Brahmanda Purana 2.37
Brahmāṇḍapurāṇa 2.37
- Language
- Sanskrit
Contents
- 2.37.33 — 1 part
2.37.1
vasiṣṭha uvāca
dṛṣṭvā paraśurāmastu tadāścaryaṃ mahādbhutam /
jagāda sarvavṛttāntaṃ mṛgayostu yathāśrutam //
2.37.2
tacchrutvā bhagavānsākṣādagastyaḥ kuṃbhasaṃbhavaḥ /
modamāna uvācedaṃ bhārgavaṃ purataḥ sthitam //
2.37.3
agastya uvāca
śṛṇu rāma mahābhāga kāryākārviśārada /
hitaṃ vadāmi yatte 'dya tatkuruṣva samāhitaḥ //
2.37.4
ito vidūre sumahatsthānaṃ viṣṇoḥ sudurlabham /
padāni yatra dṛśyante nyastāni sumāhātmanā //
2.37.5
yatra gaṅgā samudbhūtā vāmasya mahātmanaḥ /
padāgrātkramato lokāṃstadbalestu vinigrahe //
2.37.6
tatra gatvā stavaṃ cedaṃ māsamaikamananyadhīḥ /
paṭhasva niyamenaiva niyato niyatāśanaḥ //
2.37.7
yattvayā kavacaṃ pūrvamabhyastaṃ siddhimicchatā /
śatrūṇāṃ nigrahārthāya tacca te siddhidaṃ bhavet //
2.37.8
vasiṣṭha uvāca
eva mukto hyagastyena rāmaḥ śatrunibarhaṇaḥ /
namaskṛtya munīṃ śāntaṃ nirjagāmāśramādbahiḥ //
2.37.9
punastenaiva mārgeṇa saṃprāptastatra satvaram /
yatrottarātpadanyāsānnirgatā svarṇadī nṛpa //
2.37.10
tatra vāsaṃ prakalpyāsāvakṛtavraṇasaṃyutaḥ /
samabhyasyatstavaṃ divyaṃ kṛṣmapremāmṛtābhidham //
2.37.11
nityaṃ vrajapatestasya stotraṃ tuṣṭo 'bhavaddhariḥ /
jagāma darśanaṃ tasya jāmadagnyasya bhūpate //
2.37.12
caturvyūhādhipaḥ sākṣātkṛṣṇaḥ kamalalocanaḥ /
kirīṭaṃnārkavarṇena kuṇḍalābhyāṃ ca rājitaḥ //
2.37.13
kaustubhodbhāsitoraskaḥ pītavāsā dhanaprabhaḥ /
muralīvādanaparaḥ sākṣānmohanarūpadhṛk //
2.37.14
taṃ dṛṣṭvā sahasotthāya jāmadagnyo mudānvitaḥ /
praṇamya daṇḍavadbhamau tuṣṭāva prayato vibhum //
2.37.15
paraśurām uvāca
namo namaḥ kāraṇavigrahāya prapannapālāya surārttihāriṇe /
brahmeśaviṣṇvidramukhastutāya nato 'smi nityaṃ parameśvarāya //
2.37.16
yaṃ vedavādairvividhaprakārairnirṇetumīśānamukhā na śaknuyuḥ /
taṃ tvāmanirdeśyamacaṃ purāmamanantamīḍe bhava me dayāparaḥ //
2.37.17
yastveka īśo nijavāñcchitaprado dhatte tanūrlokavihāra rakṣaṇe /
nānā vidhā devamanuṣyatiryagyādaḥ su bhūmerbharavāraṇāya //
2.37.18
taṃ tvāmahaṃ bhaktajanānuraktaṃ viraktamatyantamapīndirādiṣu /
svayaṃ samakṣaṃvyabhicāraduṣṭacittāsvapi premanibaddhamānasam //
2.37.19
yaṃ vai prasannā asurāḥ surā narāḥ sakinnarāstiryakeyonayo 'pi hi /
gatāḥ svarūpaṃ nikhalaṃ vihāya te dehastryapatyārthamamatvamīśvara //
2.37.20
taṃ devadevaṃ bhajatāmabhīpsitapradaṃ nirīhaṃ guṇavarjitaṃ ca /
acintyamavyaktamaghaughanāśanaṃ prāpto 'raṇaṃ premanidhānamādarāt //
2.37.21
tapanti tāpairvividhaiḥ svadehamanye tu yajñairvividhairyajanti /
svapne 'pi te rūpamalaukikaṃvibho paśyanti naivārthanibaddhavāsanāḥ //
2.37.22
ye vai tvadīyaṃ caraṇaṃ bhavaśramānnirviṇmacittā vidhivatsmaranti /
namanti bhaktyātha samarcayanti vai parasparaṃ saṃsadi varṇayanti //
2.37.23
tenaikajanmodbhavapaṅkabhedanaprasaktacittā bhavatoṃ'ghripadme /
taranti cānyānapi tārayanti hi bhavauṣadhaṃ nāma sudhā taveśa //
2.37.24
ahaṃ prabho kāmanibaddhacitto bhavantamāryaṃ vividhaprayatnaiḥ /
ārādhayaṃ nātha bhavānabhijñaḥ kiṃ te ha vijñāpyamihāsti loke //
2.37.25
vasiṣṭha uvāca
ityevaṃ jāmadagnyaṃ tu stuvantaṃ praṇataṃ puraḥ /
uvācāgādhayā vācā mohayanniva māyayā //
2.37.26
kṛṣṇa uvāca
hanta rāma mahābhāga siddhaṃ te kāryamuttamam /
kavacasya stavasyāpi prabhāvādavadhāraya //
2.37.27
hatvā taṃ kārttavīryaṃ hi rājānaṃ dṛptamānasam /
sādhayitvā piturvairaṃ kuru niḥkṣatriyāṃ mahīm //
2.37.28
mama cakrāvatāro hi kārttavīryo dharātale /
kṛtakāryo dvijaśreṣṭa taṃ samāpaya mānada //
2.37.29
adya prabhṛti loke 'sminnaṃśāveśena me bhavān /
cariṣyati yathā kālaṃ karttā harttā svayaṃ prabhuḥ //
2.37.30
caturviśe yuge vatsa tretāyāṃ raghuvaṃśajaḥ /
rāmo nāma bhaviṣyāmi caturvyūhaḥ sanātanaḥ //
2.37.31
kausalyānandajanako rājño daśarathādaham /
tadā kauśikayajñaṃ tu sādhayitvā salakṣmaṇaḥ //
2.37.32
gamiṣyāmi mahābhāga janakasya pura mahat /
tatreśacāpaṃ nirbhajya pariṇīya videhajām //
2.37.33
tadā yāsyannayodhyāṃ te hariṣye teja unmadam /
vasiṣṭha uvāca
kṛṣṇa evaṃ samadiśya jāmadagnyaṃ taponidhim /
paśyatoṃ'tardadhe tatra rāmasya mumahātmanaḥ //
2.37.33.p1
iti śrībrahāmāṇḍe mahāpurāṇe vāyuprokte madhyabhāge tṛtīya
upoddhātapāde bhargavacarite saptatriṃśattamo 'dhyāyaḥ // 37//
Discussed in (1)
- Ancient Indian Historical Tradition — Pargiter 1922, English