Brahmandapurana 2.32
Brahmāṇḍapurāṇa 2.32
- Language
- Sanskrit
Contents
- 2.32.61 — 1 part
2.32.1
vasiṣṭha uvāca
brahmaṇo vacanaṃ śrutvā sa praṇamya jagadgurum /
prasannacetāḥ subhṛśaṃ śivalokaṃ jagāma ha //
2.32.2
lakṣayojanamūrddhvaṃ ca brahmalokā dvilakṣaṇam /
athanirvacanīyaṃ ca yogigamyaṃ parātparam //
2.32.3
vaikuṇṭho dakṣiṇe yasmādgaurīlokaśca vāmataḥ /
yadadho dhruvalokaśca sarvalokaparastu saḥ //
2.32.4
tapovīryagatī rāmaḥ śivalokaṃ dadarśa ca /
upamānena rahitaṃ nānākautukasaṃyutam //
2.32.5
vasaṃti yatra yogīndrāḥ siddhāḥ pāśupatāḥ śubhāḥ /
koṭikalpatapaḥ puṇyāḥ śāntā nirmatsarā janāḥ //
2.32.6
pārijātamukhairvṛkṣaiḥ śobhitaṃ kāmadhenubhiḥ /
yogena yoginā sṛṣṭaṃ svecchayā śaṅkareṇa hi //
2.32.7
śilpināṃ guruṇā svapne na dṛṣṭaṃ niśvakarmaṇā /
sarovaraśatairdivyaiḥ padmarāgavirājitaiḥ //
2.32.8
śobhitaṃ cātiramyaṃ ca saṃyuktaṃ maṇivedibhiḥ /
suvarṇaratnaracitaprākāreṇa samāvṛtam //
2.32.9
atyūrddhvamaṃbarasparśi svacchaṃ kṣīranibhaṃparam /
caturdvārasamāyuktaṃ śobhitaṃ maṇivedibhiḥ //
2.32.10
raktasopānayuktaiśca ratnastaṃbhakapāṭakaiḥ /
nānācitravicitraiśca śobhitaiḥ sumanoharaiḥ //
2.32.11
tanmadhaye bhavanaṃ ramyaṃ siṃhadvāropaśobhitam /
dadarśarāmo dharmātmā vicitramiva saṃgataḥ //
2.32.12
tatra sthitau dvāra pālau dadarśātibhayaṅkarau /
mahākarāladantāsyau vikṛtāraktalocanau //
2.32.13
dagdhaśailapratīkāśau mahābalaparākramau /
vibhūtibhūṣitāṅgau ca vyāghracarmāṃbarau ca tau //
2.32.14
triśūlapaṭṭiśadharau jvalantau brahmatejasā /
tau dṛṣṭvā manasā bhītaḥ kiñcidāha vinītavat //
2.32.15
namaskaromi vāmīśau śaṅkaraṃ draṣṭumāgataḥ /
īśvarājñāṃ samādāya māmathājñaptumarhatha //
2.32.16
tautu tadvacanaṃ śrutvā gṛhītvājñāṃ śivasya ca /
praveṣṭumājñāṃ dadaturīśvarānucarau ca tau //
2.32.17
sa tadājñāmanuprāpya viveśāntaḥ puraṃ mudā /
tatrātiramyāṃ siddhaughaiḥ samākīrṇāṃ sabhāṃ dvijaḥ //
2.32.18
dṛṣṭvā vismayamāpede sugandhabahulāṃ vibhoḥ /
tatrāpaśyacchivaṃ śāntaṃ trinetraṃ candraśekharam //
2.32.19
triśūlaśobhitakaraṃ vyāghracarmavarāṃbaram /
vibhūtibhūṣitāṅgaṃ ca nāgayajñopavītinam //
2.32.20
ātmārāmaṃ pūrṇakāmaṃ koṭisūryasamaprabham /
pañcānanaṃ daśabhujaṃ bhaktānugrahavigraham //
2.32.21
yogajñāne prabruvantaṃ siddhebhyastarkamudrayā /
stūyamānaṃ ca yokīndraiḥ pramathaprakarairmudā //
2.32.22
bhairavairyoginībhiśca vṛtaṃ rudragaṇaistathā /
