[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.4 # Brahmandapurana 1.4 Brahmāṇḍapurāṇa 1.4 - **Language:** Sanskrit ## Contents - [1.4.34](https://indike.org/pramana/in.purana.brahmanda.1.4.34) — 1 part ### [1.4.1](https://indike.org/pramana/in.purana.brahmanda.1.4.1) suta uvāca ātmanyavasthite vyakte vikāre pratisaṃhate / sādharmyeṇāvatiṣṭhete pradhānapuruṣau tadā // ### [1.4.2](https://indike.org/pramana/in.purana.brahmanda.1.4.2) tamaḥsattva guṇāvetau samatvena vyavasthitau / anudriktāvanucarau tena proktau parasparam // ### [1.4.3](https://indike.org/pramana/in.purana.brahmanda.1.4.3) guṇasāmye layo jñeya ādhikye sṛṣṭirucyate / sattvavṛddhau sthitirabhūd dhruvaṃ padma śikhāsthitam // ### [1.4.4](https://indike.org/pramana/in.purana.brahmanda.1.4.4) yadā tamasi sattve ca rajopyanugataṃ sthitam / rajaḥ pravartakaṃ tacca bījeṣviva yathā jalam // ### [1.4.5](https://indike.org/pramana/in.purana.brahmanda.1.4.5) guṇā vaiṣamyamāsādya prasaṃgena pratiṣṭhitāḥ / guṇebhyaḥ kṣobhyamāṇebhyastrayo jñeyā hi sādare // ### [1.4.6](https://indike.org/pramana/in.purana.brahmanda.1.4.6) śāśvatāḥ paramā guhyāḥ sarvātmānaḥ śarīriṇaḥ / sattvaṃ viṣṇū rajo brahmā tamo rudraḥ prajāpatiḥ // ### [1.4.7](https://indike.org/pramana/in.purana.brahmanda.1.4.7) rajaḥprakāśakoviṣṇurbrahmasraṣṭṛtvamāpnuyāt / jāyate ca yataścatrā lokasṛṣṭirmahojasaḥ // ### [1.4.8](https://indike.org/pramana/in.purana.brahmanda.1.4.8) tamaḥprakāśako viṣṇuḥ kālatvena vyavasthitaḥ / sattvaprakāśako viṣṇuḥ sthititvena vyavasthitaḥ // ### [1.4.9](https://indike.org/pramana/in.purana.brahmanda.1.4.9) eta eva trayo lokā eta eva trayo guṇāḥ / eta eva trayo vedā eta eva trajo 'gnayaḥ // ### [1.4.10](https://indike.org/pramana/in.purana.brahmanda.1.4.10) parasparānvayā hyete parasparamanuvratāḥ / paraspareṇa vartante prerayanti parasparam // ### [1.4.11](https://indike.org/pramana/in.purana.brahmanda.1.4.11) anyonyaṃ mithunaṃ hyete anyonyamupajīvinaḥ / kṣaṇaṃ viyogo na hyeṣāṃ na tyajanti parasparam // ### [1.4.12](https://indike.org/pramana/in.purana.brahmanda.1.4.12) pradhānaguṇavaiṣamyātsargakāle pravarttate / adṛṣṭādhiṣṭhitātpūrve tasmātsadasadātmakāt // ### [1.4.13](https://indike.org/pramana/in.purana.brahmanda.1.4.13) brahmā buddhitvamithunaṃ yugapatsaṃbabhūva ha / tasmāttamovyaktamayaṃ kṣetrajño brahmasaṃjñakaḥ // ### [1.4.14](https://indike.org/pramana/in.purana.brahmanda.1.4.14) saṃsiddhakāryakaraṇo brahmagre samavarttata / tejasāpratimo dhīmānavyaktaḥ saṃprakāśakaḥ // ### [1.4.15](https://indike.org/pramana/in.purana.brahmanda.1.4.15) sa vai śarīraprathamo dhāraṇatvavyavasthitaḥ / jñānenāpratimeneha vairāgyeṇa ca saptatiḥ // ### [1.4.16](https://indike.org/pramana/in.purana.brahmanda.1.4.16) avyaktatvāya tenāsya manasā yadyadicchati / vaśīkṛtatvāttraiguṇyātsāpekṣatvācca bhāvataḥ // ### [1.4.17](https://indike.org/pramana/in.purana.brahmanda.1.4.17) caturmukhastu brahmatve kālatve cāntakṛdbhavaḥ / sahasramūrdhā puruṣastisro 'vasthāḥsvayaṃbhuvaḥ // ### [1.4.18](https://indike.org/pramana/in.purana.brahmanda.1.4.18) sarvaṃ rajaśca brahmatve kālatve carajastamaḥ / sāttvikaḥ puruṣatve ca guṇavṛtaṃ svayaṃbhuvaḥ // ### [1.4.19](https://indike.org/pramana/in.purana.brahmanda.1.4.19) brahmatve