[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.22 # Brahmandapurana 2.22 Brahmāṇḍapurāṇa 2.22 - **Language:** Sanskrit ## Contents - [2.22.81](https://indike.org/pramana/in.purana.brahmanda.2.22.81) — 1 part ### [2.22.1](https://indike.org/pramana/in.purana.brahmanda.2.22.1) vasiṣṭha uvāca ityevamukto bhṛguṇā tathetyuktvā praṇamya ca / rāmastenābhyanujñātaścakāra gamane manaḥ // ### [2.22.2](https://indike.org/pramana/in.purana.brahmanda.2.22.2) bhṛguṃ khyātiṃ ca vidhivatparikramya praṇamyaca / pariṣvaktastathā tābhyāmāśīrbhirābhinanditaḥ // ### [2.22.3](https://indike.org/pramana/in.purana.brahmanda.2.22.3) munīṃśca tānnamaskṛtya taiḥ sarvairanumoditaḥ / niścakramāśramāttasmāttapase kṛtaniścayaḥ // ### [2.22.4](https://indike.org/pramana/in.purana.brahmanda.2.22.4) tato guruniyogena taduktenaiva vartmanā / himavantaṃ girivaraṃ yayau rāmo mahāmanāḥ // ### [2.22.5](https://indike.org/pramana/in.purana.brahmanda.2.22.5) so 'tītya vividhāndeśānparvatānsaritastathā / vanāni munimukhyānāmāvāsāṃścātyagācchanaiḥ // ### [2.22.6](https://indike.org/pramana/in.purana.brahmanda.2.22.6) tatratatra nivāseṣu munīnāṃ nivasanpathi / tīrtheṣu kṣetramukhyeṣu nivasanvā yayau śanaiḥ // ### [2.22.7](https://indike.org/pramana/in.purana.brahmanda.2.22.7) atītya subahūndeśānpaśyannapi manoramān / āsasādaca laśreṣṭhaṃ himavantamanuttamam // ### [2.22.8](https://indike.org/pramana/in.purana.brahmanda.2.22.8) sa gatvā parvatavaraṃ nānādrumalatāsthitam / dadarśa vipulaiḥ śṛṅgairullikhantamivāṃbaram // ### [2.22.9](https://indike.org/pramana/in.purana.brahmanda.2.22.9) nānādhātuvicitraiśca pradeśairupaśobhitam / ratnauṣadhībhirabhitaḥ sphuradbhirabhiśobhitam // ### [2.22.10](https://indike.org/pramana/in.purana.brahmanda.2.22.10) marutsaṃghaṭṭanāghṛṣṭanīrasāṃghripajanmanā / sānilenānalenocchairdahyamānaṃ navaṃ kvacit // ### [2.22.11](https://indike.org/pramana/in.purana.brahmanda.2.22.11) kvacidravikarāmarśajvaladarkepalāgnibhiḥ / dravaddhimāśilājātujalaśāntadavānalam // ### [2.22.12](https://indike.org/pramana/in.purana.brahmanda.2.22.12) sphaṭikāñjanadurvarṇasvarṇarāśiprabhākaraiḥ / sphuratparasparacchāyāśarairddīptavanaṃ kvacit // ### [2.22.13](https://indike.org/pramana/in.purana.brahmanda.2.22.13) upatyakaśilāpṛṣṭhavālātapaniṣevibhiḥ / tuṣāraklinnasiddhaughaurudbhāsitavanaṃ kvacit // ### [2.22.14](https://indike.org/pramana/in.purana.brahmanda.2.22.14) kvacidarkāśusaṃbhinnaścāmīkaraśilāśritaiḥ / yakṣaughairbhāsitopāntaṃ viśadbhirivapāvakam // ### [2.22.15](https://indike.org/pramana/in.purana.brahmanda.2.22.15) darīmukhaviniṣkrāntatarakṣūtpatanākulaiḥ / mṛgayūthārttasannādairāpūritaguhaṃ kvacit // ### [2.22.16](https://indike.org/pramana/in.purana.brahmanda.2.22.16) yuddhyadvarāhaśārdūlayūthapairita