[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.37 # Brahmandapurana 1.37 Brahmāṇḍapurāṇa 1.37 - **Language:** Sanskrit ## Contents - [1.37.60](https://indike.org/pramana/in.purana.brahmanda.1.37.60) — 1 part ### [1.37.1](https://indike.org/pramana/in.purana.brahmanda.1.37.1) sūta uvāca āsīdiha samudrāntā vasudheti yathā śrutam / vasu dhatte yatastasmādvasudhā seti gīyate // ### [1.37.2](https://indike.org/pramana/in.purana.brahmanda.1.37.2) madhukaiṭabhayoḥ pūrvaṃ medasā saṃpariplutā / teneyaṃ medinītyuktā niruktyā brahmavādibhiḥ // ### [1.37.3](https://indike.org/pramana/in.purana.brahmanda.1.37.3) tato 'bhyupagamādrājñaḥ pṛthorvainyasya dhīmataḥ / duhitṛtvamanuprāptā pṛthivī paṭhyate tataḥ // ### [1.37.4](https://indike.org/pramana/in.purana.brahmanda.1.37.4) pṛthunā pravibhāgaścadharāyāḥ sādhitaḥ purā / tasyākaravatī rājñaḥ pattanākaramālinī // ### [1.37.5](https://indike.org/pramana/in.purana.brahmanda.1.37.5) cāturvarṇamayasamākīrṇā rakṣitā tena dhīmatā / evaṃprabhāvorājāsīdvainyaḥ sadvijasattamāḥ // ### [1.37.6](https://indike.org/pramana/in.purana.brahmanda.1.37.6) namasyaścaiva pūcyaśca bhūtagrāmeṇa sarvaśaḥ / brāhmaṇaiśca mahābhāgairvedavedāṅgapāragaiḥ // ### [1.37.7](https://indike.org/pramana/in.purana.brahmanda.1.37.7) pṛthureva namaskāryo brahmayoniḥ sanātanaḥ / pārthivaiśca mahābhāgaiḥ prārthayadbhirmahadyaśaḥ // ### [1.37.8](https://indike.org/pramana/in.purana.brahmanda.1.37.8) ādirājo namaskāryaḥ pṛthurvainyaḥ pratāpavān / yodhairapi ca saṃgrāme prāptukāmairjayaṃ yudhi // ### [1.37.9](https://indike.org/pramana/in.purana.brahmanda.1.37.9) ādikarttāraṇānāṃ vai namasyaḥ pṛthureva hi / yo hi yoddhā raṇaṃ yāti kīrttayitvā pṛthuṃ nṛpam // ### [1.37.10](https://indike.org/pramana/in.purana.brahmanda.1.37.10) sa ghorarūpātsaṃgrāmātkṣemī tarati kīrttimān / vaiśyairapi ca rājarṣirveśyavṛttimihāsthitaiḥ // ### [1.37.11](https://indike.org/pramana/in.purana.brahmanda.1.37.11) pṛthureva namaskāryo vṛttidānānmahāyaśāḥ / ete vatsaviśeṣāśca dogdhāraḥ kṣīrameva ca // ### [1.37.12](https://indike.org/pramana/in.purana.brahmanda.1.37.12) pātrāṇi ca mayoktāni sarvāṇyeva yathākramam / brahmaṇā prathamaṃ dugdhā purā pṛthvī mahātmanā // ### [1.37.13](https://indike.org/pramana/in.purana.brahmanda.1.37.13) vāyuṃ kṛtvā tathā vatsaṃ bījāni vasudhātale / tataḥ svāyaṃbhuve pūrvaṃ tadā manvantare punaḥ // ### [1.37.14](https://indike.org/pramana/in.purana.brahmanda.1.37.14) vatsaṃ svāyaṃbhuvaṃ kṛtvā sarvasasyāni caiva hi / tataḥ svārociṣe vāpi prāpte manvantare 'dhunā // ### [1.37.15](https://indike.org/pramana/in.purana.brahmanda.1.37.15) vatsaṃ svārociṣaṃ kṛtvā dugdhā sasyāni medinī / uttamena tu tenāpi dugdhā devānu jena tu // ### [1.37.16](https://indike.org/pramana/in.purana.brahmanda.1.37.16) manuṃ kṛtvottamaṃ vatsaṃ sarvasasyāni dhīmatā / punaśca