[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.3 # Brahmandapurana 2.3 Brahmāṇḍapurāṇa 2.3 - **Language:** Sanskrit ## Contents - [2.3.131](https://indike.org/pramana/in.purana.brahmanda.2.3.131) — 1 part ### [2.3.1](https://indike.org/pramana/in.purana.brahmanda.2.3.1) ṛṣaya ūcu / devānāṃ dānavānāṃ ca daityānāṃ caiva sarvaśaḥ / utpattiṃ vistareṇaiva grūhi vaivasvateṃ'tare // ### [2.3.2](https://indike.org/pramana/in.purana.brahmanda.2.3.2) sūta uvāca dharmmasyaiva pravakṣyāmi nisargantaṃ nibodhata / arundhatīvasurjāmālaṃbā bhānurmarutvatī // ### [2.3.3](https://indike.org/pramana/in.purana.brahmanda.2.3.3) saṃkalpā ca muhūrttā ca sādhyā viśvā tathaiva ca / dharmasya patnyo daśa tā dakṣaḥ prācetaso dadau // ### [2.3.4](https://indike.org/pramana/in.purana.brahmanda.2.3.4) sādhyāputrāstu dharmasya sādhyā dvādaśajajñire / devebhyastānparāndevāndaivajñāḥ paricakṣate // ### [2.3.5](https://indike.org/pramana/in.purana.brahmanda.2.3.5) brāhmaṇā vai mukhātsṛṣṭā jayā devāḥ prajepsayā / sarve mantraśarīraste samṛtā manvantareṣviha // ### [2.3.6](https://indike.org/pramana/in.purana.brahmanda.2.3.6) darśaśca paurṇamāsaśca bṛhadyacca rathantaram / vittiścaiva vivittiśca ākūtiḥ kūtireva ca // ### [2.3.7](https://indike.org/pramana/in.purana.brahmanda.2.3.7) vijñātā caiva vijñāto mano yajñastathaiva ca / nāmānyetāni teṣāṃ vai yajñānāṃ prathitāni ca // ### [2.3.8](https://indike.org/pramana/in.purana.brahmanda.2.3.8) brahmaśāpena tejātāḥ punaḥ svāyaṃbhuve jitāḥ / svārociṣe vai tuṣitāḥ satyaścaivottame punaḥ // ### [2.3.9](https://indike.org/pramana/in.purana.brahmanda.2.3.9) tāmase harayo nāma vaikuṇṭhā revatāntare / te sādhyāścākṣuṣe nāmnā chandajā jajñire surāḥ // ### [2.3.10](https://indike.org/pramana/in.purana.brahmanda.2.3.10) dharmaputrā mahābhāgāḥ sādhyā ye dvādaśāmarāḥ / pūrvaṃ samanusūyante cākṣuṣasyāntare manoḥ // ### [2.3.11](https://indike.org/pramana/in.purana.brahmanda.2.3.11) svārociṣeṃ'tare 'tītā devā ye vai mahaujasaḥ / tuṣitā nāma te 'nyonyamūcurvai cākṣuṣeṃ'tare // ### [2.3.12](https://indike.org/pramana/in.purana.brahmanda.2.3.12) kiñcicchiṣṭe tadā tasmindevā vai tuṣitābruvan / etāmeva mahābhāgāṃ vayaṃ sādhyāṃ praviśya vai // ### [2.3.13](https://indike.org/pramana/in.purana.brahmanda.2.3.13) manvantare bhaviṣyāmastannaḥ śreyo bhaviṣyati / evamuktvā tu te sarve cākṣuṣasyāntare manoḥ // ### [2.3.14](https://indike.org/pramana/in.purana.brahmanda.2.3.14) tasyāṃ dvādaśa saṃbhūtā dharmātsvāyaṃbhuvātpunaḥ / naranārāyaṇo tatra jajñāte punareva hi // ### [2.3.15](https://indike.org/pramana/in.purana.brahmanda.2.3.15) vipaścidindro yaścābhūttathā satyo hariśca tau / svārociṣeṃ'tare pūrvamāstāṃ tau tuṣitāsutau // ### [2.3.16](https://indike.org/pramana/in.purana.brahmanda.2.3.16) tuṣitānāṃ tu sādhyātve nāmānyetāni cakṣate / mano 'numantā prāṇaśca naro 'pānaśca vīryavān // ### [2.3.17](https://indike.org/pramana/in.purana.brahmanda.2.3.17) vitirnayo