[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.35 # Brahmandapurana 1.35 Brahmāṇḍapurāṇa 1.35 - **Language:** Sanskrit ## Contents - [1.35.215](https://indike.org/pramana/in.purana.brahmanda.1.35.215) — 1 part ### [1.35.1](https://indike.org/pramana/in.purana.brahmanda.1.35.1) sūta uvāca devamitraśca śākalyo mahātmā dvijapuṅgavaḥ / cakāra saṃhitāḥ pañca buddhimānvedavittamaḥ // ### [1.35.2](https://indike.org/pramana/in.purana.brahmanda.1.35.2) pañca tasyābhavañchiṣyā mudgalo gokhalastathā / khalīyānsutapā vatsaḥ śaiśireyaśca pañcamaḥ // ### [1.35.3](https://indike.org/pramana/in.purana.brahmanda.1.35.3) provāca saṃhitāstisraḥ śāko vaiṇo rathītaraḥ / niruktaṃ ca punaścakre caturthaṃ dvijasattamaḥ // ### [1.35.4](https://indike.org/pramana/in.purana.brahmanda.1.35.4) tasya śiṣyāstu catvāraḥ pailaścekṣalakastathā / dhīmāñcha tabalākaśca gajaścaiva dvijottamāḥ // ### [1.35.5](https://indike.org/pramana/in.purana.brahmanda.1.35.5) bāṣkalistu bharadvājastisraḥ provāca saṃhitāḥ / trayastasyābhavañcchiṣyā mahātmāno guṇānvitāḥ // ### [1.35.6](https://indike.org/pramana/in.purana.brahmanda.1.35.6) dhīmāṃśca tvāpanāpaśca pānnagāriśca buddhimān / tṛtīyaścārjavaste ca tapasā śaṃsitavratāḥ // ### [1.35.7](https://indike.org/pramana/in.purana.brahmanda.1.35.7) vītarāgā mahātejāḥ saṃhitājñānapāragāḥ / ityete bahūvṛcāḥ proktāḥ saṃhitā yaiḥ pravartitāḥ // ### [1.35.8](https://indike.org/pramana/in.purana.brahmanda.1.35.8) vaiśaṃpāyanaśiṣyo 'sau yajurvedamakalpayat / ṣaḍaśītistu tenoktāḥ saṃhitā yajuṣāṃ śubhāḥ // ### [1.35.9](https://indike.org/pramana/in.purana.brahmanda.1.35.9) śiṣyebhyaḥ pradadau tāśca jagūhuste vidhānataḥ / ekastatra parityakto yā5valkyo mahātapāḥ // ### [1.35.10](https://indike.org/pramana/in.purana.brahmanda.1.35.10) ṣaḍaśītistathā śiṣyāḥ saṃhitānāṃ vikalpakāḥ / sarveṣāmeva teṣāṃ vai tridhā bhedāḥ prakīrttitāḥ // ### [1.35.11](https://indike.org/pramana/in.purana.brahmanda.1.35.11) tridhā bhedāstu te vedabhede 'sminnavame śubhe / udīcyā madhyadeśyāśca prācyaścaiva pṛthagvidhāḥ // ### [1.35.12](https://indike.org/pramana/in.purana.brahmanda.1.35.12) śyāmāyanirudīcyānāṃ pradhānaḥ saṃbabhūva ha / madhyadeśapratiṣṭhātā cāsuriḥ prathamaḥ smṛtaḥ // ### [1.35.13](https://indike.org/pramana/in.purana.brahmanda.1.35.13) ālaṃbirādiḥ prācyānāṃ trayodeśyādayastu te / ityete carakāḥ proktāḥ saṃhitā vādino dvijāḥ // ### [1.35.14](https://indike.org/pramana/in.purana.brahmanda.1.35.14) ṛṣaya ūcuḥ carakādhvaryavaḥ kena kāraṇaṃ brūhi tattvataḥ / kiṃ cīrṇaṃ kasya vā hetoścarakatvaṃ hi bhejire // ### [1.35.15](https://indike.org/pramana/in.purana.brahmanda.1.35.15) sūta uvāca kāryamāsīdṛṣīṇāṃ ca kiñcidbrāhmaṇasattamāḥ / merupṛṣṭhaṃ samāsādya taistadā tviti mantritam // ### [1.35.16](https://indike.org/pramana/in.purana.brahmanda.1.35.16) yo vātra saptarātreṇa nāgaccheddvijasattamaḥ / sa kuryādbrahmahatyāṃ vai samayo naḥ prakīrtitaḥ // ### [1.35.17](https://indike.org/pramana/in.purana.brahmanda.1.35.17) tataste sagaṇāḥ sarve vaiśaṃpāyanavarjitāḥ / prayayuḥ saptarātreṇa yatra saṃdhiḥ kṛto 'bhavat // ### [1.35.18](https://indike.org/pramana/in.purana.brahmanda.1.35.18) brahmaṇānāṃ tu vacanādbrahmahatyāṃ cakāra saḥ / śiṣyānatha samānīya sa vaiśaṃpāyano 'bravīt // ### [1.35.19](https://indike.org/pramana/in.purana.brahmanda.1.35.19) brahmahatyāṃ caradhvaṃ vai matkṛte dvijasattamāḥ / sarve yūyaṃ samāgamya brūta kāmaṃ hitaṃ vacaḥ // ### [1.35.20](https://indike.org/pramana/in.purana.brahmanda.1.35.20) yājñavalkya uvāca ahamekaścariṣyāmi tiṣṭhantu munayastvime / balenotthāpayiṣyāmi tapasā svena bhāvitaḥ // ### [1.35.21](https://indike.org/pramana/in.purana.brahmanda.1.35.21) eva muktastataḥ kruddho yā5valkyama thātyajat / uvāca yattvayādhītaṃ sarvaṃ pratyarpayasva me // ### [1.35.22](https://indike.org/pramana/in.purana.brahmanda.1.35.22) evamuktaḥ sarūpāṇi yajūṃṣi gurave dadau / rudhireṇa tathāktāni ccharditvā brahmavittamāḥ // ### [1.35.23](https://indike.org/pramana/in.purana.brahmanda.1.35.23) tataḥ sa dhyānamāsthāya saryamārādhayaddvijaḥ / sūrye brahma yadutpannaṃ taṃ gatvā pratitiṣṭhati // ### [1.35.24](https://indike.org/pramana/in.purana.brahmanda.1.35.24) tato yāni gatānyūrdhvaṃ yajūṣyādityamaḍalam / tāni tasmai dadau tuṣṭaḥ sūryo vai brahmarātaye // ### [1.35.25](https://indike.org/pramana/in.purana.brahmanda.1.35.25) aśvarūpāya mārttaṇḍo