[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.19 # Brahmandapurana 2.19 Brahmāṇḍapurāṇa 2.19 - **Language:** Sanskrit ## Contents - [2.19.74](https://indike.org/pramana/in.purana.brahmanda.2.19.74) — 1 part ### [2.19.1](https://indike.org/pramana/in.purana.brahmanda.2.19.1) śaṃyuruvāca kiṃ sviddattaṃ pitṝṇāṃ tu tṛptidaṃ vadatāṃ vara / kiṃsvitsyāccirarātrāya kiṃ vānantyāya kalpate // ### [2.19.2](https://indike.org/pramana/in.purana.brahmanda.2.19.2) bṛhaspatiruvāca havīṣi śrāddhakalpe tu yāni śrāddhavido viduḥ / tāni me śṛṇu sarvāṇi phalaṃ caiṣāṃ yathātatham // ### [2.19.3](https://indike.org/pramana/in.purana.brahmanda.2.19.3) tilairvrīhiyavaimāṣairadbhirmūlaphalaistathā / dattena māsaṃ prīyante śrāddhena hi pitāmahāḥ // ### [2.19.4](https://indike.org/pramana/in.purana.brahmanda.2.19.4) matsyaiḥ prīṇanti dvau māsau trīnmāsānhāriṇena tu / śāśena caturo māsānpañca prīṇāti śākunaiḥ // ### [2.19.5](https://indike.org/pramana/in.purana.brahmanda.2.19.5) vārāheṇa tu ṣaṇmāsāñchāgalaṃ saptamāsikam / aṣṭamāsikamityuktaṃ yacca pārvatakaṃ bhavet // ### [2.19.6](https://indike.org/pramana/in.purana.brahmanda.2.19.6) rauraveṇa tu prīyante nava māsānpitāmahāḥ / gavayasya tu māṃsena tṛptiḥ syāddaśamāsikī // ### [2.19.7](https://indike.org/pramana/in.purana.brahmanda.2.19.7) aurabhreṇa ca māṃsena māsānekādaśaiva tu / śrāddhe ca tṛptidaṃ gavyaṃ payaḥ saṃvatsaraṃ dvijāḥ // ### [2.19.8](https://indike.org/pramana/in.purana.brahmanda.2.19.8) ānantyāya bhavettadvatkhaḍgamāṃsaṃ pitṛkṣaye / pāyasaṃ madhusarpirbhyāṃ chāyāyāṃ kuñjarasya ca // ### [2.19.9](https://indike.org/pramana/in.purana.brahmanda.2.19.9) kṛṣṇacchāgasya māsena tṛptirbhavati śāśvatī / atra gāthāḥ pitṛgītāḥ kīrtayanti purāvidaḥ // ### [2.19.10](https://indike.org/pramana/in.purana.brahmanda.2.19.10) tāste 'haṃ kīrttayiṣyāmi yathāvatsannibodha me / api naḥ sa kule yāyādyo no dadyāt trayodaśīm // ### [2.19.11](https://indike.org/pramana/in.purana.brahmanda.2.19.11) ājena sarvalohena varṣāsu ca maghāsu ca / eṣṭavyā bahavaḥ putrā yadyeko 'pi gayāṃ vrajet / gaurīṃ vāpyudvahedbhāryāṃ nālaṃ vā vṛṣamutsṛjet // ### [2.19.12](https://indike.org/pramana/in.purana.brahmanda.2.19.12) śaṃyuruvāca gayādīnāṃ phalaṃ tāta brūhi me paripṛcchataḥ / dātṝṇāṃ caiva yatpuṇyaṃ nikhilena pravīhi me // ### [2.19.13](https://indike.org/pramana/in.purana.brahmanda.2.19.13) bṛhaspatiruvāca gayāyāmakṣayaṃ śrāddhañjapahomatapāṃsi ca / pitṛkṣaye hi tatputra tasmāttatrākṣayaṃ smṛtam // ### [2.19.14](https://indike.org/pramana/in.purana.brahmanda.2.19.14) pūrṇāyāmekaviṃśaṃ tu gauryāmutpāditaḥ sutaḥ / mahāmahāṃśca juhuyāditi tasya phalaṃ smṛtam / phalaṃ vṛṣasya vakṣyāmi gadato me