Brahmandapurana 2.31
Brahmāṇḍapurāṇa 2.31
- Language
- Sanskrit
Contents
- 2.31.39 — 1 part
2.31.1
sagara uvāca
brahmaputra mahābhāga vada bhārgavaceṣṭitam /
yaccakāra mahāvīryyo rājñaḥ kruddho hi karmaṇā //
2.31.2
vasiṣṭha uvāca
gate tasminmahābhāge bhṛgo pitṛparāyaṇaḥ /
rāmaḥ provāca saṃkruddho muñcañchvāsānmuharmuhuḥ //
2.31.3
paraśurāma uvāca
aho paśyata mūḍhatvaṃrājño hyutpathagāminaḥ /
kārttavīryasya yo vidvāṃścakre brahmavadhodyamam //
2.31.4
daivaṃ hi balavanmanye yatprabhāvāccharīriṇaḥ /
śubhaṃ vāpyaśubhaṃ sarve prakurvanti vimohitāḥ //
2.31.5
śṛṇavantu ṛṣayaḥ sarve pratijñā kriyate mayā /
kārttavīryaṃ nihatyājau piturvairaṃ prasādhaye //
2.31.6
yadi rājā suraiḥ sarvairindrāddairdānavaistathā /
rakṣiṣyate tathāpyenaṃ saṃhariṣyāmi nānyathā //
2.31.7
evamuktaṃ samākarṇya rāmeṇa samuhātmanā /
jamadagniruvācedaṃ putraṃ sāhasabhāṣiṇam //
2.31.8
jamadagniruvāca
śruṇu rāma pravakṣyāmi satāṃ dharmaṃ sanātanam /
yacchrutvā mānavāḥ sarve jāyante dharmakāriṇaḥ //
2.31.9
sādhavo ye mahābhāgāḥ saṃsārānmokṣakāṅkṣiṇāḥ /
na kasmaicitprakupyanti ninditāstāḍitā api //
2.31.10
kṣamādhanā mahābhāgā ye ca dāntāstapasvinaḥ /
teṣāṃ caivākṣayā lokāḥ satataṃ sādhukāriṇām //
2.31.11
yastu duṣṭaistu daṇḍādyairvacasāpi ca tāḍitaḥ /
na ca kṣobhamavāpnoti sa sādhuḥ parikīrtthate //
2.31.12
tāḍayettāḍayantaṃ yo na ca sādhuḥ sa pāpabhāk /
kṣamayār'haṇatāṃ prāptāḥ sādhavo brāhmaṇā vayam //
2.31.13
naranāthavadhe tāta pātakaṃ sumahadbhavet /
tasmānnivāraye tvādya kṣamāṃ kuru tapaścara //
2.31.14
vasiṣṭha uvāca
evaṃ pitrā samādiṣṭaṃ vijñāya nṛpanandana /
rāmaḥ provāca pitaraṃ kṣamāśīlamarindamam //
2.31.15
paraśurāma uvāca
śṛṇu tāta mahāprājña vi5ptiṃ mama sāṃpratam /
bhavatā śama uddiṣṭaḥ sādhūnāṃ sumahātmanām //
2.31.16
ma śamaḥ sādhudīneṣu guruṣvīśvarabhāvanaiḥ /
karttavyo duṣṭaceṣṭeṣu na śamaḥ sukhado bhavet //
2.31.17
tasmādasya vadhaḥ kāryaḥ kārttavīryasya vai mayā /
dehyājñāṃ mānanīyādya sādhaye vairamātmanaḥ //
2.31.18
jamadagniruvāca
śṛṇu rāma mahābhāga vaco mama samāhitaḥ /
kariṣyasi yathā bhāvi tathā naivānyathā bhavet //
2.31.19
ito vrajatvaṃ brahmāṇāṃ bṛccha tāta hitāhitam /
sa yadvadiṣyati vibhustatkarttā nātra saṃśayaḥ //
2.31.20
vasiṣṭha uvāca
evamuktaḥ sa pitaraṃ namaskṛtya mahāmatiḥ /
jagāma brahmaṇo lokamagamyaṃ prākṛtairjanaiḥ //
2.31.21
dadarśa brahmaṇo lokaṃ śātakaiṃbhavinirmitam /
