[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.21 # Brahmandapurana 2.21 Brahmāṇḍapurāṇa 2.21 - **Language:** Sanskrit ## Contents - [2.21.81](https://indike.org/pramana/in.purana.brahmanda.2.21.81) — 1 part ### [2.21.1](https://indike.org/pramana/in.purana.brahmanda.2.21.1) samāptaścāyaṃ śrāddhakalpaḥ / vasiṣṭha uvāca itthaṃ pravarttamānasya jamadagnermahātmanaḥ / varṣāṇi katicidrājanvyatīyuramitaujasaḥ // ### [2.21.2](https://indike.org/pramana/in.purana.brahmanda.2.21.2) rāmo 'pi nṛpaśārdūla sarvadharmabhṛtāṃ varaḥ / vedavedāṅgatattvajñaḥ sarvaśāstraviśāradaḥ // ### [2.21.3](https://indike.org/pramana/in.purana.brahmanda.2.21.3) pitroścakāra śuśrūṣāṃ vinītātmā mahāmatiḥ / prītiṃ ca nijaceṣṭābhiranvahaṃ paryavarttayat // ### [2.21.4](https://indike.org/pramana/in.purana.brahmanda.2.21.4) itthaṃ pravarttamānasya varṣāṇi katicinnṛpa / pitroḥ śuśrūṣayānaiṣīdrāmo matimatāṃ varaḥ // ### [2.21.5](https://indike.org/pramana/in.purana.brahmanda.2.21.5) sa kadācinmahātejāḥ pitāmaha guhaṃ prati / gantuṃ vyavasito rājandaivena ca niyojitaḥ // ### [2.21.6](https://indike.org/pramana/in.purana.brahmanda.2.21.6) nipīḍya śirasā pitroścaraṇau bhṛgupuṅgavaḥ / uvāca prāñjalirbhūtavā sapraśrayamidaṃ vacaḥ // ### [2.21.7](https://indike.org/pramana/in.purana.brahmanda.2.21.7) kañcidarthamahaṃ tāta mātaraṃ tvāṃ ca sāmpratam / vijñāpayitumicchāmi mama tacchrotumarhathaḥ // ### [2.21.8](https://indike.org/pramana/in.purana.brahmanda.2.21.8) pitāmahamahaṃ draṣṭumutkaṇṭhitamanāściram / tasmāttatpārśvamadhunā gamiṣye vāmanujñayā // ### [2.21.9](https://indike.org/pramana/in.purana.brahmanda.2.21.9) āhūtaścāsakṛttāta sotkaṇṭhaṃ prīyamāṇayā / pitāmahyā bahumukhairicchantyā mama darśanam // ### [2.21.10](https://indike.org/pramana/in.purana.brahmanda.2.21.10) pitṝnpitāmahasyāpi priyameva pradarśanam / sadīyaṃ tena tatpārśvaṃ gantuṃ māmanujānata // ### [2.21.11](https://indike.org/pramana/in.purana.brahmanda.2.21.11) vasiṣṭha uvāca iti tasya vacaḥ śrutvā saṃbhrāntaṃ samudīritam / harṣeṇa mahatā yuktau sāśrunetrau babhūvatuḥ // ### [2.21.12](https://indike.org/pramana/in.purana.brahmanda.2.21.12) tamāliṅgya mahābhāgaṃ mūrdhnyupāghrāya sādaram / abhinandyāśiṣā tāta hyubhau tāvidamāhatuḥ // ### [2.21.13](https://indike.org/pramana/in.purana.brahmanda.2.21.13) pitāmahagṛhaṃ tāta prayāhi tvaṃ yathāsukham / pitāmahapitāmahyoḥ prītaye darśanāya ca // ### [2.21.14](https://indike.org/pramana/in.purana.brahmanda.2.21.14) tatra gatvā yathānyāyaṃ taṃ śuśrūṣā parāyaṇaḥ / kañcitkālaṃ tayorvatsa prītaye vasa tadgṛhe // ### [2.21.15](https://indike.org/pramana/in.purana.brahmanda.2.21.15) sthitvā nāticiraṃ kālaṃ tayorbhūyo 'pyanuśaya / atrāgaccha mahābhāga kṣemeṇāsmaddidṛkṣayā // ### [2.21.16](https://indike.org/pramana/in.purana.brahmanda.2.21.16) kṣaṇārddhamapi śaktāḥ stho na vinā putradarśanam / tasmātpitāmaha gṛhe na cirātsthātumarhasi // ### [2.21.17](https://indike.org/pramana/in.purana.brahmanda.2.21.17) tadājñayātha vā putra prapitāmahasannidhim / gato 'pi śīghramāgaccha krameṇa tadanujñayā // ### [2.21.18](https://indike.org/pramana/in.purana.brahmanda.2.21.18) vasiṣṭha uvāca ityuktastau parikramya praṇamya ca mahāmatiḥ / pitarāvapyanujñāpya pitāmahagṛhaṃ tataḥ // ### [2.21.19](https://indike.org/pramana/in.purana.brahmanda.2.21.19) sa gatvā bhṛguvaryasya ṛcīkasya mahātmanaḥ / praviveśāśramaṃ rāmo muniśiṣyopaśobhitam // ### [2.21.20](https://indike.org/pramana/in.purana.brahmanda.2.21.20) svādhyāyaghoṣairvipulaiḥ sarvataḥ pratināditam / praśāntavaira sattvāḍhyaṃ sarvasattvamanoharam // ### [2.21.21](https://indike.org/pramana/in.purana.brahmanda.2.21.21) sa praviśyaśramaṃ ramyamṛcīkaṃ sthitamāsane / dadarśa rāmo rājendra sa pitāmahamagrataḥ // ### [2.21.22](https://indike.org/pramana/in.purana.brahmanda.2.21.22) jājvalyamānaṃ tapasā dhiṣṇyasthamiva pāvakam / upāsitaṃ satyavatyā yathā dakṣiṇāya'dhvaram // ### [2.21.23](https://indike.org/pramana/in.purana.brahmanda.2.21.23) svasamīpamupāyāntaṃ rāmamālokya tau nṛpa / suciraṃ taṃ vimarśetāṃ samājñāpūrvadarśanau // ### [2.21.24](https://indike.org/pramana/in.purana.brahmanda.2.21.24) ko 'yameṣa taporāśiḥ sarvalatraṇapūjitaḥ / bālo 'yaṃ balavānbhātigāṃbhīryātpraśrayeṇa ca // ### [2.21.25](https://indike.org/pramana/in.purana.brahmanda.2.21.25) evaṃ tayościntayatoḥ saharṣaṃ hṛdi kautukāt / āsasāda śanai rāmaḥ samīpe vinayānvitaḥ // ### [2.21.26](https://indike.org/pramana/in.purana.brahmanda.2.21.26) svanāmagotre matimānuktvā pitrormudānvitaḥ / saṃspṛśaṃścaraṇau mūrdhnā hastābhyāṃ cābhyavādayat // ### [2.21.27](https://indike.org/pramana/in.purana.brahmanda.2.21.27) tatastau prītamanasau samuthāpya ca sattamam / āśīrbhirabhinandetāṃ pṛthak pṛthagubhāvapi // ### [2.21.28](https://indike.org/pramana/in.purana.brahmanda.2.21.28) tamāśliṣyāṅkamāropya harṇāśruplutalocanau / vīkṣantau tanmukhāṃbhojaṃ paraṃ harṣamavāpatuḥ // ### [2.21.29](https://indike.org/pramana/in.purana.brahmanda.2.21.29) tataḥ sukhopaviṣṭaṃ tamātmavaṃśasamudvaham / anāmayamapṛcchetāṃ tāvubhau daṃpatī tadā // ### [2.21.30](https://indike.org/pramana/in.purana.brahmanda.2.21.30) pitarau te kuśalino vatsa kiṃbhrātarastathā / anāyāsena te vṛttirvartate cātha karhicit // ### [2.21.31](https://indike.org/pramana/in.purana.brahmanda.2.21.31) samastābhyāṃ tato rājannācacakṣe yathoditaḥ / tathā svānugataṃ pitrorbhrātṝṇāṃ caiva ceṣṭitam // ### [2.21.32](https://indike.org/pramana/in.purana.brahmanda.2.21.32) evaṃ tayormahārāja satprītijanitaiguṇaiḥ / prīyamāṇo 'vasadrāmaḥ pituḥ pitrornniveśane // ### [2.21.33](https://indike.org/pramana/in.purana.brahmanda.2.21.33) sa tasminsarvabhūtānāṃ manonayananandanaḥ / uvāsa katicinmāsāṃstacchuśrūṣāparāyaṇaḥ // ### [2.21.34](https://indike.org/pramana/in.purana.brahmanda.2.21.34) athānujñāpya tau rājanbhṛguvaryo mahāmanāḥ / pitāmahagurorgantumiyeṣāśrayamāśramam // ### [2.21.35](https://indike.org/pramana/in.purana.brahmanda.2.21.35) sa tābhyāṃ prītiyuktābhyāmāśīrbhirabhinanditaḥ / yathā cābhyāṃ pradiṣṭena yayā vaurvāśramaṃ prati // ### [2.21.36](https://indike.org/pramana/in.purana.brahmanda.2.21.36) taṃ namaskṛtya vidhivaccyavanaṃ ca mahātapāḥ / sapraharṣaṃ tadājñātaḥ prayayāvāśramaṃ bhṛgoḥ // ### [2.21.37](https://indike.org/pramana/in.purana.brahmanda.2.21.37) sa gatvāmunimukhyasya bhṛgorāśramamaṇḍalam / dadarśa śāntacetobhirmunibhiḥ sarvato vṛtam // ### [2.21.38](https://indike.org/pramana/in.purana.brahmanda.2.21.38) susnigdhaśītalacchāyaiḥ sarvartukaguṇānvitaiḥ / tarubhiḥ saṃvṛtaṃ prītaḥ phalapuṣpottarānvitaiḥ // ### [2.21.39](https://indike.org/pramana/in.purana.brahmanda.2.21.39) nānākhagakulārāvairmanaḥśrotrasukhāvahaiḥ / brahmaghoṣaiśca vividhaiḥ sarvataḥ pratināditam // ### [2.21.40](https://indike.org/pramana/in.purana.brahmanda.2.21.40) samantrāhutihomotthadhūmagandhena sarvataḥ / nirastanikhilāghaughaṃ vanāntaravisarpiṇā // ### [2.21.41](https://indike.org/pramana/in.purana.brahmanda.2.21.41) samitkuśāharairdaṇḍamekhalājinamaṇḍitaiḥ / abhitaḥ śobhitaṃ rājanramyairmunikumārakaiḥ // ### [2.21.42](https://indike.org/pramana/in.purana.brahmanda.2.21.42) prasūnajalasaṃpūrmapātrahastābhirantarā / śobhitaṃ munikalyābhiścarantībhiritastataḥ // ### [2.21.43](https://indike.org/pramana/in.purana.brahmanda.2.21.43) sapotahariṇīyūthairvisraṃbhādaviśaṅkibhiḥ / uṭajāṅgaṇaparyantatarucchāyāsvadhiṣṭhitam // ### [2.21.44](https://indike.org/pramana/in.purana.brahmanda.2.21.44) romanthataḥ parāmṛṣṭiyūtha sākṣikamutpradaiḥ / prārabdhatāṇḍavaṃ kekīmayūrairmadhurasvaraiḥ // ### [2.21.45](https://indike.org/pramana/in.purana.brahmanda.2.21.45) pravikīrṇakaṇoddeśaṃ mṛgaśabdaiḥ samīpagaiḥ / anālīḍhātapacchāyāśuṣyannīvārarāśibhiḥ // ### [2.21.46](https://indike.org/pramana/in.purana.brahmanda.2.21.46) hūyamānānalaṃ kāle pūjyamānātithivrajam / abhyasyamānacchandaughaṃ cintyamānagamoditam // ### [2.21.47](https://indike.org/pramana/in.purana.brahmanda.2.21.47) paṭhyamānākhilasmārttaṃ śrautārthapravicāraṇam / prārabdhapitṛdevejyaṃ sarvabhūtamanoharam // ### [2.21.48](https://indike.org/pramana/in.purana.brahmanda.2.21.48) tapasvijanabhūyiṣṭhamākāpuruṣasevitam / tapovṛddhikaraṃ puṇyaṃ sarvasattvasukhāspadam // ### [2.21.49](https://indike.org/pramana/in.purana.brahmanda.2.21.49) tapodhanānandakaraṃ brahmalokamivāparam / prasūnasaurabhabhrāmyanmadhupārāvanāditam // ### [2.21.50](https://indike.org/pramana/in.purana.brahmanda.2.21.50) sarvato vījyamānena vividhena nabhasvatā / evaṃvidhaguṇopetaṃ paśyannāśramamuttamam // ### [2.21.51](https://indike.org/pramana/in.purana.brahmanda.2.21.51) praviveśa vinītātmā sukṛtīvāmarālayam / saṃpraviśyaśramopāntaṃ rāmaḥ svaprapitāmaham // ### [2.21.52](https://indike.org/pramana/in.purana.brahmanda.2.21.52) dadarśa parito rājanmuniśiṣyaśatāvṛtam / vyākhyānavedikāmadhye niviṣṭaṃ kuśaviṣṭare / sitaśmaśrujaṭākūrcabrahmasūtropaśobhitam // ### [2.21.53](https://indike.org/pramana/in.purana.brahmanda.2.21.53) vāmetarorumadhyāsta vāmajaṅghena jānunā // ### [2.21.54](https://indike.org/pramana/in.purana.brahmanda.2.21.54) yogapaṭṭena saṃvītasvadehamṛṣipuṅgavam / vyākhyānamudrāvilasatsavyapāṇitalāṃbujam // ### [2.21.55](https://indike.org/pramana/in.purana.brahmanda.2.21.55) yogapaṭṭoparinyastavibhrājadvāmapāṇikam / samyagāraṇyavākyānāṃ sūkṣmatattvārthasaṃhatim // ### [2.21.56](https://indike.org/pramana/in.purana.brahmanda.2.21.56) vivṛtya munimukhyebhyaḥ śrāvayantaṃ taponidhim / pituḥ pitāmahaṃ ddaṣṭvā rāmastasya mahātmanaḥ // ### [2.21.57](https://indike.org/pramana/in.purana.brahmanda.2.21.57) śanairivamahārāja samīpaṃ samupāgamat / tamāgatamupālakṣya tatprabhāvapradharṣitāḥ // ### [2.21.58](https://indike.org/pramana/in.purana.brahmanda.2.21.58) śaṅkāmavāpurmunayo dūrādevākhilā nṛpa / tāvadūbhṛgurameyātmā tadāgamanatoṣitaḥ // ### [2.21.59](https://indike.org/pramana/in.purana.brahmanda.2.21.59) nivṛttānyakathālāpastaṃ paśyannāsa pārthiva / rāmo 'pi tamupāgamya vinayāvanatānanaḥ // ### [2.21.60](https://indike.org/pramana/in.purana.brahmanda.2.21.60) avandata yathānyayamupendra iva vedhasam / abhivādya yathānyāyaṃ khyātiṃ ca vinayānvitaḥ // ### [2.21.61](https://indike.org/pramana/in.purana.brahmanda.2.21.61) tāṃśca saṃbhāvayāmāsa munīnrāmoyathāvayaḥ / taiśca sarvairmudopetairāśīrbhirabhivarddhitaḥ // ### [2.21.62](https://indike.org/pramana/in.purana.brahmanda.2.21.62) upāviveśa medhāvī bhūmau teṣāmanujñayā / upaviṣṭaṃ tato rāmamāśīrbhirabhinanditam // ### [2.21.63](https://indike.org/pramana/in.purana.brahmanda.2.21.63) papracchakuśalapraśnaṃ tamālokya bhṛgustadā / kuśalaṃ khalu te vatsa pitrośca kimanāmayam // ### [2.21.64](https://indike.org/pramana/in.purana.brahmanda.2.21.64) bhrātṝṇāṃ caiva bhavataḥpituḥ pitrostathaiva ca / kimarthamāgato 'tra tvamadhunāmama sannidhim // ### [2.21.65](https://indike.org/pramana/in.purana.brahmanda.2.21.65) kenāpi vā tvamādiṣṭaḥ svayamevāthavāgataḥ / tatorāmo yathānyāyaṃ tasmai sarvamaśeṣataḥ // ### [2.21.66](https://indike.org/pramana/in.purana.brahmanda.2.21.66) kathayāmāsa yatpṛṣṭaṃ tadā tena mahātmanā / piturmātuśca vṛttānta bhrātṝṇāṃ ca mahātmanām // ### [2.21.67](https://indike.org/pramana/in.purana.brahmanda.2.21.67) pituḥ pritroścakauśalya darśanaṃ ca tayornṛpa / etadanyacca sakalaṃ bhṛgoḥ sapraśrayaṃ mudā // ### [2.21.68](https://indike.org/pramana/in.purana.brahmanda.2.21.68) nyavedayadyathānyāyamātmanaśca samīhitam / śrutvaitadakhilaṃ rājanrāmeṇa samudīritam // ### [2.21.69](https://indike.org/pramana/in.purana.brahmanda.2.21.69) taṃ ca dṛṣṭvā viśeṣeṇa bhṛguḥ prīto 'bhyanandata / evaṃ tasya priyaṃ kurvannutkṛṣṭairātmakarmabhiḥ // ### [2.21.70](https://indike.org/pramana/in.purana.brahmanda.2.21.70) tatrāśrame 'vasadrāmo dināni katicinnṛpa / tataḥ kadācidekānte rāmaṃ munivarottamaḥ // ### [2.21.71](https://indike.org/pramana/in.purana.brahmanda.2.21.71) vatsāgaccheti taṃ rājannupāhvayadupahvare / so 'bhigamya tamāsīnamabhivādya kṛtāñjaliḥ // ### [2.21.72](https://indike.org/pramana/in.purana.brahmanda.2.21.72) tasthau tatpurato rāmaḥ suprītenāntarātmanā / āśīrbhirabhinandyātha bhṛgustaṃ prīta mānasaḥ // ### [2.21.73](https://indike.org/pramana/in.purana.brahmanda.2.21.73) prāha nādhigatāśaṅkaṃ rāmamālokya sādaram / śruṇu vatsa vaco mahya yattvāṃ vakṣyāmi sāṃpratam // ### [2.21.74](https://indike.org/pramana/in.purana.brahmanda.2.21.74) hitārthaṃ sarvalokānāṃ tava cāsmākameva ca / gaccha putra mamādeśāddhimavantaṃ mahāgirim // ### [2.21.75](https://indike.org/pramana/in.purana.brahmanda.2.21.75) adhunaivāśramādasmāttapase dhṛtamānasaḥ / tatragatvā mahābhāga kṛtvāśramāpadaṃ śubham // ### [2.21.76](https://indike.org/pramana/in.purana.brahmanda.2.21.76) ārādhaya mahādevaṃ tapasā niyamena ca / prītimutpādya tasya tvaṃ bhaktyānanyagayā cirāt // ### [2.21.77](https://indike.org/pramana/in.purana.brahmanda.2.21.77) śreyo mahadavāpnoṣi nātra kāryā vijāraṇā / tarasā tava bhaktyā ca prīto bhavati śaṅkaraḥ // ### [2.21.78](https://indike.org/pramana/in.purana.brahmanda.2.21.78) kariṣyati ca te sarvaṃ manasā yadyadicchasi / tuṣṭe tasmiñjagannāthe śaṅkare bhaktavatsale // ### [2.21.79](https://indike.org/pramana/in.purana.brahmanda.2.21.79) astragrāmamaśeṣaṃ tvaṃ vaṇu putra yathepsitam / tvayā hitārthaṃ devānāṃ karaṇīyaṃ suduṣkaram // ### [2.21.80](https://indike.org/pramana/in.purana.brahmanda.2.21.80) vidyate 'bhyadhikaṃ karma śastrasādhyamanekaśaḥ / tasmāttvaṃ devadeveśaṃ samārādhaya śaṅkaram // ### [2.21.81](https://indike.org/pramana/in.purana.brahmanda.2.21.81) bhaktyā paramayā yuktastato 'bhīṣṭamavāpsyasi // ### [2.21.81.p1](https://indike.org/pramana/in.purana.brahmanda.2.21.81.p1) iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde ekaviṃśati tamaudhyāyaḥ // 21// --- Source: [https://indike.org/pramana/in.purana.brahmanda.2.21](https://indike.org/pramana/in.purana.brahmanda.2.21) · Pramāṇa