[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.13 # Brahmandapurana 2.13 Brahmāṇḍapurāṇa 2.13 - **Language:** Sanskrit ## Contents - [2.13.143](https://indike.org/pramana/in.purana.brahmanda.2.13.143) — 1 part ### [2.13.1](https://indike.org/pramana/in.purana.brahmanda.2.13.1) bṛhaspatiruvāca sakṛdabhyarcitāḥ prītā bhavanti pitaro 'vyayāḥ / yogātmāno mahātmāno vipāpmāno mahaujasaḥ // ### [2.13.2](https://indike.org/pramana/in.purana.brahmanda.2.13.2) pretya ca svargalokāya kāmaiśca bahulaṃ bhuvi / yeṣu vāpyanugṛhṇanti mokṣaprāptiḥ krameṇa tu // ### [2.13.3](https://indike.org/pramana/in.purana.brahmanda.2.13.3) tāni vakṣyāmyahaṃ saumya sarāṃsi saritastathā / tīrthāni caiva puṇyāni deśāṃśchailāṃstathāśramān // ### [2.13.4](https://indike.org/pramana/in.purana.brahmanda.2.13.4) puṇyo hi triṣu lokeṣu sadaivāmarakaṇṭakaḥ / parvatapravaraḥ puṇyaḥ siddhayāraṇasevitaḥ // ### [2.13.5](https://indike.org/pramana/in.purana.brahmanda.2.13.5) yatra varṣasahasrāṇi prayutānyarbudāni ca / tapaḥ suduścaraṃ tepe bhagavānaṅgirāḥ purā // ### [2.13.6](https://indike.org/pramana/in.purana.brahmanda.2.13.6) yatra mṛtyorgatirnnāsti tathaivāsurarakṣasām / na bhayaṃ naiva cālakṣmīryāvadbhūmirddhariṣyati // ### [2.13.7](https://indike.org/pramana/in.purana.brahmanda.2.13.7) tapasā tejasā tasya bhrajate sa nagottamaḥ / śṛṅge mālyavato nityaṃ vahniḥ saṃvarttako yathā // ### [2.13.8](https://indike.org/pramana/in.purana.brahmanda.2.13.8) mṛdavastu sugandhāśca hemābhāḥ priyadarśanāḥ / śāntāḥkuśā iti khyātāḥ paridakṣiṇanarmadām // ### [2.13.9](https://indike.org/pramana/in.purana.brahmanda.2.13.9) dṛṣṭavānsvargasopānaṃ bhagavānaṅgirāḥ purā / agnihotre mahātejāḥ prastārārthaṃ kuśottamān // ### [2.13.10](https://indike.org/pramana/in.purana.brahmanda.2.13.10) teṣu darbheṣu yaḥ piṇḍānmarakaṇṭaṭakaparvate / dadyātsakṛdapi prājñastasya vakṣyāmi yatphalam // ### [2.13.11](https://indike.org/pramana/in.purana.brahmanda.2.13.11) tadbhavatyakṣayaṃ śrāddhaṃ pitṝṇāṃ prītivardhanam / antarddhānaṃ ca gacchanti kṣetramāsādya tatsadā // ### [2.13.12](https://indike.org/pramana/in.purana.brahmanda.2.13.12) tatra jvālāsaraḥ puṇyaṃ dṛśyate cāpi parvasu / saśalyānāṃ ca sattvānāṃ viśalyakaraṇī nadī // ### [2.13.13](https://indike.org/pramana/in.purana.brahmanda.2.13.13) prāgdakṣiṇāyatāvarttā vāpī sā sunagottame / kaliṅgadeśapaścārddhe śṛṅge mālyavato vibhoḥ // ### [2.13.14](https://indike.org/pramana/in.purana.brahmanda.2.13.14) siddhikṣetramṛṣiśreṣṭhā yaduktaṃ paramaṃ bhuvi / saṃmataṃ devadaityānāṃ ślokaṃ cāpyuśanā jagau // ### [2.13.15](https://indike.org/pramana/in.purana.brahmanda.2.13.15) dhanyāste puruṣā loke ye prāpyāmarakaṇṭakam / pitṝnsaṃtarpayiṣyantiśrāddhe pitṛparāyaṇāḥ // ### [2.13.16](https://indike.org/pramana/in.purana.brahmanda.2.13.16) alpena tapasā siddhiṃ gamiṣyanti na saṃśayaḥ / sakṛdevārcitāstatra svargamāmarakaṇṭake // ### [2.13.17](https://indike.org/pramana/in.purana.brahmanda.2.13.17) mahendraḥparvataḥ puṇyo ramyaḥ śakraniṣevitaḥ / tatrāruhya bhavetpūtaḥ śrāddhaṃ caiva mahāphalam // ### [2.13.18](https://indike.org/pramana/in.purana.brahmanda.2.13.18) vailāṭaśikhare yuktvā divyaṃ cakṣuḥ pravartate / adhṛṣyaścaiva bhūtānāṃ devavaccarate mahīm // ### [2.13.19](https://indike.org/pramana/in.purana.brahmanda.2.13.19) saptagodāvare caiva gokarṇe ca tapovane / aśvamedhaphalaṃ snātvā tatra dattvā bhavettataḥ // ### [2.13.20](https://indike.org/pramana/in.purana.brahmanda.2.13.20) dhūtapāpasthalaṃ prāpya pūtaḥ snātvā bhavennaraḥ / rudrastatra tapastepe devadevo maheśvaraḥ // ### [2.13.21](https://indike.org/pramana/in.purana.brahmanda.2.13.21) gokarṇe nihitaṃ devair nāstikānāṃ nidarśanam / abrāhmaṇasya sāvitrīṃ paṭhatastu praṇaśyati // ### [2.13.22](https://indike.org/pramana/in.purana.brahmanda.2.13.22) devarṣibhavane śṛṅge siddhacāraṇasevite / āruhyataṃ niya mavāṃstato yāti triviṣṭapam // ### [2.13.23](https://indike.org/pramana/in.purana.brahmanda.2.13.23) divyaiścandanavṛkṣaiśca pādapairupaśobhitam / āpaścandanasaṃyuktāḥ spandeti satataṃ tataḥ // ### [2.13.24](https://indike.org/pramana/in.purana.brahmanda.2.13.24) nadī pravartate tābhyastāmraparṇīti nāmataḥ / yā candanamahākhaṇḍāddakṣiṇaṃ yāti sāgaram // ### [2.13.25](https://indike.org/pramana/in.purana.brahmanda.2.13.25) nadyāstasyāśca tāmrāyāstūhyamānā mahodadhau / śaṅkhā bhavanti śuktyaśca jāyate yāsu mauktikam // ### [2.13.26](https://indike.org/pramana/in.purana.brahmanda.2.13.26) udakānayanaṃ kṛtvā śaṅkhamauktikasaṃyutam / ādhibhirvyādhibhiścaiva muktā yāntyamarāvatīm // ### [2.13.27](https://indike.org/pramana/in.purana.brahmanda.2.13.27) candanebhyaḥ prasūtānāṃ śaṅkhānāṃ mauktikasya vā / pāpakarttṝnapi pitṝṃstārayanti yathāśruti // ### [2.13.28](https://indike.org/pramana/in.purana.brahmanda.2.13.28) candratīrthe kumāryāṃ ca kāverīprabhave kṣaye / śrīparvatasya tīrtheṣu vaikṛte ca tathā girau // ### [2.13.29](https://indike.org/pramana/in.purana.brahmanda.2.13.29) ekasthā yatra dṛśyante vṛkṣāhyauśīraparvate / palāśāḥ khadirā bilvāḥ plakṣāśvatthavikaṅkatāḥ // ### [2.13.30](https://indike.org/pramana/in.purana.brahmanda.2.13.30) evaṃ dvimaṇḍalāviddhaṃ vijñeyaṃ dvijasattamāḥ / asmiṃstyaktvā janoṃ'gāti kṣipraṃ yātyamarāvatīm // ### [2.13.31](https://indike.org/pramana/in.purana.brahmanda.2.13.31) śrīparvatasya tīrthe tu vaikṛte ca tathā girau / karmāṇi tu prayuktā ni siddhyanti prabhavāpyaye // ### [2.13.32](https://indike.org/pramana/in.purana.brahmanda.2.13.32) duṣprayuktā hi pitṛṣu suprayogā bhavantyuta / pitṝṇāṃ duhitā puṇyā narmadā saritāṃ varā // ### [2.13.33](https://indike.org/pramana/in.purana.brahmanda.2.13.33) yatra śrāddhāni dattāṃni hyakṣayāṇi bhavantyuta / māṭharasya vane puṇye siddhacāraṇasevite // ### [2.13.34](https://indike.org/pramana/in.purana.brahmanda.2.13.34) antarddhānena gacchanti yuktvā tasminmahā girau / vindhye caiva girau puṇye dharmādharmanidarśanīm // ### [2.13.35](https://indike.org/pramana/in.purana.brahmanda.2.13.35) dhārāṃ pāpā na paśyanti dhārāṃ paśyanti sādhavaḥ / tatra taddṛśyate pāpaṃ keṣāṃ citpāpakarmaṇām // ### [2.13.36](https://indike.org/pramana/in.purana.brahmanda.2.13.36) kailāse yā mataṅgasya vāpī pāpaniṣūdanī / snātvā tasyā divaṃ yānti kāmacārā vihaṅgamāḥ // ### [2.13.37](https://indike.org/pramana/in.purana.brahmanda.2.13.37) śaurpārake tathā tīrthe parvate