svarṇaprākārasaṃyuktaṃ maṇistaṃbhairvimūṣitam //
2.31.22
tatrāpaśyatsamāsīnaṃ brahmāṇamamitaujasam /
ratnasiṃhāsane ramye ratnabhūṣaṇabhūṣitam //
2.31.23
siddhendraiśca munīndraiśca veṣṭitaṃ dhyānatatparaiḥ /
vidyādharīṇāṃ nṛtyaṃ ca paśyantaṃ sasmitaṃ mudā //
2.31.24
tapasā phaladātāraṃ karttāraṃ jagatāṃ vibhum /
paripūrṇatamaṃ brahma dhyāyataṃ yatamānasam //
2.31.25
guhyayogaṃ pravocantaṃ bhaktavṛndeṣu saṃtatam /
dṛṣṭvā tamavyayaṃ bhaktyā praṇanāma bhṛgūdvahaḥ //
2.31.26
sa dṛṣṭvā vinataṃ rāmamāśīrbhirabhinandya ca /
papraccha kuśalaṃ vatsa kathamāgamanaṃ kṛthāḥ //
2.31.27
saṃpṛṣṭo vidhinā rāmaḥ provācākhilamāditaḥ /
vṛttāntaṃ kārttavīryasya pituḥ svasya mahātmanaḥ //
2.31.28
tacchrutvā sakalaṃ brahmā vijñātārtho 'pi mānada /
uvāca rāmaṃ dharmiṣṭhaṃ pariṇāmasukhāvaham //
2.31.29
pratijñā durlabhā vatsa yāṃ bhavankṛtavānruṣā /
sṛṣṭi reṣā bhagavataḥ saṃbhavetkṛpayā baṭo //
2.31.30
jagatsṛṣṭaṃ mayā tāta saṃkleśena tadājñayā /
tannāśakāriṇī caiva pratijñā bhavatā kṛtā //
2.31.31
triḥsaptakṛtvo nirbhūpāṃ kartumicchasi medinīm /
ekasya rājño doṣeṇa pituḥ paribhavena ca //
2.31.32
brahmakṣatrriyaviṭśūdraiḥ sṛṣṭireṣā sanātanī /
āvirbhūtā tirobhūtā harereva punaḥ punaḥ //
2.31.33
avyarthā tvatpratijñā tu bhavitrī prāktanena ca /
yadvāyāsena te kāryasiddhirbhavitumarhati //
2.31.34
śivalokaṃ prayāhi tvaṃ śivasyājñāmavāpnuhi /
pṛthivyāṃ bahavo bhūpāḥ saṃti śaṅkarakiṅkarāḥ //
2.31.35
vinaivājñāṃ maheśasya ko vā tānhantumīśvaraḥ /
bibhrataḥ kavacānyaṅge śaktīścāpi durāsadāḥ //
2.31.36
upāyaṃ kuru yatnena jayabījaṃ śubhāvaham /
upāye tu samārabdhe sarve sidhyantyupakramāḥ //
2.31.37
śrīkṛṣṇamantraṃ kavacaṃ gṛhṇa vatsa gurorharāt /
durllaṅghyaṃ vaiṣṇavaṃ tejaḥ śivaśaktirvijeṣyati //
2.31.38
trailokyavijayaṃ nāma kavacaṃ paramādbhutam /
yathākathaṃ ca vijñāpya śaṅkaraṃ labhadurlabham //
2.31.39
prasannaḥ sa guṇaistubhyaṃ kṛpālurdīnavatsalaḥ /
divyapāśupataṃ cāpi dāsyatyeva na saṃśayaḥ //
2.31.39.p1
iti śrībrahmāṇḍe mahāpurāṇe vāyuprokte madhyabhāge tṛtīya
upoddhātapāde bhārgavacarite ekatriṃśattamo 'dhyāyaḥ // 31//
Linked texts (5)
- Brahmavaivartapurāṇa — Vyāsa, Sanskrit
- Ancient Indian Historical Tradition — F. E. Pargiter, English
- Gaṇeśakhaṇḍa — Sanskrit
- Vaiṣṇavakhaṇḍa — Sanskrit
- Studies in the Purāṇic Records on Hindu Rites and Customs — R. C. Hazra, English