[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.48 # Brahmandapurana 2.48 Brahmāṇḍapurāṇa 2.48 - **Language:** Sanskrit ## Contents - [2.48.49](https://indike.org/pramana/in.purana.brahmanda.2.48.49) — 1 part ### [2.48.1](https://indike.org/pramana/in.purana.brahmanda.2.48.1) jaiminiruvāca gate tasminmunivare sagaro rājasattamaḥ / ayodhyāyāmadhivasnpālayāmāsa medinīm // ### [2.48.2](https://indike.org/pramana/in.purana.brahmanda.2.48.2) sarvasaṃpadgaṇopetaḥ sarvadharmārthatattvavit / vayasaiva sa bālo 'bhūtkarmaṇā vṛddhasaṃmataḥ // ### [2.48.3](https://indike.org/pramana/in.purana.brahmanda.2.48.3) tathāpi na divā bhukteṃ śete vā niśi saṃsmaran / sudīrghaṃ niḥśvasityuṣṇamudvignahṛdayo 'niśam // ### [2.48.4](https://indike.org/pramana/in.purana.brahmanda.2.48.4) śrutvā rājā svarājyaṃ nijagurumavajityāribhiḥ saṃgṛhītaṃ mātrā sārddhaṃ prayāntaṃ vanamatigahanaṃsvargataṃ taṃ ca tasmin / śokāviṣṭaḥ saroṣaṃ sakalaripukulocchittaye satpratijñaścake sadyaḥ pratijñāṃ paribhavamanalaṃ soḍhumikṣvākuvaṃśyaḥ // ### [2.48.5](https://indike.org/pramana/in.purana.brahmanda.2.48.5) sa kadācinmahīpālaḥ kṛtakautukamaṅgalaḥ / ripuṃ jetuṃ manaścakre diśaśca sakalāḥ kramāt // ### [2.48.6](https://indike.org/pramana/in.purana.brahmanda.2.48.6) anekarathasāhasrairgajāśvarathasainikaiḥ / sarvataḥ saṃvṛto rājā niścakrāma purottamāt // ### [2.48.7](https://indike.org/pramana/in.purana.brahmanda.2.48.7) śatrūnhantuṃ pratasthe nijabalanivahenotpatadbhisturaṅgairnāsattvormijālākulajalanidhinibhenātha ṣāḍaṅgikena / mattairmātaṅgayūthaiḥ sakulagirikulenaiva bhūmaṇḍalena śvetacchatradhvajaughairapi śaśisukarābhātakhenaiva sārddham // ### [2.48.8](https://indike.org/pramana/in.purana.brahmanda.2.48.8) tasyāgresarasainyayūthacaraṇaprakṣuṇṇaśailoccayakṣodāpūritanimnabhāgamavanīpālasya saṃyāsyataḥ / pratyekaṃ caturaṅgasainyanikaraprakṣodasaṃbhūtabhūreṇuprāvṛtirutsthalī samabhavadbhūmistu tatrāniśam // ### [2.48.9](https://indike.org/pramana/in.purana.brahmanda.2.48.9) nighnandṛptānanekāndvipaturagarathavyūhasaṃbhinnavīrānsadyaḥ śobhāṃ dadhāno 'suranikaracamūrnighnataścandramauliḥ / dūrādevābhiśaṃsannarinagaranirodheṣu karmābhiṣaṅge teṣāṃ śīghrāpayānakṣaṇamabhidiśati prāṇidhairyaṃ vidhatte // ### [2.48.10](https://indike.org/pramana/in.purana.brahmanda.2.48.10) vijigīṣurdiśo rājā rājño yasyābhiyāsyati // ### [2.48.11](https://indike.org/pramana/in.purana.brahmanda.2.48.11) viṣayaṃ sa nṛpastasya sadyaḥ praṇatimeṣyati / vijitya nṛpatīnsarvānkṛtvā ca svapadānugān // ### [2.48.12](https://indike.org/pramana/in.purana.brahmanda.2.48.12) saṃketa