Brahmandapurana 2.17
Brahmāṇḍapurāṇa 2.17
- Language
- Sanskrit
Contents
- 2.17.22 — 1 part
2.17.1
bṛhaspatiruvāca
ata ūrddhvaṃ pravakṣyāmi śrāddhakarmaṇi pūjitam /
kāmyaṃ naimittikājasraṃ śrāddhakarmaṇi nityaśaḥ //
2.17.2
putradāranimittāḥ syuraṣṭakāstisna eva tu /
kṛṣṇapakṣe variṣṭhā hi pūrvākhaṇḍaladevatā //
2.17.3
prājāpatyā dvitīyā syāttṛtīyā vaiśvadevikā /
ādyāpūpaiḥ sadākāryā māṃsairanyā sadā bhavet //
2.17.4
śākaiḥ kāryā tṛtīyā syādevaṃ dravyagato vidhiḥ /
atrāpīṣṭaṃ pitṝṇāṃ vai nityameva vidhīyate //
2.17.5
yā cāpyanyā caturthī syāttāṃ ca kuryādviśeṣataḥ /
āsu śrāddhaṃ budhaḥ kurvansarvasvenāpi nityaśaḥ //
2.17.6
kṣipramāpnoti hi śreyaḥ paratreha ca modate /
pitaraḥ parvakāleṣu tithikāleṣu devatāḥ //
2.17.7
sarveṣu puruṣā yānti nipātamiva dhenavaḥ /
māsāṃte pratigaccheyuraṣṭakāsu hyapūjitāḥ //
2.17.8
moghāstasya bhavantyāśāḥ paratreha ca sarvaśaḥ /
pūjakānāṃ samutkarṣo nāstikānāmadhogatiḥ //
2.17.9
devāstu dāyino yānti tiryaggacchantyadāyinaḥ /
puṣṭiṃ prajāṃ smṛtiṃ medhāṃ putrānaiśvaryameva ca //
2.17.10
kurvāṇaḥ pūjanaṃ cāsu sarvaṃ pūrṇaṃ samaśnute /
pratipaddhanalābhāya labdhaṃ cāsya na naśyati //
2.17.11
dvitīyāyāṃ tu yaḥ kuryāddvipadādhiṃpatir bhavet /
varārthināṃ tṛtīyā tu śatrughnī pāpanāśinī //
2.17.12
caturthyāṃ tu prakurvāṇaḥ śatrucchidrāṇi paśyati /
pañcamyāṃ cāpikurvāṇaḥ prāpnoti mahatīṃ śriyam //
2.17.13
ṣaṣṭhyāṃ śrāddhāni kurvāṇaḥ saṃpūjyaḥ syātprayatnataḥ /
kurute yastu saptamyāṃ śrāddhāni satataṃ naraḥ //
2.17.14
mahīśatvamavāpnoti gaṇānāṃ cādhipo bhavet /
saṃpūrṇāmṛddhimāpnoti yo 'ṣṭamyāṃ kurute naraḥ //
2.17.15
śrāddhaṃ navamyāṃ karttavyamaiśvaryaṃ strīśca kāṅkṣatā /
kurvandaśamyāṃ tu naro brāhmīṃ śriyamavāpnuyāt //
2.17.16
vedāṃścaivāpnuyātsarvānviprāṇāṃ samatāṃ vrajet /
ekādaśyāṃ paraṃ dānamaiśvarya satataṃ tathā //
2.17.17
dvādaśyāṃ jayalābhaṃ ca rājyamāyurvasūni ca /
prajāvṛddhiṃ paśūnmedhāṃ svātantryaṃ puṣṭimuttamām //
2.17.18
dīrghamāyurathaiśvaryaṃ kurvāṇastu trayodaśīm /
yuvānaśca gṛhe yasya mṛtāstebhyaḥ pradāpayet //
2.17.19
śastreṇa vā hatā ye ca teṣāṃ dadyāccaturdaśīm /
amāvāsyāṃ prayatnena śrāddhaṃ kuryātsadā śuciḥ //
2.17.20
sarvakāmānavāpnoti svargaṃ cānantamaśnute /
tathāviṣamajātānāṃ yamalānāṃ ca sarvaśaḥ //
2.17.21
śrāddhaṃ dadyādamāvāsyāṃ sarvakāmānavāpnuyāt /
maghāsu kurvañchrāddhāni sarvakāmānavāpnuyāt //
2.17.22
pratyakṣamarcitāstena bhavanti pitarastadā /
pitṛdavā maghā yasmāttasmāttāsvakṣayaṃ smṛtam //
2.17.22.p1
iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde
śrāddhakalpe tithiśrāddhavarṇanaṃ nāma saptadaśo 'dhyāyaḥ // 17//
Linked texts (1)
- Vāyupurāṇa — Vyāsa, Sanskrit