Brahmandapurana 2.20
Brahmāṇḍapurāṇa 2.20
- Language
- Sanskrit
Contents
- 2.20.23 — 1 part
2.20.1
bṛhaspatiruvāca
ityete pitaro devā devānāmapi devatāḥ /
saptasvete sthitā nityaṃ sthāneṣu pitaro 'vyayāḥ //
2.20.2
prajāpatisutā hyete sarveṣāṃ tu mahātmanām /
ādyo gaṇastu yogānāmanuyogavivarddhanaḥ //
2.20.3
dvitīyo devatānāṃ tu tṛtīyo dānavādinām /
śeṣāstu varṇiṃnāṃ jñeyā iti sarve prakīrttitāḥ //
2.20.4
devāschaitānyajante vai sarvajñāneṣvavasthitān /
āśramaśca yajantyenāṃścatvārastu yathākramam //
2.20.5
sarve varṇā yajantyenāṃścatvārastu yathāgamam /
tathā saṃkarajātyaśca mlecchāścāpi yajanti vai //
2.20.6
pitṛṃstu yo yajedbhaktyā pitaraḥ prīṇayanti te /
pitaraḥ puṣṭikāmasya prajākāmasya vā punaḥ //
2.20.7
puṣṭiṃ prajāṃ tu svargaṃ ca prayacchanti pitāmahāḥ /
devakāryādapi tathā pitṛkāryaṃ viśiṣyate //
2.20.8
devatānāṃ hi pitaraḥ pūrvamāpyāyanaṃ smṛtāḥ /
na hi yogagatiḥ sūkṣmā pitṝṇāṃ jñāyate naraiḥ //
2.20.9
tapasā hi prasiddhena kiṃ punarmāṃsacakṣuṣā /
sarveṣāṃ rājataṃ pātramatha vā rajatānvitam //
2.20.10
pāvanaṃ hyuttamaṃ proktaṃ devānāṃ pitṛbhiḥ saha /
yeṣāṃ dāsyanti piṇḍāṃstrīnbāndhavā nāmagotrataḥ //
2.20.11
bhūmau kuśottarāyāṃ ca apasavyavidhānataḥ /
sarvatra varttamānāste piṇḍāḥ prīṇanti vai pitṝn //
2.20.12
yadāhāro bhavejjanturāhāraḥ so 'sya jāyate /
yathā goṣṭhe pranaṣṭāṃ vai vatso vindati mātaram //
2.20.13
tathā taṃ nayate mantro janturyatrāvatiṣṭhati /
nāmagotraṃ ca mantraṃ ca dattamannaṃ nayanti tam //
2.20.14
api yoniśataṃ prāptāṃstṛptistānanugacchati /
evameṣā sthitā sattā brahmaṇaḥ parameṣṭhinaḥ //
2.20.15
pitṝṇamādisargetu lokānāmakṣayārthinām /
ityete pitaraścaiva lokā duhitarastathā //
2.20.16
dauhitrā yajamānaśca proktāścaiva mayānagha /
kīrttitāḥ pitaraste vai tava putra yathākramam //
2.20.17
śaṃyuruvāca
aho divyastvayā tāta pitṛsargastu kīrtitaḥ /
lokā duhitaraścaiva dohitrāśca śrutāstathā //
2.20.18
dānāni saha śaucena kīrttitāni phalāni ca /
akṣayyatvaṃ dvijāṃścaiva sarvametadudāhṛtam /
adyaprabhṛti karttāsmi sarvametadyathātatham //
2.20.19
bṛhaspatiruvāca
ityetadaṅgirāḥ pūrvamṛṣīṇāmuktavānprabhuḥ /
pṛṣṭaśca saṃśayānsarvānṛṣīnāha nṛsaṃsadi //
2.20.20
satre tu vitate pūrvaṃ tathā varṣasahasrake /
yasminsadaspatisnāto brahmā sīddevatāprabhuḥ //
2.20.21
gatāni tatra varṣāṇāṃ pañcāśacca śatāni vai /
ślokāścātra purā gītā ṛṣibhirbrahmavādibhiḥ //
2.20.22
dīkṣitasya purā satre brahmamaḥ paramātmanaḥ /
tatraiva dattamannāgraṃ pitṝṇāmakṣayarthinām /
lokānāṃ ca hitārthāya brahmaṇā parameṣṭhinā //
2.20.23
sūta uvāca
evaṃ bṛhaspatiḥ pūrvaṃ pṛṣṭaḥ putreṇa dhīmatā /
provāca pitṛsargaṃ tu yaścaiva samudāhṛta //
2.20.23.p1
iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde
śrāddhakalpo nāma viṃśatitamo 'dhyāyaḥ // 20//
Linked texts (1)
- Vāyupurāṇa — Vyāsa, Sanskrit