yājñavaklyāya dhīmate / yajūṃṣyadhīyate tāni brāhmaṇā yena kenacit // ### [1.35.26](https://indike.org/pramana/in.purana.brahmanda.1.35.26) aśvarūpāya dattāni tataste vājino 'mavan / brahmahatyā tu yaiścīrṇā caraṇāccarakāḥ smṛtāḥ // ### [1.35.27](https://indike.org/pramana/in.purana.brahmanda.1.35.27) vaiśaṃpāyanaśiṣyāste carakāḥ samudāhṛtāḥ / ityete carakāḥ proktā vājinastu nibodhata // ### [1.35.28](https://indike.org/pramana/in.purana.brahmanda.1.35.28) yā5valkyasya śiṣyāste kaṇvo baudheya eva ca / madhyandinastu sāpatyo vaidheyaścāddhabauddhakau // ### [1.35.29](https://indike.org/pramana/in.purana.brahmanda.1.35.29) tāpanīyaśca vatsāśca tathā jābālakevalau / āvaṭī ca tathā puṇḍro vaiṇoyaḥ saparāśaraḥ // ### [1.35.30](https://indike.org/pramana/in.purana.brahmanda.1.35.30) ityete vājinaḥ proktā daśapañca ca sattamāḥ / śatamekādhikaṃ jñeyaṃ yajuṣāṃ ye vikalpakāḥ // ### [1.35.31](https://indike.org/pramana/in.purana.brahmanda.1.35.31) putramadhyāpayāmāsa sumantumatha jaiminiḥ / sumantuścāpi sutvānaṃ putramadhyāpayatpunaḥ // ### [1.35.32](https://indike.org/pramana/in.purana.brahmanda.1.35.32) sukarmāṇaṃ tataḥ sunvānputramadhyāpayatpunaḥ / sa sahasramadhītyāśu sukarmāpyatha saṃhitāḥ // ### [1.35.33](https://indike.org/pramana/in.purana.brahmanda.1.35.33) provācātha sahasrasya sukarmā sūryavarcasaḥ / anadhyāyeṣvadhīyānāṃstañjaghāna śatakratuḥ // ### [1.35.34](https://indike.org/pramana/in.purana.brahmanda.1.35.34) prāyopaveśamakarottato 'sau śiṣyakāramāt / kruddhaṃ dṛṣṭvā tataḥ śakrovaraṃ so 'tha punardadau // ### [1.35.35](https://indike.org/pramana/in.purana.brahmanda.1.35.35) bhaviṣyato mahāvīryauṃ śiṣyau te 'tulavarcasau / adhīyātāṃ mahāprājñau sahasraṃ saṃhitā ubhau // ### [1.35.36](https://indike.org/pramana/in.purana.brahmanda.1.35.36) ete surā mahābhāgāḥ saṃkruddhā dvijasattama / ityuktvā vāsavaḥ śrīmānsukarmāṇaṃ yaśasvinam // ### [1.35.37](https://indike.org/pramana/in.purana.brahmanda.1.35.37) śāntakrodhaṃ dvijaṃ dṛṣṭvā kṣipramantara dhātprabhuḥ / tasya śiṣyo 'bhavaddhīmān pauṣyañjirdvijasattamāḥ // ### [1.35.38](https://indike.org/pramana/in.purana.brahmanda.1.35.38) hiraṇyanābhaḥ kauśalyo dvitīyo 'bhūnnarādhipaḥ / adhyāpayata pauṣyāñjiḥ sahasrārddhaṃ tusaṃhitāḥ // ### [1.35.39](https://indike.org/pramana/in.purana.brahmanda.1.35.39) te nāmnodīcyasāmānaḥ śiṣyāḥ pauṣyañjinaḥ śubhāḥ / sattvāni pañca kauśilyaḥ saṃhitānā madhītavān // ### [1.35.40](https://indike.org/pramana/in.purana.brahmanda.1.35.40) śiṣyā hiraṇyanābhasya smṛtāstu prācyasāmagāḥ / laugākṣiḥ kuśumiścaiva kuśīdirlāṅgalistathā / pauṣyañji śiṣyāścatvārasteṣāṃ bhedānnibodhata // ### [1.35.41](https://indike.org/pramana/in.purana.brahmanda.1.35.41) nāḍāyanīyaḥ sahataṇḍiputrastasmādanovainanāmā suvidvān / sakotiputraḥ susahāḥ sunāmā caitānbhedānvittalaugākṣiṇastu // ### [1.35.42](https://indike.org/pramana/in.purana.brahmanda.1.35.42) trayastu kuśumeḥ śiṣyā aurasaḥ sa parāśaraḥ // ### [1.35.43](https://indike.org/pramana/in.purana.brahmanda.1.35.43) nābhirvittastu tejasvī trividhā kauśumāḥ smṛtāḥ / śauriṣuḥ śṛṅgiputraśca dvāvetau tu ciravratau // ### [1.35.44](https://indike.org/pramana/in.purana.brahmanda.1.35.44) rāṇāyanīyiḥ saumitriḥ sāmavedaviśāradau / provāca saṃhitāsti sraḥ śṛṅgiputrau mahātpāḥ // ### [1.35.45](https://indike.org/pramana/in.purana.brahmanda.1.35.45) vainaḥ prājīnayogaśca surālaśca dvijauttamaḥ / provāca saṃhitāḥ ṣaṭtu pārāśaryastu kauthumaḥ // ### [1.35.46](https://indike.org/pramana/in.purana.brahmanda.1.35.46) āsurāyaṇavaiśākhyau vedavṛddhaparāyaṇau / prācīnayogaputraśca buddhimāṃśca patañjaliḥ // ### [1.35.47](https://indike.org/pramana/in.purana.brahmanda.1.35.47) kauthumasya tu bhedāśca pārāśaryasya paṭ samṛtāḥ / lāṅgalaḥ śālihotraśca ṣaḍuvācātha saṃhitāḥ // ### [1.35.48](https://indike.org/pramana/in.purana.brahmanda.1.35.48) hālinirjyāmahāniśca jaiminirlomagāyaniḥ / kaṇḍuśca kohalaścaiva ṣaḍe te lāṅgalāḥ smṛtāḥ // ### [1.35.49](https://indike.org/pramana/in.purana.brahmanda.1.35.49) ete lāṅgalinaḥ śiṣyāḥ saṃhitā yaiḥ pravarttitāḥ / eko hiraṇyanābhasya kṛtaḥ śiṣyo nṛpātmajaḥ // ### [1.35.50](https://indike.org/pramana/in.purana.brahmanda.1.35.50) so 'karottu caturviśasaṃhitā dvipadāṃ varaḥ / provāca caiva śiṣyebhyo yebhyastāśca nibodhata // ### [1.35.51](https://indike.org/pramana/in.purana.brahmanda.1.35.51) rāḍiśca rāḍavīyaśca pañjamau