[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.33 # Brahmandapurana 2.33 Brahmāṇḍapurāṇa 2.33 - **Language:** Sanskrit ## Contents - [2.33.37](https://indike.org/pramana/in.purana.brahmanda.2.33.37) — 1 part ### [2.33.1](https://indike.org/pramana/in.purana.brahmanda.2.33.1) sagara uvāca śrutaṃ sarvaṃ muniśreṣṭha kīrtyamānaṃ tvayā vibho / kavacaṃ vada sarvatra trailokyavijayapradam // ### [2.33.2](https://indike.org/pramana/in.purana.brahmanda.2.33.2) vasiṣṭha uvāca śṛṇu vatsa pravakṣyāmi kavacaṃ paramādbhutam / mantra ca siddhida śaśvatsādhakānāṃ sukhāvaham // ### [2.33.3](https://indike.org/pramana/in.purana.brahmanda.2.33.3) gopījanapadasyāta vallabhāya samuccaret / svāhānto 'yaṃ mahāmantro daśārṇo bhuktimuktidaḥ // ### [2.33.4](https://indike.org/pramana/in.purana.brahmanda.2.33.4) sadāśivastvasya ṛṣiḥ paṅktiśchanda udāhṛtam / devatā kṛṣṇa udito viniyogo 'khilāptaye // ### [2.33.5](https://indike.org/pramana/in.purana.brahmanda.2.33.5) trailokyavijayasyātha kavacasya prajāpatiḥ / ṛṣiśchandaśca jagatī devo rājeśvaraḥ svayam // ### [2.33.6](https://indike.org/pramana/in.purana.brahmanda.2.33.6) trailokyavijayaprāptau viniyogaḥ prakīrttitaḥ / praṇavo meśiraḥ pātu śrīkṛṣṇāya namaḥ sadā // ### [2.33.7](https://indike.org/pramana/in.purana.brahmanda.2.33.7) pāyātkapālaṃ kṛṣṇāya svāheti satataṃ mama / kṛṣṇeti pātu netre me kṛṣṇasvāheti tārakām // ### [2.33.8](https://indike.org/pramana/in.purana.brahmanda.2.33.8) haraye nama ityeṣa bhrūlatāṃ pātu me sadā / oṃ govindāya svāheti nāsikāṃ pātu saṃtatam // ### [2.33.9](https://indike.org/pramana/in.purana.brahmanda.2.33.9) gopālāya namo gaṇḍaṃ pātu me satataṃ manuḥ / klīṃ kṛṣṇāya namaḥ karṇauṃ pātu kalpatarurmama // ### [2.33.10](https://indike.org/pramana/in.purana.brahmanda.2.33.10) śrīṃ kṛṣṇāya namaḥ pātu nityaṃ me 'dharayugmakam / oṃ gopīśāya svāheti dantapaṅktiṃ mamāvatu // ### [2.33.11](https://indike.org/pramana/in.purana.brahmanda.2.33.11) śrīkṛṣṇeti radacchidraṃ pātume tryakṣaro manuḥ / oṃ śrīkṛṣṇāya svāheti jihvikāṃ pātu me sadā // ### [2.33.12](https://indike.org/pramana/in.purana.brahmanda.2.33.12) rāmeśvarāya svāheti tālukaṃ pātu me sadā / rādhikeśāya svāheti kaṇṭhaṃ me pātu sarvadā // ### [2.33.13](https://indike.org/pramana/in.purana.brahmanda.2.33.13) namo gopīgaṇeśāya grīvāṃ me pātu sarvadā / oṃ gopeśāya svāheti skandhau pātu sadā mama // ### [2.33.14](https://indike.org/pramana/in.purana.brahmanda.2.33.14) namaḥ kiśoraveṣāya svāhā pṛṣṭhaṃ mamāvatu / udaraṃ pātu me nityaṃ mukundāya namo manuḥ // ### [2.33.15](https://indike.org/pramana/in.purana.brahmanda.2.33.15) hnīṃ śrīṅklīṅkṛṣṇāya svāhā karau pātu sadā mama / oṃ viṣṇave namaḥ svāhā bāhuyugmaṃ mamāvatu // ### [2.33.16](https://indike.org/pramana/in.purana.brahmanda.2.33.16) oṃ hrīṃbhagavate svāhā nakhapaṅktiṃ mamāvatu / namo nārāyaṇāyeti nakharandhraṃ mamāvatu // ### [2.33.17](https://indike.org/pramana/in.purana.brahmanda.2.33.17) oṃ hrīṃśrīṃpadmanābhāya nābhiṃ pātu sadā mama / oṃ sarveśāya svāheti keśānmama sadāvatu // ### [2.33.18](https://indike.org/pramana/in.purana.brahmanda.2.33.18) namaḥ kṛṣṇāya svāheti brahmarandhraṃ sadāvatu / oṃ mādhavāya svāheti bhālaṃ me sarvadāvatu // ### [2.33.19](https://indike.org/pramana/in.purana.brahmanda.2.33.19) oṃ hrīṃśrīṃrasikeśāya kaṭiṃ mama sadāvatu / namo gopījaneśāya ūrū pātu sadā mama // ### [2.33.20](https://indike.org/pramana/in.purana.brahmanda.2.33.20) oṃ namo daityanāśāya svāhetyavatu jānunī / yaśodānandanāyeti namoto jaṅghake 'vatu // ### [2.33.21](https://indike.org/pramana/in.purana.brahmanda.2.33.21) rāsāraṃbhapriyāyeti svāhānto hīṃ mamāvatu / vṛndāpriyāya svāheti sakalāṅgāni me 'vatu // ### [2.33.22](https://indike.org/pramana/in.purana.brahmanda.2.33.22) pariburṇamanāḥ kṛṣmaḥ prācyāṃ māṃ sarvadāvatu / svayaṃ golokanātho māmāgneyyāṃ diśi rakṣatu // ### [2.33.23](https://indike.org/pramana/in.purana.brahmanda.2.33.23) pūrṇabrahmasvarūpaśca dakṣiṇe māṃ sadāvatu / nairṛtyāṃ pātu māṃ kṛṣṇāḥ paścime pātu māṃ hariḥ // ### [2.33.24](https://indike.org/pramana/in.purana.brahmanda.2.33.24) govindaḥ pātu vāyavyāmuttare rasikeśvaraḥ / aiśānyāṃ me sadā pātu vṛndāvanavihāra kṛt // ### [2.33.25](https://indike.org/pramana/in.purana.brahmanda.2.33.25) vṛndāprāṇeśvaraḥ śaśvatpātu māmūrddhvadeśataḥ / sadaiva māmadhaḥ pātu balidhvaṃsī mahābalaḥ // ### [2.33.26](https://indike.org/pramana/in.purana.brahmanda.2.33.26) jale sthale cāntarikṣe nṛsiṃhaḥ pātu māṃ sadā / svapne jāgaraṇe caiva pātu māṃ mādhavaḥ svayam // ### [2.33.27](https://indike.org/pramana/in.purana.brahmanda.2.33.27) sarvāntarātmā nirliptaḥ pātu māṃ sarvato vibhuḥ / iti te kathitaṃ bhūpa sarvāghaughavināśanam // ### [2.33.28](https://indike.org/pramana/in.purana.brahmanda.2.33.28) trailokyavijayaṃ nāma kavacaṃ parameśituḥ / mayā śrutaṃ śivamukhātpravaktavyaṃ na kasyacit // ### [2.33.29](https://indike.org/pramana/in.purana.brahmanda.2.33.29) gurumabhyarcya vidhivatkavacaṃ dhārayettu yaḥ / kaṇṭhe vā dakṣiṇe bāhau so 'pi viṣṇurna saṃśayaḥ // ### [2.33.30](https://indike.org/pramana/in.purana.brahmanda.2.33.30) sa sādhako 'vasadyatra tatra vāṇīrame sthite / yadi syātsiddhakavaco jīvanmukto na saṃśayaḥ // ### [2.33.31](https://indike.org/pramana/in.purana.brahmanda.2.33.31) niścitaṃ koṭivarṣāṇāṃ pūjāyāḥ phalamāpnuyāt / rājasūryasahasrāṇi vājapeyaśatāni ca // ### [2.33.32](https://indike.org/pramana/in.purana.brahmanda.2.33.32) mahādānāni yānyeva bhuvaścāpi pradakṣiṇā / trailokyavijayasyāsya kalāṃ nārhanti ṣoḍaśīm // ### [2.33.33](https://indike.org/pramana/in.purana.brahmanda.2.33.33) vratopavāsaniyamāḥ svādhyāyādhyayane tathā / snānaṃ ca sarvatīrtheṣu nāsyārhanti kalāmapi // ### [2.33.34](https://indike.org/pramana/in.purana.brahmanda.2.33.34) siddhatvamamaratvaṃ ca dāsatvaṃ śrīharerapi / yadi syātsiddhakavacaḥ sarvaṃ prāpnoti niścitam // ### [2.33.35](https://indike.org/pramana/in.purana.brahmanda.2.33.35) sa bhavetsiddhakavaco daśalakṣaṃ japettu yaḥ / yo bhavetsiddhakavaco vijayī sa bhaved dhruvam // ### [2.33.36](https://indike.org/pramana/in.purana.brahmanda.2.33.36) rājyaṃ deyaṃ śiro deyaṃ prāṇā deyāśca bhūpate / etattu kavacaṃ vatsa na deyaṃ saṃkaṭe 'pi ca // ### [2.33.37](https://indike.org/pramana/in.purana.brahmanda.2.33.37) mayā prakāśitaṃ yatte caiteṣāṃ trāṇakāraṇāt / mamājñākaraṇāccaiva tadviddhi kulabhāskara / idaṃ dhṛtvā tu kavacaṃ cakravarttī bhavānbhava // ### [2.33.37.p1](https://indike.org/pramana/in.purana.brahmanda.2.33.37.p1) iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde bhārgavacarite trayastriṃśattamo 'dhyāyaḥ ## Linked texts (3) - [Brahmavaivartapurāṇa (another edition)](https://indike.org/pramana/in.purana.brahmavaivarta*alt.8.50.26) — Sanskrit - [Gaṇeśakhaṇḍa](https://indike.org/pramana/in.purana.upa.surya.ganesakhanda.29.26) — Sanskrit - [Ancient Indian Historical Tradition](https://indike.org/pramana/ins.general.pargiter-1922.c32.79) — F. E. Pargiter, English --- Source: [https://indike.org/pramana/in.purana.brahmanda.2.33](https://indike.org/pramana/in.purana.brahmanda.2.33) · Pramāṇa