[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.15 # Brahmandapurana 2.15 Brahmāṇḍapurāṇa 2.15 - **Language:** Sanskrit ## Contents - [2.15.68](https://indike.org/pramana/in.purana.brahmanda.2.15.68) — 1 part ### [2.15.1](https://indike.org/pramana/in.purana.brahmanda.2.15.1) ṛṣaya ūcuḥ aho dhanyastvayā sūta śrāddhakalpaḥ prakīrtitaḥ / śrutā naḥ śrāddhakalpāstu ṛṣibhirye prakīrttitāḥ // ### [2.15.2](https://indike.org/pramana/in.purana.brahmanda.2.15.2) atīva vistaro hyasya viśeṣeṇa tu kīrttitaḥ / devāśeṣaṃ mahāprājña ṛṣestasya mataṃ yathā // ### [2.15.3](https://indike.org/pramana/in.purana.brahmanda.2.15.3) sūta uvāca kīrttayiṣyāmi vo viprā ṛṣestasya mataṃ tu yat / śrāddhaṃ prati mahābhāgastanme śruṇuta vistarāt // ### [2.15.4](https://indike.org/pramana/in.purana.brahmanda.2.15.4) uktaṃ śrāddhaṃmayā pūrvaṃ vidhiśca śrāddhakarmaṇi / pariśiṣṭaṃ pravakṣyāmi brahmaṇānāṃ parikṣaṇam // ### [2.15.5](https://indike.org/pramana/in.purana.brahmanda.2.15.5) na mīmāṃsyāḥ sadā viprāḥ pavitraṃhyetaduttamam / daive pitrye ca niyataṃ śrūyate vai parīkṣaṇam // ### [2.15.6](https://indike.org/pramana/in.purana.brahmanda.2.15.6) yasmindoṣāḥ pradṛśyeramsa hi kāryeṣu varjitaḥ / jānīyādvāpi saṃvāsādvarjayettaṃ prayatnataḥ // ### [2.15.7](https://indike.org/pramana/in.purana.brahmanda.2.15.7) avijñātaṃ dvijaṃ śrāddhe na parīkṣeta paṇḍitaḥ / siddhā hi viprarūpeṇa caranti pṛthivīmimām // ### [2.15.8](https://indike.org/pramana/in.purana.brahmanda.2.15.8) tasmādatithimāyāntamabhigacchetkṛtāñjaliḥ / pūjayeccārghyapādyābhyāṃ tathābhyañjanabhojanaiḥ // ### [2.15.9](https://indike.org/pramana/in.purana.brahmanda.2.15.9) urvī sāgaraparyantāṃ devā yogeśvaraḥ sadā / nānārūpaiścarantyete prajā dharmeṇa yojayan // ### [2.15.10](https://indike.org/pramana/in.purana.brahmanda.2.15.10) tasmāddadyātsadā dāntaḥ samabhyārcyātithiṃ naraḥ / vyañjanāni tu vakṣyāmi phalaṃ teṣāṃ tathaiva ca // ### [2.15.11](https://indike.org/pramana/in.purana.brahmanda.2.15.11) agniṣṭomaṃ payasā prāpnuyādvai phalaṃ tathokthasya ca pāyasena / saṣoḍaśī satraphalaṃ ghṛtena madhvātirātrasya phalaṃ tathaiva // ### [2.15.12](https://indike.org/pramana/in.purana.brahmanda.2.15.12) tathāpnuyācchraddadhā no naro vai sarvaiḥ kāmairbhojayedyastu viprān / sarvārthadaṃ sarvaviprātitheyaṃ phalaṃ ca bhuṅkte sarvamedhasya nityam // ### [2.15.13](https://indike.org/pramana/in.purana.brahmanda.2.15.13) yastu śrāddhe 'tithiṃ prāptaṃ daive cāpyavamanyate / taṃ vai devā nirasyanti hato yadvatparāvasuḥ // ### [2.15.14](https://indike.org/pramana/in.purana.brahmanda.2.15.14) devāśca pitaraścaiva temevāntarhitā dvijam / āviśya vipraṃ mokṣyanti lokānugrahakāraṇāt // ### [2.15.15](https://indike.org/pramana/in.purana.brahmanda.2.15.15) apūjito dahatyeṣa diśetkāmāṃśca pūjitaḥ / sarvasvenāpi tasmāddhi pūjayedatithiṃ sadā // ### [2.15.16](https://indike.org/pramana/in.purana.brahmanda.2.15.16) vānaprastho gṛhasthaśca satāmabhyāgato yathā / vālakhilyo yatiścaiva vijñeyo hyatithiḥ sadā // ### [2.15.17](https://indike.org/pramana/in.purana.brahmanda.2.15.17) abhyāgataḥ pākacāradatithiḥ syādapāvakaḥ / atitheratithiḥ proktaḥ so 'tithiryoga ucyate // ### [2.15.18](https://indike.org/pramana/in.purana.brahmanda.2.15.18) nāvratī na ca saṃkīrṇo nāvidyo nāviśeṣavit / na ca saṃtānasaṃbaddho na devī nāgase 'tithiḥ // ### [2.15.19](https://indike.org/pramana/in.purana.brahmanda.2.15.19) pipāsitāya śrāntāya bhrāntāyātibubhukṣate / tasmai satkṛtya dātavyaṃ yajñamya phalamicchatā // ### [2.15.20](https://indike.org/pramana/in.purana.brahmanda.2.15.20) na vaktavyaṃ sadā vipra kṣudhite nāsti kiñcana / tasmai satkṛtya dātavyaṃ sadāpacitireva saḥ // ### [2.15.21](https://indike.org/pramana/in.purana.brahmanda.2.15.21) akliṣṭa mavraṇaṃ yuktaṃ kṛśavṛttimayācakam / ekāntaśīlaṃ dhīmantaṃ sadā śrāddheṣu bhojayet // ### [2.15.22](https://indike.org/pramana/in.purana.brahmanda.2.15.22) no dadāmi tamityevaṃ brūyādyo vai durātmavān / api jātiśataṃ gatvā na sa mucyeta kilbiṣāt // ### [2.15.23](https://indike.org/pramana/in.purana.brahmanda.2.15.23) samodaṃ bhojayedviprānekapaṅktyāṃ tu yo naraḥ / niyukto hyani yukto vā paṅktyā harati kilbiṣam // ### [2.15.24](https://indike.org/pramana/in.purana.brahmanda.2.15.24) pāpmānaṃ gṛhyate kṣipramiṣṭāpūrttaṃ ca naśyati / yatistu sarvaviprāṇāṃ sarveṣāmagrato bhavet // ### [2.15.25](https://indike.org/pramana/in.purana.brahmanda.2.15.25) pañca vedānsetihāsānyaḥ paṭheddvijasattamaḥ / yogādanantaraṃ so 'tha niyoktavyo vijānatā // ### [2.15.26](https://indike.org/pramana/in.purana.brahmanda.2.15.26) trivedo 'nantaraṃ tasya dvivedastadanantaram / ekavedastataḥ paścādupādhyāyastataḥ param // ### [2.15.27](https://indike.org/pramana/in.purana.brahmanda.2.15.27) pāvanā ye 'tra saṃkhyātāstānpravakṣye nibodhata / ya ete pūrvanirddiṣṭāḥ sarve te hyanupūrvaśaḥ // ### [2.15.28](https://indike.org/pramana/in.purana.brahmanda.2.15.28) ṣaḍaṅgaviddhyānayogau sarvatatrastathaiva ca / yāyāvaraśca pañcaite vijñeyāḥ paṅktipāvanāḥ // ### [2.15.29](https://indike.org/pramana/in.purana.brahmanda.2.15.29) śrāddhakalpe bhavedyastu sannipatya tu pāvanaḥ / caturdaśānāṃ vidyānāmekasyāmapi pāragāḥ // ### [2.15.30](https://indike.org/pramana/in.purana.brahmanda.2.15.30) yathāvadvarttamānāśca sarve te paṅktipāvanāḥ / asaṃdehastu sauparṇāḥ pañcāgneyāśca sāmagāḥ // ### [2.15.31](https://indike.org/pramana/in.purana.brahmanda.2.15.31) yaścaredvidhivadvipra samā dvādaśa saṃtataḥ / trināciketastrai vidyo yaśca dharmāndvijaḥ paṭhet // ### [2.15.32](https://indike.org/pramana/in.purana.brahmanda.2.15.32) bārhaspatye mahāśāstre yaśca pāraṅgato dvijaḥ / sarve te pāvanā viprāḥ paṅktīnāṃ samudātdṛtāḥ // ### [2.15.33](https://indike.org/pramana/in.purana.brahmanda.2.15.33) āmantritastu yaḥ śrāddhe yoṣitaṃ sevate dvijaḥ / pitarastasya tanmāsaṃ tasminritasi śerate // ### [2.15.34](https://indike.org/pramana/in.purana.brahmanda.2.15.34) dhyānaniṣṭhāya dātavyaṃ sānukrośāya dhīmate / yatiṃ vā vālakhilyaṃ vā bhojayecchrāddakarmaṇi // ### [2.15.35](https://indike.org/pramana/in.purana.brahmanda.2.15.35) vānaprasthāya