gāminaḥ kāṃścitkṛtvā rājye nyavarttata / evaṃ sa visarandikṣu dakṣiṇābhimukho nṛpaḥ // ### [2.48.13](https://indike.org/pramana/in.purana.brahmanda.2.48.13) smaranpūrvakṛtaṃ vairaṃ haihayānabhyavarttata / tatastasya nṛpaiḥ sārddhaṃ samagrarathakuñjaraiḥ // ### [2.48.14](https://indike.org/pramana/in.purana.brahmanda.2.48.14) babhūva haihayairvīraiḥ saṃgrāmo romaharṣaṇaḥ / rājñāṃ yatra sahasrāṇi sa balāni mahāhave // ### [2.48.15](https://indike.org/pramana/in.purana.brahmanda.2.48.15) nijaghāna mahābāhuḥ saṃkruddhaḥ kosaleśvaraḥ / jitvā haihayabhūpālānbhaṅktvā dagdhvā ca tatpurīm // ### [2.48.16](https://indike.org/pramana/in.purana.brahmanda.2.48.16) niḥśeṣaśūnyā makarodvairāntakaraṇo nṛpaḥ / samagrabalasaṃmarddapramṛṣṭāśeṣabhūtalaḥ // ### [2.48.17](https://indike.org/pramana/in.purana.brahmanda.2.48.17) haihayānāmaśeṣaṃ tu cakre rājyaṃ rajaḥsamam / rājyaṃ purīṃ cāpahāya bhraṣṭaiśvaryā hatatviṣaḥ // ### [2.48.18](https://indike.org/pramana/in.purana.brahmanda.2.48.18) rājāno hatabhūyiṣṭhā vyadravanta samantataḥ / abhidrutya nṛpāṃstāṃstu dravamāṇānmahīpatiḥ // ### [2.48.19](https://indike.org/pramana/in.purana.brahmanda.2.48.19) jaghāna sānugānmattaḥ prajāḥ kruddha ivāntakaḥ / tatastānprati sakrodhaḥ sagaraḥ samare 'rihā // ### [2.48.20](https://indike.org/pramana/in.purana.brahmanda.2.48.20) mumocāstraṃ mahāraudraṃ bhārgavaṃ rīpubhīṣaṇam / tenotsṛṣṭātiraudratribhuvanabhayadaprasphuradbhārgavāstrajvālādandahyamānāvaśatanutatayaste nṛpāḥ sādya eva / vāyvastrāvṛttadhūmodgamapaṭalatamomuṣṭadṛṣṭiprasārā bhremurbhūpṛṣṭaloṭhadbahulatamarajogūḍhamātrā muhūrttam // ### [2.48.21](https://indike.org/pramana/in.purana.brahmanda.2.48.21) āganeyāstrapratāpapratihatagatayo 'dṛṣṭamārgāḥ samantā dbhūpālā naṣṭasaṃghāḥ paravaśatanavo vyākulībhūtacittāḥ / bhītāḥ saṃtyuktavastrāyudhakavacavibhūṣādikā muktakeśā vispaṣṭonmattabhāvānbhṛśa taramanukurvantyagrataḥ śātravāṇām // ### [2.48.22](https://indike.org/pramana/in.purana.brahmanda.2.48.22) vijitya haihayānsarvānsamare sagaro balī / saṃkṣubdhasāgarākāraḥ kāṃbojānabhyavarttata // ### [2.48.23](https://indike.org/pramana/in.purana.brahmanda.2.48.23) nānāvāditraghoṣāhatapaṭaharavākarṇanadhvastadhairyāḥ sadyaḥ saṃtyaktarājyasvabalapurapurandhrīsamūhā vimūḍhāḥ / kāṃbojāstālajaṅghāḥ śakayavanakirātādayaḥ sākamete bhremurbhūryastrabhītyā diśi diśi ripavo yasya pūrvāparādhāḥ // ### [2.48.24](https://indike.org/pramana/in.purana.brahmanda.2.48.24) bhītāstasya nareśvarasya ripavaḥ kecitpratā pānalajvālāmuṣṭadṛśo visṛjya vasatiṃ rājyaṃ ca putrādibhiḥ / dviṭsainyaiḥ samabhidrutā vanabhuvaṃ saṃprāpya