pañcame pṛthvī tāmasasyāntare manoḥ // ### [1.37.17](https://indike.org/pramana/in.purana.brahmanda.1.37.17) dugdheyaṃ tāmasaṃ vatsaṃ kṛtvā vai balabandhunā / cāriṣṭavasya vai ṣaṣṭhe saṃprāpte cāntare manoḥ // ### [1.37.18](https://indike.org/pramana/in.purana.brahmanda.1.37.18) dugdhā mahī purāṇena vatsaṃ cāriṣṭavaṃ prati / cākṣuṣe cāpi saṃprāpte tadā manvantare punaḥ // ### [1.37.19](https://indike.org/pramana/in.purana.brahmanda.1.37.19) dugdhā mahī purāṇena vatsaṃ kṛtvā tu cākṣuṣam / cākṣuṣasyāntare 'tīte prāpte vaivasvate punaḥ // ### [1.37.20](https://indike.org/pramana/in.purana.brahmanda.1.37.20) vainyeneyaṃ purā dugdhā yathā te kathitaṃ mayā / etairdugdhā purā pṛthvī vyatīteṣvantareṣu vai // ### [1.37.21](https://indike.org/pramana/in.purana.brahmanda.1.37.21) devādibhirmanuṣyaiśca tato bhūtādibhiśca ha / evaṃ sarveṣu vijñeyā atītānāgateṣviha // ### [1.37.22](https://indike.org/pramana/in.purana.brahmanda.1.37.22) devā manvantare svasthāḥ pṛthostu śṛṇuta prajāḥ / pṛthostu putrau vikrāntau jajñāte 'ntarddhipāṣanau // ### [1.37.23](https://indike.org/pramana/in.purana.brahmanda.1.37.23) śikhaṇḍinī havirdhānamantarddhānāvdyajāyata / havirdhānātṣaḍāgneyī dhiṣaṇājanayatsutān // ### [1.37.24](https://indike.org/pramana/in.purana.brahmanda.1.37.24) prācīnabarhiṣaṃ śuklaṃ gayaṃ kṛṣṇaṃ prajācinau / prācīnabarhirbhagavānmahānāsītprajāpatiḥ // ### [1.37.25](https://indike.org/pramana/in.purana.brahmanda.1.37.25) balaśrutatapovīryaiḥ pṛthivyāmekarāḍasau / prācīnāgrāḥ kuśāstasya tasmātprācīnabarhyasau // ### [1.37.26](https://indike.org/pramana/in.purana.brahmanda.1.37.26) samudratanayāyāṃ tu kṛtadāraḥ sa vai prabhuḥ / mahatastapasaḥ pāre savarṇāyāṃ prajāpatiḥ // ### [1.37.27](https://indike.org/pramana/in.purana.brahmanda.1.37.27) savarṇādhatta sāmudrī daśa prācīnabarhiṣaḥ / sarvānpracetaso nāma dhanurvedasya pāragān // ### [1.37.28](https://indike.org/pramana/in.purana.brahmanda.1.37.28) apṛthagdharmacaraṇāste 'tapyanta mahāttapaḥ / daśavarṣa sahasrāṇi samudrasalileśayāḥ // ### [1.37.29](https://indike.org/pramana/in.purana.brahmanda.1.37.29) tapaścateṣu pṛthivīṃ tapyatsvatha mahīruhāḥ / arakṣyamāṇāmāvabrurbabhūvātha prajākṣayaḥ // ### [1.37.30](https://indike.org/pramana/in.purana.brahmanda.1.37.30) pratyāhṛte tadā tasmiñcākṣuṣasyāntare manoḥ / nāśakanmāruto vātuṃ vṛttaṃ khamabhavaddrumaiḥ // ### [1.37.31](https://indike.org/pramana/in.purana.brahmanda.1.37.31) daśavarṣasahasrāṇi na śekuśceṣṭituṃ prajāḥ / tadupaśrutya tapasā sarve yuktāḥ pracetasaḥ // ### [1.37.32](https://indike.org/pramana/in.purana.brahmanda.1.37.32) mukhebhyo vāyumagniṃ ca sasṛjurjātamanyavaḥ / unmūlānatha vṛkṣāṃstānkṛtvā vāyuraśoṣayat // ### [1.37.33](https://indike.org/pramana/in.purana.brahmanda.1.37.33) tānagniradahaddhora evamāsīddumakṣayaḥ / drumakṣayamatho buddhvā kiñcicchiṣṭeṣu