Brahmandapurana 2.29
Brahmāṇḍapurāṇa 2.29
- Language
- Sanskrit
Contents
- 2.29.24 — 1 part
2.29.1
vasiṣṭha uvāca
jamadagnistato bhūyastamuvāca ruṣānvitaḥ /
brahmasvaṃ nāpaharttavyaṃ puruṣeṇa vijānatā //
2.29.2
prasahya gāṃ me harato pāpamāpsyasi durmate /
āyurjāne parikṣīṇaṃ na cedetatkariṣyati //
2.29.3
balādicchasi yannetuṃ tanna śakyaṃ kathañcana /
svayaṃ vā yadi sāyucyedvinaśiṣyati pārthivaḥ //
2.29.4
dānaṃ vināpaharaṇaṃ brāhmaṇānāṃ tapasvinām /
śatāyuṣor'junādanyaḥ ko nvicchati jijīviṣuḥ //
2.29.5
ityuktastena saṃkruddhaḥ sa mantrīkālacoditaḥ /
baddhvā tāṃ gāṃ dṛḍhaiḥ pāśairvicakarṣa balānvitaḥ //
2.29.6
jamadagniratha krodhādbhāvikarmapracoditaḥ /
rurodha taṃ yathāśakti vikarṣantaṃ pāyasvinīm //
2.29.7
jīvanna pratimokṣyāmi gāmenāmityamarṣitaḥ /
jagrāha sudṛḍhaṃ kaṇṭhe vāhubhyāṃ tāṃ mahāmuniḥ //
2.29.8
tataḥ krodhaparītātmā candragupto 'tinirghṛṇaḥ /
utsārayadhvamityenamādideśa svasainikān //
2.29.9
apradhṛṣyatamaṃ loke tamṛṣiṃ rājakiṅkarāḥ /
bhartrājñayā prasahyainaṃ parivavruḥ samantataḥ //
2.29.10
daṇḍaiḥ kaśābhirlakuḍairvinighnantaśca muṣṭibhiḥ /
te samutsārayan dhenoḥ sudūrataramantikāt //
2.29.11
sa tathā hanyamono 'pi vyathitaḥkṣamayānvitaḥ /
na cukrodhākrodhanatvaṃ sato hi paramaṃ dhanam //
2.29.12
sa ca śaktaḥ svatapasā saṃharttumapi rakṣitum /
jagatsarvaṃ kṣayaṃ tasya cintayanna pracukrudhe //
2.29.13
sapūrvaṃ krodhano 'tyarthaṃ māturarthe prasāditaḥ /
rāmeṇābhūttato nityaṃ śānta eva mahātapāḥ //
2.29.14
sa hanyamānaḥ subhṛśaṃ cūrṇitāṅgāsthivandhanaḥ /
nipapāta mahātejā dharaṇyāṃ gatacetanaḥ //
2.29.15
tasminmunau nipatite sa durātmā viśaṅkitaḥ /
kiṅkarānādiśacchīghraṃ dhenorānayane balāt //
2.29.16
tataḥ savatsāṃ tā dhenuṃ baddhvā pāśairdṛḍhairnṛpaḥ /
kaśābhirabhihanyanta cakṛṣuśca ninīṣayā //
2.29.17
ākṛṣyamāṇā bahubhiḥ kaśābhirlaguḍairapi /
hanyamānā bhṛśaṃ taiśca cukrudhe ca payasvinī //
2.29.18
vyathitātikaśāpātaiḥ krodhena mahātānvitā /
ākṛṣya pāśān sudṛḍhān kṛtvātmānamamocayat //
2.29.19
vimuktapāśavandhāsā sarvato 'bhivṛtā balaiḥ /
huṃhāravaṃ prakurvāṇā sarvato 'hyapatadruṣā //
2.29.20
viṣāṇakhurapucchāgrairabhihatya samantataḥ /
rājamantribalaṃ sarvaṃ vyadrāvayadamarṣitā //
2.29.21
vidrāvya kiṅkarānsarvāṃstarasaiva payasvinī /
paśyatāṃ sarvabhūtānāṃ gaganaṃ pratyapadyata //
2.29.22
tataste bhagnasaṃkalpāḥ saṃbhagnakṣatavigrahāḥ /
prasahya baddhvā tadvatsaṃ jagmurevātinirghṛṇāḥ //
2.29.23
payasvinīṃ vinā vatsaṃ gṛhītvā kiṅkaraiḥ saha /
sa pāpastarasā rājñaḥ sannidhiṃ samupāgamat //
2.29.24
gatvā samīpaṃ nṛpateḥ praṇamyāsmai praśaṃsakṛt /
tadvrattāntamaśeṣeṇa vyācacakṣe sasādhvasaḥ //
2.29.24.p1
iti śrībrahmāṇḍe mahāpurāṇe vāyuprokte madhyamabhāge tṛtīya
upoddhātapāder'junopākhyāne ekonatriṃśattamo 'dhyāyaḥ // 29//
Linked texts (2)
- History of Dharmaśāstra (Ancient and Mediaeval Religious and Civil Law in India) — P. V. Kane, English
- Ancient Indian Historical Tradition — F. E. Pargiter, English