pālamañjare / pāṇḍukūpe samudrānte piṇḍārakataṭe tathā // ### [2.13.38](https://indike.org/pramana/in.purana.brahmanda.2.13.38) vimale ca vipāpe ca saṃkalpaṃ prāpya cākṣayam / śrīvṛkṣe citrakūṭe ca jaṃbūmārge ca nityaśaḥ // ### [2.13.39](https://indike.org/pramana/in.purana.brahmanda.2.13.39) asitasya girau puṇye yogācāryasya dhīmataḥ / tatrāpi śrāddhamānantyamasitāyāṃ ca nityaśaḥ // ### [2.13.40](https://indike.org/pramana/in.purana.brahmanda.2.13.40) puṣkareṣvakṣayaṃ śrāddhaṃ tapaścaiva mahāphalamā / mahodadhau prabhāse ca tadvadeva vinirdiśet // ### [2.13.41](https://indike.org/pramana/in.purana.brahmanda.2.13.41) devikāyāṃ vṛṣo nāma kūpaḥ siddhaniṣevitaḥ / samutpatanti tasyāpo gavāṃ śabdena nityaśaḥ // ### [2.13.42](https://indike.org/pramana/in.purana.brahmanda.2.13.42) yogeśvaraiḥ sadā juṣṭaḥ sarvapāpabahiṣkṛtaḥ / dadyācchrāddhaṃ tu yastasmiṃstasya vakṣyāmi yatphalam // ### [2.13.43](https://indike.org/pramana/in.purana.brahmanda.2.13.43) akṣayaṃ sarvakāmīyaṃ śrāddhaṃ prīṇāti vai pitṝn / jātavedaḥ śilā tatra sākṣādagneḥ sanātanāt // ### [2.13.44](https://indike.org/pramana/in.purana.brahmanda.2.13.44) śrāddhāni cāgnikāryaṃ ca tatra kuryātsadā kṣayam / yastvagniṃ praviśettatra nākapṛṣṭhe sa modate // ### [2.13.45](https://indike.org/pramana/in.purana.brahmanda.2.13.45) agniśāntaḥ punarjātastatra dattaṃ tato 'kṣayam / daśāśvamedhike tīrthe tīrthe pañcāśvamedhike // ### [2.13.46](https://indike.org/pramana/in.purana.brahmanda.2.13.46) yathoddiṣṭaphalaṃ teṣāṃ kratūnāṃ nātra saṃśayaḥ / khyātaṃ hayaśiro nāma tīrthaṃ sadyo varapradam // ### [2.13.47](https://indike.org/pramana/in.purana.brahmanda.2.13.47) śrāddhaṃ tatra sadākṣayyaṃ dātā svarge ca modate / śrāddhaṃ suṃdanisuṃde ca deyaṃ pāpaniṣū danam // ### [2.13.48](https://indike.org/pramana/in.purana.brahmanda.2.13.48) śrāddhaṃ tatrākṣayaṃ proktaṃ japahomatapāṃsi ca / jatuṅge śubhe tīrthe tarpayetsatataṃ pitṝn // ### [2.13.49](https://indike.org/pramana/in.purana.brahmanda.2.13.49) dṛśyate parvasu cchāyā yatra nityaṃ divaukasām / pṛthivyāmakṣayaṃ dattaṃ virajā yatra pādapaḥ // ### [2.13.50](https://indike.org/pramana/in.purana.brahmanda.2.13.50) yogeśvaraiḥ sadā juṣṭaḥ sarvapāpabahiṣkṛtaḥ / dadyācchrāddhaṃ tu yastasmiṃstasya vakṣyāmi yatphalam // ### [2.13.51](https://indike.org/pramana/in.purana.brahmanda.2.13.51) arcitāstena vai sākṣādbhavanti pitaraḥ sadā / asmiṃlloke vaśī ca syātpretya svarge mahī yate // ### [2.13.52](https://indike.org/pramana/in.purana.brahmanda.2.13.52) prāyaśo madravā puṇyā śivo nāma hradastathā / tatra vyāsasaraḥ puṇyaṃ divyo brahmahradastathā // ### [2.13.53](https://indike.org/pramana/in.purana.brahmanda.2.13.53) ūrjjantaḥ parvataḥ puṇyo yatra yogeśvarālayaḥ / atraiva cāśramaḥ puṇyo vasiṣṭhasya mahātmanaḥ // ### [2.13.54](https://indike.org/pramana/in.purana.brahmanda.2.13.54) ṛgyajuḥ sāmaśirasaḥ kapotāḥ puṣpasāhvayāḥ / ākhyāna pañcamā vedāḥ sṛṣṭā hyete svayaṃbhuvā // ### [2.13.55](https://indike.org/pramana/in.purana.brahmanda.2.13.55) gatvaitānmucyate pāpaddvijo vahniṃ samāśrayan / śrāddhaṃ cānantyameteṣu japahomatapāṃsi ca // ### [2.13.56](https://indike.org/pramana/in.purana.brahmanda.2.13.56) puṇḍarīke