śākhiṣu // ### [1.37.34](https://indike.org/pramana/in.purana.brahmanda.1.37.34) upagamyābravī detānrājā somaḥ pracetasaḥ / dṛṣṭvā prayojanaṃ satyaṃ lokasaṃtānakāraṇāt // ### [1.37.35](https://indike.org/pramana/in.purana.brahmanda.1.37.35) kopaṃ tyajata rājānaḥ sarve prācīnabarhiṣaḥ / vṛkṣāḥ kṣityāṃ janiṣyanti śāmyatāmagnimārutau // ### [1.37.36](https://indike.org/pramana/in.purana.brahmanda.1.37.36) ratnabhūtā ca kanyeyaṃ vṛkṣāṇāṃ varavarṇinīḥ / bhaviṣyajjanatā hyeṣā dhṛtā garbheṇa vai mayā // ### [1.37.37](https://indike.org/pramana/in.purana.brahmanda.1.37.37) māriṣā nāma nāmnaiṣā vṛkṣaireva vinirmitā / bhāryā bhavatu vo hyeṣā somagarbhā vivarddhitā // ### [1.37.38](https://indike.org/pramana/in.purana.brahmanda.1.37.38) yuṣmākaṃ tejasārddhena mama cārdhena tejasā / asyāmutpatsyate vidvāndakṣo nāma prajāpatiḥ // ### [1.37.39](https://indike.org/pramana/in.purana.brahmanda.1.37.39) sa imāṃ dagdhabhūyiṣṭhāṃ yuṣmattejomayena vai / agnināgnisamo bhūyaḥ prajāḥ saṃvarddhayiṣyati // ### [1.37.40](https://indike.org/pramana/in.purana.brahmanda.1.37.40) tataḥ somasya vacanājjagṛhuste pracetasaḥ / saṃtdṛtya kopaṃ vṛkṣebhyaḥ patnīṃ dharmeṇa māriṣām // ### [1.37.41](https://indike.org/pramana/in.purana.brahmanda.1.37.41) māriṣāyāṃ tataste vai manasā garbhamādadhuḥ / daśabhyastu pracetobhyo māriṣāyāṃ prajāpatiḥ // ### [1.37.42](https://indike.org/pramana/in.purana.brahmanda.1.37.42) dakṣo jajñe mahātejāḥ somasyāṃśena vīryavān / asṛjanmanasā tvādau prajā dakṣo 'tha maithunāt // ### [1.37.43](https://indike.org/pramana/in.purana.brahmanda.1.37.43) acarāṃśca carāṃścaiva dvipado 'tha catuṣpadaḥ / visṛjya manasā dakṣaḥ paścādasṛjata striyaḥ // ### [1.37.44](https://indike.org/pramana/in.purana.brahmanda.1.37.44) dadau sa daśa dharmāya kaśyapāya trayāṃ daśa / kālasya nayane yuktāḥ saptaviṃśatimindave // ### [1.37.45](https://indike.org/pramana/in.purana.brahmanda.1.37.45) ebhyo dattvā tato 'nyā vai catasro 'riṣṭanemine / dve caiva bahuputrāya dve caivāṅgirase tathā // ### [1.37.46](https://indike.org/pramana/in.purana.brahmanda.1.37.46) kanyāmekāṃ kṛśāśvāya tebhyo 'patyaṃ babhūva ha / antaraṃ cākṣuṣasyātha manoḥ ṣaṣṭhaṃ tu gīyate // ### [1.37.47](https://indike.org/pramana/in.purana.brahmanda.1.37.47) manorvaivasvatasyāpi saptamasya prajāpateḥ / vasudevāḥ khagā gāvo nāgā ditijadānavāḥ // ### [1.37.48](https://indike.org/pramana/in.purana.brahmanda.1.37.48) gandharvāpsarasaścaiva jajñire 'nyāśca jātayaḥ / tataḥ prabhṛti loke 'sminprajā maithunasaṃbhavāḥ / saṃkalpāddarśanātsparśātpūrvāsāṃ sṛṣṭirucyate // ### [1.37.49](https://indike.org/pramana/in.purana.brahmanda.1.37.49) ṛṣiruvāca devānāṃ dānavānāṃ ca devarṣiṇāṃ ca te śubhaḥ / saṃbhavaḥ kathitaḥ pūrvaṃ dakṣasya ca mahātmanaḥ // ### [1.37.50](https://indike.org/pramana/in.purana.brahmanda.1.37.50) prāṇātprajāpaterjanma