprājñastadahnā prāpnuyātkalau / eṣā kaliyugāvasthā saṃdhyāṃśaṃ tu nibodhata // ### [1.31.74](https://indike.org/pramana/in.purana.brahmanda.1.31.74) yugeyuge tu hīyante tritripādāstu siddhayaḥ / yugasvabhāvātsaṃdhyāsu tiṣṭhantīha tu yādṛśaḥ // ### [1.31.75](https://indike.org/pramana/in.purana.brahmanda.1.31.75) saṃdhyāsvabhāvāḥ svāṃśeṣu pādaśeṣāḥ pratiṣṭhitāḥ / evaṃ saṃdhyāṃśake kāle saṃprāpte tu yugāntike // ### [1.31.76](https://indike.org/pramana/in.purana.brahmanda.1.31.76) teṣāṃ śāstā hyasādhūnāṃ bhṛgūṇāṃ nidhanotthitaḥ / gotreṇa vai candra maso nāmnā pramatirucyate // ### [1.31.77](https://indike.org/pramana/in.purana.brahmanda.1.31.77) mādhavasya tu soṃ'śena pūrvaṃ svāyaṃbhuve 'ntare / samāḥ saviṃśatiḥ pūrṇāḥ paryaṭanvai vasuṃdharām // ### [1.31.78](https://indike.org/pramana/in.purana.brahmanda.1.31.78) anukarṣansa vai senāṃ savājirathakuñjarām / pragṛhītāyudhairvipraiḥ śataśo 'tha sahasraśaḥ // ### [1.31.79](https://indike.org/pramana/in.purana.brahmanda.1.31.79) sa tadā taiḥ parivṛto mlecchānhanti smasarvaśaḥ / saha vā sarvaśaścaiva rājñastāñchūdrayonijān // ### [1.31.80](https://indike.org/pramana/in.purana.brahmanda.1.31.80) pāravaṇḍāstu tataḥ sarvān niḥ śeṣaṃ kṛtavānvibhuḥ / nātyartha dhārmikā ye ca tānsarvānhanti sarvaśaḥ // ### [1.31.81](https://indike.org/pramana/in.purana.brahmanda.1.31.81) varṇavyatyāsajātāśca ye ca tānanujīvinaḥ / udīcyānmadhyadeśyāṃśca pavatīyāṃstathaiva ca // ### [1.31.82](https://indike.org/pramana/in.purana.brahmanda.1.31.82) prācyānpratīcyāṃśca tathā vindhyapṛṣṭhacarānapi / tathaiva dākṣiṇātyāṃśca draviḍānsiṃhalaiḥ saha // ### [1.31.83](https://indike.org/pramana/in.purana.brahmanda.1.31.83) gāndhārānpāradāṃścaiva pahlavānyava nāñśakān / tuṣārānbarbarāṃścīnāñchūlikāndaradān khaśān // ### [1.31.84](https://indike.org/pramana/in.purana.brahmanda.1.31.84) laṃpākārānsakatakānkirātānāṃ ca jātayaḥ / pravṛttacakro balavānmlecchānāmantakṛtprabhuḥ // ### [1.31.85](https://indike.org/pramana/in.purana.brahmanda.1.31.85) adṛṣṭaḥ sarvabhūtānāṃ cacārātha vasundharām / mādhavasya tu soṃ'śena devasyeha vijajñivān // ### [1.31.86](https://indike.org/pramana/in.purana.brahmanda.1.31.86) pūrvajanmani vikhyātaḥ pramatirnnāma vīryavān / gotrato vai candramasaḥ pūrve kaliyuge prabhuḥ // ### [1.31.87](https://indike.org/pramana/in.purana.brahmanda.1.31.87) dvātriṃśe 'bhyudite varṣe prakrānto viṃśatīḥ samāḥ / vinighnansarvabhūtāni mānavāneva sarvaśaḥ // ### [1.31.88](https://indike.org/pramana/in.purana.brahmanda.1.31.88) kṛtvā bījāvaśeṣaṃ tu pṛthvyāṃ kūreṇa karmaṇā / paraspara nimittena kopenākasmikena tu // ### [1.31.89](https://indike.org/pramana/in.purana.brahmanda.1.31.89) susādhayitvā vṛṣalānprāyaśastānadharmikān / gaṅgāyamunayormadhye niṣṭhāṃ prāptaḥ sahānugaḥ // ### [1.31.90](https://indike.org/pramana/in.purana.brahmanda.1.31.90) tato vyatīte kalpe tu sāmānye sahasainikaḥ / utsādya pārthivānsarvānmalecchāṃścaiva sahasraśaḥ // ### [1.31.91](https://indike.org/pramana/in.purana.brahmanda.1.31.91) tatra saṃdhyāṃśake kāle saṃprāpte tu yugāntake / sthitāsvalpāvaśiṣṭāsu prajāsviha kvacitkvacit // ### [1.31.92](https://indike.org/pramana/in.purana.brahmanda.1.31.92) apagrahāstatastā vai lobhāviṣṭāstu vṛndaśaḥ / upahisaṃti cānyonyaṃ pothayantaḥ parasparam // ### [1.31.93](https://indike.org/pramana/in.purana.brahmanda.1.31.93) arājake