vāhanastathā / talako māṇḍukaścaiva kāliko rājikaṃstathā // ### [1.35.52](https://indike.org/pramana/in.purana.brahmanda.1.35.52) gautamaścājabastaśca somarājāyanastataḥ / puṣṭiśca parikṛṣṭaśca ulūkhalaka eva ca // ### [1.35.53](https://indike.org/pramana/in.purana.brahmanda.1.35.53) yavīyasastu vai śālīraṅgulīyaśca kauśikaḥ / śālimañjaripākaśca śadhīyaḥ kāniniśca yaḥ // ### [1.35.54](https://indike.org/pramana/in.purana.brahmanda.1.35.54) pārāśaryastu dharmātmā iti krāntāstu sāmagāḥ / sāmagānāṃ tu sarveṣāṃ śreṣṭhau dvau parikīrttitau // ### [1.35.55](https://indike.org/pramana/in.purana.brahmanda.1.35.55) pauṣyañjiśca kṛtaścaiva saṃhitānāṃ vikalpakau / atharvāṇaṃ dvidhā kṛtvā sumanturadadāddvijāḥ // ### [1.35.56](https://indike.org/pramana/in.purana.brahmanda.1.35.56) kabandhāya punaḥ kṛṣṇaṃ sa ca vidvānyathāśrutam / kabandhastu dvidhā kṛtvā pathyāyaikaṃ punardadau // ### [1.35.57](https://indike.org/pramana/in.purana.brahmanda.1.35.57) dvitīyaṃ devadarśāyasa caturdhākarotprabhuḥ / modo brahmabalaścaiva pippalādastathaiva ca // ### [1.35.58](https://indike.org/pramana/in.purana.brahmanda.1.35.58) śaulkāyaniśca dharmajñaścaturthastapasi sthitaḥ / devadarśasya catvāraḥ śiṣyā hyete dṛḍhavratāḥ // ### [1.35.59](https://indike.org/pramana/in.purana.brahmanda.1.35.59) punaśca trividhaṃ viddhi pathyānāṃ bhedamuttamam / jājaliḥ kumudādiśca tṛtīyaḥ śaunakaḥ smṛtaḥ // ### [1.35.60](https://indike.org/pramana/in.purana.brahmanda.1.35.60) śaunakastu dvidhā kṛtvā dadāvekāntu babhrave / ddvitīyāṃ saṃhitāṃ dhīmānsaindhavāyanasaṃjñi te // ### [1.35.61](https://indike.org/pramana/in.purana.brahmanda.1.35.61) saindhavo muñjakeśyaśca bhinnāmādhāddvidhā punaḥ / nakṣatrakalpo vaitānastṛtīyaḥ saṃhitāvidhiḥ // ### [1.35.62](https://indike.org/pramana/in.purana.brahmanda.1.35.62) caturthoṃ'girasaḥ kalpaḥ śāntikalpaśca pañcamaḥ / śreṣṭhāstvatharvaṇāmete saṃhitānāṃ vikalpakāḥ // ### [1.35.63](https://indike.org/pramana/in.purana.brahmanda.1.35.63) khaḍgaḥ kṛtvā mayā yuktaṃ purāṇamṛṣisattamāḥ / ātreyaḥ sumatirdhīmānkāśyapo hyakṛtavraṇaḥ // ### [1.35.64](https://indike.org/pramana/in.purana.brahmanda.1.35.64) bhāradvājo 'gnivarcāśca vāsiṣṭhā mitrayuśca yaḥ / sāvarṇiḥ somadattiśca suśarmā śāṃśapāyanaḥ // ### [1.35.65](https://indike.org/pramana/in.purana.brahmanda.1.35.65) ete śiṣyā mama proktāḥ purāṇeṣu dhṛtavratāḥ / tribhistatra kṛtāstisraḥ saṃhitāḥ punareva hi // ### [1.35.66](https://indike.org/pramana/in.purana.brahmanda.1.35.66) kāśyapaḥ saṃhitā karttā sāvarṇiḥ śāṃśapāyanaḥ / māmikā tu caturthī syāccatasro mūlasaṃhitāḥ // ### [1.35.67](https://indike.org/pramana/in.purana.brahmanda.1.35.67) sarvāstā hi catuṣpādāḥ sarvāścaikārthavācikāḥ / pāṭhāntare vṛthābhūtā vedaśākhā yathā tathā // ### [1.35.68](https://indike.org/pramana/in.purana.brahmanda.1.35.68) catuḥ sāhasrikāḥ sarvāḥ śāṃśapāyanikāmṛte / laumaharṣaṇikā mūlā tataḥ kāśyapikā parā // ### [1.35.69](https://indike.org/pramana/in.purana.brahmanda.1.35.69) sāvarṇikā tṛtīyāsāvṛjuvākyārthamaṇḍitā / śāṃśapāyanikā cānyā nodanārthavibhūṣitā // ### [1.35.70](https://indike.org/pramana/in.purana.brahmanda.1.35.70) sahasrāṇi ṛcāṃ cāṣṭau ṣaṭśatāni tathaiva ca / etāḥ pañcadaśānyāśca daśānyā daśabhistathā // ### [1.35.71](https://indike.org/pramana/in.purana.brahmanda.1.35.71) savālakhilyāḥ saptaitāḥ sasuparṇāḥ prakīrttitāḥ / aṣṭau sāmasahasrāṇi sāmāni ca caturddaśa // ### [1.35.72](https://indike.org/pramana/in.purana.brahmanda.1.35.72) sāraṇyakaṃ sahohaṃ ca etadgāyanti sāmagāḥ / dvādaśaiva sahasrāṇi cchanda ādhvaryavaṃ smṛtam // ### [1.35.73](https://indike.org/pramana/in.purana.brahmanda.1.35.73) yajuṣāṃ brāhmaṇānāṃ ca tathā vyāso vyakalpayat / sagrāmyāraṇyakaṃ tasmātsamantrakaraṇaṃ tathā // ### [1.35.74](https://indike.org/pramana/in.purana.brahmanda.1.35.74) ataḥ paraṃ kathānaṃ tu pūrvā iti viśeṣaṇam / grāmyāraṇyaṃ samantraṃ tadṛgbrāhmaṇayajuḥ smṛtam // ### [1.35.75](https://indike.org/pramana/in.purana.brahmanda.1.35.75) tathā hāridravīryāṇāṃ khilānyupakhilānitu / tathaiva taittirīyāṇāṃ parakṣudrā iti smṛtam // ### [1.35.76](https://indike.org/pramana/in.purana.brahmanda.1.35.76) dve sahasre śatanyūne vede vājasaneyake / ṛggamaḥ parisaṃkhyāto brāhmaṇaṃ tu caturguṇam // ### [1.35.77](https://indike.org/pramana/in.purana.brahmanda.1.35.77) aṣṭau sahasrāṇi śatāni vāṣṭāvaśītiranyānyadhikāni vā ca / etatpramāṇaṃ yajuṣāmṛcāṃ ca saśukriyaṃ sakhilaṃ yājñavalkyam // ### [1.35.78](https://indike.org/pramana/in.purana.brahmanda.1.35.78) tathā cāraṇavidyānāṃ pramāṇasahitaṃ śṛṇu / ṣaṭsahasramṛcāmuktamṛcaḥ ṣaḍviṃśatiṃ punaḥ // ### [1.35.79](https://indike.org/pramana/in.purana.brahmanda.1.35.79) etāvadadhikaṃ teṣāṃ yajuḥ ki mapi vakṣyate / ekādaśasahasrāṇi ṛcaścānyā daśottarāḥ // ### [1.35.80](https://indike.org/pramana/in.purana.brahmanda.1.35.80) ṛcāṃ daśasahasrāṇi hyaśītistriṃśadeva tu / sahasramekaṃ mantrāṇāmṛcāmuktaṃ pramāṇataḥ // ### [1.35.81](https://indike.org/pramana/in.purana.brahmanda.1.35.81) etāvānṛci vistāro hyanyaccātharvikaṃ bahu / ṛcāmatharvaṇāṃ pañcasahasrāṇīti niścayaḥ // ### [1.35.82](https://indike.org/pramana/in.purana.brahmanda.1.35.82) sahasramanyadvijñeyamṛṣi bhirviśatiṃ vinā / etadaṅgirasāṃ proktaṃ teṣāmāraṇyakaṃ punaḥ // ### [1.35.83](https://indike.org/pramana/in.purana.brahmanda.1.35.83) iti saṃkhyā prasaṃkhyātā śākhābhedāstathaiva tu / kartāraśacaiva śākhānāṃ bhedahetūṃstathaiva ca // ### [1.35.84](https://indike.org/pramana/in.purana.brahmanda.1.35.84) sarvamanvantareṣvevaṃ śākhābhedāḥ samāśritāḥ / prājāpatyā śrutirnityā tadvikalpāstvime smṛtāḥ // ### [1.35.85](https://indike.org/pramana/in.purana.brahmanda.1.35.85) anityabhāvāddevānāṃ mantrotpattiḥ punaḥ punaḥ / dvāpareṣu punarbhedāḥ śrutīnāṃ parikīrttitāḥ // ### [1.35.86](https://indike.org/pramana/in.purana.brahmanda.1.35.86) evaṃ vedaṃ tadāpyasya bhagavānṛṣisattamaḥ / śiṣcebyaśca pradattvā tu tapastaptu vana gataḥ // ### [1.35.87](https://indike.org/pramana/in.purana.brahmanda.1.35.87) tasya śiṣyapraśiṣyaistu śākhābhedāstvime kṛtāḥ / aṅgāni vedāścatvāro mīmāṃsā nyāyavistaraḥ // ### [1.35.88](https://indike.org/pramana/in.purana.brahmanda.1.35.88) dharmaśāstraṃ purāṇaṃ ca vidyāścemāścaturdaśa / āyurvedo dhanurvedo gāndharvaśceti te trayaḥ // ### [1.35.89](https://indike.org/pramana/in.purana.brahmanda.1.35.89) arthaśāstraṃ caturthaṃ tu vidyā hyaṣṭādaśaiva hi / jñeyā brahmarṣayaḥ pūrvaṃ tebhyo devarṣayaḥ punaḥ // ### [1.35.90](https://indike.org/pramana/in.purana.brahmanda.1.35.90) rājarṣayaḥ punastebhya ṛṣiprakṛtayastridhā / kāśyapeṣu vasiṣṭheṣu tathā bhṛgvaṅgiro 'triṣu // ### [1.35.91](https://indike.org/pramana/in.purana.brahmanda.1.35.91) pañcasveteṣu jāyante gotreṣu brahmavādinaḥ / yasmādṛṣanti brahmāṇaṃ tato brahmarṣayaḥ smṛtāḥ // ### [1.35.92](https://indike.org/pramana/in.purana.brahmanda.1.35.92) dharmasyātha pulastyasya kratośca pulahasya ca / pratyūṣasya ca devasya kaśyapasya tathā punaḥ // ### [1.35.93](https://indike.org/pramana/in.purana.brahmanda.1.35.93) devarṣayaḥ sutāsteṣāṃ nāmatastānnibodhata / devārṣī dharmaputrau tu naranārāyaṇavubhau // ### [1.35.94](https://indike.org/pramana/in.purana.brahmanda.1.35.94) vālakhilyāḥ kratoḥ putrāḥ kardamaḥ pulahasya tu / kuberaścaiva paulastyaḥ pratyūṣasya dalaḥ suta // ### [1.35.95](https://indike.org/pramana/in.purana.brahmanda.1.35.95) nāradaḥ parvataścaiva kaśyapasyātmajāvubhau / ṛṣanti vedānyasmātte tasmāddevarṣayaḥ smṛtāḥ // ### [1.35.96](https://indike.org/pramana/in.purana.brahmanda.1.35.96) mānave caiva ye vaṃśe ailavaṃśe ca ye nṛpāḥ / ye ca aikṣvākanābhāgā jñeyā rājarṣayastu te // ### [1.35.97](https://indike.org/pramana/in.purana.brahmanda.1.35.97) ṛṣanti rañjanādyasmātprajā rājarṣayastataḥ / brahmalokapratiṣṭhāstu samṛtā brahmarṣayo 'malāḥ // ### [1.35.98](https://indike.org/pramana/in.purana.brahmanda.1.35.98) devalokapratiṣṭhāstu jñeyā devarṣayaḥ śubhāḥ / indralokapratiṣṭhāstu sarve rājarṣayo matāḥ // ### [1.35.99](https://indike.org/pramana/in.purana.brahmanda.1.35.99) abhijātyātha tapasā mantravyāharaṇaistathā / ye ca brahmarṣayaḥ proktā divyā devarṣayaśca ye // ### [1.35.100](https://indike.org/pramana/in.purana.brahmanda.1.35.100) rājarṣayastathā caiva teṣāṃ vakṣyāmi lakṣaṇam / bhūtaṃ bhavyaṃ bhavajjñānaṃ satyābhi vyātdṛtaṃ tathā // ### [1.35.101](https://indike.org/pramana/in.purana.brahmanda.1.35.101) saṃtuṣṭāśca svayaṃ ye tu saṃbuddhā ye ca vai svayam / tapaseha prasiddhā ye garbhe yaiśca praveditam // ### [1.35.102](https://indike.org/pramana/in.purana.brahmanda.1.35.102) mantravyāhāriṇo ye ca aiśvaryātsarvagāśca ye / ete rājarṣayo yuktā devādvijanṛpāśca ye // ### [1.35.103](https://indike.org/pramana/in.purana.brahmanda.1.35.103) etānbhāvānadhigatā ye vai ta ṛṣayo matāḥ / saptaite saptabhiścaiva