mahātīrthe puṇḍarīkasamaṃ phalam / brahmatīrthe mahāprājña sarvayajñasamaṃ phalam // ### [2.13.57](https://indike.org/pramana/in.purana.brahmanda.2.13.57) siṃdhusāgarasaṃbhede tathā pañcanade kṣayam / virajāyāṃ tathā puṇyaṃ madravāyāṃ ca parvate // ### [2.13.58](https://indike.org/pramana/in.purana.brahmanda.2.13.58) deyaṃ saptanade śrāddhaṃ mānase vā viśeṣataḥ / mahākūṭe hyanante ca girau trikakude tathā // ### [2.13.59](https://indike.org/pramana/in.purana.brahmanda.2.13.59) saṃdhyāyāṃ ca mahānadyāṃ dṛśyate mahādadbhutam / aśraddadhānaṃ nābhyeti sā cābhyeti dhṛtavratam // ### [2.13.60](https://indike.org/pramana/in.purana.brahmanda.2.13.60) saṃśrayitvaikamekena sāyāhnaṃ prati nityaśaḥ / tasmindeyaṃ sadā śrāddhaṃ pitṝṇāmakṣayārthinām // ### [2.13.61](https://indike.org/pramana/in.purana.brahmanda.2.13.61) kṛtātmā vākṛtātmā ca yatra vijñāyate naraḥ / svargamārgapradaṃ nāma tīrthaṃ sadyo varapradam // ### [2.13.62](https://indike.org/pramana/in.purana.brahmanda.2.13.62) cīrāṇyutsṛjya yasmiṃstu divaṃ saptarṣayo gātāḥ / adyāpi tāni dṛśyante cīrāṇyaṃbhogatāni tu // ### [2.13.63](https://indike.org/pramana/in.purana.brahmanda.2.13.63) snātvā svargamavāpnoti tasmiṃstīrthettame naraḥ / khyātamāyatanaṃ tatra nandinaḥ siddhasevitam // ### [2.13.64](https://indike.org/pramana/in.purana.brahmanda.2.13.64) nandīśvarasya sā mūrttirnirācārairnadṛśyate / dṛśyante kāñcanā yupāstvarciṣo bhāskarodaye // ### [2.13.65](https://indike.org/pramana/in.purana.brahmanda.2.13.65) kṛtvā pradakṣiṇaṃ tāṃstu gacchantyānanditā divam / sarvataśca kurukṣetraṃ sutīrthaṃ tu viśeṣataḥ // ### [2.13.66](https://indike.org/pramana/in.purana.brahmanda.2.13.66) puṇyaṃ sanatkumārasya yogeśasya mahātmanaḥ / kīrtyate ca tilāndattvā pitṛbhyovai sadākṣayam // ### [2.13.67](https://indike.org/pramana/in.purana.brahmanda.2.13.67) uktamevākṣayaṃ śrāddhaṃ dharmarājaniṣevitam / śrāddhaṃ dattamamāvāsyāṃ vidhinā ca yathākramam // ### [2.13.68](https://indike.org/pramana/in.purana.brahmanda.2.13.68) puṃsaḥ sannihitāyāṃ tu kurūkṣetre viśeṣataḥ / arcayitvā pitṝṃstatra sa putrastvanṛṇo bhavet // ### [2.13.69](https://indike.org/pramana/in.purana.brahmanda.2.13.69) sarasvatyāṃ vinaśane plakṣapraśravaṇe tathā / vyāsatīrthe dṛṣadvatyāṃ triplakṣe ca viśeṣataḥ // ### [2.13.70](https://indike.org/pramana/in.purana.brahmanda.2.13.70) deyamoṅkārapavane śrāddhamakṣayamicchatā / śakrāvatāre gaṅgāyāṃ maināke ca nagottame // ### [2.13.71](https://indike.org/pramana/in.purana.brahmanda.2.13.71) yamunāprabhave caiva sarvapāpaiḥ pramucyate / atyuṣṇāścātiśītāśca āpastasminnidarśanam // ### [2.13.72](https://indike.org/pramana/in.purana.brahmanda.2.13.72) yamasya bhaginī puṣyā mārttaṇḍaduhitā śubhā / tatrākṣayaṃ sadā śrāddhaṃ pitṛbhiḥ pūrvakīrttitam // ### [2.13.73](https://indike.org/pramana/in.purana.brahmanda.2.13.73) brahmatuṇḍahrade snātvā saddayo bhavati brāhmaṇaḥ / tasmiṃstu śrāddhamānantyaṃ japahomatapāṃsi ca // ### [2.13.74](https://indike.org/pramana/in.purana.brahmanda.2.13.74) sthāṇubhūto 'carattatra vasiṣṭo vai mahātapāḥ / adyāpi tatra dṛśyante pādapā maṇibarhaṇāḥ // ### [2.13.75](https://indike.org/pramana/in.purana.brahmanda.2.13.75) tulā