nibodhata // ### [2.19.15](https://indike.org/pramana/in.purana.brahmanda.2.19.15) vṛṣotsraṣṭā punātyeva daśātītāndaśāvarān // ### [2.19.16](https://indike.org/pramana/in.purana.brahmanda.2.19.16) yatkiñcitspṛśate toyamavatīrṇo nadījale / vṛṣotsarggatpitṝṇāṃ tu hyakṣayaṃ samudāhṛtam // ### [2.19.17](https://indike.org/pramana/in.purana.brahmanda.2.19.17) yenayena spṛśettoyaṃ lāṅgūlādibhiraṅgaśaḥ / sarvaṃ tadakṣayaṃ tasya pitṝṇāṃ nātra saṃśayaḥ // ### [2.19.18](https://indike.org/pramana/in.purana.brahmanda.2.19.18) śṛṅgaiḥ khurairvā bhūmiṃ yāmullikhatyaniśaṃ vṛṣaḥ / madhukulyāḥ pitṝṃstasya hyakṣayāśca bhavanti vai // ### [2.19.19](https://indike.org/pramana/in.purana.brahmanda.2.19.19) sahasranalvamātreṇa taḍāgena yathāsrutiḥ / tṛptistu yā pitṝṇāṃ vai sā vṛṣeṇeha kalpate // ### [2.19.20](https://indike.org/pramana/in.purana.brahmanda.2.19.20) yo dadāti guḍonmiśratilāni śrāddhakarmaṇi / madhu vāmadhumiśraṃ vā sarvamevākṣayaṃ bhavet // ### [2.19.21](https://indike.org/pramana/in.purana.brahmanda.2.19.21) na brāhmaṇaṃ parikṣeta sadā deyaṃ hi mānavaiḥ / daivekarmaṇi pitrye ca śrūyate vai parīkṣaṇam // ### [2.19.22](https://indike.org/pramana/in.purana.brahmanda.2.19.22) sarvavedavratasnātāḥ paṅktīnāṃ pāvanā dvijāḥ / ye ca bhāṣāvidaḥ kecidye ca vyākaraṇe ratāḥ // ### [2.19.23](https://indike.org/pramana/in.purana.brahmanda.2.19.23) adhīyate purāṇaṃ vai dharmaśāstramathāpi ca / triṇāciketaḥ pañcāgniḥ sa sauparṇaḥ ṣaḍaṅgavit // ### [2.19.24](https://indike.org/pramana/in.purana.brahmanda.2.19.24) brahmadevasutaścaiva cchandogo jyeṣṭhasāmagaḥ / puṇyeṣu yaśca tīrtheṣu kṛtasnānaḥ kṛtavrataḥ // ### [2.19.25](https://indike.org/pramana/in.purana.brahmanda.2.19.25) makheṣu ye ca sarveṣu bhavantyavabhṛthāplutāḥ / ye ca satyavratā nityaṃ svadharmaniratāśca ye // ### [2.19.26](https://indike.org/pramana/in.purana.brahmanda.2.19.26) akrodhanā lobhaparāstāñchrāddheṣu nimantrayet / etebhyo dattamakṣayyamete vai paṅktipāvanāḥ // ### [2.19.27](https://indike.org/pramana/in.purana.brahmanda.2.19.27) śrāddhīyā brahmaṇā ye tu yogavratasuniṣṭhitāḥ / trayo 'pi pūjitāstena brahmaviṣṇumaheśvarāḥ // ### [2.19.28](https://indike.org/pramana/in.purana.brahmanda.2.19.28) pitṛbhiḥ saha lokāśca yo hyetānpūjayennaraḥ / pavitrāṇāṃ pavitraṃ ca maṅgalānāṃ ca maṅgalam // ### [2.19.29](https://indike.org/pramana/in.purana.brahmanda.2.19.29) prathamaḥ sarvadharmāṇāṃ yogadharmo nigadyate / apāṅkteyānpravakṣyami gadato me nibodhata // ### [2.19.30](https://indike.org/pramana/in.purana.brahmanda.2.19.30) kitavo madyapo yaśca paśupālo nirākṛtaḥ / grāmapreṣyo vārdhuṣiko hyāpaṇo vaṇijastathā // ### [2.19.31](https://indike.org/pramana/in.purana.brahmanda.2.19.31) agāra