Pramāṇa · Search · About · API

Brahmandapurana 2.16

Brahmāṇḍapurāṇa 2.16

Language
Sanskrit

Contents

2.16.1

bṛhaspatiruvāca
ataḥ paraṃ pravakṣyāmi dānāni ca phalāni ca /
tāraṇaṃ sarvabhūtānāṃ svargamārgasukhāvaham //

2.16.2

loke śreṣṭhatam sarvamātmanaścaiva yatpriyam /
sarvaṃ pitṝṇāṃ dātavyaṃ teṣāmevājñayārthinā //

2.16.3

jāṃbūnadamayaṃ divyaṃ vimānaṃ sūryasannibham /
divyāpsarobhiḥ saṃpūrṇamannado labhate 'kṣayam //

2.16.4

savyañjanaṃ tu yo dadyādahataṃ śrāddhakarmaṇi /
āyuḥ prākāśyamaiśvaryaṃ rūpaṃ ca labhate śubham //

2.16.5

yajñopavītaṃ yo dadyācchrāddhakāle tu yajñavit /
pāvanaṃ sarva viprāṇāṃ brahmadānasya tatphalam //

2.16.6

plutaṃ vipreṣu yo dadyācchrāddhakāle kamaḍalum /
madhukṣīrājyadadhibhirdātāramupatiṣṭhate //

2.16.7

cakrāviddhaṃ ca yo dadyācchrāddhakāle kamaṇḍalum /
dhenuṃ salabhate divyāṃ payodāṃ sukhado hinīm //

2.16.8

tūlapūrṇe ca yo dadyātpāduke śrāddhakarmaṇi /
śobhanaṃ labhate yānaṃ pādayoḥ sukhamedhate //

2.16.9

vyacanaṃ tālavṛntaṃ ca dattvā viprāya satkṛtam /
prāpnuyātsarvapuṣpāṇi sugandhīni mṛdūni ca //

2.16.10

śrāddhe hyupānahau dattvā brāhmaṇebhyaḥ sadā budhaḥ /
divyaṃ sa labhate yānaṃ vājiyuktaṃ navaṃ tathā //

2.16.11

śrāddhe chatraṃ tu yo dadyātpuṣpamālānvitaṃ tathā /
prāsādo hyuttamo bhūtvā gacchantamanugacchati //

2.16.12

śaraṇaṃ ratnasaṃpūrṇaṃ saśayyābhojanaṃ budhaḥ /
śrāddhe dattvā yatibhyastu nākapṛṣṭhe mahīyate //

2.16.13

suktāvaidūryavāsāṃsi ratnāni vividhāni ca /
vāhanāni ca divyāni prayutānyarbudāni ca //

2.16.14

sumahadvyomagaṃ puṇyaṃ sarvakāmasamanvitam /
candrasūryanibhaṃ divyaṃ vimānaṃ labhate 'kṣayam //

2.16.15

apsarobhiḥ parivṛtaṃ kāmagaṃ sumanojavam /
vasetsa tu vimānāgre stūyamānaḥ samantataḥ //

2.16.16

divyaiḥpuṣpaiścitaścāhurdānānāṃ paramaṃ budhāḥ /
suślakṣmāni suvarṇāni śrāddhe pātrāṇi dāpayet //

2.16.17

rasāstamupatiṣṭhanti bhakṣyaṃ saubhāgyameva ca /
tilānikṣūṃstathā śrāddhe dvijebhyaḥ saṃprayacchati //

2.16.18

mitrāṇi labhate loke strīṣu saubhāgyameva ca /
yaḥ pātraṃ taijasaṃ dadyānmanojña śrāddhabhojanaiḥ //

2.16.19

pātraṃ bhavati kāmānā rūpasya ca dhanasya ca /
rājataṃ kāñcanaṃ vāpi yo dadyācchrāddhakarmaṇi //