hayaścaiva haṃso nārāyaṇastathā / vibhuścāpi prabhuścāpi sādhyā dvādaśa jajñire // ### [2.3.18](https://indike.org/pramana/in.purana.brahmanda.2.3.18) svāyaṃbhuvaiṃ'tare pūrvaṃ tataḥ svāro ciṣe punaḥ / nāmānyāsanpunastāni tuṣitānāṃ nibodhata // ### [2.3.19](https://indike.org/pramana/in.purana.brahmanda.2.3.19) prāṇāpānāvudānaśca samāno vyāna eva ca / cakṣuḥ śrotraṃ raso ghrāṇaṃ sparśo buddhirmanastathā // ### [2.3.20](https://indike.org/pramana/in.purana.brahmanda.2.3.20) nāmānyetāni vai pūrvaṃ tuṣitānāṃ smṛtāni ca / vasostu vasavaḥ putrāḥ sādhyānāmanujāḥ smṛtāḥ // ### [2.3.21](https://indike.org/pramana/in.purana.brahmanda.2.3.21) dharo dhruvaśca somaśca āyuścaivānalo 'nilaḥ / pratyūṣaśca prabhāsaśca vasavo 'ṣṭau prakīrtitāḥ // ### [2.3.22](https://indike.org/pramana/in.purana.brahmanda.2.3.22) dharasya putro draviṇo hutahavyo rajas tathā / dhruvaputro 'bhavattāta kālo lokāprakālanaḥ // ### [2.3.23](https://indike.org/pramana/in.purana.brahmanda.2.3.23) somasya bhagavānvarcā budhaśca grahabaudhanaḥ / dharormī kalilaścaiva pañca candramasaḥ sutāḥ // ### [2.3.24](https://indike.org/pramana/in.purana.brahmanda.2.3.24) āyasya putro vaitaṇḍyaḥ śamaḥ śāntastathaiva ca / skandaḥ sanatkumāraśca jajñe pādena tejasaḥ // ### [2.3.25](https://indike.org/pramana/in.purana.brahmanda.2.3.25) agneḥ putraṃ kumāraṃ tu svāhā jajñe śriyā ṣṛtam / tasya śākho viśākhaśca naigameyaśca praṣṭajāḥ // ### [2.3.26](https://indike.org/pramana/in.purana.brahmanda.2.3.26) anilasya śivā bhāryā tasyāḥ putro manojavaḥ / avijñāna gatiścaiva dvau putrāvanilasya ca // ### [2.3.27](https://indike.org/pramana/in.purana.brahmanda.2.3.27) pratyūṣasya viduḥ putramṛṣiṃ nāmnātha devalam / dvau putrau devalasyāpi kṣamāvantau manīṣiṇau // ### [2.3.28](https://indike.org/pramana/in.purana.brahmanda.2.3.28) bṛhaspateśtu bhaginī bhuvanā brahmavādinī / yogasiddhā jagatkṛtsnamaśaktā carati sma ha // ### [2.3.29](https://indike.org/pramana/in.purana.brahmanda.2.3.29) prabhāsasya tu bhāryā sā vasūnāmaṣṭamasya ha / viśvakarmā sutastasyāḥ prajāpatipatirvibhuḥ // ### [2.3.30](https://indike.org/pramana/in.purana.brahmanda.2.3.30) viśvedevāstu viśvāyā jajñire daśa viśrutāḥ / kraturdakṣaḥ śravaḥ satyaḥ kālaḥ munistathā // ### [2.3.31](https://indike.org/pramana/in.purana.brahmanda.2.3.31) purūravo mārdravaso rocamānaśca te daśa / dharmaputrāḥ surā ete viśvāyāṃ jajñire śubhāḥ // ### [2.3.32](https://indike.org/pramana/in.purana.brahmanda.2.3.32) marutvatyāṃ marutvanto bhānavo bhānujāḥ smṛtāḥ / muhūrtāśca muhūrtāyā ghoṣalaṃbā hyajāyata // ### [2.3.33](https://indike.org/pramana/in.purana.brahmanda.2.3.33) saṃkalpāyāṃ tu saṃjajñe vidvānsaṃkalpa eva tu / nava vīthyastu jāmāyāḥ pathatrayamupāśritāḥ // ### [2.3.34](https://indike.org/pramana/in.purana.brahmanda.2.3.34) pṛthivī viṣayaṃ sarvamarundhatyāmajāyata / eṣa sargaḥ samākhyāto vidvāndharmasya