dāhī garado vṛṣalo grāmayājakaḥ / kāṇḍapṛṣṭho 'tha kuṇḍāśī madhupaḥ somavikrayī // ### [2.19.32](https://indike.org/pramana/in.purana.brahmanda.2.19.32) samudrāntarito bhṛtyaḥ piśunaḥ kūṭasākṣikaḥ / pitrā vivadamānaśca yasya copapatirgṛhe // ### [2.19.33](https://indike.org/pramana/in.purana.brahmanda.2.19.33) abhiśastastathā stenaḥ śilpaṃ yaścopajīvati / stavakaḥ sūpakāraśca yaśca mitrāṇi nindati // ### [2.19.34](https://indike.org/pramana/in.purana.brahmanda.2.19.34) kāṇaśca khañjakaścaiva nāstiko vedavarjitaḥ / unmatto 'pyatha ṣaṇḍhaśca bhrūṇahā gurutalpagaḥ // ### [2.19.35](https://indike.org/pramana/in.purana.brahmanda.2.19.35) bhiṣagjīvī prāśanikaḥ parastrīṃ yaśca sevate / vikrīṇāti ca yo brahmavratāni niyamāṃstathā // ### [2.19.36](https://indike.org/pramana/in.purana.brahmanda.2.19.36) naṣṭaṃ syānnāstike dattaṃ vrataghne cāpavarjitam / yaccavāṇijake dattaṃ neha nāmutra saṃbhavet // ### [2.19.37](https://indike.org/pramana/in.purana.brahmanda.2.19.37) nikṣepahārake caiva kṛtaghne vidavarjite / tathā pāṇavike vai ca kāruke dharmavarjite // ### [2.19.38](https://indike.org/pramana/in.purana.brahmanda.2.19.38) krīṇāti yo hyapaṇyāni vikrīṇāti praśaṃsati / anyatrāsya samādhānaṃ na vaṇikūchrāddhamarhati // ### [2.19.39](https://indike.org/pramana/in.purana.brahmanda.2.19.39) bhasmanīva hutaṃ havyaṃ dattaṃ paunarbhave dvijaḥ / ṣaṣṭiṃ kāṇaḥ śataṃ ṣaṇḍhaḥ śvitrī pañcaśatānyapi // ### [2.19.40](https://indike.org/pramana/in.purana.brahmanda.2.19.40) pāparogī sahasraṃ vai dāturnāśayate phalam / bhraśyeddhi sa phalāttasmātpradātā yastu bāliśaḥ // ### [2.19.41](https://indike.org/pramana/in.purana.brahmanda.2.19.41) yadviṣṭitaśirā bhuṅkte yadbhuṅkte dakṣiṇāmukhaḥ / sopānatkaśca yadbhuṅkte yacca dattamasatkṛtam // ### [2.19.42](https://indike.org/pramana/in.purana.brahmanda.2.19.42) sarvaṃ tadasuredrāya brahmā bhāgamakalpayat / śvā caiva brahmahā caiva nāvekṣeta kathañcana // ### [2.19.43](https://indike.org/pramana/in.purana.brahmanda.2.19.43) tasmātparivṛtairdadyāttilaiścānnaṃ vikīrya ca / rākṣasānāṃ tilāḥ proktāḥ śunāṃ parivṛtāstathā // ### [2.19.44](https://indike.org/pramana/in.purana.brahmanda.2.19.44) darśanātsūkaro hanti pakṣavātena kukkuṭaḥ / rajasvalāyāḥ sparśena kruddhoyaśca prayacchati // ### [2.19.45](https://indike.org/pramana/in.purana.brahmanda.2.19.45) nadītīreṣu ramyeṣu saritsu ca sarassu ca / vivikteṣu ca prīyante datteneha pitāmahāḥ // ### [2.19.46](https://indike.org/pramana/in.purana.brahmanda.2.19.46) nāsavyaṃpātayejjānu na yukto vācamīrayet / tasmātparivṛteneha vidhivaddarbhapāṇinā // ### [2.19.47](https://indike.org/pramana/in.purana.brahmanda.2.19.47) pitrorārādhanaṃ kāryamevaṃ prīṇayate pitṝn / anumānya dvijānpūrvamargauṃ kuryādyathāvidhi // ### [2.19.48](https://indike.org/pramana/in.purana.brahmanda.2.19.48) pitṝṇāṃ nirvapedbhūmau sūrye vā darbhasaṃstare / śuklapakṣe ca pūrvāṅṇe śrāddhaṃ kuryādyathāvidhi // ### [2.19.49](https://indike.org/pramana/in.purana.brahmanda.2.19.49) kṛṣṇapakṣe 'paraṅṇe tu rauhiṇaṃ vai na laṅghayet / evamete mahātmāno mahāyogā mahaujasaḥ // ### [2.19.50](https://indike.org/pramana/in.purana.brahmanda.2.19.50) sadā vai pitaraḥ pūjyāḥ saṃ prāptau deśakālayoḥ / pitṛbhaktyaiva tu naro yogaṃ prāpnoti durllabham // ### [2.19.51](https://indike.org/pramana/in.purana.brahmanda.2.19.51) dhyānena mokṣaṃ gaccheddhi hitvā karma śubhāśubham / yajñahetostaduddhṛtya mohayitvā jagattathā // ### [2.19.52](https://indike.org/pramana/in.purana.brahmanda.2.19.52) guhāyāṃ nihitaṃ brahma kaśyapena mahātmanā / amṛtaṃ guhyamuddhṛtya yoge yogavidāṃ varāḥ // ### [2.19.53](https://indike.org/pramana/in.purana.brahmanda.2.19.53) proktaḥ sanatkumāreṇa mahāto brahmaṇaḥ padam / devānāṃ paramaṃ guhyamṛṣīṇāṃ ca parāyaṇam // ### [2.19.54](https://indike.org/pramana/in.purana.brahmanda.2.19.54) pitṛbhaktyā prayatnena prāpya te tanmanīṣibhiḥ / pitṛbhaktaḥ samāsena pitṛpūrvaparaśca yaḥ // ### [2.19.55](https://indike.org/pramana/in.purana.brahmanda.2.19.55) ayatnātprāpnuyādeva sarvametanna saṃśayaḥ // ### [2.19.56](https://indike.org/pramana/in.purana.brahmanda.2.19.56) bṛhaspatiruvāca yasmaiśrāddhāni deyāni yacca dattaṃ mahatphalam / yeṣu cāpyakṣayaṃ śrāddhaṃ tīrtheṣu ca guhāsu ca // ### [2.19.57](https://indike.org/pramana/in.purana.brahmanda.2.19.57) yeṣu svargamavāpnoti tatte proktaṃ sasaṃgraham / śrutvemaṃ śrāddhakalpaṃ ca na kuryādyastu mānavaḥ // ### [2.19.58](https://indike.org/pramana/in.purana.brahmanda.2.19.58) sa majjennarake ghore nāstikastamasāvṛte / parivādo na karttavyo yogināṃ tu viśeṣataḥ // ### [2.19.59](https://indike.org/pramana/in.purana.brahmanda.2.19.59) parivādātkrimirbhūtvā tatraiva parivarttate / yogānparivadedyastu dhyānino mokṣakāṅkṣiṇaḥ // ### [2.19.60](https://indike.org/pramana/in.purana.brahmanda.2.19.60) sa gacchennarakaṃ ghoraṃ śrotāpyasya na saṃśayaḥ / āvṛtaṃ tamasaḥ sarvaṃ narakaṃ ghoradarśanam / yogīśvaraparīvādānna svargaṃ yāti mānavaḥ // ### [2.19.61](https://indike.org/pramana/in.purana.brahmanda.2.19.61) yogeśvarāṇāmā krośaṃ śṛṇuyādyo yatātmanām / sahi kālaṃ ciraṃ majjennarake nātra saṃśayaḥ / kuṃbhīpākeṣu pacyante jihvācchede punaḥ punaḥ // ### [2.19.62](https://indike.org/pramana/in.purana.brahmanda.2.19.62) samudre ca yathā loṣaṭastadbatsīdanti te narāḥ / manasā karmaṇā vācā dveṣaṃ yogeṣu varjayet / protyānantaṃ phalaṃ bhuṅkta iha vāpi na saṃśayaḥ // ### [2.19.63](https://indike.org/pramana/in.purana.brahmanda.2.19.63) na pārago vindati paramātmanastrilokamadhye carati svakarmamiḥ / ṛco yajuḥ sāma tadaṅgapārage 'vikārametaṃ hyanavāpya sīdati // ### [2.19.64](https://indike.org/pramana/in.purana.brahmanda.2.19.64) vikārapāraṃ prakṛteśca pāragastrayīguṇānā triguṇasya pāragaḥ / yaḥ syāccaturviśatitattvapāragaḥ sa pārago nādhyayanasya pāragaḥ // ### [2.19.65](https://indike.org/pramana/in.purana.brahmanda.2.19.65) kṛtsnaṃ yathāvatsamupaiti tatparastathaiva bhūyaḥ pralayatvamātmanaḥ / pratyāharedyogapathaṃ na yo dvijo na sarvapāra kramapāragocaraḥ // ### [2.19.66](https://indike.org/pramana/in.purana.brahmanda.2.19.66) vedasya veditavyaṃ ca vedyaṃ vindati yogavit / taṃ vai vedavidaḥ prāhustamāhurvedapāragam // ### [2.19.67](https://indike.org/pramana/in.purana.brahmanda.2.19.67) vedaṃ ca veditavyaṃ ca viditvā vai yathāsthitaḥ / evaṃ vedavidaḥ prāhuranyaṃ vai vedapāragam // ### [2.19.68](https://indike.org/pramana/in.purana.brahmanda.2.19.68) yajñānvedāṃstathā kāmāṃstapāṃsi vividhāni ca / prāpnotyāyuḥ prajāścaiva pitṛbhakto na saśayaḥ // ### [2.19.69](https://indike.org/pramana/in.purana.brahmanda.2.19.69) śraddhayā śrāddhakalpaṃ tu yastvimaṃ niyataḥ paṭhet / sarvāṇyetāni vāpnoti tīrthadānaphalāni ca // ### [2.19.70](https://indike.org/pramana/in.purana.brahmanda.2.19.70) sa paṅktipāvanaścaiva dvijānāmagrabhugbhavet / āśrāvya ca dvijānso 'tha sarvakāmānavāpnuyāt // ### [2.19.71](https://indike.org/pramana/in.purana.brahmanda.2.19.71) yaścaitacchṛṇuyānnityama nyāṃśca śrāvayeddvijaḥ / anasūyurjitakrodho lobhamohavivarjitaḥ // ### [2.19.72](https://indike.org/pramana/in.purana.brahmanda.2.19.72) tīrthādīnāṃ phalaṃ prāpya dānādīnāṃ ca sarvaśaḥ / mokṣopāyaṃ labhecchreṣṭhaṃ svargopāyaṃ na saṃśayaḥ / iha cāpi parā puṣṭhistasmātkurvīta nityaśaḥ // ### [2.19.73](https://indike.org/pramana/in.purana.brahmanda.2.19.73) imaṃ vidhiṃ yo hi paṭhedatandritaḥ samāhitaḥ saṃsadi parvasaṃdhiṣu / apatyabhāgī ca pareṇa tejasā divaukasāṃ sa vrajate salokatām // ### [2.19.74](https://indike.org/pramana/in.purana.brahmanda.2.19.74) yena proktastvayaṃ kalpo namastasmai svayaṃbhuve / mahāyogeśvarebhyaśca sadā ca praṇato 'smyaham // ### [2.19.74.p1](https://indike.org/pramana/in.purana.brahmanda.2.19.74.p1) iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde śrāddhakalpe brahmaṇaparīkṣā nāma ekonaviṃśo 'dhyāyaḥ // 19// ## Linked texts (1) - [Vāyupurāṇa](https://indike.org/pramana/in.purana.vayu.2.21.p1) — Vyāsa, Sanskrit --- Source: [https://indike.org/pramana/in.purana.brahmanda.2.19](https://indike.org/pramana/in.purana.brahmanda.2.19) · Pramāṇa