Brahmanda Purana 2.43

Brahmāṇḍapurāṇa 2.43

Language: Sanskrit

2.43.32 — 1 part

2.43.1

vasiṣṭha uvāca
evaṃ susnigdhacitteṣu teṣu tiṣṭhatsu bhūpate /
bhavānyutsaṃgato rāmaḥ samutthāya kṛtājaliḥ //

2.43.2

tuṣṭāva prayato bhūtvā nirviśeṣa viśeṣavat /
advayaṃ dvaitamāpannaṃ nirguṇaṃ saguṇātmakam //

2.43.3

rāma uvāca
prakṛtivikṛtijātaṃ viśvametadvidhātuṃ mama kiyadanubhātaṃ vaibhavaṃ tatpramātum /
aviditatanunāmābhīṣṭavastvekadhāmābhavadatha bhava bhāmā pātu māṃ pūrṇakāmā //

2.43.4

prakaṭitaguṇābhānaṃ kālasaṃkhyāvidhānaṃ sakalabhavanidānaṃ kīrtyate yatpradhānam /
tadiha nikhilatātaḥ saṃbabhūvokṣapātaḥ kṛtakṛtakanipātaḥ pātu māmadya mātaḥ //

2.43.5

danujakulavināśīlekhapātāvināśī prathamakulavikāśī sarvavidyāprakāśī /
prasabharacitakāśī bhaktadattākhilāśīravatu vijitapāśī māṃsadā ṣaṇmukhāśī //

2.43.6

haranikaṭa nivāsī kṛṣṇasevāvilāsī praṇatajanavibhāsī gopakanyāprahāsī /
harakṛtabahumāno gopikeśaikatāno viditabahuvidhāno jāyatāṃ kīrtihā nau //

2.43.7

prabhuniyatamānā yo nunnabhaktāntarāyo tdṛtaduritanikāyo jñānadātāparāyoḥ /
sakalaguṇagariṣṭho rādhikāṅkeniviṣṭo mama kṛtamaparādhaṃ kṣantumarhatvagādham //

yā rādhā jagadudbhavasthitilayeṣvārādhyate vā janaiḥ śabdaṃ bodhayatīśavaktraṃvigalatpremāmṛtāsvādanam /
rāseśī rasikeśvarī ramaṇatdṛnniṣṭhānijānandinī netrī sā paripātu māmavanataṃ rādheti ya kīrtyate //

2.43.9

yasyā garbhasamudbhavo hyativirāḍyasyāṃśabhūto virāṭ yannābhyaṃburuhodbhavena vidhinaikāntopadiṣṭena vai sṛṣṭaṃ sarvamidaṃ carācaramayaṃ viśvaṃ ca yadromasu brahmāṇḍāni vibhānti tasya jananī śaśvatprasannāstu sā //

2.43.10

pāyādyaḥ sa carācarasya jagato vyāpī vibhuḥ saccidānandābdhiḥ prakaṭasthito vilasati premāndhayā rādhayā /
kṛṣṇaḥ pūrṇatamo mamopari dayāklinnāntaraḥ stātsadā yenāhaṃ sukṛtī bhavāmi ca bhavāmyānandalīnāntaraḥ //

2.43.11

vasiṣṭha uvāca
stutvaivaṃ jāmadagnyastu virarāma ha tatparam /
vijñātākhilatattvārtho hṛṣṭaromā kṛtārthavat //

2.43.12

athovāca prasannātmā kṛṣṇaḥ kamalalocanaḥ /
bhārgavaṃ praṇataṃ bhaktyā kṛpāpātraṃ purasthitam //

2.43.13

kṛṣma uvāca
siddho 'si bhārgavendra tvaṃ prasādānmama saṃpratam /
adya prabhṛti vatsāsmiṃlloke śreṣṭhatamo bhava //

2.43.14

tubhyaṃ varo mayā dattaḥ purā viṣṇupadāśrame /
tatsarvaṃ kramato bhāvyaṃ samā bahvīstvayā vibho //

2.43.15

dayā vidheyā dīneṣu śreya uttamamicchatā /
yogaśca sādanīyo vai śatrūṇāṃ nigrahastathā //

2.43.16

tvatsamo nāsti loke 'smiṃstejasā ca balena ca /
jñānena yaśasā vāpi sarvaśreṣṭhatamo bhavān //

2.43.17

atha svagṛhamāsādya pitroḥ śuśrūṣaṇaṃ kuru /
tapaścara yathākālaṃ tena siddhiḥ karasthitā //

2.43.18

rādhotsaṃgātsamutthāpya gaṇeśaṃ rādhikeśvaraḥ /
āliṅgya gāḍhaṃ rāseṇa maitrīṃ tasya cakāra ha //

2.43.19

athobhāvapi saṃprītau tadā rāmagaṇeśvarau /
kṛṣṇājñayā mahābhāgau babhūvaturarindama //

2.43.20

etasminnantare devī rādhā kṛṣṇapriyā satī /
ubhābhyāṃ ca varaṃ prādātprasannāsyā mudānvitā //

2.43.21

rādhovāca /
sarvasya jagato vandyau durādharṣauṃ priyāvahau /
madbhaktau ca viśeṣeṇa bhavantau bhavatāṃ sutau //

2.43.22

bhavatornāma cauccārya yatkāryaṃ yaḥ samārabhet /
siddhiṃ prayātu tatasarvaṃ matprasādāddhi tasya tu //

2.43.23

athovāca jaganmātā bhavānī bhavavallabhā /
vatsa rāma prasannāhaṃ tubhyaṃ kaṃ pradade varam /
taṃ prabrūhi mahābhāga bhayaṃ tyaktvā sudūrataḥ /
rāma uvāca
janmānta rasahasreṣu yeṣuyeṣu vrajāmyaham //

2.43.24

kṛṣṇayorbhavayorbhakto bhaviṣyāmīti dehi me /
abhedena ca paśyāmi kṛṣṇau cāpi bhavau tathā //

2.43.25

pārvatyuvāca
evamastu mahābhāga bhakto 'si bhavakṛṣṇayoḥ /
cirañjīvī bhavāśu tvaṃ prasādānmama suvrata //

2.43.26

athovāca dharādhīśaḥ prasannastamumāpatiḥ /
praṇataṃ bhārgavendraṃ tu varārhaṃ jagadīśvaraḥ //

2.43.27

śiva uvāca
rāmabhakto 'si me vatsa yaste datto varo mayā /
sa bhaviṣyati kārtsyena satyamuktaṃ na cānyathā //

2.43.28

adyaprabhṛti loke 'smin bhavato balavattaraḥ /
na ko 'pi bhavatādvatsa tejasvī ca bhavatparaḥ //

2.43.29

vasiṣṭha uvāca
atha kṛṣṇo 'pyanujñāpya śivaṃ ca naganandinīm /
golokaṃ prayayau yuktaḥ śrīdāmnā cāpi rādhayā //

2.43.30

atha rāmo 'pi dharmātmā bhavānīṃ ca bhavaṃ tathā /
saṃpūjya cābhivādyātha pradakṣiṇamupā kramīt //

2.43.31

gaṇeśaṃ kārttikeyaṃ ca natvāpṛcchya ca bhūpate /
akṛtavraṇasaṃyukto niścakrāma gṛhāntarāt //

2.43.32

niṣkramyamāṇo rāmastu nandīśvaramukhairgaṇaiḥ /
namaskṛto yayau rājansvagṛhaṃ parayā mudā //

2.43.32.p1

iti śrī brahmāṇḍe mahāpurāṇe vāyuprokte madhyamābhāge tṛtīya
upoddhātapāde bhārgavacarite tricatvāriṃśattamo 'dhyāyaḥ // 43//