[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 1.8 # Brahmandapurana 1.8 Brahmāṇḍapurāṇa 1.8 - **Language:** Sanskrit ## Contents - [1.8.66](https://indike.org/pramana/in.purana.brahmanda.1.8.66) — 1 part ### [1.8.1](https://indike.org/pramana/in.purana.brahmanda.1.8.1) sūta uvāca tatobhidhyāyatastasya mānasyo jajñire prajāḥ / taccharīrasamutpannaiḥ kāryaistaiḥ kāraṇaiḥ saha // ### [1.8.2](https://indike.org/pramana/in.purana.brahmanda.1.8.2) kṣetrajñāḥ samavarttanta kṣetrasyaitasya dhīmataḥ / tato devāsurapitṝnmanuṣyāṃśca catuṣṛyam // ### [1.8.3](https://indike.org/pramana/in.purana.brahmanda.1.8.3) sisṛkṣurayutātāni sa cātmānamayūyujat / yuktātmanastatastasya tamomātrāsamudbhavaḥ // ### [1.8.4](https://indike.org/pramana/in.purana.brahmanda.1.8.4) tadābhidhyāyataḥ sargaṃ prayatno 'bhūtprajāpateḥ / tato 'sya jagha nātpūrvamasurā jajñira sutāḥ // ### [1.8.5](https://indike.org/pramana/in.purana.brahmanda.1.8.5) asuḥ prāṇaḥ smṛto vijñaistajjanmānastato 'surāḥ / sṛṣṭā yayā surāstanvā tāṃ tanuṃ sa vyapohata // ### [1.8.6](https://indike.org/pramana/in.purana.brahmanda.1.8.6) sāpaviddhā tanustena sadyo rātrirajāyata / sā tamobahulā yasmāttato rātristriyāmikā // ### [1.8.7](https://indike.org/pramana/in.purana.brahmanda.1.8.7) āvṛtāstamasā rātrau prajā stasmātsvayaṃ punaḥ / sṛṣṭvāsurāṃstataḥ so 'tha tanumanyāmapadyata // ### [1.8.8](https://indike.org/pramana/in.purana.brahmanda.1.8.8) avyaktāṃ sattvabahulāṃ tatastāṃ so 'bhyayuñjata / tatastāṃ yuñja mānasya priyamāsītprabhoḥ kila // ### [1.8.9](https://indike.org/pramana/in.purana.brahmanda.1.8.9) tato mukhātsamutpannā dīvyatastasya devatāḥ / yato 'sya dīvyato jātāstena devāḥ prakīrttitāḥ // ### [1.8.10](https://indike.org/pramana/in.purana.brahmanda.1.8.10) dhāturdivyeti yaḥ proktaḥ krīḍāyāṃ sa vibhāvyate / tasmāttanvāstu divyāyā jajñire tena devatāḥ // ### [1.8.11](https://indike.org/pramana/in.purana.brahmanda.1.8.11) devān sṛṣṭvā tataḥ so 'tha tanuṃ divyāmapohata / utsṛṣṭā sā tanustena ahaḥ samabhavattadā // ### [1.8.12](https://indike.org/pramana/in.purana.brahmanda.1.8.12) tasmādahaḥkarmayuktā devatāḥ samupāsate / devānsṛṣṭvā tataḥ so 'tha tanumanyāmapadyata // ### [1.8.13](https://indike.org/pramana/in.purana.brahmanda.1.8.13) sattvamātrātmikāmeva tato 'nyāmabhyayuṅkta vai / piteva manyamānastānputrānpradhyāya sa prabhuḥ // ### [1.8.14](https://indike.org/pramana/in.purana.brahmanda.1.8.14) pitaro hyabhavaṃstasyā sadhye rātryahayoḥ pṛthak / tasmātte pitaro devāḥ pitṛtvaṃ teṣu tatsmṛtam // ### [1.8.15](https://indike.org/pramana/in.purana.brahmanda.1.8.15) yayāsṛṣṭāstu pitarastāṃ tanuṃ sa vyapohata / sāpaviddhā tanustena sadyaḥ saṃdhyā vyajāyata // ### [1.8.16](https://indike.org/pramana/in.purana.brahmanda.1.8.16) tasmādahardevatānāṃ rātriryā sā'surī smṛtā / tayormadhye tu vai paitrī yā tanuḥ sā garīyasī // ### [1.8.17](https://indike.org/pramana/in.purana.brahmanda.1.8.17) tasmāddevāsurāścaiva ṛṣayo mānavāstathā / yuktāstanumupāsaṃte uṣāvyuṣṭyoryadantaram // ### [1.8.18](https://indike.org/pramana/in.purana.brahmanda.1.8.18) tasmādrātryahayoḥ saṃdhimupāsaṃte tathā dvijāḥ / tato 'nyasyāṃ punarbrahmā svatanvāmupapadyata // ### [1.8.19](https://indike.org/pramana/in.purana.brahmanda.1.8.19) rajomātrātmikā yā tu manasā so 'sṛjatprabhuḥ / manasā tu sutāstasya prajanājjajñire prajāḥ // ### [1.8.20](https://indike.org/pramana/in.purana.brahmanda.1.8.20) mananācca manuṣayāste prajanātprathitāḥ prajāḥ / sṛṣṭvā punaḥ prajāḥ so 'tha svāṃ tanuṃ sa vyapohata // ### [1.8.21](https://indike.org/pramana/in.purana.brahmanda.1.8.21) sāpaviddhā tanustena jyotsnā sadyastvajāyata / tasmādbhavanti saṃhṛṣṭā jyotsnāyā udbhave prajāḥ // ### [1.8.22](https://indike.org/pramana/in.purana.brahmanda.1.8.22) ityetāstanavastena hyapaviddhā mahātmanā / sadyo rātryahanī caivasaṃdhyā jyotsnā ca jajñire // ### [1.8.23](https://indike.org/pramana/in.purana.brahmanda.1.8.23) jyotsnā saṃdhyāhanī caiva sattvamātrātmakaṃ trayam / tamomātrātmikā rātriḥ sā vai tasmānniyāmikā // ### [1.8.24](https://indike.org/pramana/in.purana.brahmanda.1.8.24) tasmāddevā divyatanvā tuṣṭyā sṛṣṭā sukhāttu vai / yasmātteṣāṃ divā janma balinastena te divā // ### [1.8.25](https://indike.org/pramana/in.purana.brahmanda.1.8.25) tanvā yadasurānratryā jaghanādasṛjatprabhuḥ / prāṇebhyo rātrijanmāno hyajeyā niśi tena te // ### [1.8.26](https://indike.org/pramana/in.purana.brahmanda.1.8.26) etānyeva bhaviṣyāṇāṃ devānāmasuraiḥ saha / pitṝṇāṃ mānuṣāṇāṃ ca atītānā gateṣu vai // ### [1.8.27](https://indike.org/pramana/in.purana.brahmanda.1.8.27) manvantareṣu sarveṣu nimittāni bhavanti hi / jyotsnā rātryahanī saṃdhyā catvāryetāni tāni vā // ### [1.8.28](https://indike.org/pramana/in.purana.brahmanda.1.8.28) bhānti yasmāttato bhāti bhāśabdo vyāptidīptiṣu / aṃbhāṃsyetāni sṛṣṭvā tu devadānavamānuṣān // ### [1.8.29](https://indike.org/pramana/in.purana.brahmanda.1.8.29) pitṝṃścaiva tathā cānyānvividhānvya sṛjatprajāḥ / tāmutsṛjya tato cyotsnāṃ tato 'nyāṃ prāpya sa prabhuḥ // ### [1.8.30](https://indike.org/pramana/in.purana.brahmanda.1.8.30) mūrttiṃ rajastamodriktāṃ tatastāṃ so 'bhyayuñjata / tato 'nyāḥ soṃ'dhakāre ca kṣudhāviṣṭāḥ prajāḥ sṛjan // ### [1.8.31](https://indike.org/pramana/in.purana.brahmanda.1.8.31) tāḥ sṛṣṭāstu kṣudhāviṣṭā ambhāṃsyādātumudyatāḥ / ambhāṃsyetāni rakṣāma uktavantastu teṣu ye // ### [1.8.32](https://indike.org/pramana/in.purana.brahmanda.1.8.32) rākṣasāste smṛtāstasmātkṣudhātmāno niśācarāḥ / ye 'bruvan kṣiṇumo 'mbhāṃsi teṣāṃ tdṛṣṭāḥ parasparam // ### [1.8.33](https://indike.org/pramana/in.purana.brahmanda.1.8.33) tena te karmaṇā yakṣā guhyakāḥ krūrakarmiṇaḥ / rakṣeti pālane cāpi dhātureṣa vibhāvyate // ### [1.8.34](https://indike.org/pramana/in.purana.brahmanda.1.8.34) ya eṣa kṣītidhāturvai kṣapaṇe sa nirucyate / rakṣaṇādrakṣa ityuktaṃ kṣapaṇādyakṣa ucyata // ### [1.8.35](https://indike.org/pramana/in.purana.brahmanda.1.8.35) tāndṛṣṭvā