mūrdhnā namāma taṃ dṛṣṭvā rāmaḥ paramayā mudā //
2.32.23
vāmabhāge kārttikeyaṃ dakṣiṇe ca gaṇeśvaram /
nandīśvaraṃ mahākālaṃ vīrabhadraṃ ca tatpuraḥ //
2.32.24
kroḍe durgāṃ śatabhujāṃ dṛṣṭvā natvātha tāmapi /
stotuṃ pracakrame vidvāngirā gadgadayā vibhum //
2.32.25
namasye śivamīśānaṃ vibhuṃ vyāpakamavyayam /
bhujaṅgabhūṣaṇaṃ cograṃ nṛkapālasragujjvalam //
2.32.26
yo vibhuḥ sarvalokānāṃ sṛṣṭisthitivināśakṛt /
brahmādirūpadhṛgjyeṣṭhastaṃ tvāṃ veda kṛpārṇavam //
2.32.27
vedā na śaktā yaṃ stotu mavāṅmanasagocaram /
jñānabuddhyorasādhyaṃ ca nirākāraṃ namāmyaham //
2.32.28
śakrādayaḥ suragaṇā ṛṣayo manavo 'surāḥ /
na yaṃ viduryathātattvaṃ taṃ namāmi parātparam //
2.32.29
yasyāṃśāṃśena sṛjayante lokāḥ sarve carācarāḥ /
līyante ca punaryasmiṃstaṃ namāmi jaganmayam //
2.32.30
yasyeṣatkopasaṃbhūto hutāśo dahate 'khilam /
sorddhvalokaṃ sapātālaṃ taṃ namāmi haraṃ param //
2.32.31
pṛthvīpavana vahnyabhabhonabhoyajvendubhāskarāḥ /
mūrttayo 'ṣṭau jagatpūjyāstaṃ yajñaṃ praṇamāmyaham //
2.32.32
yaḥ kālarūpo jagadādikarttā pātā pṛthagrūpadharo jaganmayaḥ /
rarttā punā rudravapustathānte taṃ kālarūpaṃ śaraṇaṃ prapadye //
2.32.33
ityevamuktvā sa tu bhārgavo mudā paṣāta tasyāṅghri samīpa āturaḥ /
utthāpya taṃ vāmakareṇa līlayā dadhre tadā mūrdhni karaṃ kṛpārṇavaḥ //
2.32.34
āśīrbhirenaṃ hyabhinandya sādaraṃ niveśayāmāsa gaṇeśapūrvataḥ /
uvāca vāmāmabhivīkṣya cāpyumāṃ kṛpārdradṛṣṭyākhilakāmapūrakaḥ //
2.32.35
śiva uvāca
kastvaṃ vaṭo kasyakule prasūtaḥ kiṃ kāryamuddiśya bhavānihāgataḥ /
vinirddiśāhaṃ tava bhaktibhāvataḥ prītaḥ pradadyāṃ bhavato manogatam //
2.32.36
ityevamuktaḥ sa bhṛgurmahātmanā hareṇa viśvārttihareṇa sādaram /
punaśca natvā vibudhāṃ pati guruṃ kṛpāsamudraṃ samuvāca satvaram //
2.32.37
paraśurāma uvāca
bhṛgoścāhaṃ kule jāto jamadagnisutau vibho /
rāmo nāma jagadvandyaṃ tvāmahaṃ śaraṇaṃ gataḥ //
2.32.38
yatkāryārthamahaṃ nātha tava sāṃnidhyamāgataḥ /
taṃ prasādhaya viśveśa vāñchitaṃ kāmameva me //
2.32.39
mṛgayāmāgatasyāpi kārttavīryasya bhūpateḥ /
ātithyaṃ kṛtavān deva jamadagniḥ pitā mama //
2.32.40
rājā taṃ sa balāllobhātpātayāmāsa mandadhīḥ /
sā dhenustaṃ mṛtaṃ dṛṣṭvā gavāṃ lokaṃ jagāma ha //
2.32.41
rājā na śocanmaraṇaṃ piturmama nirāgasaḥ /
jagāma svapuraṃ paścānmātā me prārudadbhṛśam //
2.32.42
tajjñātvā lokavṛttajño bhṛgurnaḥ prapitāmahaḥ /
ājagāma mahādeva hyahamapyāgato vanāt //