2.16.20

dānāttu labhate kāmānprākāśyaṃ dhanameva ca /
dhenuṃ śrāddhe tu yo dadyādgṛṣṭiṃ kumbhāpadohanīm //

2.16.21

gāvastamupatiṣṭhanti naraṃ puṣṭistathaiva ca /
dadyādyaḥ śiśire cāgniṃ bahukāṣṭhaṃ prayatnataḥ //

2.16.22

kāyāgnidīptiṃ prākāśyaṃ saubhāgyaṃ tabhate naraḥ /
indhanāni tu yo dadyā ddvijebhyaḥ śiśirāgame //

2.16.23

nityaṃ jayati saṃgrāme śriyā juṣṭastu jāyate /
surabhīṇi ca mālyāni gandhavanti tathaiva ca //

2.16.24

pūjayitvā tu pātrebhyaḥ śrāddhe satkṛtya dāpayet /
gandhamālyaṃ mahātmānaṃ sukhāni vividhāni ca //

2.16.25

dātāramupatiṣṭhanti yuvatyaśca pativratāḥ /
śayanāsanayānāni bhūmayo vāhanāni ca //

2.16.26

śrāddheṣvetāni yo dadyādaśvamedhaphalaṃ labhet /
śrāddhakāle guṇavati vipre vai samupasthite //

2.16.27

iṣṭadravyaṃ ca yo dadyātsmṛtiṃ medhāṃ ca vindati /
sarpiḥpūrṇāni pātrāṇi śrāddhe satkṛtya dāpayet //

2.16.28

kumbhopadohagṛṣṭīnāṃ bahvīnāṃ phalamaśnute /
śrāddhe yathepsitaṃ dattvā puṇḍarīkaphalaṃ labhet //

2.16.29

vanaṃ puṣpaphalopetaṃ dattvā gosavamaśnute /
kūpārāmataḍāgāni kṣetragoṣṭhagṛhāṇi ca //

2.16.30

dattvā modanti te svarge nityamācandratārakam /
svāstīrṇaṃ śayanaṃ dattvā śrāddheratnavibhūṣitam //

2.16.31

pitarastasya tuṣyanti svargalokaṃ samaśanute /
asmiṃlloke ca saṃpannaṃ syandanaṃ ca suvāhanaiḥ //

2.16.32

aṣṭābhiḥ pūjyate cātra dhanadhānyaiśca varddhate /
parṇakauśeyapaṭṭorṇe tathā prāvārakaṃbalau //

2.16.33

ajinaṃ kāñcanaṃ paṭṭaṃ praveṇīṃ mṛgalomakam /
dadyādetāni viprāṇāṃ bhojayitvā yathāvidhi //

2.16.34

prāpnoti śraddhadhānastu vājapeyaphalaṃ naraḥ /
bahubhāryāḥ surūpāśca putrā bhṛtyāśca kiṅkarāḥ //

2.16.35

vaśe tiṣṭhanti bhūtāni loke cāsminnirāmayam /
kauśeyaṃ kṣaumakārpāsaṃ dukūlaṃ gahanaṃ tathā //

2.16.36

śrāddhe caitāni yo dadyātkāmānāpnotyanuttamān /
alakṣmīṃ nāśayantyete tamaḥ sūryodayo yathā //

2.16.37

bhrājate ya vimānāgre nakṣatreṣviva candramāḥ /
vāso hi sarvadaivatye sarvadevairabhiṣṭutam //

2.16.38

vastrābhāve kriyā nāsti ya5dānatapāṃsi ca /
tasmādvastrāṇi deyāni śrāddhakāle tu nityaśaḥ //

2.16.39

tāni sarvāṇyavāpnoti śrāddhe dattvā tu mānavaḥ /
nityaśrāddhe tu yo dadyātprayatastatparāyaṇaḥ //

2.16.40

sarvakāmānavāpnoti rājyaṃ svage tathava ca /
sarvakāmasamṛddhasya yajñasya phalamaśnute //