guṇaiḥ saptarṣayaḥ smṛtāḥ // ### [1.35.104](https://indike.org/pramana/in.purana.brahmanda.1.35.104) dīrghāyuṣo mantrakṛta īśvarāddivyacakṣuṣaḥ / buddhāḥ pratyakṣa dharmāṇo gotraprāvarttakāśca te // ### [1.35.105](https://indike.org/pramana/in.purana.brahmanda.1.35.105) ṣaṭkarmaniratā nityaṃ śālīnā gṛhamedhinaḥ / tulyairvyavaharanti sma hyaduṣṭaiḥ karmahetubhiḥ // ### [1.35.106](https://indike.org/pramana/in.purana.brahmanda.1.35.106) agrāmyairvarttayanti sma rasaiścaiva svayaṅkṛtaiḥ / kuṭuṃbino buddhimanto vanāntaranivāsinaḥ // ### [1.35.107](https://indike.org/pramana/in.purana.brahmanda.1.35.107) kṛtādiṣu yugākhyāsu sarvaireva punaḥ punaḥ / varṇāśramavyavasthānaṃ kriyate prathamaṃ tu vai // ### [1.35.108](https://indike.org/pramana/in.purana.brahmanda.1.35.108) prāpte tretāyugamukhe punaḥ saptarṣayastviha / pravarttayanti ye varṇānāśramāṃścaiva sarvaśaḥ // ### [1.35.109](https://indike.org/pramana/in.purana.brahmanda.1.35.109) teṣāmevānvaye vīrā utpadyante punaḥ punaḥ / jāyamāne pitāputre putraḥ pitari caiva hi // ### [1.35.110](https://indike.org/pramana/in.purana.brahmanda.1.35.110) evaṃ saṃtatya vicchedādvartayantyāyugakṣayāt / aṣṭāśītisahasrāṇi proktāni gṛhamedhinām // ### [1.35.111](https://indike.org/pramana/in.purana.brahmanda.1.35.111) aryamṇo dakṣiṇaṃ ye tu pitṛyānaṃ samāśritāḥ / dārāgnihotriṇaste vai yai prajāhetavaḥ smṛtāḥ // ### [1.35.112](https://indike.org/pramana/in.purana.brahmanda.1.35.112) gṛhamedhinastvasaṃkhyeyāḥ śmaśānānyāśrayanti te / aṣṭāśītisahasrāṇi nihitā uttarāpathe // ### [1.35.113](https://indike.org/pramana/in.purana.brahmanda.1.35.113) ye śrūyante divaṃ prāptā ṛṣayo hyūrdhvaretasaḥ / mantrabrāhmaṇakarttāro jāyante ca yugakṣayāt // ### [1.35.114](https://indike.org/pramana/in.purana.brahmanda.1.35.114) evamāvarttamānāstedvāpareṣu punaḥ punaḥ / kalpānāmārṣavidyānāṃ nānāśāstrakṛtaśca ye // ### [1.35.115](https://indike.org/pramana/in.purana.brahmanda.1.35.115) kriyate yairvyavatdṛtirvaidikānāṃ ca karmaṇām / vaivasvate 'ntare tasmindvāpareṣu punaḥ punaḥ // ### [1.35.116](https://indike.org/pramana/in.purana.brahmanda.1.35.116) aṣṭāviṃśatikṛtvo vai vedā vyastā maharṣibhiḥ / saptame dvāpare vyamatāḥ svayaṃ vedāḥ svayaṃbhuvā // ### [1.35.117](https://indike.org/pramana/in.purana.brahmanda.1.35.117) dvitīye dvāpare caiva vedavyāsaḥ prajāpatiḥ / tṛtīye cośanā vyāsaścaturthe ca bṛhaspatiḥ // ### [1.35.118](https://indike.org/pramana/in.purana.brahmanda.1.35.118) savitā pañcame vyāso mṛtyuḥ ṣaṣṭhe smṛtaḥ prabhuḥ / saptame ca tathaivendro vasiṣṭhaścāṣṭame smṛtaḥ // ### [1.35.119](https://indike.org/pramana/in.purana.brahmanda.1.35.119) sārasvatastu navame tridhāmā daśame smṛtaḥ / ekādaśe tu trivarṣā sanadvājastataḥ param // ### [1.35.120](https://indike.org/pramana/in.purana.brahmanda.1.35.120) trayodaśe cāntarikṣo dharmaścāpi caturdaśe / traiyyāruṇiḥ pañcadaśe ṣoḍaśe tu dhanañjayaḥ // ### [1.35.121](https://indike.org/pramana/in.purana.brahmanda.1.35.121) kṛtañjayaḥ saptadaśe ṛjīṣo 'ṣṭādaśe smṛtaḥ / ṛjīṣāttu bharadvājo bharadvājāttu gautamaḥ // ### [1.35.122](https://indike.org/pramana/in.purana.brahmanda.1.35.122) gautamāduttamaścaiva tato haryavanaḥ smṛtaḥ / haryavanātparo venaḥ smṛto vājaśravāstataḥ // ### [1.35.123](https://indike.org/pramana/in.purana.brahmanda.1.35.123) arvākca vājaśravasaḥ somamukhyāyanastataḥ / tṛṇabindustatastasmāttatajastṛṇabindutaḥ // ### [1.35.124](https://indike.org/pramana/in.purana.brahmanda.1.35.124) tatajācca smṛtaḥ śaktiḥ śakteścāpi parāśaraḥ / jātūkarṇo bhavattasmātta smāddvaipāyanaḥ smṛtaḥ // ### [1.35.125](https://indike.org/pramana/in.purana.brahmanda.1.35.125) aṣṭāviṃśatirityete vedavyāsāḥ purātanāḥ / bhaviṣye dvāpare caiva dvoṇirdvaipāyane 'pi ca // ### [1.35.126](https://indike.org/pramana/in.purana.brahmanda.1.35.126) vedavyāse hyatīte 'sminbhavitā sumahātapāḥ / bhaviṣyanti bhaviṣyeṣu śākhāpramayanāni tu // ### [1.35.127](https://indike.org/pramana/in.purana.brahmanda.1.35.127) tasyaiva brahmaṇo brahma tapasaḥ prāptamavyayam / tapasā karma ca prāptaṃ karmaṇā cāpi te yaśaḥ // ### [1.35.128](https://indike.org/pramana/in.purana.brahmanda.1.35.128) punaśca tejasā satyaṃ satyenānandamavyayam / vyāptaṃ brahmāmṛtaṃ śukraṃ brahmaivāmṛtamucyate // ### [1.35.129](https://indike.org/pramana/in.purana.brahmanda.1.35.129) dhruvamekākṣaramidamomityeva vyavasthitam / bṛhatvādbṛṃhaṇāccaiva