2.32.43
mayā maha suduḥkhārttānbhrātṝnmātrāsahaiva me /
sāṃtvayitvā sa mantrajño 'jīvayatpitaraṃ mama //
2.32.44
ānāgate bhṛgau māturduḥkhenāhaṃ prakopitaḥ /
pratijñāṃ kṛtavāndeva sātvayanmātaraṃsvakām //
2.32.45
triḥsaptakṛtvo yadurastāḍitaṃ māturātmanaḥ /
tāvatsaṃkhyamahaṃ pṛthvīṃ kariṣye kṣatravarjitām //
2.32.46
ityevaṃ paripūrṇā me karttā devo jagatpatiḥ /
mahādevo hyato nātha tvatsakāṇamihāgataḥ //
2.32.47
vasiṣṭha uvāca
ityevaṃ tadvacaḥ śrutvā dṛṣṭvā durgāmukhaṃ haraḥ /
babhūvānamravadanaschintayānaḥ kṣaṇaṃ tadā //
2.32.48
etasminnantare durgā vismitā prāhasadbhṛśam /
uvāca ca mahārāja bhārgavaṃ vairasādhakam //
2.32.49
tapasvindvijaputra kṣmāṃ nirbhūpāṃ karttumicchasi /
triḥ saptakṛtvaḥ kopena sāhasaste mahānbaṭo //
2.32.50
hantumicchasi niḥśastraḥ sahasrārjunamīśvaram /
bhrūbhaṅgalīlayā yena rāvaṇo 'pi nirākṛtaḥ //
2.32.51
tasmai pradattaṃ dattena śrīhareḥ kavacaṃ purā /
śaktiratyarthavīryā ca taṃ kathaṃ hantumicchasi //
2.32.52
śaṅkaraḥ karuṇāsiddhaḥ karttuṃ cāpyanyathā vibhuḥ /
na cānyaḥ śaṅkarātputra satkāryaṃ karttumīśvaraḥ //
2.32.53
atha devyā anumatiṃ prāpya śaṃbhurddayārṇavaḥ /
abhyadhādbhadrayā vāyā jamadagnisutaṃ vibhuḥ //
2.32.54
śiva uvāca
adyaprabhṛti vipra tvaṃ mama skandasamo bhava /
dāsyāmi mantraṃ divyaṃ te kavacaṃ ca mahāmate //
2.32.55
līlayā yatprasādena kārttavīryaṃ haniṣyasi /
triḥ saptakṛtvo nirbhūpāṃ mahīṃ cāpi kariṣyasi //
2.32.56
ityuktvā śaṅkarastasmai dadau mantraṃ sudurlabham /
trailokyavijayaṃ nāma kavacaṃ paramādbhutam //
2.32.57
nāgapāśaṃ pāśupataṃ brahmāstraṃ ca sudurllabham /
nārāyaṇāstramāgneyaṃ vāyavyaṃ vāruṇaṃ tathā //
2.32.58
ghāndharvaṃ gāruḍaṃ caiva jṛṃbhaṇāstraṃ mahādbhutam /
gadāṃ śaktiṃ ca paraśuṃ śūlaṃ daṇḍamanuttamam //
2.32.59
śastrāstragrāmamakhilaṃ prahṛṣṭaḥ saṃbabhūva ha /
namaskṛtya śivaṃ śāntaṃ durgāṃ skandaṃ gaṇeśvaram //
2.32.60
parikramya yayau rāmaḥ puṣkaraṃ tīrthamuttamam /
siddhaṃ kṛtvā śivoktaṃ tu mantraṃ kavacamuttamam //
2.32.61
sādhayāmāsa nikhilaṃ svakāryaṃ bhṛgunandanaḥ /
nihatya kārttavīryaṃ taṃ sasainyaṃ sakulaṃ mudā /
vinivṛtto gṛhaṃ prāgātpituḥ svasya bhṛgūdvahaḥ //
2.32.61.p1
iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde bhārgavacarite dvātriṃśattamo 'dhyāyaḥ // 32//
Linked texts (2)
- Brahmavaivartapurāṇa — Vyāsa, Sanskrit
- Brahmavaivartapurāṇa (another edition) — Sanskrit