[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.12 # Brahmandapurana 2.12 Brahmāṇḍapurāṇa 2.12 - **Language:** Sanskrit ## Contents - [2.12.11](https://indike.org/pramana/in.purana.brahmanda.2.12.11) — 1 part - [2.12.46](https://indike.org/pramana/in.purana.brahmanda.2.12.46) — 1 part ### [2.12.1](https://indike.org/pramana/in.purana.brahmanda.2.12.1) sūta uvāca devāścapitaraścaiva anyonyaṃ niyatāḥ smṛtāḥ / ātharvaṇastveṣa vidhirityuvāca bṛhaspatiḥ // ### [2.12.2](https://indike.org/pramana/in.purana.brahmanda.2.12.2) pūjayeta pitṝnpūrvaṃ devāṃśca tadanantaram / devā api pitṝnpūrvamarccayanti hi yatnataḥ // ### [2.12.3](https://indike.org/pramana/in.purana.brahmanda.2.12.3) dakṣasya duhitā nāmnā viśvā nāmeti viśrutā / viśvākhyāstu sutāstasyāṃ dharmato jajñire daśa // ### [2.12.4](https://indike.org/pramana/in.purana.brahmanda.2.12.4) prakhyātā striṣu lokeṣu sarvalokanamaskṛtāḥ / samastāste mahātmānaścerurugraṃ mahattapaḥ // ### [2.12.5](https://indike.org/pramana/in.purana.brahmanda.2.12.5) himavacchikhare ramye devarṣigaṇasevite / śuddhena mansā prītā ūcustānpitarastadā // ### [2.12.6](https://indike.org/pramana/in.purana.brahmanda.2.12.6) varaṃ vṛṇīdhvaṃ prītāḥ sma kaṃ kāmaṃ kakhāmahe / evamukte tu pitṛbhistadā trailokyabhāvanaḥ // ### [2.12.7](https://indike.org/pramana/in.purana.brahmanda.2.12.7) brahmovāca mahātejāstapasā taistu toṣitaḥ / prīto 'smi tapasānena kaṃ kāmaṃ karavāṇi vaḥ // ### [2.12.8](https://indike.org/pramana/in.purana.brahmanda.2.12.8) evamuktāstadā viśve brahmaṇā viśvakarmaṇā / ūcuste sahitāḥ sarve brahmāṇāṃ lokabhāvanam // ### [2.12.9](https://indike.org/pramana/in.purana.brahmanda.2.12.9) śrāddhe 'smākaṃ bhavedaṃśo hyeṣa naḥ kāṅkṣito varaḥ / pratyuvāca tato brahmā tānvai tridaśapūjitaḥ // ### [2.12.10](https://indike.org/pramana/in.purana.brahmanda.2.12.10) bhaviṣyatyevamevaṃ tu kāṅkṣito vo varastu yaḥ / pitṛbhiśca tathetyuktamevametanna saṃśayaḥ // ### [2.12.11](https://indike.org/pramana/in.purana.brahmanda.2.12.11) sahasmābhistu bhoktavyaṃ yatkiṃ ciddṛśyate tviha / asmākaṃ kalpite śrāddhe yuṣmānaprāśanaṃ hi vai // ### [2.12.11.p1](https://indike.org/pramana/in.purana.brahmanda.2.12.11.p1) bhaviṣyati manuṣyeṣu satyame tadbruvāmahe / mālyairgandhaistathānnena yuṣmānagre 'rccayiṣyati /1 12.12// ### [2.12.13](https://indike.org/pramana/in.purana.brahmanda.2.12.13) agre dattvā tu yuṣmākamasmākaṃ dāsyate tataḥ / visarjanamathāsmākaṃ pūrvaṃ paścāttu daivatam // ### [2.12.14](https://indike.org/pramana/in.purana.brahmanda.2.12.14) rakṣaṇaṃ caiva śrāddhasya ātithyasya vidhidvayam / bhūtānāṃ devatānāṃ ca pitṝṇāṃ caiva karmaṇi // ### [2.12.15](https://indike.org/pramana/in.purana.brahmanda.2.12.15) evaṃ kṛte samyagetatsarvameva bhaviṣyati / evaṃ dattvā varaṃ teṣāṃ brahmā pitṛgaṇaiḥ saha // ### [2.12.16](https://indike.org/pramana/in.purana.brahmanda.2.12.16) kṣamānugrahakṛddevaḥ saṃcakāra yathoditam / vede pañca mahāyajñā narāṇāṃ samudāhṛtāḥ // ### [2.12.17](https://indike.org/pramana/in.purana.brahmanda.2.12.17) etānpañca mahāyajñānnirvapetsatataṃ naraḥ / yatra sthāsyanti dātārastatsthānaṃ vai nibodhata // ### [2.12.18](https://indike.org/pramana/in.purana.brahmanda.2.12.18) nirbhayaṃ virajaskaṃ ca niḥśokaṃ nirvyathaklamam / brāhmaṃ sthānamavāpnoti sarvalokapuraskṛtam // ### [2.12.19](https://indike.org/pramana/in.purana.brahmanda.2.12.19) śūdreṇāpi ca karttavyāḥ pañcaite mantravarjitāḥ / ato 'nyathā tu yo bhuṅkte sa ṛṇaṃ nityamaśnute // ### [2.12.20](https://indike.org/pramana/in.purana.brahmanda.2.12.20) ṛṇaṃ bhuṅkte sa pāpātmā yaḥ pacedātmakāraṇāt / tasmānnirvartayetpañca mahāyajñānsadā budhaḥ // ### [2.12.21](https://indike.org/pramana/in.purana.brahmanda.2.12.21) udakpūrve baliṃ kuryādudakānte tathaiva ca / baliṃ suvihitaṃ kuryā duccairuccataraṃ kṣipet // ### [2.12.22](https://indike.org/pramana/in.purana.brahmanda.2.12.22) paraśṛṅgaṃ gavāṃ mūtraṃ baliṃ sūtraṃ samutkṣipet / tannivedyo bhavetpiṇḍaḥ pitṝṇāṃ yastu jīvati // ### [2.12.23](https://indike.org/pramana/in.purana.brahmanda.2.12.23) iṣṭenānnena bhakṣyaiśca bhojayecca yathāvidhi / nivedyaṃ kecidicchanti jīvantyapi hi yatnataḥ // ### [2.12.24](https://indike.org/pramana/in.purana.brahmanda.2.12.24) devadevā mahātmāno hyete pitara ityuta / icchanti kecidācāryaḥ paścātpiṇḍanivedanam // ### [2.12.25](https://indike.org/pramana/in.purana.brahmanda.2.12.25) pūjanaṃ caiva vipraṇāṃ pūrvameveha nityaśaḥ / taddhidharmārthakuśalo netyuvāca bṛhasmatiḥ // ### [2.12.26](https://indike.org/pramana/in.purana.brahmanda.2.12.26) pūrvaṃ nivedayetpiṇḍānpaścādviprāṃśca bhojayet / yogātmāno mahātmānaḥ pitaro yoga saṃbhavāḥ // ### [2.12.27](https://indike.org/pramana/in.purana.brahmanda.2.12.27) somamāpyāyayantyete pitaro yogasaṃsthitāḥ / tasmāddadyācchuciḥ piṇḍānyogebhyastatparāyaṇaḥ // ### [2.12.28](https://indike.org/pramana/in.purana.brahmanda.2.12.28) pitṝṇāṃ hi bhavedetatsākṣādiva hutaṃ haviḥ / brahmaṇānāṃ sahasrasya yogasthaṃ grāsayedyadi // ### [2.12.29](https://indike.org/pramana/in.purana.brahmanda.2.12.29) yajamānaṃ ca bhoktṝṃś ca naurivāmbhasi tārayet / asatāṃ pragraho yatra satāṃ caiva vimānatā // ### [2.12.30](https://indike.org/pramana/in.purana.brahmanda.2.12.30) daṇḍo daivakṛtastatra sadyaḥ patati dāruṇaḥ / itvā mama sadharmāṇaṃ bāliśaṃ yastu bhojayet // ### [2.12.31](https://indike.org/pramana/in.purana.brahmanda.2.12.31) ādikarma samutsṛjya dātā tatra vinaśyati / piṇḍamagnau sadā dadyadbhogārthī prathamaṃ naraḥ // ### [2.12.32](https://indike.org/pramana/in.purana.brahmanda.2.12.32) dadyātprajārthī yatnena madhyamaṃ mantrapūrvakam / uttamāṃ kāntimanvicchangoṣu nityaṃ prayacchati // ### [2.12.33](https://indike.org/pramana/in.purana.brahmanda.2.12.33) prajñāṃ caiva yaśaḥ kīrttimapsu vai saṃprayacchati / prārthayandīrghāmāyuśca vāyasebhyaḥ prayacchati // ### [2.12.34](https://indike.org/pramana/in.purana.brahmanda.2.12.34) sokumāryamathānvicchankukkuṭebhyaḥ prayacchati / evametatsamuddiṣṭaṃ piṇḍanirvapaṇe phalam // ### [2.12.35](https://indike.org/pramana/in.purana.brahmanda.2.12.35) ākāśe gamayedvāpi apsu vā dakṣiṇāmukhaḥ / pitṝṇāṃ sthānamākāśaṃ dakṣiṇā caiva digbhevet // ### [2.12.36](https://indike.org/pramana/in.purana.brahmanda.2.12.36) eke viprāḥ punaḥ prāhuḥ piṇḍoddharaṇamagrataḥ / anujñātastu tairvipraiḥ kāmasuddhriyatāmit // ### [2.12.37](https://indike.org/pramana/in.purana.brahmanda.2.12.37) puṣpāṇāṃ ca phalānāṃ ca bhakṣyāṇāmannatastathā / agramuddhṛtya sarveṣāṃ juhuyāddhavyavāhane // ### [2.12.38](https://indike.org/pramana/in.purana.brahmanda.2.12.38) bhaṅyamannaṃ tathā peyaṃ mūlāni ca phalāni ca / hutvāgnau ca tataḥ piṇḍānnirvapeddakṣiṇā mukhaḥ // ### [2.12.39](https://indike.org/pramana/in.purana.brahmanda.2.12.39) vaivasvatāya somāya hutvā piṇḍānnivedya ca / udakānnayanaṃ kṛtvā paścādviprāṃśca bhojayet // ### [2.12.40](https://indike.org/pramana/in.purana.brahmanda.2.12.40) anupūrvaṃ tato viprānbhakṣyairannaiśca śaktitaḥ / snigdhairuṣṇaiḥ sugandhaiśca tarpayettānrasairapi // ### [2.12.41](https://indike.org/pramana/in.purana.brahmanda.2.12.41) ekāgraḥ paryupāsīnaḥ prayataḥ prāñjaliḥ sthitaḥ / tatparaḥ śraddadhānaśca kāmānāpnoti mānavaḥ // ### [2.12.42](https://indike.org/pramana/in.purana.brahmanda.2.12.42) akṣudratvaṃ kṛtajñatvaṃ dākṣiṇyaṃ saṃskṛtaṃ vacaḥ / tapo yajñāṃśca dānaṃ ca prayacchanti pitāmahāḥ // ### [2.12.43](https://indike.org/pramana/in.purana.brahmanda.2.12.43) ataḥ paraṃ vidhiṃ saumyaṃ bhuktavatsu dvijātiṣu / ānupūrvyeṇa vihitaṃ tanme nigadataḥ śṛṇu // ### [2.12.44](https://indike.org/pramana/in.purana.brahmanda.2.12.44) prokṣya bhūmimathoddhṛtya pūrvaṃ pitṛparāyaṇaḥ / tato 'nnivikiraṃ kuryādvidhidṛṣṭena karmaṇā // ### [2.12.45](https://indike.org/pramana/in.purana.brahmanda.2.12.45) svadhā vācya tato viprān vidhivadbhūritakṣiṇān / annaśeṣamanujñāpya satkṛtya dvijasattamān // ### [2.12.46](https://indike.org/pramana/in.purana.brahmanda.2.12.46) prāñjaliḥ prayataścaiva anugamya visarjayet // ### [2.12.46.p1](https://indike.org/pramana/in.purana.brahmanda.2.12.46.p1) iti śrībrahmāṇḍe mahāpurāṇe vāyuprokte madhyabhāge tṛtīye upoddhātapāde śrāddhakalpe dvādaśo 'dhyāyaḥ // 12// ## Linked texts (3) - [Vāyupurāṇa](https://indike.org/pramana/in.purana.vayu.2.14.7) — Vyāsa, Sanskrit - [Nāradapurāṇa](https://indike.org/pramana/in.purana.narada.1.14.89) — Vyāsa, Sanskrit - [Nṛsiṃhaprasāda](https://indike.org/pramana/in.niti.dharma.nibandha.mahanibandha.nrsimhaprasada.p211.5) — Dalapatirāja 1511, Sanskrit --- Source: [https://indike.org/pramana/in.purana.brahmanda.2.12](https://indike.org/pramana/in.purana.brahmanda.2.12) · Pramāṇa