[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.32 # Brahmandapurana 2.32 Brahmāṇḍapurāṇa 2.32 - **Language:** Sanskrit ## Contents - [2.32.61](https://indike.org/pramana/in.purana.brahmanda.2.32.61) — 1 part ### [2.32.1](https://indike.org/pramana/in.purana.brahmanda.2.32.1) vasiṣṭha uvāca brahmaṇo vacanaṃ śrutvā sa praṇamya jagadgurum / prasannacetāḥ subhṛśaṃ śivalokaṃ jagāma ha // ### [2.32.2](https://indike.org/pramana/in.purana.brahmanda.2.32.2) lakṣayojanamūrddhvaṃ ca brahmalokā dvilakṣaṇam / athanirvacanīyaṃ ca yogigamyaṃ parātparam // ### [2.32.3](https://indike.org/pramana/in.purana.brahmanda.2.32.3) vaikuṇṭho dakṣiṇe yasmādgaurīlokaśca vāmataḥ / yadadho dhruvalokaśca sarvalokaparastu saḥ // ### [2.32.4](https://indike.org/pramana/in.purana.brahmanda.2.32.4) tapovīryagatī rāmaḥ śivalokaṃ dadarśa ca / upamānena rahitaṃ nānākautukasaṃyutam // ### [2.32.5](https://indike.org/pramana/in.purana.brahmanda.2.32.5) vasaṃti yatra yogīndrāḥ siddhāḥ pāśupatāḥ śubhāḥ / koṭikalpatapaḥ puṇyāḥ śāntā nirmatsarā janāḥ // ### [2.32.6](https://indike.org/pramana/in.purana.brahmanda.2.32.6) pārijātamukhairvṛkṣaiḥ śobhitaṃ kāmadhenubhiḥ / yogena yoginā sṛṣṭaṃ svecchayā śaṅkareṇa hi // ### [2.32.7](https://indike.org/pramana/in.purana.brahmanda.2.32.7) śilpināṃ guruṇā svapne na dṛṣṭaṃ niśvakarmaṇā / sarovaraśatairdivyaiḥ padmarāgavirājitaiḥ // ### [2.32.8](https://indike.org/pramana/in.purana.brahmanda.2.32.8) śobhitaṃ cātiramyaṃ ca saṃyuktaṃ maṇivedibhiḥ / suvarṇaratnaracitaprākāreṇa samāvṛtam // ### [2.32.9](https://indike.org/pramana/in.purana.brahmanda.2.32.9) atyūrddhvamaṃbarasparśi svacchaṃ kṣīranibhaṃparam / caturdvārasamāyuktaṃ śobhitaṃ maṇivedibhiḥ // ### [2.32.10](https://indike.org/pramana/in.purana.brahmanda.2.32.10) raktasopānayuktaiśca ratnastaṃbhakapāṭakaiḥ / nānācitravicitraiśca śobhitaiḥ sumanoharaiḥ // ### [2.32.11](https://indike.org/pramana/in.purana.brahmanda.2.32.11) tanmadhaye bhavanaṃ ramyaṃ siṃhadvāropaśobhitam / dadarśarāmo dharmātmā vicitramiva saṃgataḥ // ### [2.32.12](https://indike.org/pramana/in.purana.brahmanda.2.32.12) tatra sthitau dvāra pālau dadarśātibhayaṅkarau / mahākarāladantāsyau vikṛtāraktalocanau // ### [2.32.13](https://indike.org/pramana/in.purana.brahmanda.2.32.13) dagdhaśailapratīkāśau mahābalaparākramau / vibhūtibhūṣitāṅgau ca vyāghracarmāṃbarau ca tau // ### [2.32.14](https://indike.org/pramana/in.purana.brahmanda.2.32.14) triśūlapaṭṭiśadharau jvalantau brahmatejasā / tau dṛṣṭvā manasā bhītaḥ kiñcidāha vinītavat // ### [2.32.15](https://indike.org/pramana/in.purana.brahmanda.2.32.15) namaskaromi vāmīśau śaṅkaraṃ draṣṭumāgataḥ / īśvarājñāṃ samādāya māmathājñaptumarhatha // ### [2.32.16](https://indike.org/pramana/in.purana.brahmanda.2.32.16) tautu tadvacanaṃ śrutvā gṛhītvājñāṃ śivasya ca / praveṣṭumājñāṃ dadaturīśvarānucarau ca tau // ### [2.32.17](https://indike.org/pramana/in.purana.brahmanda.2.32.17) sa tadājñāmanuprāpya viveśāntaḥ puraṃ mudā / tatrātiramyāṃ siddhaughaiḥ samākīrṇāṃ sabhāṃ dvijaḥ // ### [2.32.18](https://indike.org/pramana/in.purana.brahmanda.2.32.18) dṛṣṭvā vismayamāpede sugandhabahulāṃ vibhoḥ / tatrāpaśyacchivaṃ śāntaṃ trinetraṃ candraśekharam // ### [2.32.19](https://indike.org/pramana/in.purana.brahmanda.2.32.19) triśūlaśobhitakaraṃ vyāghracarmavarāṃbaram / vibhūtibhūṣitāṅgaṃ ca nāgayajñopavītinam // ### [2.32.20](https://indike.org/pramana/in.purana.brahmanda.2.32.20) ātmārāmaṃ pūrṇakāmaṃ koṭisūryasamaprabham / pañcānanaṃ daśabhujaṃ bhaktānugrahavigraham // ### [2.32.21](https://indike.org/pramana/in.purana.brahmanda.2.32.21) yogajñāne prabruvantaṃ siddhebhyastarkamudrayā / stūyamānaṃ ca yokīndraiḥ pramathaprakarairmudā // ### [2.32.22](https://indike.org/pramana/in.purana.brahmanda.2.32.22) bhairavairyoginībhiśca vṛtaṃ rudragaṇaistathā / mūrdhnā namāma taṃ dṛṣṭvā rāmaḥ paramayā mudā // ### [2.32.23](https://indike.org/pramana/in.purana.brahmanda.2.32.23) vāmabhāge kārttikeyaṃ dakṣiṇe ca gaṇeśvaram / nandīśvaraṃ mahākālaṃ vīrabhadraṃ ca tatpuraḥ // ### [2.32.24](https://indike.org/pramana/in.purana.brahmanda.2.32.24) kroḍe durgāṃ śatabhujāṃ dṛṣṭvā natvātha tāmapi / stotuṃ pracakrame vidvāngirā gadgadayā vibhum // ### [2.32.25](https://indike.org/pramana/in.purana.brahmanda.2.32.25) namasye śivamīśānaṃ vibhuṃ vyāpakamavyayam / bhujaṅgabhūṣaṇaṃ cograṃ nṛkapālasragujjvalam // ### [2.32.26](https://indike.org/pramana/in.purana.brahmanda.2.32.26) yo vibhuḥ sarvalokānāṃ sṛṣṭisthitivināśakṛt / brahmādirūpadhṛgjyeṣṭhastaṃ tvāṃ veda kṛpārṇavam // ### [2.32.27](https://indike.org/pramana/in.purana.brahmanda.2.32.27) vedā na śaktā yaṃ stotu mavāṅmanasagocaram / jñānabuddhyorasādhyaṃ ca nirākāraṃ namāmyaham // ### [2.32.28](https://indike.org/pramana/in.purana.brahmanda.2.32.28) śakrādayaḥ suragaṇā ṛṣayo manavo 'surāḥ / na yaṃ viduryathātattvaṃ taṃ namāmi parātparam // ### [2.32.29](https://indike.org/pramana/in.purana.brahmanda.2.32.29) yasyāṃśāṃśena sṛjayante lokāḥ sarve carācarāḥ / līyante ca punaryasmiṃstaṃ namāmi jaganmayam // ### [2.32.30](https://indike.org/pramana/in.purana.brahmanda.2.32.30) yasyeṣatkopasaṃbhūto hutāśo dahate 'khilam / sorddhvalokaṃ sapātālaṃ taṃ namāmi haraṃ param // ### [2.32.31](https://indike.org/pramana/in.purana.brahmanda.2.32.31) pṛthvīpavana vahnyabhabhonabhoyajvendubhāskarāḥ / mūrttayo 'ṣṭau jagatpūjyāstaṃ yajñaṃ praṇamāmyaham // ### [2.32.32](https://indike.org/pramana/in.purana.brahmanda.2.32.32) yaḥ kālarūpo jagadādikarttā pātā pṛthagrūpadharo jaganmayaḥ / rarttā punā rudravapustathānte taṃ kālarūpaṃ śaraṇaṃ prapadye // ### [2.32.33](https://indike.org/pramana/in.purana.brahmanda.2.32.33) ityevamuktvā