[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.47 # Brahmandapurana 2.47 Brahmāṇḍapurāṇa 2.47 - **Language:** Sanskrit ## Contents - [2.47.100](https://indike.org/pramana/in.purana.brahmanda.2.47.100) — 1 part ### [2.47.1](https://indike.org/pramana/in.purana.brahmanda.2.47.1) vasiṣṭha uvāca tato mūrddhābhiṣiktānāṃ rājñāmamitatejasām / ṣaṭsahasradvayaṃ rāmo jīvagrāhaṃ gṛhītavān // ### [2.47.2](https://indike.org/pramana/in.purana.brahmanda.2.47.2) tato rājasahasrāṇi gṛhītvā munibhiḥ saha / sa jagāma mahātejāḥ kurukṣetraṃ tapomayam // ### [2.47.3](https://indike.org/pramana/in.purana.brahmanda.2.47.3) sarasāṃ pañcakaṃ tatra khānayitvā bhṛgudvahaḥ / sukhāvagāhatīrthāni tāni cakre samantataḥ // ### [2.47.4](https://indike.org/pramana/in.purana.brahmanda.2.47.4) jaghāna tatra vai rājñaḥ śarīraprabhavāmṛjā / sarāṃsi tāni vai pañca pūrayāmāsa bhārgavaḥ // ### [2.47.5](https://indike.org/pramana/in.purana.brahmanda.2.47.5) snātvā teṣu yathānyāyaṃ jāmadagnayaḥ pratāpavān / pitṝnsaṃtarpayāmāsa yathāśāstramatandritaḥ // ### [2.47.6](https://indike.org/pramana/in.purana.brahmanda.2.47.6) pituḥ pretasya rājendra śrāddhādikamaśeṣataḥ / brāhmaṇaiḥ saha mātuśca tatra cakre yathoditam // ### [2.47.7](https://indike.org/pramana/in.purana.brahmanda.2.47.7) evaṃ tīrṇapratīkaḥ sa kurukṣetre tapomaye / uvāsātandritaḥ samyak pitṛpūjāparāyaṇaḥ // ### [2.47.8](https://indike.org/pramana/in.purana.brahmanda.2.47.8) tataḥ prabhṛtyabhūdrājaṃstīrthānāmuttamottamam / vihitaṃ jāmadagnyena kurukṣetre tapovane // ### [2.47.9](https://indike.org/pramana/in.purana.brahmanda.2.47.9) sasyamaṃ tapañcakamiti sthānaṃ trailokyaviśrutam / yatra yakre bhṛguśreṣṭhaḥ pitṝṇāṃ tṛptimakṣayām // ### [2.47.10](https://indike.org/pramana/in.purana.brahmanda.2.47.10) snānadānatapohomadvijabhojanatarpaṇaiḥ / bhṛśamāpyāyitāstena yatra te pitaro 'khilāḥ // ### [2.47.11](https://indike.org/pramana/in.purana.brahmanda.2.47.11) avāpurakṣayāṃ tṛptiṃ pitṛlokaṃ ca śāśvatam / samantapañcakaṃ nāma tīrthaṃ loke pariśrutam // ### [2.47.12](https://indike.org/pramana/in.purana.brahmanda.2.47.12) sarvapāpakṣayakaraṃ mahāpuṇyopabṛṃhitam / martyānāṃ yatra yātānāmenāṃsi nikhilāni tu // ### [2.47.13](https://indike.org/pramana/in.purana.brahmanda.2.47.13) dūrādevāpayāsyanti pravāte śuṣkaparṇavat / tatkṣetracaryāgamanaṃ martyānāmasatāmiha // ### [2.47.14](https://indike.org/pramana/in.purana.brahmanda.2.47.14) na labhyate mahārāja jātu janmaśatairapi / samantapañcakaṃ tīrthaṃ kurukṣetre 'tipāvanam // ### [2.47.15](https://indike.org/pramana/in.purana.brahmanda.2.47.15) yatra snātaḥ sarvatīrthaiḥ snāto bhavati mānavaḥ / kṛtakṛtyastato rāmaḥ samyak pūrṇamanorathaḥ // ### [2.47.16](https://indike.org/pramana/in.purana.brahmanda.2.47.16) uvāsa tatra niyataḥ kañcitkālaṃ mahāmatiḥ / tataḥ saṃvatsarasyānte brāhmaṇaiḥ sahito vaśī // ### [2.47.17](https://indike.org/pramana/in.purana.brahmanda.2.47.17) pitṛpiṇḍapradānāya jāmadagnyo 'gamadgayām / tato gatvā tataḥ śrāddhe yathāśāstramarindamaḥ // ### [2.47.18](https://indike.org/pramana/in.purana.brahmanda.2.47.18) brāhmaṇāṃstarpayāmāsa pitṝnuddiśya satkṛtān / śaivaṃ tatra paraṃ sthānaṃ candrapādamiti smṛtam // ### [2.47.19](https://indike.org/pramana/in.purana.brahmanda.2.47.19) pitṛtṛptikaraṃ kṣetraṃ tādṛgloke na vidyate / yatrārcitāḥ svakulajairyathāśakti manāgapi // ### [2.47.20](https://indike.org/pramana/in.purana.brahmanda.2.47.20) pitaraḥ piṇḍadānādyaiḥ prāpsyanti gatimakṣayām / pitṝnuddiśya tatrāsau tarppiteṣu dvijātiṣu // ### [2.47.21](https://indike.org/pramana/in.purana.brahmanda.2.47.21) dadau ca vidhivatpiṇḍaṃ pitṛbhaktisamanvitaḥ / tatastatpitaraḥ sarve pitṛlokādupāgatāḥ // ### [2.47.22](https://indike.org/pramana/in.purana.brahmanda.2.47.22) jagṛhustatkṛtāṃ pūjāṃ jamadagnipurogamāḥ / atha saṃprītamanasaḥ sametya bhṛgunandanam // ### [2.47.23](https://indike.org/pramana/in.purana.brahmanda.2.47.23) ūcustatpitaraḥ sarve 'dṛśyā bhūtvāntarikṣagāḥ / pitara ūcuḥ mahatkarma kṛtaṃ vīra bhavatānyaiḥ suduṣkaram // ### [2.47.24](https://indike.org/pramana/in.purana.brahmanda.2.47.24) asmānapi yathānyāyaṃ samyak tarpitavānasi / asmākamakṣayāṃ prītiṃ tathāpi tvaṃ na yacchasi // ### [2.47.25](https://indike.org/pramana/in.purana.brahmanda.2.47.25) kṣatrahatyāṃ hi kṛtvā tu kṛtakarmābhavadyataḥ / kṣetrasyāsya prabhāveṇa bhaktyā ca tava darśanam // ### [2.47.26](https://indike.org/pramana/in.purana.brahmanda.2.47.26) prāptāḥsma pūjitāḥ kiṃ tu nākṣayyaphalabhāginaḥ / tsamāttvaṃ vīrahatyādipāpapraśamanāya hi // ### [2.47.27](https://indike.org/pramana/in.purana.brahmanda.2.47.27) prāyaścittaṃ yathānyāyaṃ kuru dharmaṃ ca śāśvatam / vadhācca vinivartasva kṣatriyāṇāmataḥ param // ### [2.47.28](https://indike.org/pramana/in.purana.brahmanda.2.47.28) piturnna te 'parādhyante na svatantraṃ yato jagat / tannimittaṃ tu maraṇaṃ pituste vihitaṃ purā // ### [2.47.29](https://indike.org/pramana/in.purana.brahmanda.2.47.29) hantuṃ kaṃ kaḥ samarthaḥ syālloke rakṣitumeva vā / nimittamātrameveha sarvaḥ sarvasya caitayoḥ // ### [2.47.30](https://indike.org/pramana/in.purana.brahmanda.2.47.30) dhruvaṃ karmānurūpaṃ te ceṣṭante sarva eva hi / kālānuvṛttaṃ balavānnṛloko nātra saṃśayaḥ // ### [2.47.31](https://indike.org/pramana/in.purana.brahmanda.2.47.31) bādhituṃ bhuvi bhūtāni bhūtānāṃ na vidhiṃ vinā / śakyate vatsa sarvo 'pi yataḥ śaktyā svakarmakṛt // ### [2.47.32](https://indike.org/pramana/in.purana.brahmanda.2.47.32) kṣatraṃ prati tato roṣaṃ vimucyāsmatpriyepsayā / śamamā pnuhi bhadraṃ te sa hyasmākaṃ paraṃ balam // ### [2.47.33](https://indike.org/pramana/in.purana.brahmanda.2.47.33) vasiṣṭha uvāca ityuktvāntardadhuḥ sarve pitaro bhṛgunandanam / sa cāpi tadvacaḥ sarvaṃ pratijagrāha sādaram // ### [2.47.34](https://indike.org/pramana/in.purana.brahmanda.2.47.34) akṛtavraṇasaṃyukto mudā paramayā yutaḥ / prayayau ca tadā rāmastasmātsiddhavanāśramam // ### [2.47.35](https://indike.org/pramana/in.purana.brahmanda.2.47.35) tasminsthitvā bhṛguśreṣṭho brāhmaṇaiḥ sahito nṛpa / tapase dhṛtasaṃkalpo babhūva sa mahāmanāḥ // ### [2.47.36](https://indike.org/pramana/in.purana.brahmanda.2.47.36) sarathaṃ sahasāhaṃ ca dhanuḥsaṃhananāni ca / punarāgamasaṃketaṃ kṛtvā prāsthāpayattadā // ### [2.47.37](https://indike.org/pramana/in.purana.brahmanda.2.47.37) tataḥ sa sarvatīrtheṣu cakre snānamatandritaḥ / parītyapṛthivīṃ sarvāṃ pitṛdevādibūjakaḥ // ### [2.47.38](https://indike.org/pramana/in.purana.brahmanda.2.47.38) evaṃ krameṇa pṛthivīṃ trivāraṃ bhugunandanaḥ / paricakrāma rājendra lokavṛttamanuvrataḥ // ### [2.47.39](https://indike.org/pramana/in.purana.brahmanda.2.47.39) tataḥ sa parvataśreṣṭhaṃ mahendraṃ punarapyatha / jagāma tapase rājanbāhmaṇairabhisaṃvṛtaḥ // ### [2.47.40](https://indike.org/pramana/in.purana.brahmanda.2.47.40) sa tasmiṃścirarātrāya muni siddhaniṣevite / nivāsamātmano rājankalpayāmāsa dharmavit // ### [2.47.41](https://indike.org/pramana/in.purana.brahmanda.2.47.41) munayastaṃ tapasyantaṃ sarvakṣetranivāsinaḥ / draṣṭukāmāḥ samājagmurniyatā brahmavādinaḥ // ### [2.47.42](https://indike.org/pramana/in.purana.brahmanda.2.47.42) dadṛśuste munigaṇāstapasyāsaktamānasam / kṣātraṃ kakṣamaśeṣeṇa dagdhvā śāntamivānalam // ### [2.47.43](https://indike.org/pramana/in.purana.brahmanda.2.47.43) atha tānāgatāndṛṣṭvā munīndivyāṃstapomayān / arghyādisamudācāraiḥ pūjayāmāsa bhārgavaḥ // ### [2.47.44](https://indike.org/pramana/in.purana.brahmanda.2.47.44) kṛtakauśalasaṃpraśnapūrvakāḥ sumahodayāḥ / teṣāṃ tasya ca saṃvṛttāḥ kathāḥ puṇyā manoharāḥ // ### [2.47.45](https://indike.org/pramana/in.purana.brahmanda.2.47.45) tatasteṣāmanumate munīnāṃ bhāvitātmanām / hayamedhaṃ mahāyajñamāhartumupacakrame // ### [2.47.46](https://indike.org/pramana/in.purana.brahmanda.2.47.46) saṃbhṛtya sarvasaṃbhārānaurvādyaiḥ sahito nṛpa / viśvāmitrabharadvājamārkaṇḍeyādibhistathā // ### [2.47.47](https://indike.org/pramana/in.purana.brahmanda.2.47.47) teṣā manumate kṛtvā kāśyapaṃ gurumātmanaḥ / vājimedhaṃ tato rājannājahāra mahākratum // ### [2.47.48](https://indike.org/pramana/in.purana.brahmanda.2.47.48) tasyābhūtkāśyapo 'dhvaryurudgātā gautamo muniḥ / viśvāmitro 'bhavaddhotā rāmasya viditātmanaḥ // ### [2.47.49](https://indike.org/pramana/in.purana.brahmanda.2.47.49) brahmatvamakarottasya mārkaṇḍeyo mahāmuniḥ / bharadvājāgniveśyādyā veda vedāṅgapāragāḥ // ### [2.47.50](https://indike.org/pramana/in.purana.brahmanda.2.47.50) munayaścakruranyāni karmāṇyanye yathākramam / puttraiḥ śiṣyaiḥ praśiṣyaiśca sahito bhagavānbhṛguḥ // ### [2.47.51](https://indike.org/pramana/in.purana.brahmanda.2.47.51) sādasyamakarodrājannanyaiśca munibhiḥ saha / sa taiḥ sahākhilaṃ karma