2.16.41

bhakṣyajātaṃ tu sukṛtaṃ svastikādyaṃ saśarkaram /
kṛsara madhusarpiśca payaḥ pāyasameva ca //

2.16.42

snigdhaprāyāśca yo dadyādagniṣṭomaphalaṃ labhet /
dadhigavyamasaṃsṛṣṭaṃ bhakṣyānnānāvidhāṃstathā //

2.16.43

dattvā na śocate śrāddhe varṣāsu ca maghāsu ca /
ghṛtena bhojayedviprānghṛtaṃ bhūmau samutsṛjot //

2.16.44

chāyāyāṃ hastinaścaiva dattvā śrāddhena śocate /
odanaṃ pāyasaṃ sarpirmadhumūlaphalāni ca //

2.16.45

bhakṣyāṃśca vividhāndattvā paratreha ca modate /
śarkarākṣīrasaṃyuktāḥ pṛthukā nityamakṣayāḥ //

2.16.46

syāttu saṃvatsaraṃ prītiḥ śākairmāṃsarasena ca /
saktulājāstathāpūpāḥ kulmāṣā vyañjanaiḥ saha //

2.16.47

sarpiḥsnigdhāni sarvāṇi dadhnā saṃskṛtya bhojayet /
śrāddheṣvetāni yo dadyātpadmaṃ sa labhate nidhim //

2.16.48

navasasyāniyo dadyācchrāddhe satkṛtya yatnataḥ /
sarvabhogānavāpnoti pūjyate ca divaṃ gataḥ //

2.16.49

bhakṣyabhojyāni peyāni coṣyaleṅyavarāṇi ca /
bhojanāgrāsanaṃ dattvā atithibhyaḥ kṛtāñjaliḥ //

2.16.50

sarvayajñakratūnāṃ hi phalaṃ prāpnotyanuttamam /
kṣipramatyuṣṇamakliṣṭaṃ dadyādannaṃ bubhukṣate //

2.16.51

savyañjanaṃ tathā snigdhaṃ bhaktyā satkṛtya yatnataḥ /
taruṇādityasaṃkāśaṃ vimānaṃ haṃsavāhanam //

2.16.52

annado labhate nityaṃ kanyākoṭīstathaiva ca /
annadānātparaṃ dānaṃ nānyatkiñcittu vidyate //

2.16.53

annādbhūtāni jāyante jīvanti prabhavanti ca /
jīvadānātparaṃ dānaṃ nānyatkiñcana vidyate //

2.16.54

annāllokāḥ pratiṣṭhanti lokadānasya tatphalam /
annaṃ prajāpatiḥ sākṣātte na sarvamidaṃ tatam //

2.16.55

tasmādannasamaṃ dānaṃ na bhūtaṃ na bhaviṣyati /
yāni ratnāni medinyāṃ vāhanāni striyastathā //

2.16.56

kṣipraṃ prāpnoti tatsarvaṃ pitṛbhaktastu yo naraḥ /
pratiśrayaṃ ca yo dadyādatithibyaḥ kṛtāñjaliḥ //

2.16.57

devāstaṃ saṃpratīcchanti divyātithyaiḥ sahasraśaḥ /
sarvāṇyetāni yo dadyātpṛthivyāmekarāḍbhavet //

2.16.58

tribhirdvābhyāmathaikena dānena tu sukhī bhadet /
dānāni paramo dharmaḥ sadbhiḥ satkṛtya pūjitaḥ //

2.16.59

trailokyasyā dhipatyaṃ hi dānenaiva dhruvaṃ sthitam /
arājā labhate rājyamadhanaścottamaṃ dhanam /
kṣīṇāyurlabhate cāyuḥ pitṛbhaktaḥ sadā naraḥ //

2.16.59.p1

iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde
śrāddhakalpe dānapraśaṃsā nāma ṣoḍaśo 'dhyāyaḥ // 16//

Linked texts (5)