tu dṛśyate tatra dharmāndharmanidharśinī / yathā vai tolitaṃ vipraistīrthānāṃ phalamuttamam // ### [2.13.76](https://indike.org/pramana/in.purana.brahmanda.2.13.76) pitṝṇāṃ duhitā yogā gandhakālīti viśrutā / caturtho brahmaṇastvaṃśaḥ parāśarakulodbhavaḥ // ### [2.13.77](https://indike.org/pramana/in.purana.brahmanda.2.13.77) vyasiṣyati caturddhā vai vedaṃ dhīmānmahāmuniḥ / mahāyogaṃ mahātmānaṃ yā vyāsaṃ janayiṣyati // ### [2.13.78](https://indike.org/pramana/in.purana.brahmanda.2.13.78) acchodakaṃ nāmasarastatrācchodāsamudbhavaḥ / matsyayonau punarjātā niyogātkāraṇena tu // ### [2.13.79](https://indike.org/pramana/in.purana.brahmanda.2.13.79) tasyāstvādyāśrame puṇye puṇyakṛdbhirniṣevite / dattaṃ sakṛdapi śrāddhamakṣayaṃ samudāhṛtam // ### [2.13.80](https://indike.org/pramana/in.purana.brahmanda.2.13.80) nadyāṃ yogasamādhānaṃ dattaṃ yugapadudbhavet / kuberatuṅge pāpaghnaṃ vyāsatīrthetathaiva ca // ### [2.13.81](https://indike.org/pramana/in.purana.brahmanda.2.13.81) puṇyāyāṃ brahmaṇo vedyāṃ śrāddhamānantyamiṣyate / siddhaistu sevitā nityaṃ dṛśyate tu kṛtātmabhiḥ // ### [2.13.82](https://indike.org/pramana/in.purana.brahmanda.2.13.82) anivartanaṃ tu nandāyāṃ vedyāḥ prāguttaradiśi / siddhikṣetraṃ surairjuṣṭaṃ yatprāpya na nivarttate // ### [2.13.83](https://indike.org/pramana/in.purana.brahmanda.2.13.83) mahālaye padaṃ nyastaṃ mahādevena dhīmatā / bhūtānāmanukaṃpārthaṃ nāstikānāṃ nidarśanam // ### [2.13.84](https://indike.org/pramana/in.purana.brahmanda.2.13.84) viraje tvakṣayaṃ śrāddhaṃ pūrvameva mahālaye / nandāyāṃ viraje caiva tathaiva ca mahālaye // ### [2.13.85](https://indike.org/pramana/in.purana.brahmanda.2.13.85) ātmānaṃ tārayantīha daśapūrvāndaśāparān / kākahrade jātismaryaṃ suvarṇamamitaujasam // ### [2.13.86](https://indike.org/pramana/in.purana.brahmanda.2.13.86) kaumāraṃ ca saraḥ puṇyaṃ nāgabhogābhirakṣitam / kumāratīrthe snātvā tu tridivaṃ yāti mānavaḥ // ### [2.13.87](https://indike.org/pramana/in.purana.brahmanda.2.13.87) devālaye tapastasvā ekapādena duścaram / nirāhāro yugaṃ divyamumātuṅgo sthito jvalan // ### [2.13.88](https://indike.org/pramana/in.purana.brahmanda.2.13.88) umātuṅge bhṛgostuṅge brahmatuṅge mahālaye / tatra śrāddhāni deyāni nityamakṣayamicchatā // ### [2.13.89](https://indike.org/pramana/in.purana.brahmanda.2.13.89) akṣayaṃ tu sadā śrāddhaṃ śālagrāme samantataḥ / duṣkṛtaṃ dṛśyate tatra pratyakṣamakṛtātmanām // ### [2.13.90](https://indike.org/pramana/in.purana.brahmanda.2.13.90) pratyadeśo hyaśiṣṭānāṃ śiṣṭānāṃ ca viśeṣataḥ / tatra devahradaḥ puṇyo brahmaṇo nāgarāṭ śuciḥ // ### [2.13.91](https://indike.org/pramana/in.purana.brahmanda.2.13.91) piṇḍaṃ gṛhṇati hi satāṃ na gṛhṇātyasatāṃ sadā / atipradīptairbhujagairbhoktumannaṃ na śakyate // ### [2.13.92](https://indike.org/pramana/in.purana.brahmanda.2.13.92) pratyakṣaṃ dṛśyate dharmastīrthayornatayordvayoḥ / kāravatyāṃ ca śāṇḍilyāṃ guhāyāṃ vāmanasya ca // ### [2.13.93](https://indike.org/pramana/in.purana.brahmanda.2.13.93) gatvā caitāni pūtaḥsyācchradaddhamakṣayameva ca / japo homastapo dhyānaṃ yatkiñcitsukṛtaṃ bhavet // ### [2.13.94](https://indike.org/pramana/in.purana.brahmanda.2.13.94) brahmacaryaṃ ca yau dhatte gurubhaktiṃ śataṃ samāḥ / evamādyāssaricchreṣṭhā yatsnānādaghamokṣaṇam / kumāradhārā tatraiva dṛṣṭā pāpaṃ praṇaśyati // ### [2.13.95](https://indike.org/pramana/in.purana.brahmanda.2.13.95) dhyānāsanaṃ tu tatraiva vyāsasyādyāpi dṛśyate / śailaḥ kāntipurābhyāśe prāgudīcyāṃ diśi sthitaḥ // ### [2.13.96](https://indike.org/pramana/in.purana.brahmanda.2.13.96) puṇya puṣkariṇī tatra kirātagaṇarakṣitā / yasyāṃ snātvā sakṛdvipraḥ kāmānāpnoti śāśvatān // ### [2.13.97](https://indike.org/pramana/in.purana.brahmanda.2.13.97) adṛśyaḥ sarvabhūtānāṃ devavaccarate mahīm // ### [2.13.98](https://indike.org/pramana/in.purana.brahmanda.2.13.98) kāśyapasya mahātīrthaṃ kālasarpiriti śrutam / tatra śrāddhāni deyāni nityamakṣayamicchatā // ### [2.13.99](https://indike.org/pramana/in.purana.brahmanda.2.13.99) devadāruvane vāpi dhārāyāstu nidarśanam / nirdhūtāni tu pāpāni dṛśyante sukṛtātmanām // ### [2.13.100](https://indike.org/pramana/in.purana.brahmanda.2.13.100) bhāgīrathyāṃ prayāge tu nityamakṣayamucyate / kālañjare daśārṇāyāṃ naimiṣe kurujāṅgale // ### [2.13.101](https://indike.org/pramana/in.purana.brahmanda.2.13.101) vārāṇasyāṃ nagaryāṃ ca deyaṃ śrāddhaṃ prayatnataḥ / tatra yogeśvaro nityaṃ tasyāṃ dattamathākṣayam // ### [2.13.102](https://indike.org/pramana/in.purana.brahmanda.2.13.102) gatvā caitāni pūrtaḥ syācchrāddhamakṣayyameva ca / jabo homastathā dhyānaṃ yatkiñcitsukṛtaṃ bhavet // ### [2.13.103](https://indike.org/pramana/in.purana.brahmanda.2.13.103) lauhitye vaitaraṇyāṃ casvargavedyāṃ tathaiva ca / sā tu devī samudrānte dṛśyate caiva nāmabhiḥ // ### [2.13.104](https://indike.org/pramana/in.purana.brahmanda.2.13.104) gayāyāṃ dharmavṛṣṭhe tu sarasi brahmaṇastathā / gayāṃ gṛdhravaṭe caiva śrāddhaṃ dattaṃ mahāphalam // ### [2.13.105](https://indike.org/pramana/in.purana.brahmanda.2.13.105) himaṃ ca patate tatra samantātpañcayo janam / bharatasyāśrame puṇye 'raṇyaṃ puṇyatamaṃ smṛtam // ### [2.13.106](https://indike.org/pramana/in.purana.brahmanda.2.13.106) mataṅgasya vanaṃ tatra dṛśyate sarvamānuṣaiḥ / sthāpitaṃ dharmasarvasvaṃ lokasyāsya nidarśanam // ### [2.13.107](https://indike.org/pramana/in.purana.brahmanda.2.13.107) yaddaṇḍakavanaṃ puṇyaṃ puṇyakṛdbhirniṣevitam / yasminprāhurviśalyeti tīrthaṃ sadyo nidarśanam // ### [2.13.108](https://indike.org/pramana/in.purana.brahmanda.2.13.108) tulāmānaistathā cāpi śāstraiśca vividhaistathā / unmaccanti tathā lagna ye vai pāpakṛto janāḥ // ### [2.13.109](https://indike.org/pramana/in.purana.brahmanda.2.13.109) tṛtīyāyāṃ tathā pāde nirādhāyāṃ tu maṇḍale / mahāhrade ca kauśikyāṃ dattaṃ śrāddhaṃ mahāphalam // ### [2.13.110](https://indike.org/pramana/in.purana.brahmanda.2.13.110) muṇḍapṛṣṭe padaṃ nyastaṃ mahādevena dhīmatā / bahudevayugāṃstaptvā tapastīvraṃ sudaścaram // ### [2.13.111](https://indike.org/pramana/in.purana.brahmanda.2.13.111) alpenāpyatra kālena naro dharmaparāyaṇaḥ / pāpmānamutsṛjatyāśu jīrṇāṃ tvacamivoragaḥ // ### [2.13.112](https://indike.org/pramana/in.purana.brahmanda.2.13.112) siddhānāṃ prītijananaṃ papānāṃ ca bhayaṅkaram / lelihānairmahāghorai rakṣyate sumahoragaiḥ // ### [2.13.113](https://indike.org/pramana/in.purana.brahmanda.2.13.113) nāmnā kanakanandīti tīrthaṃ jagati viśrutam / udīcyāṃ muṇḍapṛṣṭasya brahmarṣigaṇasevitam // ### [2.13.114](https://indike.org/pramana/in.purana.brahmanda.2.13.114) tatra snātvā divaṃyānti svaśarīreṇa mānavāḥ / dattaṃ vāpi sadā śrāddhamakṣayyaṃ samudāhṛtam // ### [2.13.115](https://indike.org/pramana/in.purana.brahmanda.2.13.115) ṛṇaistribhistataḥ snātvā niṣkrīṇāti narastanum / mānase sarasi snātvā śrāddhaṃnirvarttayettataḥ // ### [2.13.116](https://indike.org/pramana/in.purana.brahmanda.2.13.116) tīre tu sarasastasya devasyā yatanaṃ mahat / āruhya tu japaṃstatra siddho yāti divaṃ tataḥ // ### [2.13.117](https://indike.org/pramana/in.purana.brahmanda.2.13.117) uttaraṃ mānasaṃ gatvāsiddhiṃ prāpnotyanuttamām / snātvā tasminsaraśreṣṭhe dṛśyate mahādadbhutam // ### [2.13.118](https://indike.org/pramana/in.purana.brahmanda.2.13.118) divaścyutā mahābhāgā hyantarikṣe virājate / gaṅgā tripathagā devī viṣṇupādāccyutā satī // ### [2.13.119](https://indike.org/pramana/in.purana.brahmanda.2.13.119) ākāśe dṛśyate tatra toraṇaṃ sūryasannibham / jāṃbūnadamayaṃ puṇyaṃ svagadvāramivāyatam // ### [2.13.120](https://indike.org/pramana/in.purana.brahmanda.2.13.120) tataḥ pravarttate bhūyaḥ sarvasāgaramaṇḍikā / pāvanī sarvabhūtānāṃ dharmajñānāṃ viśeṣataḥ // ### [2.13.121](https://indike.org/pramana/in.purana.brahmanda.2.13.121) candrabhāgā ca siddhuśca śubhe mānasasaṃbhave / sāgaraṃ paścimaṃ yāto divyaḥ siṃdhunado varaḥ // ### [2.13.122](https://indike.org/pramana/in.purana.brahmanda.2.13.122) parvato himavānnāma nānādhātuvibhūṣitaḥ / āyato vai sahasrāṇi yojanānāṃ bahuni tu // ### [2.13.123](https://indike.org/pramana/in.purana.brahmanda.2.13.123) siddhacāraṇasaṃkīrṇā devarṣigaṇasevitā / tatra puṣkariṇī ramyā suṣumṇā nāma nāmataḥ // ### [2.13.124](https://indike.org/pramana/in.purana.brahmanda.2.13.124) daśavarṣasahasrāṇi tasyāṃ snātastu jīvati / śrāddhaṃ bhavati cānantaṃ tatra dattaṃ mahodayam // ### [2.13.125](https://indike.org/pramana/in.purana.brahmanda.2.13.125) tārayecca sadā śrāddhe daśapūrvāndaśāparān / sarvatra himavānpuṇyo gaṅgā puṇyā samantataḥ // ### [2.13.126](https://indike.org/pramana/in.purana.brahmanda.2.13.126) samudragāḥ samudrāśca sarve puṇyāḥ samantataḥ / evamādiṣu cānyeṣu śrāddhaṃ nirvartayedbudhaḥ // ### [2.13.127](https://indike.org/pramana/in.purana.brahmanda.2.13.127) puto bhavati vai snātvā hutvā dattvā tathaiva ca / śelasānuṣu śṛṅgeṣu kandareṣu guhāsu ca // ### [2.13.128](https://indike.org/pramana/in.purana.brahmanda.2.13.128) upahvaranitaṃbeṣu tathā prasravaṇeṣu ca / pulineṣvāpagānāṃ ca tathaiva prabhaveṣu ca // ### [2.13.129](https://indike.org/pramana/in.purana.brahmanda.2.13.129) mahodadhau gavāṃ goṣṭe saṃgameṣu vaneṣu ca / susaṃmṛṣṭopalipteṣu tdṛdyeṣu surabhiṣvatha // ### [2.13.130](https://indike.org/pramana/in.purana.brahmanda.2.13.130) gomayenopalipteṣu vivikteṣu gṛheṣu ca / kuryācchrāddhamathaiteṣu nityameva yathāvidhi // ### [2.13.131](https://indike.org/pramana/in.purana.brahmanda.2.13.131) prāgdakṣiṇāṃ diśaṃ gatvā sarvakāmacikīrṣayā / evameteṣu sarveṣu śrāddhaṃ kuryādatandritaḥ // ### [2.13.132](https://indike.org/pramana/in.purana.brahmanda.2.13.132) eteṣveva tu medhāvī brāhmīṃ siddhimavāpnuyāt / traivarṇavihitaiḥ sthāne dharme varṇāśrame rataiḥ // ### [2.13.133](https://indike.org/pramana/in.purana.brahmanda.2.13.133) kaupasthānaṃ ca saṃtyāgātprāpyate pitṛpūjanam / tīrthānyanusaranvīraḥ śraddadhānaḥ samāhitaḥ // ### [2.13.134](https://indike.org/pramana/in.purana.brahmanda.2.13.134) kṛtapāpo 'pi śudhyeta kiṃ punaḥ śubhakarmakṛt / tiryagyoniṃ na gacchecca kudeśe ca na jāyate // ### [2.13.135](https://indike.org/pramana/in.purana.brahmanda.2.13.135) svargī bhavati vipro vai mokṣopāyaṃ ca vindati / aśraddadhānaḥ pāpāyurnāstiko 'cchinnasaṃśayaḥ // ### [2.13.136](https://indike.org/pramana/in.purana.brahmanda.2.13.136) hetuniṣṭhaśca pañcaite na tīrthe phalabhāginaḥ / gurutīrthe parā siddhistīrthānāṃ paramaṃ padam // ### [2.13.137](https://indike.org/pramana/in.purana.brahmanda.2.13.137) dhyānaṃ tīrthaṃ paraṃ tasmādbrahmatīrthaṃ sanātanam / upavāsātparaṃ dhyānamindriyāṇāṃ nivarttanam // ### [2.13.138](https://indike.org/pramana/in.purana.brahmanda.2.13.138) upavāsanibaddhairhi prāṇaireva punaḥ punaḥ / prāṇāpānau vaśe kṛtvā vaśagānīndiyāṇi ca // ### [2.13.139](https://indike.org/pramana/in.purana.brahmanda.2.13.139) buddhiṃ manasi saṃyamya sarveṣāṃ tu nivarttanam / pratyāhāraṃ kṛtaṃ viddhi mokṣopāyamasaṃśayam // ### [2.13.140](https://indike.org/pramana/in.purana.brahmanda.2.13.140) indriyāṇāṃ mano ghoraṃ buddhyādīnāṃ vivarttanam / anā hāro kṣayaṃ yāti vidyādanaśanaṃ tapaḥ // ### [2.13.141](https://indike.org/pramana/in.purana.brahmanda.2.13.141) nigrahe buddhimansoranyabuddhirna jāyate / kṣīṇeṣu sarvadoṣeṣu kṣīṇeṣvevendriyeṣu ca // ### [2.13.142](https://indike.org/pramana/in.purana.brahmanda.2.13.142) parinirvāti śuddhātmā yathā vahniranidhanaḥ / kāraṇebhyo guṇebhyaśca vyaktāvyaktācca kutsnaśaḥ // ### [2.13.143](https://indike.org/pramana/in.purana.brahmanda.2.13.143) niyojayati kṣetrajñaṃ tebhyoyogena yogavit / tasya nāsti gatiḥ sthānaṃ vyaktāvyakte ca sarvaśaḥ / na sannāsanna sadasannaiva kiñcidavasthitaḥ // ### [2.13.143.p1](https://indike.org/pramana/in.purana.brahmanda.2.13.143.p1) iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde śrāddhakalpe puṇyadeśānukīrttanaṃ nāma trayodaśo 'dhyāyaḥ // 13// ## Linked texts (7) - [Vāyupurāṇa](https://indike.org/pramana/in.purana.vayu.2.15.2) — Vyāsa, Sanskrit - [Kūrmapurāṇa](https://indike.org/pramana/in.purana.kurma.2.36.32) — Vyāsa, Sanskrit - [Dāśarathīyatantra](https://indike.org/pramana/in.sampradaya.vaisnava.tantra.dasarathiyatantra.5261) — Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.11.p393) — Lakṣmīdhara Bhaṭṭa, Sanskrit - [Smṛticandrikā](https://indike.org/pramana/in.niti.dharma.nibandha.mahanibandha.smrticandrika.79.p29) — Devaṇṇabhaṭṭa, Sanskrit - [Vratakhaṇḍa](https://indike.org/pramana/in.niti.dharma.vrata.vratakhanda.112.p1.21) — Hemādri, Sanskrit - [Tīrthaprakāśa](https://indike.org/pramana/in.niti.dharma.tirtha.tirthaprakasa.4.p248) — Mitramiśra, Sanskrit --- Source: [https://indike.org/pramana/in.purana.brahmanda.2.13](https://indike.org/pramana/in.purana.brahmanda.2.13) · Pramāṇa