sa tu bhārgavo mudā paṣāta tasyāṅghri samīpa āturaḥ / utthāpya taṃ vāmakareṇa līlayā dadhre tadā mūrdhni karaṃ kṛpārṇavaḥ // ### [2.32.34](https://indike.org/pramana/in.purana.brahmanda.2.32.34) āśīrbhirenaṃ hyabhinandya sādaraṃ niveśayāmāsa gaṇeśapūrvataḥ / uvāca vāmāmabhivīkṣya cāpyumāṃ kṛpārdradṛṣṭyākhilakāmapūrakaḥ // ### [2.32.35](https://indike.org/pramana/in.purana.brahmanda.2.32.35) śiva uvāca kastvaṃ vaṭo kasyakule prasūtaḥ kiṃ kāryamuddiśya bhavānihāgataḥ / vinirddiśāhaṃ tava bhaktibhāvataḥ prītaḥ pradadyāṃ bhavato manogatam // ### [2.32.36](https://indike.org/pramana/in.purana.brahmanda.2.32.36) ityevamuktaḥ sa bhṛgurmahātmanā hareṇa viśvārttihareṇa sādaram / punaśca natvā vibudhāṃ pati guruṃ kṛpāsamudraṃ samuvāca satvaram // ### [2.32.37](https://indike.org/pramana/in.purana.brahmanda.2.32.37) paraśurāma uvāca bhṛgoścāhaṃ kule jāto jamadagnisutau vibho / rāmo nāma jagadvandyaṃ tvāmahaṃ śaraṇaṃ gataḥ // ### [2.32.38](https://indike.org/pramana/in.purana.brahmanda.2.32.38) yatkāryārthamahaṃ nātha tava sāṃnidhyamāgataḥ / taṃ prasādhaya viśveśa vāñchitaṃ kāmameva me // ### [2.32.39](https://indike.org/pramana/in.purana.brahmanda.2.32.39) mṛgayāmāgatasyāpi kārttavīryasya bhūpateḥ / ātithyaṃ kṛtavān deva jamadagniḥ pitā mama // ### [2.32.40](https://indike.org/pramana/in.purana.brahmanda.2.32.40) rājā taṃ sa balāllobhātpātayāmāsa mandadhīḥ / sā dhenustaṃ mṛtaṃ dṛṣṭvā gavāṃ lokaṃ jagāma ha // ### [2.32.41](https://indike.org/pramana/in.purana.brahmanda.2.32.41) rājā na śocanmaraṇaṃ piturmama nirāgasaḥ / jagāma svapuraṃ paścānmātā me prārudadbhṛśam // ### [2.32.42](https://indike.org/pramana/in.purana.brahmanda.2.32.42) tajjñātvā lokavṛttajño bhṛgurnaḥ prapitāmahaḥ / ājagāma mahādeva hyahamapyāgato vanāt // ### [2.32.43](https://indike.org/pramana/in.purana.brahmanda.2.32.43) mayā maha suduḥkhārttānbhrātṝnmātrāsahaiva me / sāṃtvayitvā sa mantrajño 'jīvayatpitaraṃ mama // ### [2.32.44](https://indike.org/pramana/in.purana.brahmanda.2.32.44) ānāgate bhṛgau māturduḥkhenāhaṃ prakopitaḥ / pratijñāṃ kṛtavāndeva sātvayanmātaraṃsvakām // ### [2.32.45](https://indike.org/pramana/in.purana.brahmanda.2.32.45) triḥsaptakṛtvo yadurastāḍitaṃ māturātmanaḥ / tāvatsaṃkhyamahaṃ pṛthvīṃ kariṣye kṣatravarjitām // ### [2.32.46](https://indike.org/pramana/in.purana.brahmanda.2.32.46) ityevaṃ paripūrṇā me karttā devo jagatpatiḥ / mahādevo hyato nātha tvatsakāṇamihāgataḥ // ### [2.32.47](https://indike.org/pramana/in.purana.brahmanda.2.32.47) vasiṣṭha uvāca ityevaṃ tadvacaḥ śrutvā dṛṣṭvā durgāmukhaṃ haraḥ / babhūvānamravadanaschintayānaḥ kṣaṇaṃ tadā // ### [2.32.48](https://indike.org/pramana/in.purana.brahmanda.2.32.48) etasminnantare durgā vismitā prāhasadbhṛśam / uvāca ca mahārāja bhārgavaṃ vairasādhakam // ### [2.32.49](https://indike.org/pramana/in.purana.brahmanda.2.32.49) tapasvindvijaputra kṣmāṃ nirbhūpāṃ karttumicchasi / triḥ saptakṛtvaḥ kopena sāhasaste mahānbaṭo // ### [2.32.50](https://indike.org/pramana/in.purana.brahmanda.2.32.50) hantumicchasi niḥśastraḥ sahasrārjunamīśvaram / bhrūbhaṅgalīlayā yena rāvaṇo 'pi nirākṛtaḥ // ### [2.32.51](https://indike.org/pramana/in.purana.brahmanda.2.32.51) tasmai pradattaṃ dattena śrīhareḥ kavacaṃ purā / śaktiratyarthavīryā ca taṃ kathaṃ hantumicchasi // ### [2.32.52](https://indike.org/pramana/in.purana.brahmanda.2.32.52) śaṅkaraḥ karuṇāsiddhaḥ karttuṃ cāpyanyathā vibhuḥ / na cānyaḥ śaṅkarātputra satkāryaṃ karttumīśvaraḥ // ### [2.32.53](https://indike.org/pramana/in.purana.brahmanda.2.32.53) atha devyā anumatiṃ prāpya śaṃbhurddayārṇavaḥ / abhyadhādbhadrayā vāyā jamadagnisutaṃ vibhuḥ // ### [2.32.54](https://indike.org/pramana/in.purana.brahmanda.2.32.54) śiva uvāca adyaprabhṛti vipra tvaṃ mama skandasamo bhava / dāsyāmi mantraṃ divyaṃ te kavacaṃ ca mahāmate // ### [2.32.55](https://indike.org/pramana/in.purana.brahmanda.2.32.55) līlayā yatprasādena kārttavīryaṃ haniṣyasi / triḥ saptakṛtvo nirbhūpāṃ mahīṃ cāpi kariṣyasi // ### [2.32.56](https://indike.org/pramana/in.purana.brahmanda.2.32.56) ityuktvā śaṅkarastasmai dadau mantraṃ sudurlabham / trailokyavijayaṃ nāma kavacaṃ paramādbhutam // ### [2.32.57](https://indike.org/pramana/in.purana.brahmanda.2.32.57) nāgapāśaṃ pāśupataṃ brahmāstraṃ ca sudurllabham / nārāyaṇāstramāgneyaṃ vāyavyaṃ vāruṇaṃ tathā // ### [2.32.58](https://indike.org/pramana/in.purana.brahmanda.2.32.58) ghāndharvaṃ gāruḍaṃ caiva jṛṃbhaṇāstraṃ mahādbhutam / gadāṃ śaktiṃ ca paraśuṃ śūlaṃ daṇḍamanuttamam // ### [2.32.59](https://indike.org/pramana/in.purana.brahmanda.2.32.59) śastrāstragrāmamakhilaṃ prahṛṣṭaḥ saṃbabhūva ha / namaskṛtya śivaṃ śāntaṃ durgāṃ skandaṃ gaṇeśvaram // ### [2.32.60](https://indike.org/pramana/in.purana.brahmanda.2.32.60) parikramya yayau rāmaḥ puṣkaraṃ tīrthamuttamam / siddhaṃ kṛtvā śivoktaṃ tu mantraṃ kavacamuttamam // ### [2.32.61](https://indike.org/pramana/in.purana.brahmanda.2.32.61) sādhayāmāsa nikhilaṃ svakāryaṃ bhṛgunandanaḥ / nihatya kārttavīryaṃ taṃ sasainyaṃ sakulaṃ mudā / vinivṛtto gṛhaṃ prāgātpituḥ svasya bhṛgūdvahaḥ // ### [2.32.61.p1](https://indike.org/pramana/in.purana.brahmanda.2.32.61.p1) iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde bhārgavacarite dvātriṃśattamo 'dhyāyaḥ // 32// ## Linked texts (2) - [Brahmavaivartapurāṇa](https://indike.org/pramana/in.purana.brahmavaivarta.4.29.6) — Vyāsa, Sanskrit - [Brahmavaivartapurāṇa (another edition)](https://indike.org/pramana/in.purana.brahmavaivarta*alt.8.48.24) — Sanskrit --- Source: [https://indike.org/pramana/in.purana.brahmanda.2.32](https://indike.org/pramana/in.purana.brahmanda.2.32) · Pramāṇa