tatrāpi te 'staimityaṃ samupāgatā giriguhāsuptotthitena dviṣaḥ // ### [2.48.25](https://indike.org/pramana/in.purana.brahmanda.2.48.25) tālajaṅghānnihatyājau rājā sa balavāhanān / krameṇa nāśayāmāsa tadrājyamarikarṣaṇaḥ // ### [2.48.26](https://indike.org/pramana/in.purana.brahmanda.2.48.26) tato yavanakāṃbojakirātādīnanekaśaḥ / nijaghāna ruṣāviṣṭaḥ palhavānpāradānapi // ### [2.48.27](https://indike.org/pramana/in.purana.brahmanda.2.48.27) hanyamānāstu te sarve rājānastena saṃyuge / dudruvuḥ saṃghaśo bhītā hataśiṣṭāḥ samantataḥ // ### [2.48.28](https://indike.org/pramana/in.purana.brahmanda.2.48.28) yuṣmābhiryasya rājyaṃ bahubhirapatdṛtaṃ tasya putro 'dhunāhaṃ hantuṃ vaḥ sapratijñaṃ prasabhamupagato vairaniryātanaiṣī / ityuccaiḥ śrāvayāṇo yudhi nijacaritaṃ vairibhirnāgavīryaḥ kṣatrairvidhvaṃsitejāḥ sagaranarapatiḥ smārayāmāsa bhūpaḥ // ### [2.48.29](https://indike.org/pramana/in.purana.brahmanda.2.48.29) taṃ dṛṣṭvā rājavaryaṃ sakalaripukulaprakṣayopāttadīkṣaṃ bhītāḥ strībālapūrvaṃ śaraṇamabhiyayuḥ svāsusarakṣaṇāya / ikṣvākūṇāṃ vasiṣṭhaṃ kulagurumabhitaḥ sapta rājñāṃ kaleṣu prakhyātāḥ saṃprasūtā nṛpavararipavaḥ pāradāḥ palhavādyāḥ // ### [2.48.30](https://indike.org/pramana/in.purana.brahmanda.2.48.30) vasiṣṭhamāśramopānte vasaṃtamṛṣibhirvṛtam / upagamyābruvansarve kṛtāñjalipuṭā nṛpāḥ // ### [2.48.31](https://indike.org/pramana/in.purana.brahmanda.2.48.31) śaraṇaṃ bhaṃva no brahmannārttānāmabhayaiṣiṇām / sagarāstrāgninirdagdhaśarīrāṇāṃ mumūrṣatām // ### [2.48.32](https://indike.org/pramana/in.purana.brahmanda.2.48.32) sa hantyasamānaśeṣeṇa vairāntakaraṇonmukhaḥ / tasmādbhayāddhi niṣkrāntā vayaṃ jīvitakāṅkṣiṇaḥ // ### [2.48.33](https://indike.org/pramana/in.purana.brahmanda.2.48.33) vibhinnarājyabhogarddhisvadārāpatyabāndhavāḥ / kevalaṃ prāṇarakṣārthaṃ tvāṃ tvayaṃ śaraṇaṃ gataḥ // ### [2.48.34](https://indike.org/pramana/in.purana.brahmanda.2.48.34) na hyanyo 'sti pumāṃlloke sauhṛdena balena vā / yastaṃ nivarttayitvāsmānpālayenmahato bhayāt // ### [2.48.35](https://indike.org/pramana/in.purana.brahmanda.2.48.35) tvaṃ kilārkānvayabhuvāṃ rājñāṃ kulagurur vṛtaḥ / tadvaṃśapūrvajairbhūpaistvataprabhāvaśca tādṛśaḥ // ### [2.48.36](https://indike.org/pramana/in.purana.brahmanda.2.48.36) tenāyaṃ sagaro 'pyadya gurugauravayantritaḥ / bhavannideśaṃ nātyeti velāmiva mahodadhiḥ // ### [2.48.37](https://indike.org/pramana/in.purana.brahmanda.2.48.37) tvaṃ naḥ suhṛtpitā mātā lokānāṃ ca gururvibho / tasmādasmānmahābhāga paritrātuṃ tvamarhasi // ### [2.48.38](https://indike.org/pramana/in.purana.brahmanda.2.48.38) jaiminiruvāca