steram / prasabhonmṛṣṭakāntoruśilātarutaṭaṃ kvacit // ### [2.22.17](https://indike.org/pramana/in.purana.brahmanda.2.22.17) kalabhonmeṣaṇākṛṣṭakariṇībhiranudrutaiḥ / gavayaiḥ khurasaṃkṣuṇṇaśilāprasthataṭaṅkvacit // ### [2.22.18](https://indike.org/pramana/in.purana.brahmanda.2.22.18) vāsitarthe 'bhisaṃvṛddhamadonmattamataṅgajaiḥ / yuddhyadbhiścūrṇitānekagaṇḍaśailavanaṃ kvacit // ### [2.22.19](https://indike.org/pramana/in.purana.brahmanda.2.22.19) bṛṃhitaśravaṇāmarṣānmātaṃ gānabhidhāvatām / siṃhānāṃ caraṇakṣuṇṇanakhabhinnoparaṃ kvacit // ### [2.22.20](https://indike.org/pramana/in.purana.brahmanda.2.22.20) sahasā nipatatsiṃhanakhanirbhinnamastakaiḥ / gajairākrandanādena pūryamāmaṃ vanaṃ kvacit // ### [2.22.21](https://indike.org/pramana/in.purana.brahmanda.2.22.21) aṣṭapādabalākṛṣṭakesarā dāruṇākhaiḥ / bhedyamānākhilaśilāgaṃbhīrakuharaṃ kvacit // ### [2.22.22](https://indike.org/pramana/in.purana.brahmanda.2.22.22) saṃrabdhā nekaśabaraprasaktairṛyūthapaiḥ / itaretarasaṃmardaṃ viprabhagnadṛṣatkvacit // ### [2.22.23](https://indike.org/pramana/in.purana.brahmanda.2.22.23) girikuñjeṣu saṃkrīḍatkariṇīmadvipaṃ kvacit / kareṇumādravanmattagajākalitakānanam // ### [2.22.24](https://indike.org/pramana/in.purana.brahmanda.2.22.24) svapatsiṃhamukhaśvāsamarutpurmadarīśatam / gahaneṣu gurutrāsasāśaṅkaviharanmṛgam // ### [2.22.25](https://indike.org/pramana/in.purana.brahmanda.2.22.25) kaṇṭākaśliṣṭalāṅgūlalomatruṭanakātaraiḥ / krīḍitaṃ camarīyūthairmandamandavicāribhiḥ // ### [2.22.26](https://indike.org/pramana/in.purana.brahmanda.2.22.26) girikandarasaṃsaktakinnarīsamudīritaiḥ / satālanādairudinairbhṛtāśeṣadiśāmukham // ### [2.22.27](https://indike.org/pramana/in.purana.brahmanda.2.22.27) araṇyadevatānāṃ ca caretīnāmitastataḥ / alaktakarasaklinnacaraṇāṅkitabhūtalam // ### [2.22.28](https://indike.org/pramana/in.purana.brahmanda.2.22.28) mayūrakekirīvṛndaiḥ saṃgīta madhurasvaraiḥ / pravṛttanṛttaṃ parito vitatodagrabarhibhiḥ // ### [2.22.29](https://indike.org/pramana/in.purana.brahmanda.2.22.29) jalasthalaruhānekakusumotkaravarṣibhiḥ / gātrāhlādakarairmandaṃ vījyamānaṃ vanānilaiḥ // ### [2.22.30](https://indike.org/pramana/in.purana.brahmanda.2.22.30) bhūtārttavarasāsvādamādyatpuṃskokilāravaiḥ / ākulīkṛtaparyantasahakāravanāntaram // ### [2.22.31](https://indike.org/pramana/in.purana.brahmanda.2.22.31) nānāpuṣpāsavonmādyadbhṛṅgasaṃgītanāditam / anekavihagārāvabadhirīkṛtakānanam // ### [2.22.32](https://indike.org/pramana/in.purana.brahmanda.2.22.32) madhudravārdrāviralapratyagrakusumotkaraiḥ / vanāntamārutākīrṇairalaṅkṛtamahītalam // ### [2.22.33](https://indike.org/pramana/in.purana.brahmanda.2.22.33) upariṣṭānnipatatāṃ viṣamopalasaṃkaṭe / nirjharāṇāṃ mahārāvaiḥ samantādbadhirīkṛtam // ### [2.22.34](https://indike.org/pramana/in.purana.brahmanda.2.22.34) vitatānekasaṃsaktaśākhāgrāviralacchadaiḥ / pāṭalairviṭapacchāyairupaśalyasamutthitaiḥ // ### [2.22.35](https://indike.org/pramana/in.purana.brahmanda.2.22.35) kadaṃbaniṃbahintālasarjabedhūkatindukaiḥ / kapitthapanasāśokasahakāregudāśanaiḥ // ### [2.22.36](https://indike.org/pramana/in.purana.brahmanda.2.22.36) nāgacaṃpakapunnāgakovidārapriyaṅgubhiḥ / priyālanīpabakulabandhūkākṣatamālakaiḥ // ### [2.22.37](https://indike.org/pramana/in.purana.brahmanda.2.22.37) drākṣāmadhūkāmalakajaṃbūkaṅkolajātibhiḥ / bilvārjunakarañjāmrabījapūrāṅghripairapi // ### [2.22.38](https://indike.org/pramana/in.purana.brahmanda.2.22.38) piculāṃbaṣṭhakanakavaikaṅkataśamīdhavaiḥ / putrajīvābhayāriṣṭalohoduṃbarapippalaiḥ // ### [2.22.39](https://indike.org/pramana/in.purana.brahmanda.2.22.39) anyaiśca vividhairvṛkṣaiḥ samantādupaśobhitam / nirantaratarucchāyāsudūravinivāritaiḥ // ### [2.22.40](https://indike.org/pramana/in.purana.brahmanda.2.22.40) samantādarkakiraṇairanāsāditabhūtalam / nānāpakvaphalāsvādabalapuṣṭaiḥ plavegamaiḥ // ### [2.22.41](https://indike.org/pramana/in.purana.brahmanda.2.22.41) ākrāntacakitānekavanapaṅktiśatākulam / tatra tatrātiramyaiśca śilākuharanirgataiḥ // ### [2.22.42](https://indike.org/pramana/in.purana.brahmanda.2.22.42) pratāpaviṣamairājanhrāsyamānaṃ saricchataiḥ / sārovaraiśca vipulaiḥ kumudotpalamaṇḍitaiḥ // ### [2.22.43](https://indike.org/pramana/in.purana.brahmanda.2.22.43) nānāvihagasaṃghuṣṭaiḥ samantādupaśobhitam / samāsādyatha śailendraṃ tuṣāraśiśiraṃ girim // ### [2.22.44](https://indike.org/pramana/in.purana.brahmanda.2.22.44) āruroha bhaguśreṣṭhastarasā taṃ mudānvitaḥ / tasya praviśya gahanaṃ vanaṃ rāmo mahāmanāḥ // ### [2.22.45](https://indike.org/pramana/in.purana.brahmanda.2.22.45) vicacāra śanai rājannupaśalyamahīruham / sa tatra vicarandikṣu hariṇībhiḥ samantataḥ // ### [2.22.46](https://indike.org/pramana/in.purana.brahmanda.2.22.46) vikṣyamāṇo mudaṃ lebhe sāśaṅkaṃ mugdhadṛṣṭibhiḥ / sa tatra kusumāmodagandhibhirvanavāyubhiḥ // ### [2.22.47](https://indike.org/pramana/in.purana.brahmanda.2.22.47) vījyamāno jaharṣe sa vīkṣyodārāṃ vanaśriyam / vividhāśca stharīḥ sūkṣmamuparikramya bhārgavaḥ // ### [2.22.48](https://indike.org/pramana/in.purana.brahmanda.2.22.48) dvandvāṃśca dhātūnvividhānpaśyannevamatarkayat / aho 'yaṃ sarvaśailānāmādhipatye 'bhiṣecitaḥ // ### [2.22.49](https://indike.org/pramana/in.purana.brahmanda.2.22.49) brahmaṇā yajñabhākcaiva sthāne saṃpratipāditaḥ / asya śailādhirājatvaṃ suvyaktamabhilakṣyate // ### [2.22.50](https://indike.org/pramana/in.purana.brahmanda.2.22.50) ravaiḥ kīcakaveṇunāṃ madhurīkṛtakānanaḥ / nitaṃbasthalasaṃsaktatuṣāranicayaigyam // ### [2.22.51](https://indike.org/pramana/in.purana.brahmanda.2.22.51) vibhātīvāhitasvacchaparītadhavalāṃśukaḥ / nibiḍaśritanīhāranikareṇa tathopari // ### [2.22.52](https://indike.org/pramana/in.purana.brahmanda.2.22.52) nānāvarṇottarāsaṃgāvṛttāṅga ivalkṣyate / candanāgurukarpūrakastūrīkuṅkumādibhiḥ // ### [2.22.53](https://indike.org/pramana/in.purana.brahmanda.2.22.53) alaṅkṛtāgaḥ suvyaktaṃ dṛśyate 'hī vilāsivat / mṛgendrāhatadantīndrakuṃbhasthalaparicyutaiḥ // ### [2.22.54](https://indike.org/pramana/in.purana.brahmanda.2.22.54) sthūlamuktotkaraireṣa vibhāti parito giriḥ / nānāvṛkṣalatāvallīpuṣpālaṅkṛtamūrddhajaḥ // ### [2.22.55](https://indike.org/pramana/in.purana.brahmanda.2.22.55) nīrandhrāñcitame ghaughavitānasamalaṅkṛtaḥ / nānādhātuvicitrāṅgaḥ sarvaratnavibhūṣitaḥ // ### [2.22.56](https://indike.org/pramana/in.purana.brahmanda.2.22.56) kailāsavyājavilasatsitacchatravirājitaḥ / gajāśvamukhayūthaiśca samantātparivāritaḥ // ### [2.22.57](https://indike.org/pramana/in.purana.brahmanda.2.22.57) ratnadvīpamahādvāraśilākandaramandiraḥ / viviktagahvarāsthānamadhyasiṃhāsanāśrayaḥ // ### [2.22.58](https://indike.org/pramana/in.purana.brahmanda.2.22.58) samantātpratisaṃsaktataruvetravatāṃ śanaiḥ / dṛṣṭvā janairanāsādyo mahārājādhirājavat // ### [2.22.59](https://indike.org/pramana/in.purana.brahmanda.2.22.59) dodhūyamāno vicaraccamarīcā rucāmaraiḥ / mayūrairupanṛtyadbhirgāyadbhiścaiva kinnaraiḥ // ### [2.22.60](https://indike.org/pramana/in.purana.brahmanda.2.22.60) sattvajātairanekaiśca sevyamāno virājate / vyaktamevācalendrāṇāmadhirājyapade sthitaḥ // ### [2.22.61](https://indike.org/pramana/in.purana.brahmanda.2.22.61) bhunaktyākramya vasudhāṃ samagrāṃ śriyamojasā / evaṃ saṃcintayānaḥ sa himādrivanagahvare // ### [2.22.62](https://indike.org/pramana/in.purana.brahmanda.2.22.62) vicacāra ciraṃ rāmo mudā paramayā yutaḥ / āsasāda vane tasminvipule bhṛgupuṅgavaḥ // ### [2.22.63](https://indike.org/pramana/in.purana.brahmanda.2.22.63) sarovaraṃ mahārāja vipulaṃ vimalodakam / kumudotpalakahlāranikarairupasobhitam // ### [2.22.64](https://indike.org/pramana/in.purana.brahmanda.2.22.64) paṅkajairutpalaiścaiva raktapītaiḥ sitāsitaiḥ / anyaiśca jalacairvakṣaiḥ sarvataḥ samalaṅkṛtam // ### [2.22.65](https://indike.org/pramana/in.purana.brahmanda.2.22.65) haṃsasārasadātyūhakāraṇḍavaśatairapi / jīvajīvakacakrāhvakurarabhramarotkaraiḥ // ### [2.22.66](https://indike.org/pramana/in.purana.brahmanda.2.22.66) saṃghuṣyamāṇaṃ paritaḥ sevitaṃ mandavāyunā / śapharīmatsyasaṃghaiśca vicaradbhiritastataḥ // ### [2.22.67](https://indike.org/pramana/in.purana.brahmanda.2.22.67) antarjanitakallolairnṛtyamānamivābhitaḥ / āsasāda bhṛguśreṣṭhastatsarovaramuttamam // ### [2.22.68](https://indike.org/pramana/in.purana.brahmanda.2.22.68) nānāpatatrrivirutairmadhurīkṛtadiktaṭam / sa tasya tīre vipulaṃ kṛtvāśramapadaṃ śubham // ### [2.22.69](https://indike.org/pramana/in.purana.brahmanda.2.22.69) rāmo matimatāṃ śreṣṭhastapase ca mano dadhe / śākamūlaphalāhāro niyataṃ niyatendriyaḥ // ### [2.22.70](https://indike.org/pramana/in.purana.brahmanda.2.22.70) tapaścacāra deveśaṃ viniveśyātmamānase / bhṛgūpadiṣṭamārgeṇa bhaktyā paramayā yutaḥ // ### [2.22.71](https://indike.org/pramana/in.purana.brahmanda.2.22.71) pūjayāmāsa deveśamekāgramanasā nṛpa / aniketaḥ sa varṣāsu śiśire jalasaṃśrayaḥ // ### [2.22.72](https://indike.org/pramana/in.purana.brahmanda.2.22.72) grīṣme pañjāgnimadhyasthaścacāraivaṃ tapaściram / ripūnnirjitya kāmādīnūrmiṣaṣaṭkaṃ vidhūya ca // ### [2.22.73](https://indike.org/pramana/in.purana.brahmanda.2.22.73) dvandvairanudvejitadhīstāpadoṣairanākulaḥ / yamaiḥ saniyamaiścaiva śuddhadehaḥ samāhitaḥ // ### [2.22.74](https://indike.org/pramana/in.purana.brahmanda.2.22.74) vaśī cakāra pavanaṃ prāṇāyāmena dehagam / jitapadmāsano maunī sthiracitto mahāmuniḥ // ### [2.22.75](https://indike.org/pramana/in.purana.brahmanda.2.22.75) vaśī cakāra cākṣāṇi pratyāhāraparāyaṇaḥ / dhāraṇābhiḥ sthirīcakre manaścañcalamātmavān // ### [2.22.76](https://indike.org/pramana/in.purana.brahmanda.2.22.76) dhyānena devadeveśaṃ dadarśa parameśvaram / svasthāntaḥ karaṇo maitraḥ sarvabādhāvivarjitaḥ // ### [2.22.77](https://indike.org/pramana/in.purana.brahmanda.2.22.77) cintayāmāsa deveśaṃ dhyāne dṛṣṭvā jagadgurum / dhyeyāvasthi tacittātmā niścaledriyadehavān // ### [2.22.78](https://indike.org/pramana/in.purana.brahmanda.2.22.78) ākālāvadhi so 'tiṣṭhannivātasthapradīpavat / japaṃśca devadeveśaṃ dhyāyaṃśca svamanīṣayā // ### [2.22.79](https://indike.org/pramana/in.purana.brahmanda.2.22.79) ārādhayadameyātmā sarvabhāvasthamīśvaram / tataḥ sa niṣphalaṃ rūpamaiśvaraṃ yannirañjanam // ### [2.22.80](https://indike.org/pramana/in.purana.brahmanda.2.22.80) paraṃ jyotiracintyaṃ yadyogidhyeyamanutta mam / nityaṃ śuddhaṃ sadā śāntamatīndriyamanaupamam / ānandamātramacalaṃ vyāptāśeṣacarācaram // ### [2.22.81](https://indike.org/pramana/in.purana.brahmanda.2.22.81) cintayāmāsa tadrūpaṃ devadevasya bhārgavaḥ / nityaṃ śuddhaṃ sadā śāntamatīndriyamanaupamam // ### [2.22.81.p1](https://indike.org/pramana/in.purana.brahmanda.2.22.81.p1) iti śrībrahmāṇḍe mahāpurāṇe vāyuprokte madhyabhāge tṛtīye upoddhātapāde vasiṣṭhasagarasaṃvāde arcunopākhyāne jāmadagnyatapaścaraṇaṃ nāma dvāviṃśatitamo 'dhyāyaḥ // 22// ## Linked texts (1) - [Brahmavaivartapurāṇa](https://indike.org/pramana/in.purana.brahmavaivarta.3.2.124.4) — Vyāsa, Sanskrit --- Source: [https://indike.org/pramana/in.purana.brahmanda.2.22](https://indike.org/pramana/in.purana.brahmanda.2.22) · Pramāṇa