Brahmanda Purana 2.39
Brahmāṇḍapurāṇa 2.39
- Language
- Sanskrit
Contents
- 2.39.53 — 1 part
2.39.1
vasiṣṭha uvāca
matsyarāje nipatite rājā yuddhaviśāradaḥ /
rājendrānprerayāmāsa kārttavīryo mahābalaḥ //
2.39.2
bṛhadbalaḥ somadatto vidarbho mithileśvaraḥ /
niṣadhādhipatiścaiva magadhādhipatistathā //
2.39.3
āyayuḥ samare yoddhaṃ bhārgavedreṇa bhūpate /
varṣantaḥ śarajālāni nānāyuddhaviśāradāḥ //
2.39.4
vīrābhimāninaḥ sarve haihayasyājñayā tadā /
pinākahastaḥ sa bhṛgurjvaladagniśikhopamaḥ //
2.39.5
cikṣepa nāgapāśaṃ ca ābhimantrya śarottamam /
tadastraṃ bhārgave dreṇa kṣiptaṃ saṃgrāmamūrddhani //
2.39.6
cakartta gāruḍāstreṇa somadatto mahābalaḥ /
tataḥ kruddho mahābhāgo rāmaḥ śatruvidāraṇaḥ //
2.39.7
rudradattena śūlena somadattaṃ jaghāna ha /
bṛhadbalaṃ ca gadayā vidarbhaṃ muṣṭinā tathā //
2.39.8
maithilaṃ mudgareṇaiva śaktyā ca niṣadhādhipam /
māgadhañcaraṇāghātairastrajālena sainikān //
2.39.9
nihatya nikhilāṃ senāṃ saṃhārāgnisamīraṇe /
dudrāva kārttavīryaṃ ca jāmadagnyo mahābalaḥ //
2.39.10
dṛṣṭvā taṃ yoddhumāyāntaṃ rājāno 'nye mahārathāḥ /
kāryyākāryavidhānajñāḥ pṛṣṭe kṛtvā ca haihayam //
2.39.11
rāmeṇa yuyudhuścaiva darśayantaśca sauhṛdam /
kānyakubjāśca śataśaḥ saurāṣṭrāvantayastathā //
2.39.12
cakruśca śarajālāni rāmasya ca samantataḥ /
śarajālāvṛtasteṣāṃ rāmaḥ saṃgrāmamūrddhani //
2.39.13
na cādṛśyata rājendra tadā sa tvakṛtavraṇaḥ /
sasmāra rāmacaritaṃ yaduktaṃ hariṇena vai //
2.39.14
kuśalaṃ bhārgavendrasya yācamāno hariṃ muniḥ /
etasminneva kāle tu rāmaḥ śastrāstrakovidaḥ //
2.39.15
vidhūya śarajālāni vāyavyāstreṇa mantravit /
udatiṣṭhadraṇākāṅkṣī nīhārādiva bhāskaraḥ //
2.39.16
trirātraṃ samare rāmastaiḥ sārddhaṃ yuyudhe balī /
dvādaśākṣauhiṇīstatra ciccheda laghuvikramaḥ //
2.39.17
rambhāstambhavanaṃ yadvat paraśvadhavarāyudhaḥ /
sarvāṃstānbhūpavargāṃśca tadīyaśca mahācamūḥ //
2.39.18
dṛṣṭvā vinihatāṃ tena rāmeṇa sumahātmanā /
ājagāma mahāvīryaḥ sucandraḥ sūryavaṃśajaḥ //
2.39.19
lakṣarājanyasaṃyuktaḥ saptākṣauhiṇisaṃyutaḥ /
tatrānekamahāvīrā garjantastoyadā iva //
2.39.20
kaṃpayanto bhuvaṃ rājan yuyudhurbhārgaveṇa ca /
teḥ prayuktāni śastrāṇi mahāstrāṇi ca bhūpate //
2.39.21
kṣaṇena nāśayāmāsa bhārgavendraḥ pratāpavān /
gṛhītvā paraśuṃ divyaṃ kālātakayamopamam //
2.39.22
kālayansakalā senāṃ ciccheda bhugunandanaḥ /
karṣakastu yathā kṣetre pakvaṃ dhānyaṃ tathā tṛṇam //
2.39.23
niśeṣayati dātreṇa tathā rāmeṇa tatkṛtam /
lakṣarājanyasainyaṃ tadadṛṣṭvā rāmeṇa dāritam //
2.39.24
sucandraḥ pṛthivīpālo yuyudhe saṃgare nṛpa /
tāvubhau tatra saṃkṣubdhau nānāśastrāstrakovidau //
2.39.25
yuyudhāte mahāvīrau munīśanṛpatīśvarau /
rāmo 'smai yāni śastrāṇi cikṣepāstrāṇi cāpi hi //
2.39.26
tāni sarvāṇi ciccheda sucandro yuddha paṇḍitaḥ /
tataḥ kruddho raṇe rāmaḥ sucandraṃ pṛthivīśvaram //
2.39.27
kṛtapratikṛtābhijñaṃ jñātvopaspṛśya vāryatha /
nārāyaṇāstraṃ viśikhe saṃdadhe cānivāritam //
2.39.28
tadastraṃ śatasūryābhaṃ kṣiptaṃ rāmeṇa dhīmatā /
hṛṣṭottīrya rathātsadyaḥ sucandraḥ praṇanāma ha //
2.39.29
sarvāstrapūjyaṃ taccāpi nārāyaṇavinirmitam /
tamevaṃ praṇataṃ tyaktvā yathau nārāyamantikam //
2.39.30
vismito 'bhūttadā rāmaḥ samare śatrasūdanaḥ /
dṛṣṭvā vyarthaṃ mahāstraṃ tadbhūpaṃ svasthaṃ vilokya ca //
2.39.31
rāmaḥ śaktiṃ ca musalaṃ tomaraṃ paṭṭiśaṃ tathā /
gadāṃ ca paraśuṃ kopācchikṣepa nṛpamūrddhani //
2.39.32
jagrāha tāni sarvāṇi sucandro līlayaiva hi /
cikṣepa śivaśūlaṃ ca rāmo nṛpataye yadā //
2.39.33
babhūva puṣpamālāṃ ca tacchūlaṃ nṛpatergale /
dadarśa ca purastasya bhadrakālīṃ jagatprasūm //
2.39.34
vahantīṃ muṇḍamālāṃ ca vikaṭāsyāṃ bhayaṅkarīm /
siṃhasthāṃ ca trinetrāṃ ca triśūlavaradhāriṇīm //
2.39.35
dṛṣṭvā vihāya śastrāstraṃ namaskṛtya samaiḍata /
rāma uvāca
namostu te śaṅkaravallabhāyai jagatsavitryai samalaṅkṛtāyai //
2.39.36
nānāvibhūṣābhiribhārigāyai prapannarakṣāvihitodyamāyai /
dakṣaprasūtyai himavadbhavāyai maheśvarārddhaṅgasamāsthitāyai //
2.39.37
kālyai kalānāthakalādharāyai bhaktapriyāyai bhuvanādhipāyai /
tārābhidhāyai śivatatparāyai gaṇeśvarārādhitapādukāyai //
2.39.38
parātparāyai parameṣṭhidāyai tāpatrayonmūlanacintanāyai /
jagaddhitāyāstapuratrayāyai bālādikāyai tripurābhidhāyai //
2.39.39
samastavidyāsuvilāsadāyai jagajjananyai nihitāhitāyai /
bakānanāyai bahusākhyadāyai vidhvastanānāsuradānvāyai //
2.39.40
varābhayālaṅkṛtadorlatāyai samastagīrvāṇanamaskṛtāyai /
pītāṃbarāyai pavanāśugāyai śubhapradāyai śivasaṃstutāyai //
2.39.41
nāgārigāyai navakhaṇḍapāyai nīlācalābhāṃ galasatprabhāyai /
laghukramāyai lalitābhidhāyai lekhādhipāyai lavaṇākarāyai //
2.39.42
lolekṣaṇāyai layavarjitāyai lākṣārasālaṅkṛtapaṅkajāyai /
ramābhidhāyai ratisupriyāyai rogāpahāyai racitākhilāyai //
2.39.43
rājyapradāyai ramaṇotsukāyai ratnaprabhāyai rucirāṃbarāyai /
namo namaste parataḥ purastāt pārśvādharordhvaṃ ca namo namaste //
2.39.44
sadā ca sarvatra namo namaste namo namaste 'khilavigrahāyai /
prasīda deveśi mama pratijñāṃ purā kṛtāṃ pālaya bhadrakāli //
2.39.45
tvameva mātā ca pitā tvameva jagattrayasyāpi namo namaste /
vasiṣṭha uvāca
evaṃ stutā tadā devī bhadrakālī tarasvinī //
2.39.46
uvāca bhārgavaṃ prītā varadānakṛtotsavā /
bhadrakālyuvāca
vatsa rāma mahābhāga prītāsmi tava sāṃpratam //
2.39.47
varaṃ varaya matto yastvayā cābhyarthitā hṛdi /
rāma uvāca
mātaryadi varo deyastvayā me bhaktava tsale //
2.39.48
tatsucandraṃ jaye yuddhe tavānugrahabhājanam /
iti me 'bhihitaṃ devi kuru prītena cetasā //
2.39.49
yena kenāpyupāyena jaganmātarnamo 'stu te /
bhadrakālyuvāca
āgneyāstreṇa rājendraṃ sucandraṃ naya madgṛham //
2.39.50
mamātipriyamadyaiva pārṣado me bhavatvayam /
vasiṣṭha uvāca
ityuktamākarṇya sa bhārgavendro devyāḥ priyaṃ kartumathodyato 'bhūt //
2.39.51
prāṇānniyamyācamanaṃ ca kṛtvā sucandramuddiśya ca tatsamādadhe /
astraṃ prayuktaṃ nṛpatervadhāya rāmeṇa rājan prasabhaṃ tadā tat //
2.39.52
dagdhvā vapurbhūtamayaṃ tadīyaṃ nināya lokaṃ paradevatāyāḥ /
tatastu rāmeṇa kṛtapraṇāmā sā bhadrakālo jagadādikartrī //
2.39.53
antarhitābhūdatha jāmadagnyastasthau raṇebhūpavadhābhikāṅkṣī //
2.39.53.p1
iti śrībrahmāṇḍe mahāpurāṇe vāyuprokte madhyabhāge tṛtīya
upoddhātapāde bhārgavacarite ekonacatvāriṃśattamo 'dhyāyaḥ // 39//
Linked texts (2)
- Brahmavaivartapurāṇa (another edition) — Sanskrit
- Gaṇeśakhaṇḍa — Sanskrit