dakṣasya kathitaṃ tvayā / kathaṃ prāce tastvaṃ ca punarlebhe mahātapāḥ // ### [1.37.51](https://indike.org/pramana/in.purana.brahmanda.1.37.51) etaṃ naḥ saṃśayaṃ sūta vyākhyātuṃ tvamihārhasi / dauhitraścaiva somasya kathaṃ śrvaśuratāṃ gataḥ // ### [1.37.52](https://indike.org/pramana/in.purana.brahmanda.1.37.52) sūta uvāca utpattiśca nirodhaśca nityaṃ bhūteṣu sattamāḥ / ṛṣayo 'tra na suhyanti vidyāvantaśca ye janāḥ // ### [1.37.53](https://indike.org/pramana/in.purana.brahmanda.1.37.53) yuge yuge bhavantyete sarve dakṣādayo dvijāḥ / punaścaiva nirudhyante vidvāṃstatra na muhyati // ### [1.37.54](https://indike.org/pramana/in.purana.brahmanda.1.37.54) jyaiṣṭhyakāniṣṭhyamapyeṣāṃ pūrvamāsīddvijottamāḥ / tapa eva garīyo 'bhūtprabhāvaścaiva kāraṇam // ### [1.37.55](https://indike.org/pramana/in.purana.brahmanda.1.37.55) imāṃ visṛṣṭiṃ yo veda cākṣuṣasya carācaram / prajāvānāyuṣastīrṇaḥ svargaloke mahīyate // ### [1.37.56](https://indike.org/pramana/in.purana.brahmanda.1.37.56) evaṃ sargaḥ samākhyātaścākṣuṣasya samāsataḥ / ityete ṣaṭ nisargāśca krāntā manvantarātmakāḥ // ### [1.37.57](https://indike.org/pramana/in.purana.brahmanda.1.37.57) svāyaṃbhuvādyāḥ saṃkṣepāccāśuṣāntā yathākramam / ete sargā yathā prājñaiḥ proktā ye dvijasattamāḥ // ### [1.37.58](https://indike.org/pramana/in.purana.brahmanda.1.37.58) vaivasvatanisargeṇa teṣāṃ jñeyastu vistaraḥ / anyūnānatiriktāste sarve sargā vivasvataḥ // ### [1.37.59](https://indike.org/pramana/in.purana.brahmanda.1.37.59) ārogyāyuḥ pramāṇebhyo dharmataḥ kāmator'thataḥ / etāneva guṇāneti yaḥ paṭhannanasūyakaḥ // ### [1.37.60](https://indike.org/pramana/in.purana.brahmanda.1.37.60) vaivasvatasya vakṣyāmi sāṃpratasya mahātmanaḥ / samāsavyāsataḥ sargaṃ bruvato me nibodhata // ### [1.37.60.p1](https://indike.org/pramana/in.purana.brahmanda.1.37.60.p1) iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde cākṣuṣasargavarṇanaṃ nāma saptatriṃśattamo 'dhyāyaḥ ## Linked texts (8) - [Vāyupurāṇa](https://indike.org/pramana/in.purana.vayu.2.2.4) — Vyāsa, Sanskrit - [Brahmapurāṇa](https://indike.org/pramana/in.purana.brahma.2.29) — Vyāsa, Sanskrit - [Viṣṇupurāṇa (vulgate)](https://indike.org/pramana/in.purana.visnu*vulgate.1.14.1) — Sanskrit - [Śivapurāṇa (complete text)](https://indike.org/pramana/in.purana.siva*complete-2.5.30.33) — Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.6.44) — Sanskrit - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.18.22) — Sanskrit - [Skandamahāpurāṇa (vulgate)](https://indike.org/pramana/in.purana.skanda*vulgate.8.9.304_1251) — Sanskrit - [Vallālacarita](https://indike.org/pramana/in.lit.historical.vallalacarita.2.10.18) — Ānandabhaṭṭa 1510, Sanskrit --- Source: [https://indike.org/pramana/in.purana.brahmanda.1.37](https://indike.org/pramana/in.purana.brahmanda.1.37) · Pramāṇa