tadbrahmetyabhidhīyate // ### [1.35.130](https://indike.org/pramana/in.purana.brahmanda.1.35.130) pramavā vasthitaṃ bhūyo bhūrbhuvaḥ svariti smṛtam / atharvaṛgyajuḥ sāmni yattasmai brahmaṇe namaḥ // ### [1.35.131](https://indike.org/pramana/in.purana.brahmanda.1.35.131) jagataḥ pralayotpattau yattatkāraṇasaṃjñitam / mahataḥ paramaṃ guhyaṃ tasmai subrahmaṇe namaḥ // ### [1.35.132](https://indike.org/pramana/in.purana.brahmanda.1.35.132) agādhāpāramakṣayyaṃ jagatsaṃbohasaṃbhavam / saṃprakāśapravṛttibhyāṃ puruṣārthaprayojanam // ### [1.35.133](https://indike.org/pramana/in.purana.brahmanda.1.35.133) sāṃkhyajñānavatāṃ niṣṭhā gatiḥ śamadamātmanām / yattadavyaktamataṃ prakṛtirbrahma śāśvatam // ### [1.35.134](https://indike.org/pramana/in.purana.brahmanda.1.35.134) pradhānamātmayoniśca gṛhyaṃ sattvaṃ ca śasyate / avibhāgastathā śukramakṣaraṃ bahudhātmakam // ### [1.35.135](https://indike.org/pramana/in.purana.brahmanda.1.35.135) paramabrahmaṇe tasmai nityameva namonamaḥ / kṛte punaḥ kriyā nāsti kuta evākṛtakriyāḥ // ### [1.35.136](https://indike.org/pramana/in.purana.brahmanda.1.35.136) sakṛdeva kṛtaṃ sarvaṃ yadvai loke kṛtākṛtam / śrotavyaṃ vā śrutaṃ vāpi tathaivāsādhu sādhu vā // ### [1.35.137](https://indike.org/pramana/in.purana.brahmanda.1.35.137) jñātavyaṃ vāpyamantavyaṃ sapraṣṭavyaṃ bhojyameva ca / draṣṭavyaṃ vātha śrotavyaṃ ghrātavyaṃ vā kathañcana // ### [1.35.138](https://indike.org/pramana/in.purana.brahmanda.1.35.138) darśitaṃ yadanenaiva jñātaṃ tadvai surarṣibhiḥ / yanna darśitavāneṣa kastadanveṣṭumarhati // ### [1.35.139](https://indike.org/pramana/in.purana.brahmanda.1.35.139) sarvāṇi sarvaṃ sarvāṃśca bhagavāneva so 'bravīt / yadā yatkriyate yena tadā tasmo 'bhimanyate // ### [1.35.140](https://indike.org/pramana/in.purana.brahmanda.1.35.140) yatredaṃ kriyate pūrvaṃ na tadanyena bhāṣitam / yadā ca kriyate kiñcitkenacidvā kathaṃ kvacit // ### [1.35.141](https://indike.org/pramana/in.purana.brahmanda.1.35.141) tanaiva tatkṛtaṃ kṛtyaṃ karttṝṇāṃ pratibhāti vai / viriktaṃ cātiriktaṃ ca jñānājñānepriyāpriye // ### [1.35.142](https://indike.org/pramana/in.purana.brahmanda.1.35.142) dharmādharmauṃ suśaṃ duḥkhaṃ mṛtyuścāmṛtameva ca / ūrddhvaṃ tiryyagadhobhāvastasyaivādṛṣṭakāriṇaḥ // ### [1.35.143](https://indike.org/pramana/in.purana.brahmanda.1.35.143) svayaṃbhuvo 'tha jyeṣṭhasya brahmaṇaḥ parameṣṭhinaḥ / pratyekavedyaṃbhavati tretāsviha punaḥ punaḥ // ### [1.35.144](https://indike.org/pramana/in.purana.brahmanda.1.35.144) vyasyate hyekavedyaṃ tu dvāpareṣu punaḥ punaḥ / brahmā caitānuvācādau tasminvaivasvate 'ntare // ### [1.35.145](https://indike.org/pramana/in.purana.brahmanda.1.35.145) āvarttamānā ṛṣayo yugākhyāsu punaḥ punaḥ / kurvanti saṃhitā hyete jāyamānāḥ parasparam // ### [1.35.146](https://indike.org/pramana/in.purana.brahmanda.1.35.146) aṣṭāśītisahasrāṇi śrutarṣīṇāṃ samṛtāni vai / atīteṣu vyatītāni varttante punaḥ punaḥ // ### [1.35.147](https://indike.org/pramana/in.purana.brahmanda.1.35.147) śritā dakṣiṇapanthānaṃ ye śmaśānāni bhejire / yuge yuge tu tāḥ śākhā vyasyante tai punaḥ punaḥ // ### [1.35.148](https://indike.org/pramana/in.purana.brahmanda.1.35.148) dvāpareṣviha sarveṣu saṃhitāstu śrutarṣibhiḥ / teṣāṃ gotreṣvimāḥ śākhā bhavanti hi punaḥ punaḥ // ### [1.35.149](https://indike.org/pramana/in.purana.brahmanda.1.35.149) tāḥ śākhāste ca karttāro bhavaṃ tīhāyugakṣayāt / evameva tu vijñeyā atītānāgateṣvapi // ### [1.35.150](https://indike.org/pramana/in.purana.brahmanda.1.35.150) manvantareṣu sarveṣu śākhāpraṇayanāni vai / atīteṣu vyatītāni varttante sāṃprate 'ntare // ### [1.35.151](https://indike.org/pramana/in.purana.brahmanda.1.35.151) bhaviṣyanti ca yāni syurvartsyante 'nāgateṣvapi / pūrveṇa paścimaṃ jñeyaṃ vartamānena cobhayam // ### [1.35.152](https://indike.org/pramana/in.purana.brahmanda.1.35.152) etena kramayogena manvantaraviniścayaḥ / evaṃ devāḥ sapitara ṛṣayo manavaśca vai // ### [1.35.153](https://indike.org/pramana/in.purana.brahmanda.1.35.153) mantraiḥ sahordhvaṃ gacchanti hyāvarttante ca taiḥ saha / janalokātsurāḥ sarve daśakalpānpunaḥ punaḥ // ### [1.35.154](https://indike.org/pramana/in.purana.brahmanda.1.35.154) paryāyakāle saṃprāpte saṃbhūtā nidhanasya te / avaśyabhāvinār'thena saṃbhadhyante tadā tu te // ### [1.35.155](https://indike.org/pramana/in.purana.brahmanda.1.35.155) tataste doṣavajjanma paśyanto rogapūrvakam / nivarttate tadā vṛttiḥ sā teṣāṃ doṣadarśanāt // ### [1.35.156](https://indike.org/pramana/in.purana.brahmanda.1.35.156) evaṃ devayugānīha daśakṛtvo vivartya vai / janalokāttapolokaṃ gacchantīhānivarttakam // ### [1.35.157](https://indike.org/pramana/in.purana.brahmanda.1.35.157) evaṃ devayugānīha vyatī tāni sahasraśaḥ / nidhanaṃ brahmaloke vai gatāni ṛṣibhiḥ saha // ### [1.35.158](https://indike.org/pramana/in.purana.brahmanda.1.35.158) na śakya ānupūrvyeṇa teṣāṃ vaktuṃ suvistaraḥ / anāditvācca kālasya saṃkhyānāṃ caiva sarvaśaḥ // ### [1.35.159](https://indike.org/pramana/in.purana.brahmanda.1.35.159) manvantarāṇyatītāni yāni kalpaiḥ purā saha / pitṛbhirmunibhirdevaiḥ sārddhaṃ ca ṛṣibhiḥ saha // ### [1.35.160](https://indike.org/pramana/in.purana.brahmanda.1.35.160) kālena pratisṛṣṭāni yugānāṃ ca vivarttanam / etena kramayogena kalpamanvantarāṇi ca // ### [1.35.161](https://indike.org/pramana/in.purana.brahmanda.1.35.161) saprajāni vyatītāni śataśo 'tha sahasraśaḥ / manvantarānte saṃhāraḥ saṃhārānte ca saṃbhavaḥ // ### [1.35.162](https://indike.org/pramana/in.purana.brahmanda.1.35.162) devatānāmṛṣīṇāṃ ca manoḥ pitṛgaṇasya ca / na śakya ānupūrvyeṇa vaktuṃ varṣaśatairapi // ### [1.35.163](https://indike.org/pramana/in.purana.brahmanda.1.35.163) vistarastu nisargasya saṃhārasya ca sarvaśaḥ / manvantarasya saṃkhyā tu mānuṣeṇa nibodhata // ### [1.35.164](https://indike.org/pramana/in.purana.brahmanda.1.35.164) manvantarāstu saṃkhyātāḥ saṃkhyānārthaviśāradaiḥ / triṃśatkoṭyastu saṃpūrṇā saṃkhyātāḥ saṃkhyāyā dvijaiḥ // ### [1.35.165](https://indike.org/pramana/in.purana.brahmanda.1.35.165) saptaṣaṣṭistanthānyāni niyutāni ca saṃkhyāyā / viṃśatiśca sahasrāmi kālo 'yaṃ sādhikaṃ vinā // ### [1.35.166](https://indike.org/pramana/in.purana.brahmanda.1.35.166) manvantarasya saṃkhyeyaṃ mānuṣeṇa prakīrttitā / varṣāgreṇāpi divyena pravakṣyāmyuttaraṃ manoḥ // ### [1.35.167](https://indike.org/pramana/in.purana.brahmanda.1.35.167) aṣṭau śatasahasrāṇi divyayā saṃkhyayā smṛtam / dvipañcāśattathānyāni sahasrāṇyadhikāni tu // ### [1.35.168](https://indike.org/pramana/in.purana.brahmanda.1.35.168) caturdaśaguṇo hyeṣa kālo hyābhūtasaṃplavam / pūrṇaṃ yugasahasraṃ syāttadaharbrahmaṇaḥ smṛtam // ### [1.35.169](https://indike.org/pramana/in.purana.brahmanda.1.35.169) tataḥ sarvāṇi bhūtāni dagdhānyādityaraśmibhiḥ / brahmāṇāmagrataḥ kṛtvā saha devarṣidānavaiḥ // ### [1.35.170](https://indike.org/pramana/in.purana.brahmanda.1.35.170) praviśanti suraśreṣṭhaṃ devaṃ nārāyaṇaṃ prabhum / sa sraṣṭā sarva bhūtānāṃ kalpādiṣu punaḥ punaḥ // ### [1.35.171](https://indike.org/pramana/in.purana.brahmanda.1.35.171) ityeṣa sthitikālo vai mato devarṣibhiḥ saha / sarvamanvantarāṇāṃ hi pratisaṃdhiṃ nibodhata // ### [1.35.172](https://indike.org/pramana/in.purana.brahmanda.1.35.172) yugakhyā yā samuddiṣṭā prāgetasminmayānaghāḥ / kṛtatretādisaṃyuktaṃ caturyugamiti smṛtam // ### [1.35.173](https://indike.org/pramana/in.purana.brahmanda.1.35.173) taccaikasaptatiguṇaṃ parivṛttaṃ tu sādhikam / manoretamadhīkāraṃ provāca bhagavānprabhuḥ // ### [1.35.174](https://indike.org/pramana/in.purana.brahmanda.1.35.174) evaṃ manvantarāṇāṃ ca sarveṣāmeva lakṣaṇam / atītānāgatānāṃ vai varttimānena kīrttitam // ### [1.35.175](https://indike.org/pramana/in.purana.brahmanda.1.35.175) ityeṣa kīttitaḥ sargo manoḥ svāyaṃbhuvasya te / pratisaṃdhiṃ tu vakṣyāmi tasya caivāparasya ca // ### [1.35.176](https://indike.org/pramana/in.purana.brahmanda.1.35.176) manvantaraṃ yathā pūrvamṛṣibhirdaivataiḥ saha / avaśyabhāvinārthena yathāvadvinivarttate // ### [1.35.177](https://indike.org/pramana/in.purana.brahmanda.1.35.177) etasminnantare pūrvaṃ trailākyasye śvarāstu ye / saptarṣayaśca devāśca pitaro manavastathā // ### [1.35.178](https://indike.org/pramana/in.purana.brahmanda.1.35.178) manvantarasya kāle tu saṃpūrṇe sādhike tadā / kṣīṇe 'dhikāre saṃvignā buddhvā paryayamātmanaḥ // ### [1.35.179](https://indike.org/pramana/in.purana.brahmanda.1.35.179) maharlokāya te sarve unmukhā dadhire matim / tato manvantare tasminprakṣīṇe devatāstu tāḥ // ### [1.35.180](https://indike.org/pramana/in.purana.brahmanda.1.35.180) saṃpūrṇesthitikāle tu tiṣṭhedekaṃ kṛtaṃ yugam / utpadyante bhaviṣyanto ye vai manvantareśvarāḥ // ### [1.35.181](https://indike.org/pramana/in.purana.brahmanda.1.35.181) devatāḥ pitaraścaiva