śāśvataḥ // ### [2.3.35](https://indike.org/pramana/in.purana.brahmanda.2.3.35) muhūrtāścaiva tithyāśca pratibhiḥ saha suvratāḥ / nāmataḥ saṃpravakṣyāmi bruvato me nibodhata // ### [2.3.36](https://indike.org/pramana/in.purana.brahmanda.2.3.36) ahorātravibhāgaśca nakṣatrāṇi samāśritaḥ / muhurttāḥ sarvanakṣatrā ahorātrabhidastathā // ### [2.3.37](https://indike.org/pramana/in.purana.brahmanda.2.3.37) ahorātrakalānāṃ tu ṣaḍaśītyadhikāḥ smṛtāḥ / ravergati viśeṣeṇa sarvarttuṣu ca nityaśaḥ // ### [2.3.38](https://indike.org/pramana/in.purana.brahmanda.2.3.38) tato vedavidaścaitāṃ gatimicchanti parvasu / aviśeṣeṣu kāleṣu jñeyaḥ savitṛmānataḥ // ### [2.3.39](https://indike.org/pramana/in.purana.brahmanda.2.3.39) raudraḥ sārpastathā maitraḥ pitryo vāsava eva ca / āpyo 'tha vaiśvadevaśca brāhmo madhyāhnasaṃśritaḥ // ### [2.3.40](https://indike.org/pramana/in.purana.brahmanda.2.3.40) prājāpatyastathaivendra indrāgnī nirṛtistathā / vāruṇaśca yathāryamṇo bhagaścāpi dinaśritāḥ // ### [2.3.41](https://indike.org/pramana/in.purana.brahmanda.2.3.41) ete dinamuhūrtāśca divākaravinirmitāḥ / śaṅkucchāyā viśeṣeṇa veditavyāḥ pramāṇataḥ // ### [2.3.42](https://indike.org/pramana/in.purana.brahmanda.2.3.42) ajaikapādahirbudhnyaḥ pūṣāśviyamadevatāḥ / āgneyaścāpi vijñeyaḥ prājāpatyastathaiva ca // ### [2.3.43](https://indike.org/pramana/in.purana.brahmanda.2.3.43) saumyaścāpi tathādityo bārhaspatyaśca vaiṣmavaḥ / sāvitraśca tathā tvāṣṭro vāyavyaśceti saṃgrahaḥ // ### [2.3.44](https://indike.org/pramana/in.purana.brahmanda.2.3.44) ete rātrermuhūrttāḥ syuḥ kramoktā daśa pañca ca / indorgatyudayā jñeyā nāḍikā āditastathā // ### [2.3.45](https://indike.org/pramana/in.purana.brahmanda.2.3.45) kālāvasthāstvimāstvete muhūrttā devatāḥ smṛtāḥ / sarvagrahāṇāṃ trīṇyeva sthānāni vihitāni ca // ### [2.3.46](https://indike.org/pramana/in.purana.brahmanda.2.3.46) dakṣiṇottaramadhyāni tāni vidyādyathākramam / sthānaṃ jāradgavaṃ sadhye tathairāvatamuttaram // ### [2.3.47](https://indike.org/pramana/in.purana.brahmanda.2.3.47) vaiśvānaraṃ dakṣiṇato nirdiṣṭamiha tattvataḥ / aśvinī kṛttikā yāmyaṃ nāgavīthīti viśrutā // ### [2.3.48](https://indike.org/pramana/in.purana.brahmanda.2.3.48) brāhmaṃ saumyaṃ tathārdrā ca gajavīthīti śabditā / puṣyāśleṣe tathādityaṃ vīthī cairāvatī matā // ### [2.3.49](https://indike.org/pramana/in.purana.brahmanda.2.3.49) tisrastu vithayo hyetā uttaro mārga ucyate / pūrvottare ca phalgunyau maghā caivārṣabhī smṛtā // ### [2.3.50](https://indike.org/pramana/in.purana.brahmanda.2.3.50) hastaścitrā tathā svātī govīthīti tu śabditā / jyeṣṭhā viśākhānurādhā vīthī jāradgavī matā // ### [2.3.51](https://indike.org/pramana/in.purana.brahmanda.2.3.51) etāstu vīthayastisro madhyamo mārga ucyate / mūlaṃ pūrvottarāṣāḍhe ajavīthyābhiśabdite // ### [2.3.52](https://indike.org/pramana/in.purana.brahmanda.2.3.52) śravaṇaṃ ca dhaniṣṭhā ca mārgī śatabhiṣaktathā / vaiśvānarī bhādrapade revatī caiva kīrttitā // ### [2.3.53](https://indike.org/pramana/in.purana.brahmanda.2.3.53) etāstu vīthayastisro dakṣiṇe mārga ucyate / aṣṭāviśati yāḥ kanyā dakṣaḥ somāya tā dadau // ### [2.3.54](https://indike.org/pramana/in.purana.brahmanda.2.3.54) sarvā nakṣatranāmnyastā jyautiṣe parikīrttitāḥ / tāsāmapatyānyabhavandīptayo 'mitatejasaḥ // ### [2.3.55](https://indike.org/pramana/in.purana.brahmanda.2.3.55) yāstu śeṣāstadā kanyāḥ pratijagrāha kaśyapaḥ / caturdaśā mahābhāgāḥ sarvāstā lokamātaraḥ // ### [2.3.56](https://indike.org/pramana/in.purana.brahmanda.2.3.56) aditirditirdanuḥ kāṣṭhāriṣṭānāyuḥ khaśā tathā / surabhirvinatā tāmrā muniḥ krodhavaśā tathā // ### [2.3.57](https://indike.org/pramana/in.purana.brahmanda.2.3.57) kadrūrmātā ca nāgānāṃ prajāstāsāṃ nibodhata / svāyaṃbhuve 'ntare tāta ye dvādaśa surottamāḥ // ### [2.3.58](https://indike.org/pramana/in.purana.brahmanda.2.3.58) vaikuṇṭhā nāma te sādhyā babhūvuścākṣuṣeṃ'tare / upasthiteṃ'tare hyasminpunarvaivasvatasya ha // ### [2.3.59](https://indike.org/pramana/in.purana.brahmanda.2.3.59) ārādhitā ādityā te sametyocuḥ parasparam / etāmeva mahābhāgāmaditiṃ saṃpraviśya vai // ### [2.3.60](https://indike.org/pramana/in.purana.brahmanda.2.3.60) vaivasvateṃ'tare hyasminyogādarddhena tejasā / gacchema putratāmasyāstannaḥ śreyo bhaviṣyati // ### [2.3.61](https://indike.org/pramana/in.purana.brahmanda.2.3.61) evamuktvā tu te sarve varttamāneṃ'tare tadā / jajñire dvādaśādityā mārīyātkaśyapātpunaḥ // ### [2.3.62](https://indike.org/pramana/in.purana.brahmanda.2.3.62) śatakratuśca viṣṇuśca jajñāte punareva hi / vaivasvateṃ'tare hyasminnaranārāyaṇau tadā // ### [2.3.63](https://indike.org/pramana/in.purana.brahmanda.2.3.63) teṣāmapi hi devānāṃ nidhanotpattirucyate / yathā sūryasya loke 'sminnudayāstamayāvubhau // ### [2.3.64](https://indike.org/pramana/in.purana.brahmanda.2.3.64) dṛṣṭānuśravike yasmātsaktāḥ śabdādilakṣaṇe / aṣṭātmake 'ṇimādye ca tasmātte jajñire surāḥ // ### [2.3.65](https://indike.org/pramana/in.purana.brahmanda.2.3.65) ityeṣa viṣaye rāgaḥ saṃbhūtyāḥ kāraṇaṃ smṛtam / brahmaśāpena saṃbhūtā jayāḥ svāyaṃbhuve jitāḥ // ### [2.3.66](https://indike.org/pramana/in.purana.brahmanda.2.3.66) svārociṣe vai tuṣitāḥ satyaścaivottame punaḥ / tāmase harayo devā jātāścā riṣṭave tu vai // ### [2.3.67](https://indike.org/pramana/in.purana.brahmanda.2.3.67) vaikuṇṭhāścāśruṣe sādhyā ādityāḥ saptame punaḥ / dhātāryamā ca mitraśca varuṇoṃ'śo bhagastathā // ### [2.3.68](https://indike.org/pramana/in.purana.brahmanda.2.3.68) indro vivasvānpūṣā ca parjanyo daśamaḥ smṛtaḥ / tatastvaṣṭā tato viṣṇurajaghanyo jaghanyajaḥ // ### [2.3.69](https://indike.org/pramana/in.purana.brahmanda.2.3.69) ityete dvādaśādityāḥ kaśyapasya sutā vibhoḥ / surabhyāṃ kaśyapādrudrā ekādaśa vijajñire // ### [2.3.70](https://indike.org/pramana/in.purana.brahmanda.2.3.70) mahādevaprasādena