yugavaśātsaṃkṣaye samupasthite / prajāstā vai tataḥ sarvāḥ parasparabhayārdditāḥ // ### [1.31.94](https://indike.org/pramana/in.purana.brahmanda.1.31.94) vyākulāśca paribhrāntāstyaktvā dārāngṛhāṇi ca / svānpraṇānanapekṣanto niṣkāraṇasuduḥkhitāḥ // ### [1.31.95](https://indike.org/pramana/in.purana.brahmanda.1.31.95) naṣṭe śraute smṛtau dharme parasparahatāstadā / nirmaryādā nirākrandā niḥsnehā nirapatrapāḥ // ### [1.31.96](https://indike.org/pramana/in.purana.brahmanda.1.31.96) naṣṭe dharme pratihatā hrasvakāḥ pañcaviṃśatim / hitvā putrāṃśca dārāṃśca viṣādavyākuledriyāḥ // ### [1.31.97](https://indike.org/pramana/in.purana.brahmanda.1.31.97) anāvṛṣṭihatāścaiva vārttāmutsṛjya duḥkhitāḥ / pratyantāṃstā niṣevante hitvā janapadānsvakān // ### [1.31.98](https://indike.org/pramana/in.purana.brahmanda.1.31.98) saritaḥ sāgarānūpānsevante parvatāṃstathā / māṃsairmūlaphalaiścaiva vartayantaḥ suduḥkhitāḥ // ### [1.31.99](https://indike.org/pramana/in.purana.brahmanda.1.31.99) cīrapatrācinadharā niṣkriyā niṣparigrahāḥ / varṇāśramaparibhraṣṭāḥ saṃkaraṃ ghoramāsthitāḥ / etāṃ kāṣṭhāmanuprāptā alpaśeṣāḥ prajāstataḥ // ### [1.31.100](https://indike.org/pramana/in.purana.brahmanda.1.31.100) jarāvyādhikṣudhā viṣṭā duḥkhānnirvedamāgaman / vicāraṇā tu nirvedātsāmyāvasthā vicāraṇāt // ### [1.31.101](https://indike.org/pramana/in.purana.brahmanda.1.31.101) sāmyāvasthātmako bodhaḥ saṃbodhāddharmaśīlatā / tāsūpaśamayuktāsu kaliśiṣṭāsu vai svayam // ### [1.31.102](https://indike.org/pramana/in.purana.brahmanda.1.31.102) ahorātraṃ tadā tāsāṃ yugānte parivarttini / cittasaṃmohanaṃ kṛtvā tāsāṃ vai suptamattavat // ### [1.31.103](https://indike.org/pramana/in.purana.brahmanda.1.31.103) bhāvinor'thasya ca balāttataḥ kṛtamavarttata / pravṛtte tu tatastasminpūte kṛtayuge tu vai // ### [1.31.104](https://indike.org/pramana/in.purana.brahmanda.1.31.104) utpannāḥ kaliśiṣṭāsu prajāḥ kārtayugāstadā / tiṣṭhanti ceha ye siddhā adṛṣṭā vicaranti ca // ### [1.31.105](https://indike.org/pramana/in.purana.brahmanda.1.31.105) saha saptarṣibhiścaiva tatra te ca vyavasthitāḥ / brahmakṣatraviśaḥ śūdrā bījārthaṃ ye smṛtā iha // ### [1.31.106](https://indike.org/pramana/in.purana.brahmanda.1.31.106) kalijaiḥ saha te saṃti nirviśeṣāstadābhavan / teṣāṃ saptarṣayo dharmaṃ kathayantītareṣu ca // ### [1.31.107](https://indike.org/pramana/in.purana.brahmanda.1.31.107) varṇāśramācārayuktaḥ śrautaḥ smārtto dvidhā tu saḥ / tatasteṣu kriyāvatsu vartante vai prajāḥ kṛte // ### [1.31.108](https://indike.org/pramana/in.purana.brahmanda.1.31.108) śrautasmārtte kṛtānāṃ ca dharme saptarṣidarśite / keciddharmavyavasthārthaṃ tiṣṭhantīhāyugakṣayāt // ### [1.31.109](https://indike.org/pramana/in.purana.brahmanda.1.31.109) manvantarādhikāreṣu tiṣṭhanti munayastu vai / yathā dāvapradagdheṣu tṛṇeṣviha tapena tu // ### [1.31.110](https://indike.org/pramana/in.purana.brahmanda.1.31.110) vanānāṃ prathamaṃ vṛṣṭyā teṣāṃ mūleṣu saṃbhavaḥ / tathā kārtayugānāṃ tu kalijaṣviha saṃbhavaḥ // ### [1.31.111](https://indike.org/pramana/in.purana.brahmanda.1.31.111) evaṃ yugo yugasyeha saṃtānastu parasparam / varttate hyavyavacchedādyāvanmanvantarakṣayaḥ // ### [1.31.112](https://indike.org/pramana/in.purana.brahmanda.1.31.112) sukhamāyurbalaṃ rūpandharmor'thaḥ kāma eva ca / yugeṣvetāni hīyante tritripādāḥ krameṇa ca // ### [1.31.113](https://indike.org/pramana/in.purana.brahmanda.1.31.113) sasaṃdhyāśeṣu hīyante yugānāndharmasiddhayaḥ / ityeṣa pratisaṃdhiryaḥ kīrttitastu mayā dvijāḥ // ### [1.31.114](https://indike.org/pramana/in.purana.brahmanda.1.31.114) caturyugānāṃ sarveṣāmetenaiva prasādhanam / eṣā caturyugāvṛttirāsahasradguṇīkṛtā // ### [1.31.115](https://indike.org/pramana/in.purana.brahmanda.1.31.115) brahmaṇastadahaḥ proktaṃ rātriścaitāvatī smṛtā / atrārjavaṃ jaḍībhāvo bhūtānāmāyugakṣayāt // ### [1.31.116](https://indike.org/pramana/in.purana.brahmanda.1.31.116) etadeva tu sarveṣāṃ yugānāṃ lakṣaṇaṃ smṛtam / eṣā caturyugānāṃ ca guṇitā hyekasaptatiḥ // ### [1.31.117](https://indike.org/pramana/in.purana.brahmanda.1.31.117) krameṇa parivṛttā tumanorantaramucyate / caturyuge yathaikasminbhavatīha yathā tu yat // ### [1.31.118](https://indike.org/pramana/in.purana.brahmanda.1.31.118) tathā cānyeṣu bhavati punastadvadyathākramam / sarge sarge tathā bhedā utpadyante tathaiva tu // ### [1.31.119](https://indike.org/pramana/in.purana.brahmanda.1.31.119) pañcatriṃśatparimitā na nyūnā nādhikāḥ smṛtāḥ / tathā kalpā yugaiḥ mārddhaṃ bhavanti saha lakṣaṇaiḥ / manvantarāṇāṃ sarveṣāmetadeva tu lakṣaṇam // ### [1.31.120](https://indike.org/pramana/in.purana.brahmanda.1.31.120) yathā yugānāṃ parivarttanāni cirapravṛttāni yugasvabhāvāt / tathā na saṃtiṣṭhati jīvalokaḥ kṣayodayābhyāṃ parivarttamānaḥ // ### [1.31.121](https://indike.org/pramana/in.purana.brahmanda.1.31.121) ityeta llakṣaṇaṃ proktaṃ yugānāṃ vai samāsataḥ // ### [1.31.122](https://indike.org/pramana/in.purana.brahmanda.1.31.122) atītānāgatānāṃ hi sarvamanvantaroṣviha / manvantareṇa caikena sarvāṇyevāntarāṇi vai // ### [1.31.123](https://indike.org/pramana/in.purana.brahmanda.1.31.123) khyātānīha vijānīdhvaṃ kalpaṃ kalpena caiva ha / anāgateṣu tadvacca tarkaḥ kāryo vijānatā // ### [1.31.124](https://indike.org/pramana/in.purana.brahmanda.1.31.124) manvantareṣu sarveṣu atītānāgateṣviha / tulyābhimāninaḥ sarve nāmarūpairbhavantyuta // ### [1.31.125](https://indike.org/pramana/in.purana.brahmanda.1.31.125) devā hyaṣṭavidhā ye vā iha manvantareśvarāḥ / ṛṣayo manavaścaiva sarve tulyāḥ prayojanaiḥ // ### [1.31.126](https://indike.org/pramana/in.purana.brahmanda.1.31.126) evaṃ varṇāśramāṇāṃ tu pravibhāgaṃ purā yuge / yugasvabhāvāṃśca tathā vidhatte vai sadā prabhuḥ // ### [1.31.127](https://indike.org/pramana/in.purana.brahmanda.1.31.127) varṇāśramavibhāgāśca yugāni yugasiddhayaḥ / anuṣaṅgātsamākhyātāḥ sṛṣṭisargaṃ nibodhata / vistareṇānupūrvyā ca sthitiṃ vakṣye yugeṣviha // ### [1.31.127.p1](https://indike.org/pramana/in.purana.brahmanda.1.31.127.p1) iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde caturyugākhyānaṃ nāmaikatriṃśattamo 'dhyāyaḥ ## Linked texts (5) - [Vāyupurāṇa](https://indike.org/pramana/in.purana.vayu.1.58.2) — Vyāsa, Sanskrit - [Matsyapurāṇa](https://indike.org/pramana/in.purana.matsya.144.1) — Vyāsa, Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.1.4.38.239) — Sanskrit - [Vulgate (Nīlakaṇṭha's text)](https://indike.org/pramana/in.lit.mahabharata.vyasa*vulgate.1.21.4) — Sanskrit - [Śūdrakamalākara](https://indike.org/pramana/in.niti.dharma.jati.sudrakamalakara.6.3-2) — Kamalākarabhaṭṭa, Sanskrit --- Source: [https://indike.org/pramana/in.purana.brahmanda.1.31](https://indike.org/pramana/in.purana.brahmanda.1.31) · Pramāṇa