sṛjate lokān kālatve saṃkṣayatyapi / puruṣatve udāsīnastisro 'vasthāḥ svayaṃbhuvaḥ // ### [1.4.20](https://indike.org/pramana/in.purana.brahmanda.1.4.20) brahmā kamala patrākṣaḥ kālo jātyañjanaprabhaḥ / puruṣaḥ puṇḍarīkākṣo rūpeṇa paramātmanaḥ // ### [1.4.21](https://indike.org/pramana/in.purana.brahmanda.1.4.21) ekadhā sa dvidhā caiva tridhā ca bahudhā punaḥ / yogīśvaraḥ śarīrāṇi karoti vikarotica // ### [1.4.22](https://indike.org/pramana/in.purana.brahmanda.1.4.22) nānākṛtikriyārūpamāśrayantisvalīlayā / tridhā yadvartate loke tasmātrriguṇa ucyate // ### [1.4.23](https://indike.org/pramana/in.purana.brahmanda.1.4.23) caturddhā pravibhaktatvāccaturvyūhaḥ prakīrttitaḥ / yadā śete tadārdhāte yadbhuṅkte viṣayānprabhuḥ // ### [1.4.24](https://indike.org/pramana/in.purana.brahmanda.1.4.24) yatsvasthāḥ satataṃ bhāvastasmādātmā nirūcyate / ṛṣiḥ sarvagataścātra śarīre so 'bhyayātprabhuḥ // ### [1.4.25](https://indike.org/pramana/in.purana.brahmanda.1.4.25) svāmī sarvasya yatsarvaṃviṣṇuḥ sarvapraveśanāt / bhagavānagrasadbhāvānnāgo nāgasvasaṃśrayāt // ### [1.4.26](https://indike.org/pramana/in.purana.brahmanda.1.4.26) paramaḥ saṃprahṛṣṭatvāddevatādomiti smṛtiḥ / sarvajñaḥ sarvavijñānātsarvaḥsarvaṃyatastataḥ // ### [1.4.27](https://indike.org/pramana/in.purana.brahmanda.1.4.27) narāṇāṃ svāpanaṃ brahmā tasmānnārāyaṇaḥ smṛtaḥ / tridhā vibhajya cātmānaṃ sakalaḥ saṃpravarttate // ### [1.4.28](https://indike.org/pramana/in.purana.brahmanda.1.4.28) sṛjate grasate caiva pālyate ca tribhiḥ svayam / so 'gre hiraṇyagarbhaḥ san prādurbhūtaḥ svayaṃ prabhuḥ // ### [1.4.29](https://indike.org/pramana/in.purana.brahmanda.1.4.29) ādyo hi svavaśaścaiva ajātatvādajaḥ smṛtaḥ / tasmāddhiraṇyagarbhaśca purāṇeṣu nirucyate // ### [1.4.30](https://indike.org/pramana/in.purana.brahmanda.1.4.30) svayaṃbhuvo nivṛttasya kālo varṇāgratastu yaḥ / na śakyaḥ parisaṃkhyātuṃ manuvarṣaśatairapi // ### [1.4.31](https://indike.org/pramana/in.purana.brahmanda.1.4.31) kalpasaṃkhyānivṛttastu parārdho brahmaṇaḥ smṛtaḥ / tāvattve so 'sya kālo 'nyastasyānte pratibuddhyate // ### [1.4.32](https://indike.org/pramana/in.purana.brahmanda.1.4.32) koṭivarṣasahasrāṇi gṛhabhūtāni yāni ca / samatītāni kalpānāṃ tāvaccheṣātparetu ye // ### [1.4.33](https://indike.org/pramana/in.purana.brahmanda.1.4.33) yatsvayaṃ varttate kalpo vārāhastannibodhata / prathamaṃ sāṃpratasteṣāṃ kalpo vai varttate ca yaḥ // ### [1.4.34](https://indike.org/pramana/in.purana.brahmanda.1.4.34) pūrṇe yugasahasre tu paripālyaṃ nareśvaraiḥ // ### [1.4.34.p1](https://indike.org/pramana/in.purana.brahmanda.1.4.34.p1) iti śrībrahmāṇḍe mahāpurāṇe vāyuprokte pūrvabhāge prathame prakriyāpade lokakalpanaṃ nāma caturtho 'dhyāyaḥ ## Linked texts (4) - [Vāyupurāṇa](https://indike.org/pramana/in.purana.vayu.1.5.8) — Vyāsa, Sanskrit - [Śivapurāṇa](https://indike.org/pramana/in.purana.siva.7.1.9.3.p31) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.4.62) — Vyāsa, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.4.p10) — Ativīrarāma Pāṇṭiyar, Sanskrit --- Source: [https://indike.org/pramana/in.purana.brahmanda.1.4](https://indike.org/pramana/in.purana.brahmanda.1.4) · Pramāṇa