tapasā bhāvitā satī / aṅgārakaṃ tathā sarpaṃ nirṛtiṃ sadasatpatim // ### [2.3.71](https://indike.org/pramana/in.purana.brahmanda.2.3.71) acaikapādahirbudhnyau dvāvekaṃ ca jvaraṃ tathā / bhuvanaṃ ceśvaraṃ mṛtyuṃ kapālīti ca viśutam // ### [2.3.72](https://indike.org/pramana/in.purana.brahmanda.2.3.72) devānekādaśaitāṃstu rudrāṃstribhuvaneśvarān / tapasogreṇa mahātā surabhistānajījanat // ### [2.3.73](https://indike.org/pramana/in.purana.brahmanda.2.3.73) tato duhitarāvanye surabhirdevyajāyata / rohiṇī caiva subhagāṃ gāndhavī ca yaśasvinīm // ### [2.3.74](https://indike.org/pramana/in.purana.brahmanda.2.3.74) rohiṇyā jajñire kanyāścatasro lokaviśrutāḥ / surūpā haṃsakālī ca bhadrā kāmadughā tathā // ### [2.3.75](https://indike.org/pramana/in.purana.brahmanda.2.3.75) suṣuve gāḥ kāmadughā surūpā tanayadvayam / haṃsakālī tu mahiṣānbhadrāyastvavijātayaḥ // ### [2.3.76](https://indike.org/pramana/in.purana.brahmanda.2.3.76) viśrutāstu mahābhāgā gāndharvyā vājinaḥ sutāḥ / uccaiḥśravādayo jātāḥ khecarāste manojavāḥ // ### [2.3.77](https://indike.org/pramana/in.purana.brahmanda.2.3.77) śvetāḥ śoṇāḥ piśaṅgāsca sāraṅgā hari tārjunāḥ / uktā devopavāhyāste gāndharviyonayo hayāḥ // ### [2.3.78](https://indike.org/pramana/in.purana.brahmanda.2.3.78) bhūyo jajñe surabhyāstu śrīmāṃścandraprabho vṛṣaḥ / sragvī kakudmāndyutimā namṛtālayasaṃbhavaḥ // ### [2.3.79](https://indike.org/pramana/in.purana.brahmanda.2.3.79) surabhyanumate datto dhvajo māheśvarastu saḥ / ityete kaśyapasutā rudrādityāḥ prakīrttitāḥ // ### [2.3.80](https://indike.org/pramana/in.purana.brahmanda.2.3.80) dharmapu putrāḥ smṛtāḥ sādhyā viśve ca vasavastathā / yathendhanavaśādvahnirekastu bahudhā bhavet // ### [2.3.81](https://indike.org/pramana/in.purana.brahmanda.2.3.81) bhavatyekastathā tadvanmūrttīnāṃ sa pitā mahaḥ / eko brahmāntakaścaiva puruṣaścaiti tatra yaḥ // ### [2.3.82](https://indike.org/pramana/in.purana.brahmanda.2.3.82) ekasyaitāḥ smṛtāstisrastanavastu svayaṃbhuvaḥ / brāhmī ca pauruṣī caiva kālākhyā ceti tāḥ smṛtāḥ // ### [2.3.83](https://indike.org/pramana/in.purana.brahmanda.2.3.83) yā tatra rājasī tasya tanuḥ sā vai prajākarī / matā sā yā tu kālākhyā prajākṣayakarī tu sā // ### [2.3.84](https://indike.org/pramana/in.purana.brahmanda.2.3.84) sāttvikī pauruṣī yā tu sā tanuḥ pālikā smṛtā / rājasī brahmaṇo yā tu mārīcaḥ kaśyapo 'bhavat // ### [2.3.85](https://indike.org/pramana/in.purana.brahmanda.2.3.85) tāmasī cāntakṛdyā tu tadaṃśo viṣṇurucyate // ### [2.3.86](https://indike.org/pramana/in.purana.brahmanda.2.3.86) trailokye tāḥ smṛtāstisrastanavo vai prajākarī / matā sā yā tu kālākhyā prajākṣayakarī tu sā // ### [2.3.87](https://indike.org/pramana/in.purana.brahmanda.2.3.87) sṛjatyathānugṛhṇāti tathā saṃharati prajāḥ / evametāḥ smṛtāstisrastanavo hi svayaṃbhuvaḥ // ### [2.3.88](https://indike.org/pramana/in.purana.brahmanda.2.3.88) prājāpatyā ca raudrā ca vaiṣṇavī ceti tāstridhā / etāstanvaḥ smṛtā devā dharmaśāstre purātane // ### [2.3.89](https://indike.org/pramana/in.purana.brahmanda.2.3.89) sāṃkhyayogaratairdhīraiḥ pṛthagekārthadarśibhiḥ / abhijātiprabhāvajñairmunibhistattvadarśibhiḥ // ### [2.3.90](https://indike.org/pramana/in.purana.brahmanda.2.3.90) ekatvena pṛthaktvena tāsu bhinnāḥ prajāstvimāḥ / idaṃ paramidaṃ neti bruvate bhinnadarśinaḥ // ### [2.3.91](https://indike.org/pramana/in.purana.brahmanda.2.3.91) brahmāṇāṃ kāraṇaṃ ke citkecidāhuḥ prajāpatim / kecidbhavaṃ paratvena prāhurviṣṇuṃ tathāpare // ### [2.3.92](https://indike.org/pramana/in.purana.brahmanda.2.3.92) abhijñānena saṃbhūtāḥ saktāriṣṭavicetasaḥ / sattvaṃ kālaṃ ca deśaṃ ca kāryaṃ cāvekṣya karma ca // ### [2.3.93](https://indike.org/pramana/in.purana.brahmanda.2.3.93) kāraṇaṃ tu smṛtā hyete nānārtheṣviha devatāḥ / ekaṃ praśaṃsamānastu sarvānevapraśasati // ### [2.3.94](https://indike.org/pramana/in.purana.brahmanda.2.3.94) ekaṃ nindati yastveṣāṃ sarvāneva sa nindati / na pradveṣastataḥ kāryo devatāsu vijānatā // ### [2.3.95](https://indike.org/pramana/in.purana.brahmanda.2.3.95) na śakyā īśvarājñātumaiśvaryeṇa vyavasthitāḥ / ekatvātsa tridhā bhūtvā saṃpramohayati prajāḥ // ### [2.3.96](https://indike.org/pramana/in.purana.brahmanda.2.3.96) eteṣāṃ vai trayāṇāṃ tu vicinvantyantaraṃ janāḥ / jijñāsavaḥ parīhante saktā duṣṭā vicetasaḥ // ### [2.3.97](https://indike.org/pramana/in.purana.brahmanda.2.3.97) idaṃ paramidaṃ neti saṃraṃbhādbhinnadarśinaḥ / yātudhānā viśeṣā ye piśācāścaiva nāntaram // ### [2.3.98](https://indike.org/pramana/in.purana.brahmanda.2.3.98) ekaḥ sa tu pṛthaktvena svayaṃ bhūtvā ca tiṣṭhati / guṇamātrātmikābhistu tanubhirmohayanprajāḥ // ### [2.3.99](https://indike.org/pramana/in.purana.brahmanda.2.3.99) teṣvekaṃ yajate yo vai sa tadā yajate trayam / tasmāddevāstrayo hyete nairantaryeṇadhiṣṭatāḥ // ### [2.3.100](https://indike.org/pramana/in.purana.brahmanda.2.3.100) tasmātpṛthaktvamekatvaṃ saṃkhyā saṃkhye gatāgatam / alpatvaṃ vā bahutvaṃ vā teṣu ko jñātumarhati // ### [2.3.101](https://indike.org/pramana/in.purana.brahmanda.2.3.101) tasmātsṛṣṭvānugṛhṇati grasate caiva sarvaśaḥ / guṇātmakatvavai kalpaye tasmādekaḥ sa ucyate // ### [2.3.102](https://indike.org/pramana/in.purana.brahmanda.2.3.102) rudraṃ brahmāṇamindraṃ ca lokapālānṛṣīnmanūn / devaṃ tamekaṃ bahudhā prāhurnārāyaṇaṃ dvijāḥ // ### [2.3.103](https://indike.org/pramana/in.purana.brahmanda.2.3.103) prājāpatyā ca raudrī ca tanuryā caiva vaiṣṇavī / manvantareṣu vai tisra āvarttante punaḥ punaḥ // ### [2.3.104](https://indike.org/pramana/in.purana.brahmanda.2.3.104) kṣetrajñā api cānye 'sya vibhorjāyantyanugrahāt / tejasā yaśasā buddhyā śrutena ca balena ca // ### [2.3.105](https://indike.org/pramana/in.purana.brahmanda.2.3.105) jāyante tatsamāścaiva tānapīmānnibodhata / rājasyā brahmaṇoṃ'śena mārīcaḥ kaśyapo 'bhavat // ### [2.3.106](https://indike.org/pramana/in.purana.brahmanda.2.3.106) tāmasyāstasya cāṃśena kālo rudraḥ sa ucyate / sāttvikyāśca tathāṃśena yajño viṣṇurajā yata // ### [2.3.107](https://indike.org/pramana/in.purana.brahmanda.2.3.107) triṣu kāleṣu tasyaitā brahmamastanavo dvijāḥ / manvantareṣviha sraṣṭumāvarttante punaḥ punaḥ // ### [2.3.108](https://indike.org/pramana/in.purana.brahmanda.2.3.108) manvantareṣu sarveṣu prajāḥ sthāvarajaṅgamāḥ / yugādau sakṛdutpannāstiṣṭhantīhāprasaṃyamāt // ### [2.3.109](https://indike.org/pramana/in.purana.brahmanda.2.3.109) prāpte prāpte tu kalpānte rudraḥ saṃharati prajāḥ / kālo bhūtvā yugātmāsau rudraḥ saṃharate punaḥ // ### [2.3.110](https://indike.org/pramana/in.purana.brahmanda.2.3.110) saṃprāpte caiva kalpānte saptaraśimardivākaraḥ / bhūtvā saṃvarttakādityastrīṃllokāṃśca dahatyuta // ### [2.3.111](https://indike.org/pramana/in.purana.brahmanda.2.3.111) viṣṇuḥ prajānugrahakṛtsadā pālayati prajāḥ / tasyāṃ tasyāmavasthāyāṃ tata utpādya kāraṇam // ### [2.3.112](https://indike.org/pramana/in.purana.brahmanda.2.3.112) sattvodriktā tu yā proktā brahmaṇaḥ pauruṣī tanuḥ / tasyāśena ca vijñeyo manoḥ svāyaṃbhuventare // ### [2.3.113](https://indike.org/pramana/in.purana.brahmanda.2.3.113) ākṛtyāṃ manasā deva utpannaḥ prathamaṃ vibhuḥ / tataḥ punaḥ sa vai devaḥ prāpte svārociṣe 'ntare // ### [2.3.114](https://indike.org/pramana/in.purana.brahmanda.2.3.114) tuṣitāyāṃ samutpanno hyajitastuṣitaiḥ saha / auttame hyantare vāpi hyajitastu punaḥ prabhuḥ // ### [2.3.115](https://indike.org/pramana/in.purana.brahmanda.2.3.115) satyāyāmabhavatsatyaḥ saha satyaiḥ surottamaiḥ / tāmasasyātare cāpi sa devaḥ punareva hi // ### [2.3.116](https://indike.org/pramana/in.purana.brahmanda.2.3.116) hariṇyāṃ haribhiḥ sārddhaṃ harireva babhūva ha / vaivasvatentare cāpi harirdeveḥ punastu saḥ // ### [2.3.117](https://indike.org/pramana/in.purana.brahmanda.2.3.117) vaikuṇṭho nāmato jajñe vidhūtarajasaiḥ saha / marīcātkaśyapādviṣṇuradityāṃ saṃbabhūva ha // ### [2.3.118](https://indike.org/pramana/in.purana.brahmanda.2.3.118) tribhiḥ kramairimāṃllokañjitvā viṣṇustrivikramaḥ / pratyapādayadindrāya daivataiścaiva sa prabhuḥ // ### [2.3.119](https://indike.org/pramana/in.purana.brahmanda.2.3.119) ityetāstanavo jātā vyatītāḥ saptasaptasu / manvantareṣvatīteṣu yābhiḥ saṃrakṣitāḥ prajāḥ // ### [2.3.120](https://indike.org/pramana/in.purana.brahmanda.2.3.120) yasmādviśvamidaṃ sarvaṃ jāyate līyate punaḥ / yasyāṃśenāmarāḥ sarve jāyante tridiveśvarāḥ // ### [2.3.121](https://indike.org/pramana/in.purana.brahmanda.2.3.121) varddhante tejasā buddhyā śrutena ca balena ca / yadyadvibhūtimatsattvaṃ śrīmadūrjitameva vā // ### [2.3.122](https://indike.org/pramana/in.purana.brahmanda.2.3.122) tattadevāvagacchadhvaṃ viṣṇostejoṃ'śasaṃbhavam / sa eva jāyateṃ'śena kecidicchanti mānavāḥ // ### [2.3.123](https://indike.org/pramana/in.purana.brahmanda.2.3.123) eke