kurvāṇaḥ pūjāmātreṇa tuṣyate / gṛhasthaṃ bhojayedyastu viśvedevāstu pūjitāḥ // ### [2.15.36](https://indike.org/pramana/in.purana.brahmanda.2.15.36) vānaprasthena ṛṣayo vālakhilyaiḥ purandaraḥ / yatīnāṃ tu kṛtā pūjā sākṣādbrahmā tuṃ pūjitaḥ // ### [2.15.37](https://indike.org/pramana/in.purana.brahmanda.2.15.37) āśramo 'pāvano yastu pañcamassaṃkarātmakaḥ / catvārastvāśramāḥ pūcyāḥ śrāddhe deve tathaiva ca // ### [2.15.38](https://indike.org/pramana/in.purana.brahmanda.2.15.38) caturāśramabāhyebhya stebhyaḥ śrāddhe na dāpayet / yastiṣṭhedvāyubhakṣaśca cāturāśramabāhyataḥ // ### [2.15.39](https://indike.org/pramana/in.purana.brahmanda.2.15.39) anāśramītapastepe na taṃ tatra nimantrayet / ayatirmokṣavādī ca śrutau tau paṅktidūṣakau // ### [2.15.40](https://indike.org/pramana/in.purana.brahmanda.2.15.40) ugreṇa tapasā yuktā bahujñāścitravādinaḥ / nindanti ca dvijātibhyaḥ sarve te paṅktidūṣakāḥ // ### [2.15.41](https://indike.org/pramana/in.purana.brahmanda.2.15.41) aupavastāstathā sāṃkhyā nāstikā vedanindakāḥ / dhyānaṃ nindanti ye kecitsarve te paṅktidūṣakāḥ // ### [2.15.42](https://indike.org/pramana/in.purana.brahmanda.2.15.42) vṛthā muṇḍāśca jaṭilāḥ sarve kārpaṭikāstathā / nirghṛṇānbhinnavṛttāṃśca sarvabhakṣāṃśca varjayet // ### [2.15.43](https://indike.org/pramana/in.purana.brahmanda.2.15.43) kārukādīnanācārāṃllokavedabahiṣkṛtān / gāya nānvedavṛttāṃśca havyakavye na bhojayet // ### [2.15.44](https://indike.org/pramana/in.purana.brahmanda.2.15.44) etaistu varttayedyastu kṛṣṇavarṇaṃ sa gacchati / yo 'śnāti saha śūdreṇā sarve te paṅktidūṣaṇāḥ // ### [2.15.45](https://indike.org/pramana/in.purana.brahmanda.2.15.45) vyākarṣaṇaṃ sattvanibarhaṇaṃ ca kṛṣirvaṇijyā paśupālanaṃ ca / śuśrūṣaṇaṃ cāpyagurorarervāpyakāryametaddhi sadā dvijānām // ### [2.15.46](https://indike.org/pramana/in.purana.brahmanda.2.15.46) mithyāsaṃkalpinaḥ sarvānudvṛttāṃśca vivarjayet / mithyāpravādī nindākṛttathā sūcakadāṃbhikau // ### [2.15.47](https://indike.org/pramana/in.purana.brahmanda.2.15.47) upapātakasaṃyuktāḥ pātakaiśca viśeṣataḥ / vede niyogadātāro lobhamohaphalarthinaḥ // ### [2.15.48](https://indike.org/pramana/in.purana.brahmanda.2.15.48) brahmavikrayiṇastānvai śrāddhakarmaṇi varjayet / na viyogāstu vedānāṃ yo niyuṅkte sa pāpakṛt // ### [2.15.49](https://indike.org/pramana/in.purana.brahmanda.2.15.49) vaktā vedaphalādbhraśyeddātā dānaphalāttathā / bhṛtako 'dhyāpayedyastu bhṛtakādhyāpitastu yaḥ // ### [2.15.50](https://indike.org/pramana/in.purana.brahmanda.2.15.50) nārhatastāvapi śrāddhe brahmāṇaḥ krayavikrayī / krayaśca vikrayaścaivājīvitārthe vigarhitau // ### [2.15.51](https://indike.org/pramana/in.purana.brahmanda.2.15.51) vṛttireṣā tu vaiśyasya brāhmaṇasya tu pātakam / āharedbhṛtito vedān vedebhyaścopajīvati // ### [2.15.52](https://indike.org/pramana/in.purana.brahmanda.2.15.52) ubhau tau nārhataḥ śrāddhaṃ putrikāpatireva ca / vṛthā dārāṃśca yo gacchedyo yajeta vṛthādhvaraiḥ // ### [2.15.53](https://indike.org/pramana/in.purana.brahmanda.2.15.53) nārhatastāvapi