iti teṣāṃ vacaḥ śrutvā vasiṣṭho bhagavānṛṣiḥ / śanairvilokayāmāsa śaraṇaṃ samupāgatān // ### [2.48.39](https://indike.org/pramana/in.purana.brahmanda.2.48.39) vṛddhastrībālabhūyiṣṭhānhataśeṣānnṛpānvayān / dṛṣṭvā tvatapyadbhagavānsarvabhūtānukaṃpakaḥ // ### [2.48.40](https://indike.org/pramana/in.purana.brahmanda.2.48.40) ciraṃ nirūpya manasā tānvilokya ca sādaram / ujjīvayañchanairvācā mā bhaiṣṭeti mahāmatiḥ // ### [2.48.41](https://indike.org/pramana/in.purana.brahmanda.2.48.41) athāvocanmahābhāgaḥ kṛpayā parayānvitaḥ / samaye sthāpayāmāsa rājñastāñjīvitārthinaḥ // ### [2.48.42](https://indike.org/pramana/in.purana.brahmanda.2.48.42) bhūpavyā kopadagdhaṃ nṛpakulavihitāśeṣadharmādapetaṃ kṛtvā teṣāṃ vasiṣṭhaḥ samayamavanipālapratijñānivṛttyai / gatvā taṃ rājavaryaṃ svayamatha śanakaiḥ sāṃtvayitvā yathāvatsaprāṇānāmarīṇāmapagamanavidhāvabhyanujñāṃ yayāce // ### [2.48.43](https://indike.org/pramana/in.purana.brahmanda.2.48.43) sakrodho 'pi mahīpatirguruvacaḥ saṃbhāvayaṃstānarīndharmasya svakulocitasya ca tathā veṣasya saṃtyāgataḥ / śrautasmārttavibhinnakarmaniratānvipraiśca dūroñjhitānsāsūnkevalamatyajanmṛtasamānekaikaśaḥ pārthivān // ### [2.48.44](https://indike.org/pramana/in.purana.brahmanda.2.48.44) arddhamuṇḍāñchakāṃścakre palhavān śmaśrudhāriṇaḥ / yavanānvigataśmaśrūnkāṃbojāṃścabukānvitān // ### [2.48.45](https://indike.org/pramana/in.purana.brahmanda.2.48.45) evaṃ virūpānanyāṃśca sa cakāra nṛpānvayān / vedoktakarmanirmuktānvipraiśca parivarjitān // ### [2.48.46](https://indike.org/pramana/in.purana.brahmanda.2.48.46) kṛtvā saṃsthāpya samaye jīvatastānvya sarjayat / tataste ripavastasya tyaktasvācāralakṣaṇāḥ // ### [2.48.47](https://indike.org/pramana/in.purana.brahmanda.2.48.47) vrātyatāṃ samanuprāptāḥ sarvavarṇavinintitāḥ / dhikkṛtā satataṃ sarvenṛśaṃsā nirapatrapāḥ // ### [2.48.48](https://indike.org/pramana/in.purana.brahmanda.2.48.48) krūrāśca saṃghaśo loke babhūvurmlechajātayaḥ // ### [2.48.49](https://indike.org/pramana/in.purana.brahmanda.2.48.49) muktāstenātha rājñā śakayavanakirātādayaḥ sadya eva tyaktasvācāraveṣā girigahanaguhādyāśayāḥ saṃbabhūvuḥ / etā adyāpi sadbhiḥ satatamavamatā jātayo 'satpravṛttyā varttante duṣṭaceṣṭā jagati narapateḥ pālayantaḥ pratijñām // ### [2.48.49.p1](https://indike.org/pramana/in.purana.brahmanda.2.48.49.p1) iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde sagaropākhyāne sagarapratijñāpālanaṃ nāmāṣṭācatvāriṃśattamo 'dhyāyaḥ // 48// --- Source: [https://indike.org/pramana/in.purana.brahmanda.2.48](https://indike.org/pramana/in.purana.brahmanda.2.48) · Pramāṇa