vivadamānāstu dṛṣṭāntācca bruvanti hi / eṣāṃ na vidyate bhedastrayāṇāṃ dyusadāmiha // ### [2.3.124](https://indike.org/pramana/in.purana.brahmanda.2.3.124) jāyante pohayantyaṃ śairīśvarā yogamāyayā // ### [2.3.125](https://indike.org/pramana/in.purana.brahmanda.2.3.125) tasmātteṣāṃ pracāre tu yuktāyuktaṃ na vidyate / bhūtānuvādinā mādyā madhyasthā bhūtavādinām // ### [2.3.126](https://indike.org/pramana/in.purana.brahmanda.2.3.126) bhūtānuvādinaḥ saktastrayaścaiva pravādinām / parīkṣya cānugṛhṇanti nigṛhṇanti khalānsvayam // ### [2.3.127](https://indike.org/pramana/in.purana.brahmanda.2.3.127) mattaḥ pūrvve ca te tasmātprabhavaśca tato 'dhikāḥ / tathādhikaraṇairatairyathā tattvanidarśakāḥ // ### [2.3.128](https://indike.org/pramana/in.purana.brahmanda.2.3.128) devānāṃ devabhūtāśca te vai sarvapravarttakāḥ / karmmaṇāṃ mahatāṃ te hi karttāro jagadīśvarāḥ // ### [2.3.129](https://indike.org/pramana/in.purana.brahmanda.2.3.129) śrutijñaiḥ kāraṇairetaiścaturbhiḥ parikīrttitāḥ / bāliśāste na jānanti daivatāni prabhāgaśaḥ // ### [2.3.130](https://indike.org/pramana/in.purana.brahmanda.2.3.130) imaṃ codāharantyatra ślokaṃ yogeśvarānprati / kuryādyogabalaṃ prāpya taiśca sarvairmahāṃścaret // ### [2.3.131](https://indike.org/pramana/in.purana.brahmanda.2.3.131) prāpnuyādviṣayāṃścaiva punaścorddhva tapaścaret / saṃhareta punaḥ sarvvānsūryyo jyotirgaṇāniva // ### [2.3.131.p1](https://indike.org/pramana/in.purana.brahmanda.2.3.131.p1) iti śrībrahmāṇḍe mahāpurāṇe vāyuprokte madhyabhāge tṛtīya upoddhātapāde svayaṃbhūtraiguṇyasvarūpavarṇanaṃ nāma tṛtīyo 'dhyāyaḥ ## Linked texts (11) - [Vāyupurāṇa](https://indike.org/pramana/in.purana.vayu.2.5.2) — Vyāsa, Sanskrit - [Devībhāgavatapurāṇa](https://indike.org/pramana/in.purana.upa.sakta.devibhagavata.8.1.46) — Sanskrit - [Brahmapurāṇa](https://indike.org/pramana/in.purana.brahma.3.39) — Vyāsa, Sanskrit - [Viṣṇupurāṇa (vulgate)](https://indike.org/pramana/in.purana.visnu*vulgate.1.15.114) — Sanskrit - [Kūrmapurāṇa](https://indike.org/pramana/in.purana.kurma.1.49.33) — Vyāsa, Sanskrit - [Śivapurāṇa (complete text)](https://indike.org/pramana/in.purana.siva*complete-2.5.32.3) — Sanskrit - [Agnipurāṇa (Nag Publishers edition, Delhi)](https://indike.org/pramana/in.purana.agni*nag.18.42) — Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.2.140) — Ṭoḍaramalla 1564, Sanskrit - [Dānakhaṇḍa](https://indike.org/pramana/in.niti.dharma.nibandha.hemadri.danakhanda.176.p5) — Hemādri, Sanskrit - [Caturvargacintāmaṇi](https://indike.org/pramana/in.niti.dharma.nibandha.mahanibandha.caturvargacintamani.170.p5) — Hemādri, Sanskrit - [Ṣoḍaśamahādānavidhi (Hemādri)](https://indike.org/pramana/in.niti.dharma.dana.mahadana.sodasamahadanavidhi-hemadri.170.p5) — Hemādri, Sanskrit --- Source: [https://indike.org/pramana/in.purana.brahmanda.2.3](https://indike.org/pramana/in.purana.brahmanda.2.3) · Pramāṇa