samāpya bhṛgupuṅgavaḥ // ### [2.47.52](https://indike.org/pramana/in.purana.brahmanda.2.47.52) brahmāṇaṃ pūjayāmāsa yathāvadguruṇā saha / alaṅkṛtya yathānyāya kanyāṃ rūpavatīṃ mahīm // ### [2.47.53](https://indike.org/pramana/in.purana.brahmanda.2.47.53) puragrāmaśatopetāṃ samudrāṃbaramālinīm / āhūya bhṛguśārdūlaḥ saśailavanakānanām // ### [2.47.54](https://indike.org/pramana/in.purana.brahmanda.2.47.54) kāśyapāya dadau sarvāmṛte taṃ śailamuttamam / ātmanaḥ sannivāsārthaṃ taṃ rāmaḥ paryakalpayat // ### [2.47.55](https://indike.org/pramana/in.purana.brahmanda.2.47.55) tataḥ prabhṛtirājendra pūjayāmāsa śāstrataḥ / hiraṇyaratnavastraśvagogajānnādibhistathā // ### [2.47.56](https://indike.org/pramana/in.purana.brahmanda.2.47.56) purā samāpya yajñānte tathā cāvabhṛthāplutaḥ / cakre dravyaparityāgaṃ teṣāmanumate tadā // ### [2.47.57](https://indike.org/pramana/in.purana.brahmanda.2.47.57) dattvā ca sarvabhūtānāmabhayaṃ bhṛgunandanaḥ / tatrāpi parvatavare tapaścartuṃ samārabhat // ### [2.47.58](https://indike.org/pramana/in.purana.brahmanda.2.47.58) tatastaṃ samanujñāya sadasyā ṛtvijastathā / yayuryathāgataṃ sarve munayaḥ śaṃsitavratāḥ // ### [2.47.59](https://indike.org/pramana/in.purana.brahmanda.2.47.59) gateṣu teṣu bhagavānakṛtavraṇasaṃyutaḥ / tapo mahatsamāsthāya tatraiva nyavasatsukhī // ### [2.47.60](https://indike.org/pramana/in.purana.brahmanda.2.47.60) kāśyapī tu tato bhūmirjananāthā hyanekaśaḥ / sarvaduḥkhapraśāntyarthaṃ mārīcānumatena tu // ### [2.47.61](https://indike.org/pramana/in.purana.brahmanda.2.47.61) tatra dīpapratiṣṭhākhyavrataṃ viṣṇumukhoditam / cacāra dharaṇī samyak dukhairḥmuktābhavacca sā // ### [2.47.62](https://indike.org/pramana/in.purana.brahmanda.2.47.62) ityeṣa jāmadagnyasya prādurbhāva udāhṛtaḥ / yasmiñśrute naraḥ sarvapātakairvipramucyate // ### [2.47.63](https://indike.org/pramana/in.purana.brahmanda.2.47.63) prabhāvaḥ kārttavīryasya loke prathitatejasaḥ / prasaṃgātkathitaḥ samyaṅnātisaṃkṣepavistaraḥ // ### [2.47.64](https://indike.org/pramana/in.purana.brahmanda.2.47.64) evaṃprabhāvaḥ sa nṛpaḥ kārttavīryo 'bhavadbhuvi / na tādṛśaḥ pumātkaścidbhāvī bhūtāthavā śrutaḥ // ### [2.47.65](https://indike.org/pramana/in.purana.brahmanda.2.47.65) dattātreyādvaraṃ vavre mṛtimuttamapūruṣāt / yatpurā so 'gamanmuktiṃ raṇe rāmeṇa ghātitaḥ // ### [2.47.66](https://indike.org/pramana/in.purana.brahmanda.2.47.66) tasyāsītpañcamaḥ putraḥ pakhyāto yo jayadhvajaḥ / putrastasya mahābāhustālajaṅgho 'bhavannṛpa // ### [2.47.67](https://indike.org/pramana/in.purana.brahmanda.2.47.67) abhūttasyāpi putrāṇāṃ śatamuttamadhanvinām / tālajaṅghābhidhā yeṣāṃ vītihotro 'grajo 'bhavat // ### [2.47.68](https://indike.org/pramana/in.purana.brahmanda.2.47.68) putraiḥ savītihotrādyairhaihayādyaiśca rājabhiḥ / kālaṃ mahāntamavasaddhimādrivānagahvare // ### [2.47.69](https://indike.org/pramana/in.purana.brahmanda.2.47.69) yaḥ pūrvaṃ rāma bāṇena dravanpṛṣṭhe 'bhitāḍitaḥ / tālajaṅgho 'patadbhūmau mūrchito gāḍhavedanaḥ // ### [2.47.70](https://indike.org/pramana/in.purana.brahmanda.2.47.70) dadarśa vītihotrastaṃ dravandaivavaśādiva / rathamāropya vegena palāyanaparo 'bhavat // ### [2.47.71](https://indike.org/pramana/in.purana.brahmanda.2.47.71) te tatra nyavasansarve himādrau bhayapīḍitāḥ / kṛcchraṃ mahāntamāsādya śākamūlaphalāśanaḥ // ### [2.47.72](https://indike.org/pramana/in.purana.brahmanda.2.47.72) tataḥ śāntiṃ gate rāme tapasyāsaktamānase / jālajaṅghaḥ svakaṃ rājyaṃ saputraḥ pratyapadyata // ### [2.47.73](https://indike.org/pramana/in.purana.brahmanda.2.47.73) sanniveśya purīṃ bhūyaḥ pūrvavannṛpasattamaḥ / vasaṃstadā nijaṃ rājyamāpālayadarindamaḥ // ### [2.47.74](https://indike.org/pramana/in.purana.brahmanda.2.47.74) suputraḥ sānugabalaḥ pūrvavairamanusmaran / abhyāyayau mahārāja tālajaṅghaḥ puraṃ tava // ### [2.47.75](https://indike.org/pramana/in.purana.brahmanda.2.47.75) caturaṅgabalopetaḥ kaṃpayanniva medinīm / rurodābhyetya nagarīmayodhyāṃ sa mahīpatiḥ // ### [2.47.76](https://indike.org/pramana/in.purana.brahmanda.2.47.76) tato niṣkramya nagarātphalagutantro 'pi te pitā / yuyudhe tairnṛpaiḥ sarvairvṛddho 'pi taruṇo yathā // ### [2.47.77](https://indike.org/pramana/in.purana.brahmanda.2.47.77) nihatānekamātagaturaṅgarathasainikaḥ / śatrubhirnirjito vṛddhaḥ palāyanaparo ' bhavat // ### [2.47.78](https://indike.org/pramana/in.purana.brahmanda.2.47.78) tyaktvā sa nagaraṃ rājyaṃ sakośabalavāhanam / antarvatnyā ca te mātrā sahito vanamāviśat // ### [2.47.79](https://indike.org/pramana/in.purana.brahmanda.2.47.79) tatra caurvāśramopānte nivasannacirādiva / śokāmarṣasamāviṣṭo vṛddhabhāvena ca svayam // ### [2.47.80](https://indike.org/pramana/in.purana.brahmanda.2.47.80) vilokyamāno mātrā te bāṣpagadgadakaṇṭhayā / anātha iva rājendra svargalokamito gataḥ // ### [2.47.81](https://indike.org/pramana/in.purana.brahmanda.2.47.81) tataste jananī rājanduḥkhaśokasamanvitā / citāmāropayadbhartū rudatī sā kalevaram // ### [2.47.82](https://indike.org/pramana/in.purana.brahmanda.2.47.82) anaśanādiduḥkhena bhartturvyasanakarśitā / cakārāgnipraveśāya sudṛḍhāṃ matimātmanaḥ // ### [2.47.83](https://indike.org/pramana/in.purana.brahmanda.2.47.83) aurvastadakhilaṃ śrutvā svayameva mahāmuniḥ / nirgatya cāśramāttāṃ ca vārayannidamabravīt // ### [2.47.84](https://indike.org/pramana/in.purana.brahmanda.2.47.84) na marttavyaṃ tvayā rājñi sāṃprataṃ jaṭhare tava / putrastiṣṭhati sarveṣāṃ pravaraścavarttinām // ### [2.47.85](https://indike.org/pramana/in.purana.brahmanda.2.47.85) iti tadvacanaṃ śrutvā mātā tava manasvinī / virarāma mṛtestāṃ tu muniḥ svāśramamānayat / tataḥ sā sarvaduḥkhāni niyamya tvanmukhāṃbujam // ### [2.47.86](https://indike.org/pramana/in.purana.brahmanda.2.47.86) didṛkṣurāśramopānte tasyaiva nyavasatsukham / suṣāva ca tataḥ kāle sā tvāmaurvāśrame tadā // ### [2.47.87](https://indike.org/pramana/in.purana.brahmanda.2.47.87) jātakarmādikaṃ sarvaṃ bhavataḥ so 'karonmuniḥ / aurvāśrame vivṛddhaśca bhavāṃstenānukaṃpitaḥ // ### [2.47.88](https://indike.org/pramana/in.purana.brahmanda.2.47.88) tvayaiva viditaṃ sarvamataḥ paramarindama / evaṃ prabhāvo nṛpatiḥ kārttavīryo 'bhavadbhuvi // ### [2.47.89](https://indike.org/pramana/in.purana.brahmanda.2.47.89) vratasyāsya prabhāveṇa sarvalokeṣu viśrutaḥ / yadvaṃśajairjito yuddhe pitā te vanamādiśat // ### [2.47.90](https://indike.org/pramana/in.purana.brahmanda.2.47.90) tadvṛttāntamaśeṣeṇa mayā te samudīritam / etacca sarvamākhyātaṃ vratānāmuttamaṃ tava // ### [2.47.91](https://indike.org/pramana/in.purana.brahmanda.2.47.91) samantratantraṃ lokeṣu sarvalokaphalapradam / na hyasya kartturnṛpateḥ puruṣārthacatuṣṭaye // ### [2.47.92](https://indike.org/pramana/in.purana.brahmanda.2.47.92) bhavatyabhīpsitaṃ kiñciddarllabhaṃ bhuvanatraye / saṃkṣepeṇa mayākhyātaṃ vrataṃ haihayabhūbhujaḥ / jāmadagnyasya ca mune kimanyatkathayāmi te // ### [2.47.93](https://indike.org/pramana/in.purana.brahmanda.2.47.93) jaiminiruvāca tataḥ sa sagaro rājā kṛtāñjalipuṭo munim // ### [2.47.94](https://indike.org/pramana/in.purana.brahmanda.2.47.94) uvāca bhagavannetatkartumicchāmyahaṃ vratam / samyaktamupadeśena tatrānujñāṃ prayaccha me // ### [2.47.95](https://indike.org/pramana/in.purana.brahmanda.2.47.95) karmaṇānena viprarṣe kṛtārtho 'smi na saṃśayaḥ / ityuktastena rājñātu tathetyuktvā mahāmuniḥ // ### [2.47.96](https://indike.org/pramana/in.purana.brahmanda.2.47.96) dīkṣayāmāsa rājānaṃ śastroktenaiva vartmanā / sa dīkṣito vasiṣṭhena sagaro rājasattamaḥ // ### [2.47.97](https://indike.org/pramana/in.purana.brahmanda.2.47.97) dravyāṇyānīya vidhivatpracacāra śubhavratam / pūjayitvā jagannāthaṃ vidhinā tena pārthivaḥ // ### [2.47.98](https://indike.org/pramana/in.purana.brahmanda.2.47.98) samāpya ca yathāyogyamanujñāya guruṃ tataḥ / pratijñāmakarodrājā vratametadanuttamam // ### [2.47.99](https://indike.org/pramana/in.purana.brahmanda.2.47.99) ājīvāntaṃ dhariṣyāmi yatneneti mahāmatiḥ / athānujñāpya rājānaṃ vasiṣṭho bhagavānṛṣiḥ // ### [2.47.100](https://indike.org/pramana/in.purana.brahmanda.2.47.100) sannivartyānugacchantaṃ prajagāma nijāśramam // ### [2.47.100.p1](https://indike.org/pramana/in.purana.brahmanda.2.47.100.p1) iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde sagaropākhyāne vasiṣṭhagamanaṃ nāma saptacatvāriṃśattamo 'dhyāyaḥ ## Linked texts (2) - [Narasiṃhapurāṇa](https://indike.org/pramana/in.purana.upa.vaisnava.narasimha.32.17) — Sanskrit - [Vratakhaṇḍa](https://indike.org/pramana/in.niti.dharma.vrata.vratakhanda.114.p2.6) — Hemādri, Sanskrit --- Source: [https://indike.org/pramana/in.purana.brahmanda.2.47](https://indike.org/pramana/in.purana.brahmanda.2.47) · Pramāṇa