ṛṣayo manureva ca / manvantare tu saṃpūrṇe tadvadante kalau yuge // ### [1.35.182](https://indike.org/pramana/in.purana.brahmanda.1.35.182) saṃpadyate kṛtaṃ teṣu kaliśiṣṭeṣu vai tadā / yathā kṛtasya saṃtānaḥ kalipūrvaḥ smṛto budhaiḥ // ### [1.35.183](https://indike.org/pramana/in.purana.brahmanda.1.35.183) tathā manvantarānteṣu ādirmanvantarasya ca / kṣīṇe manvantare pūrve pravṛtte cāpare punaḥ // ### [1.35.184](https://indike.org/pramana/in.purana.brahmanda.1.35.184) mukhe kṛtayugasyātha teṣāṃ śiṣṭāstu ye tadā / saptarṣayo manuścaiva kālāpekṣāstu ye sthitāḥ // ### [1.35.185](https://indike.org/pramana/in.purana.brahmanda.1.35.185) manvantarapratīkṣāste kṣīyamāṇāstapasvinaḥ / manvantarotsavasyārthe saṃtatyarthe ca sarvadā // ### [1.35.186](https://indike.org/pramana/in.purana.brahmanda.1.35.186) pūrvavatsaṃpravarttante pravṛtte vṛṣṭisarjane / dvandveṣu saṃpravṛtteṣu utpannāsvauṣadhīṣu ca // ### [1.35.187](https://indike.org/pramana/in.purana.brahmanda.1.35.187) prajāsu cāniketāsu saṃsthitāsu kvacitkvacit / vārttāyāṃ saṃpravṛttāyāṃ dharme caivopasaṃsthite // ### [1.35.188](https://indike.org/pramana/in.purana.brahmanda.1.35.188) nirānande cāpi loke naṣṭe sthāvarajaṅgame / agrāmanagare caiva varṇāśramavivarjite // ### [1.35.189](https://indike.org/pramana/in.purana.brahmanda.1.35.189) pūrvamanvantare śiṣṭā ye bhavantīha dhārmikāḥ / saptarṣayo manuścaiva saṃtānārthaṃ vyavasthitāḥ // ### [1.35.190](https://indike.org/pramana/in.purana.brahmanda.1.35.190) prajārthaṃ tapatāṃ teṣāṃ tapaḥ paramaduścaram / utpadyante hi pūrveṣāṃ nidhaneṣviha pūrvavat // ### [1.35.191](https://indike.org/pramana/in.purana.brahmanda.1.35.191) devāsurāḥ pitṛgaṇā ṛṣayo mānuṣāstathā / sarpā bhūtapiśācāśca gandharvā yakṣarākṣasāḥ // ### [1.35.192](https://indike.org/pramana/in.purana.brahmanda.1.35.192) tatasteṣāṃ tu ye śiṣṭāḥ śiṣṭācārānprajakṣate / saptarṣayo manuścava hyādau manvantarasya hi // ### [1.35.193](https://indike.org/pramana/in.purana.brahmanda.1.35.193) prārabhante ca karmāṇi manuṣyo daivataiḥ saha / ṛṣīṇāṃ brahmacaryeṇa gatvānṛṇyaṃ tu va tadā // ### [1.35.194](https://indike.org/pramana/in.purana.brahmanda.1.35.194) pitṝṇāṃ prajāyā caiva devānāmijyayā tathā / śataṃvarṣasahasrāṇāṃ dharme varṇātmake sthitāḥ // ### [1.35.195](https://indike.org/pramana/in.purana.brahmanda.1.35.195) trayī vārttā daṇḍanītirdharmānvarṇāśramāṃstathā / sthāpayitvāśramāṃścaiva svargāya dedhire manaḥ // ### [1.35.196](https://indike.org/pramana/in.purana.brahmanda.1.35.196) pūrvadeveṣu teṣvevaṃ svargāyā bhimukheṣu vai / pūrvadevāstataste vai sthitā dharmeṇa kṛtsnaśaḥ // ### [1.35.197](https://indike.org/pramana/in.purana.brahmanda.1.35.197) manvantare purāvṛtte sthānānyutsṛjya sarvaśaḥ / mantraiḥ sahordhvaṃ gacchanti maharlokamanāmayam // ### [1.35.198](https://indike.org/pramana/in.purana.brahmanda.1.35.198) vinivṛttādhikārāste mānasīṃ siddhimāsthitāḥ / avekṣamāṇā vaśinastiṣṭhantyā bhūtasaṃplavāt // ### [1.35.199](https://indike.org/pramana/in.purana.brahmanda.1.35.199) tatasteṣu vyatīteṣu pūrvadeveṣu vai tadā / śūnyeṣu devasthāneṣu trailokye teṣu sarvaśaḥ // ### [1.35.200](https://indike.org/pramana/in.purana.brahmanda.1.35.200) upasthitā ihānye vai ye devāḥ svargavāsinaḥ / tataste tapasā yuktāḥ sthānānyāpūrayanti ca // _First 200 of 217 passages. [Read on](https://indike.org/pramana/in.purana.brahmanda.1.35)_ ## Linked texts (8) - [Vāyupurāṇa](https://indike.org/pramana/in.purana.vayu.1.60.67) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.3.4.21) — Sanskrit - [Nandipurāṇa](https://indike.org/pramana/in.purana.upa.saiva.nandi.1.7-3.21) — Sanskrit - [Narasiṃhapurāṇa](https://indike.org/pramana/in.purana.upa.vaisnava.narasimha.2.19) — Sanskrit - [Kālahastīśavilāsa](https://indike.org/pramana/in.lit.kavya.mahakavya.saiva.kalahastisavilasa.2.79) — Sanskrit - [Caturvargacintāmaṇi](https://indike.org/pramana/in.niti.dharma.nibandha.mahanibandha.caturvargacintamani.83.p22) — Hemādri, Sanskrit - [Ṣoḍaśamahādānavidhi (Hemādri)](https://indike.org/pramana/in.niti.dharma.dana.mahadana.sodasamahadanavidhi-hemadri.83.p22) — Hemādri, Sanskrit - [Dānakhaṇḍa](https://indike.org/pramana/in.niti.dharma.nibandha.hemadri.danakhanda.91.p27) — Hemādri, Sanskrit --- Source: [https://indike.org/pramana/in.purana.brahmanda.1.35](https://indike.org/pramana/in.purana.brahmanda.1.35) · Pramāṇa