śrāddhaṃ dvijo yaścaiva vārdhuṣī / striyo raktāntarā yeṣāṃ paradāraparāśca ye // ### [2.15.54](https://indike.org/pramana/in.purana.brahmanda.2.15.54) arthakāmaratāścaiva na tāñchrāddheṣu bhojayet / varṇāśramāṇāṃ dharmeṣu viruddhāḥsarvakarmaṇi // ### [2.15.55](https://indike.org/pramana/in.purana.brahmanda.2.15.55) stenaśca sarvayājī ca sarve te paṅktidūṣakāḥ / yaśca sūkaravadbhuṅkte yaśca pāṇitale dvijaḥ // ### [2.15.56](https://indike.org/pramana/in.purana.brahmanda.2.15.56) na tadaśnanti pitaro yaśca vācyaṃ samaśnute / strīśūdrāyānnametadvai śrāddhocchiṣṭaṃ na dāpayet // ### [2.15.57](https://indike.org/pramana/in.purana.brahmanda.2.15.57) yo dadyāccānusaṃmohānna tadgacchati vai pitṝn / tasmānna deyamannādyamucchiṣṭaṃ śrāddhakarmaṇi // ### [2.15.58](https://indike.org/pramana/in.purana.brahmanda.2.15.58) anyacca dadhisarpirbhyāṃ śiṣṭaṃ putrāya nānyathā / avaśeṣaṃ tu dātavyamannādyaṃ tu viśeṣataḥ // ### [2.15.59](https://indike.org/pramana/in.purana.brahmanda.2.15.59) puṣpamūlaphalairvāpi tuṣṭā gaccheyurantataḥ / yāvanna śrapitaṃ cānnaṃ yāvatauṣṇyaṃ na muñcati // ### [2.15.60](https://indike.org/pramana/in.purana.brahmanda.2.15.60) tāvadaśnanti pitaro yāvadaśnanti vāgyatāḥ / dattaṃ pratigraho homo bhojanaṃ balireva ca // ### [2.15.61](https://indike.org/pramana/in.purana.brahmanda.2.15.61) sāṃguṣṭhena tathā pādyaṃ nāsurebhyo yathā bhavet / etānyeva ca sarvāṇi dānāni ca viśeṣataḥ // ### [2.15.62](https://indike.org/pramana/in.purana.brahmanda.2.15.62) antarjānūpaviṣṭena tadvadācamanaṃ bhavet / muṇḍāñjaṭilakāṣāyāñśrāddhakarmaṇi varjayet // ### [2.15.63](https://indike.org/pramana/in.purana.brahmanda.2.15.63) ye tu vṛtte sthitā nityaṃ jñānino dhyāninastathā / devabhaktā mahātmānaḥ punīyurdarśanādapi // ### [2.15.64](https://indike.org/pramana/in.purana.brahmanda.2.15.64) śikhibhyo dhāturaktebhyastridaṇḍebhyaḥ pradāpayet / sarvaṃ yogeśvarairvyāptaṃ trailokyaṃ hi nirantaram // ### [2.15.65](https://indike.org/pramana/in.purana.brahmanda.2.15.65) tasmātpaśyanti te sarvaṃ yatkiñcijjagatīgatam / vyaktāvyaktaṃ vaśe kṛtvā sarvasyāpi ca yatparam // ### [2.15.66](https://indike.org/pramana/in.purana.brahmanda.2.15.66) satyāsatyaṃ ca yaddṛṣṭaṃ sada sacca mahātmabhiḥ / sarvajñānāni sṛṣṭāni mokṣādīnimahātmabhiḥ // ### [2.15.67](https://indike.org/pramana/in.purana.brahmanda.2.15.67) tasmātteṣāṃ sadā bhaktaḥ phalaṃ prāpnoti vottamam // ### [2.15.68](https://indike.org/pramana/in.purana.brahmanda.2.15.68) ṛcaśca yo veda sa veda vedānyajūṃṣi yo veda yajñam / sāmāni yo veda sa veda brahma yo mānasaṃ veda sa veda sarvam // ### [2.15.68.p1](https://indike.org/pramana/in.purana.brahmanda.2.15.68.p1) iti śrī brahmāṇḍe mahāpurāṇe vāyuprokte madhyabhāge tṛtīya upoddhātapāde śrāddhakalpe brāhmaṇaparīkṣā nāma pañcadaśo 'dhyāyaḥ // 15// ## Linked texts (1) - [Vāyupurāṇa](https://indike.org/pramana/in.purana.vayu.2.17.5) — Vyāsa, Sanskrit --- Source: [https://indike.org/pramana/in.purana.brahmanda.2.15](https://indike.org/pramana/in.purana.brahmanda.2.15) · Pramāṇa