tvapriyeṇāsya keśāḥ śīrṇāśca dhīmataḥ / te śīrṇā vyutthitā hyūrddhamāro hantaḥ punaḥ punaḥ // ### [1.8.36](https://indike.org/pramana/in.purana.brahmanda.1.8.36) hīnā ye śiraso bālāḥ pannāścaivāpasarpiṇaḥ / bālātmanā smṛtā vyālā hīnatvādahayaḥ smṛtāḥ // ### [1.8.37](https://indike.org/pramana/in.purana.brahmanda.1.8.37) pannatvātpannagāścāpi vyapasarpācca sarppatā / teṣāṃ layaḥ pṛthivyāṃ yaḥ sūryācandramasau ghanāḥ // ### [1.8.38](https://indike.org/pramana/in.purana.brahmanda.1.8.38) tasya krodhodbhavo yo 'sāvagnigarbhaḥ sudāruṇaḥ / sa tānsarppān sahotpannānāviveśa viṣātmakaḥ // ### [1.8.39](https://indike.org/pramana/in.purana.brahmanda.1.8.39) sarppānsṛṣṭvā tataḥ krodhāt krodhātmāno vinirmitāḥ / varṇena kapiśenogrāste bhūtāḥ piśitāśanāḥ // ### [1.8.40](https://indike.org/pramana/in.purana.brahmanda.1.8.40) bhūtatvātte ramṛtā bhūtāḥ piśācā piśitāśanāt / gāyato gāṃ tatastasya gandharvā jajñire sutāḥ // ### [1.8.41](https://indike.org/pramana/in.purana.brahmanda.1.8.41) dhayeti dhātuḥ kavibhiḥ pānārthe paripaṭhyate / pibato jajñire vācaṃ gandharvāstena te smṛtāḥ // ### [1.8.42](https://indike.org/pramana/in.purana.brahmanda.1.8.42) aṣṭāsvetāsu sṛṣṭāsu devayoniṣu sa prabhuḥ / chandataścaiva chandāsi vayāṃsi vayasāsṛjat // ### [1.8.43](https://indike.org/pramana/in.purana.brahmanda.1.8.43) pakṣiṇastu sa sṛṣṭvā vai tataḥ paśugaṇānsṛjan / mukhatojāḥ sṛjanso 'tha vakṣasaścāpyavīḥ sṛjan // ### [1.8.44](https://indike.org/pramana/in.purana.brahmanda.1.8.44) gāvaścaivodarādbrahmā pāśvībhyāṃ ca vinirmame / pādato 'śvānsamātaṅgān rāsabhān gavayānmṛgān // ### [1.8.45](https://indike.org/pramana/in.purana.brahmanda.1.8.45) uṣṭrāṃścaiva varāhāṃśca śuno 'nyāṃścaiva jātayaḥ / oṣadhyaḥ phala mūlinyo romabhyastasya jajñire // ### [1.8.46](https://indike.org/pramana/in.purana.brahmanda.1.8.46) evaṃ pañcauṣadhīḥ sṛṣṭvā vyayuñjatso 'dhvareṣu vai / asya tvādau tu kalpasya tretāyugamukhepurā // ### [1.8.47](https://indike.org/pramana/in.purana.brahmanda.1.8.47) gaurajaḥ puruṣo 'thāviraśvāśvataragardabhāḥ / ete grāmyāḥ samṛtāḥ sapta āraṇyāḥ sapta cāpare // ### [1.8.48](https://indike.org/pramana/in.purana.brahmanda.1.8.48) śvāpado dvīpino hastī vānaraḥ pakṣipañcamaḥ / audakāḥ paśavaḥ ṣaṣṭhāḥ saptamāstu sarīsṛpāḥ // ### [1.8.49](https://indike.org/pramana/in.purana.brahmanda.1.8.49) mahiṣā gavayoṣṭrāśca dvikhurāḥ śarabho dviṣaḥ / markaṭaḥ saptamo hyeṣāṃ cāraṇyāḥ paśavastu te // ### [1.8.50](https://indike.org/pramana/in.purana.brahmanda.1.8.50) gāyatrīṃ ca ṛcaṃ caiva trivṛtsatomarathantare / agniṣṭomaṃ ca yajñānāṃ nirmame prathamānmukhāt // ### [1.8.51](https://indike.org/pramana/in.purana.brahmanda.1.8.51) yajūṃṣi traiṣṭubhaṃ chandaḥ stomaṃ pañcadaśaṃ tathā / bṛhatsāma tathoktaṃ ca dakṣiṇātso 'sṛjanmukhāt // ### [1.8.52](https://indike.org/pramana/in.purana.brahmanda.1.8.52) sāmāni jagatīṃ caiva stomaṃ saptadaśaṃ tathā / vairūpyamatirātraṃ ca paścimātso 'sṛjanmakhāt // ### [1.8.53](https://indike.org/pramana/in.purana.brahmanda.1.8.53) ekaviṃśamatharvāṇamāptoryāmaṃ tathaiva ca / anuṣṭubhaṃ savairājaṃ caturthādasṛjanmukhāt // ### [1.8.54](https://indike.org/pramana/in.purana.brahmanda.1.8.54) vidyuto 'śanimeghāṃśva rohitedradhanūṃṣi ca / sṛṣṭvāsau bhagavāndevaḥ parjanyamitiviśrutam // ### [1.8.55](https://indike.org/pramana/in.purana.brahmanda.1.8.55) ṛco yajūṃṣi sāmāni nirmame yajñasiddhaye / uccāvacāni bhūtāni gātrebhyastasya jajñire // ### [1.8.56](https://indike.org/pramana/in.purana.brahmanda.1.8.56) brahmaṇāstu prajāsargaṃ sṛjato hi prajāpateḥ / sṛṣṭvā catuṣṭayaṃ pūrvaṃ devarṣipitṛmānavān // ### [1.8.57](https://indike.org/pramana/in.purana.brahmanda.1.8.57) tato 'sṛjata bhūtāni carāṇi sthāvarāṇi ca / sṛṣṭvā yakṣapiśācāṃśca gandharvapsarasastadā // ### [1.8.58](https://indike.org/pramana/in.purana.brahmanda.1.8.58) narakinnararakṣāṃsi vayaḥpaśumṛgoragān / avyayaṃ ca vyayaṃ caiva dvayaṃ sthāvarajaṅgamam // ### [1.8.59](https://indike.org/pramana/in.purana.brahmanda.1.8.59) teṣāṃ ye yāni karmāṇi prāk sṛṣṭāni prapedire / tānyeva pratipadyante sṛjyamānāḥ punaḥpunaḥ // ### [1.8.60](https://indike.org/pramana/in.purana.brahmanda.1.8.60) hiṃsrāhiṃsre sṛjan krūre dharmādharmāvṛtānṛte / tadbhāvitāḥ prapadyante tasmāttattasya rocate // ### [1.8.61](https://indike.org/pramana/in.purana.brahmanda.1.8.61) mahābhūteṣu nānātvamindriyārteṣu mūrtiṣu / viniyogaṃ ca bhūtānāṃ dhātaiva vyadadhātsvayam // ### [1.8.62](https://indike.org/pramana/in.purana.brahmanda.1.8.62) kecitpuruṣakāraṃ tu prāhuḥ karma ca mānavāḥ / daivamityapare viprāḥ svabhāvaṃ bhūtacintakāḥ // ### [1.8.63](https://indike.org/pramana/in.purana.brahmanda.1.8.63) pauruṣaṃ karma daivaṃ ca phalavṛttisvabhāvataḥ / na caiva tu pṛthagbhāvamadhikena tato viduḥ // ### [1.8.64](https://indike.org/pramana/in.purana.brahmanda.1.8.64) etadevaṃ ca naivaṃ ca na cobhe nānubhe na ca / svakarmaviṣayaṃ brūyuḥ sattvasthāḥ samadarśinaḥ // ### [1.8.65](https://indike.org/pramana/in.purana.brahmanda.1.8.65) nānārūpaṃ ca bhūtānāṃ kṛtānāṃ ca prapañcanam / vedaśabdebhya evādau nirmame sa maheśvaraḥ // ### [1.8.66](https://indike.org/pramana/in.purana.brahmanda.1.8.66) ārṣāṇi caiva nāmāni yāśca deveṣu dṛṣṭayaḥ / śarvaryante prasūtānāṃ punastebhyo dadhātyajaḥ // ### [1.8.66.p1](https://indike.org/pramana/in.purana.brahmanda.1.8.66.p1) iti śrībrahmāṇḍe mahāpurāṇe vāyuprokte pūrvabhāge dvitīye 'nuṣaṅgapāde mānasasṛṣṭivarṇanaṃ nāmāṣṭamo 'dhyāyaḥ ## Linked texts (5) - [Vāyupurāṇa](https://indike.org/pramana/in.purana.vayu.1.9.5) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.7.39) — Vyāsa, Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.1.5.40) — Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.2.62) — Ṭoḍaramalla 1564, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.7.p7) — Ativīrarāma Pāṇṭiyar, Sanskrit --- Source: [https://indike.org/pramana/in.purana.brahmanda.1.8](https://indike.org/pramana/in.purana.brahmanda.1.8) · Pramāṇa