[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.49 # Brahmandapurana 2.49 Brahmāṇḍapurāṇa 2.49 - **Language:** Sanskrit ## Contents - [2.49.66](https://indike.org/pramana/in.purana.brahmanda.2.49.66) — 1 part ### [2.49.1](https://indike.org/pramana/in.purana.brahmanda.2.49.1) jaiminiruvāca athānujñāya sagaro vasiṣṭhamṛṣisattamam / balena mahatā yukto vidarbhānabhyavarttata // ### [2.49.2](https://indike.org/pramana/in.purana.brahmanda.2.49.2) tato vidarbharāṭ tasmai svasutāṃ prītipūrvakam / keśinyākhyāmanupamāmanurūpāṃ nyavedayat // ### [2.49.3](https://indike.org/pramana/in.purana.brahmanda.2.49.3) sa tasyā rājaśārdūlo vidhivadvahnisākṣikam / śubhe muhūrte keśinyāḥ pārṇiṃ jagrāha bhūmipaḥ // ### [2.49.4](https://indike.org/pramana/in.purana.brahmanda.2.49.4) sthitvā dināni katicidgṛhe tasyātisatkṛtaḥ / vidarbharājñā saṃmantrya tato gantuṃ prajakrame // ### [2.49.5](https://indike.org/pramana/in.purana.brahmanda.2.49.5) anujñātastatastena pāribarhaiśca satkṛtaḥ / niṣkramya tatpurādrājā śūrasenānupeyivān // ### [2.49.6](https://indike.org/pramana/in.purana.brahmanda.2.49.6) saṃbhāvitastataścaiva yādavairmātṛsodaraiḥ / dhanaughaistarpitastaiśca madhurāyā viniryayau // ### [2.49.7](https://indike.org/pramana/in.purana.brahmanda.2.49.7) evaṃ sa sagaro rājā vijitya vasudhāmimām / karaiśca sa nṛpānsarvāṃścakre saṃketagānapi // ### [2.49.8](https://indike.org/pramana/in.purana.brahmanda.2.49.8) tato 'numānya nṛpatīnnijarājyāya sānugān / anujajñe narapatiḥ samastānanuyāyinaḥ // ### [2.49.9](https://indike.org/pramana/in.purana.brahmanda.2.49.9) tato balena mahātā skandhāvārasamanvitaḥ / śanairapīḍayandeśānsvarājyamupajagmivān // ### [2.49.10](https://indike.org/pramana/in.purana.brahmanda.2.49.10) saṃbhāvyamānaśca muhurupadābhiranekaśaḥ / nānājanapadaistūrmamayodhyāṃ samupāgamat // ### [2.49.11](https://indike.org/pramana/in.purana.brahmanda.2.49.11) tadāgamanamājñāya nāgaraḥ sakalo janaḥ / nagarīṃ tāmalañcakre mahotsavasamutsukaḥ // ### [2.49.12](https://indike.org/pramana/in.purana.brahmanda.2.49.12) tataḥ sā nagarī sarvā kṛtakautukamaṅgalā / siktasaṃmṛṣṭabhūbhāgā pūrṇakumbhaśatāvṛtā // ### [2.49.13](https://indike.org/pramana/in.purana.brahmanda.2.49.13) samucchritadhvajaśatā patākābhiraṃlakṛtā / sarvatrāgarudhūpāñaḍhyā vicitrakusumojjvalā // ### [2.49.14](https://indike.org/pramana/in.purana.brahmanda.2.49.14) sadratnatoraṇottuṅgagopurāṭṭalabhūṣitā / prasūnalājavarṣaiśca svalaṅkṛtamahāpathā // ### [2.49.15](https://indike.org/pramana/in.purana.brahmanda.2.49.15) mahotsavasamāyuktā pratigehamabhūtpurī / saṃbūjitāśeṣavāstudevatāgṛhamālinī // ### [2.49.16](https://indike.org/pramana/in.purana.brahmanda.2.49.16) dikcakrajayino rājñaḥ saṃdarśanamudānvitaiḥ / paurajānapadairtdṛṣṭaiḥ sarvataḥ samalaṅkṛtā // ### [2.49.17](https://indike.org/pramana/in.purana.brahmanda.2.49.17) tataḥ prakṛtayaḥ sarve tathāntaḥ puravāsinaḥ / vārakātākadabaiśca nagarībhiśca savṛtāḥ // ### [2.49.18](https://indike.org/pramana/in.purana.brahmanda.2.49.18) abhyāyayustataḥ sarve samatya puravāsinaḥ / sa taiḥ sametya nṛpatirlabdhāśīrvāda saktkriyaḥ // ### [2.49.19](https://indike.org/pramana/in.purana.brahmanda.2.49.19) badhirīkṛtadikcakro jayaśabdena bhūriṇā / nānāvāditrasaṃghoṣamiśreṇa madhureṇa ca // ### [2.49.20](https://indike.org/pramana/in.purana.brahmanda.2.49.20) satkṛtya tānyathā yogaṃ sahitastairmudānvitaiḥ / ānandayanprajāḥ sarvāḥ praviveśa purottamam // ### [2.49.21](https://indike.org/pramana/in.purana.brahmanda.2.49.21) vedaghoṣaiḥ sumadhurairbrāhmaṇairabhinanditaḥ / saṃstūyamānaḥ subhṛśaṃ sūtamāgadhavandibhiḥ // ### [2.49.22](https://indike.org/pramana/in.purana.brahmanda.2.49.22) jayaśabdaiśca parito nānājanapaderitaiḥ / kalatālaravonmiśravīṇāveṇutalasvanaiḥ // ### [2.49.23](https://indike.org/pramana/in.purana.brahmanda.2.49.23) gāyadbhirgāyakajanairnṛtyadbhirgaṇikājanaiḥ / anvīyamāno vilasacchvetacchatravirājitaḥ // ### [2.49.24](https://indike.org/pramana/in.purana.brahmanda.2.49.24) vikīryamāṇaḥ paritaḥ sallājakusumotkaraiḥ / purīmayodhyāmaviśatsvapurīmiva vāsavaḥ // ### [2.49.25](https://indike.org/pramana/in.purana.brahmanda.2.49.25) dṛṣṭipūtena gandhena brāhmaṇānāṃ ca vartmanā / jagāma madhyenagaraṃ gṛhaṃ śrīmadalaṅkṛtam // ### [2.49.26](https://indike.org/pramana/in.purana.brahmanda.2.49.26) avaruhya tato yānādbhāryābhyāṃ sahito mudā / praviveśa gṛhaṃ māturhṛṣṭapuṣṭajanāyutam // ### [2.49.27](https://indike.org/pramana/in.purana.brahmanda.2.49.27) paryaṅkasthāmupāgamya mātaraṃ vinayānvitaḥ / tatpādau saṃspṛśanmūrdhnā praṇāmamakarottadā // ### [2.49.28](https://indike.org/pramana/in.purana.brahmanda.2.49.28) sābhinandya tamāśīrbhirharṣagadgadayā girā / sasaṃbhramaṃ samutthāya paryaṣvajata cātmajam // ### [2.49.29](https://indike.org/pramana/in.purana.brahmanda.2.49.29) saharṣaṃ bahudhāśīrbhirabhyanandadubhe snuṣe / sa tāṃ saṃbhāvya kathayā tatra sthitvā cirādiva // ### [2.49.30](https://indike.org/pramana/in.purana.brahmanda.2.49.30) anujñātastayā rājā niścakrāma tadālayāt / tataḥ sānucaro rājā śvetavyajanavījitaḥ // ### [2.49.31](https://indike.org/pramana/in.purana.brahmanda.2.49.31) surarāja iva śrīmānsabhāṃ samagamacchanaiḥ / saṃpraviśya sabhāṃ divyāmanekanṛpasevitām // ### [2.49.32](https://indike.org/pramana/in.purana.brahmanda.2.49.32) natvā gurujanaṃ sarvamāśīrbhiścābhinanditaḥ / siṃhāsane śubhe divye niṣasāda nareśvaraḥ // ### [2.49.33](https://indike.org/pramana/in.purana.brahmanda.2.49.33) saṃsevyamānaśca nṛpairnānājanapadeśvaraiḥ / nānāvidhāḥ kathāḥ kurvansa tatra nṛpasattamaḥ // ### [2.49.34](https://indike.org/pramana/in.purana.brahmanda.2.49.34) saṃprīyamāmaḥ sutarāmuvāsa saha bandhubhiḥ / pratijñāṃ pālayitvaivaṃ jitadiṅmaṇḍalo nṛpaḥ // ### [2.49.35](https://indike.org/pramana/in.purana.brahmanda.2.49.35) anvatiṣṭhadyanthānyāya marthatrayamudāradhīḥ / svaprabhāvajitāśeṣavairirdiṅmaṇḍalādhipaḥ // ### [2.49.36](https://indike.org/pramana/in.purana.brahmanda.2.49.36) ekātapatrāṃ pṛthivīmanvaśāsadvṛṣo yathā / svaryātasya pituḥ pūrvaṃ paribhāvamamarṣitaḥ // ### [2.49.37](https://indike.org/pramana/in.purana.brahmanda.2.49.37) sa yāṃ pratijñāmārūḍhastāṃ samyakparipūrya ca / saptadvīpābdhinagaragrāmāyatanamālinīm // ### [2.49.38](https://indike.org/pramana/in.purana.brahmanda.2.49.38) jitvā śatrūnaśeṣeṇa pālayāmāsa medinīma / evaṃ gacchati kāle ca vasiṣṭho bhagavānṛṣiḥ // ### [2.49.39](https://indike.org/pramana/in.purana.brahmanda.2.49.39) abhyajagāma taṃ bhūyo draṣṭukāmo jareśvaram / tamāyāntamatiprekṣya munivaryaṃ sasaṃbhramaḥ // ### [2.49.40](https://indike.org/pramana/in.purana.brahmanda.2.49.40) pratyujjagāmārghahastaḥ sahitastairnapairnṛpaḥ / ardhyapādyādibhiḥ samyakpūjayitvā mahāmatiḥ // ### [2.49.41](https://indike.org/pramana/in.purana.brahmanda.2.49.41) praṇāmamakarottasmai gurubhaktisamanvitaḥ / āśīrbhirvarddhayitvā taṃ vasiṣṭhaḥ sagaraṃ tadā // ### [2.49.42](https://indike.org/pramana/in.purana.brahmanda.2.49.42) āsyatāmiti hovāca saha sarvairnareśvaraiḥ / upāviśattato rājā kāñcane paramāsane // ### [2.49.43](https://indike.org/pramana/in.purana.brahmanda.2.49.43) muninā samanujñātaḥ sabhāryaḥ saha rājabhiḥ / āpavastunṛpaśreṣṭhamupāsīnamupahvare // ### [2.49.44](https://indike.org/pramana/in.purana.brahmanda.2.49.44) uvāca śṛṇvatāṃ rājñāṃ śanairmṛdvakṣaraṃ vacaḥ / vasiṣṭha uvāca kuśalaṃ nanu te rājanvāhyeṣvābhyantareṣu ca // ### [2.49.45](https://indike.org/pramana/in.purana.brahmanda.2.49.45) mantriṣvamātyavargeṣu rājye vā sakale 'dhunā / diṣṭyā ca vijitāḥ sarve samagrabalavāhanāḥ // ### [2.49.46](https://indike.org/pramana/in.purana.brahmanda.2.49.46) ayatnenaiva yuddheṣu bhavatā ripavo hi yat / diṣṭyārūḍhapratijñena mama mānayatā vacaḥ // ### [2.49.47](https://indike.org/pramana/in.purana.brahmanda.2.49.47) arayastyaktadharmāṇastvayā jīvavisarjitāḥ / tānvijityetarāñjetuṃ punardigvijayecchayā // ### [2.49.48](https://indike.org/pramana/in.purana.brahmanda.2.49.48) gatassavāhanabalastvamityaśṛṇavaṃ vacaḥ / jitadiṅmaṇḍalaṃ bhūyaḥ śrutvā tvāṃ nagarasthitam // ### [2.49.49](https://indike.org/pramana/in.purana.brahmanda.2.49.49) prītyāhamāgato draṣṭumidānīṃ rājasattama / jaiminiruvāca vasiṣṭhenaivamuktastu sagarastālajaṅghajit // ### [2.49.50](https://indike.org/pramana/in.purana.brahmanda.2.49.50) kṛtāñjalipuṭo bhūtvā pratyuvāca mahāmunim / sagara uvāca kuśalaṃ nanu sarvatra maharṣe nātra saṃśayaḥ // ### [2.49.51](https://indike.org/pramana/in.purana.brahmanda.2.49.51) kalyāṇābhimukhāḥ sarve devatāśca mune 'niśam / bhavāndhyāyati kalyāṇaṃ manasā yasya saṃtatam // ### [2.49.52](https://indike.org/pramana/in.purana.brahmanda.2.49.52) tasya me copasargāśca saṃbhavanti kathaṃ mune / bhavatānugṛhīto 'smi kṛtārthaścādhunā kṛtaḥ // ### [2.49.53](https://indike.org/pramana/in.purana.brahmanda.2.49.53) yanmāṃ draṣṭumihāyātaḥ svayameva bhavānguro / yanmahyamāha bhagavānvipakṣavijayādikam // ### [2.49.54](https://indike.org/pramana/in.purana.brahmanda.2.49.54) tattathānuṣṭhitaṃ kiṃ tu sarvaṃ bhavadanugrahāt / bhavatprasādataḥ sarvaṃ manye prāptaṃ mahīkṣitām // ### [2.49.55](https://indike.org/pramana/in.purana.brahmanda.2.49.55) anyathā mama kā śaktiḥ śatrūnhantuṃ tathāvidhān / analpī kurute phalyaṃ yanme vyavasitaṃ bhavān // ### [2.49.56](https://indike.org/pramana/in.purana.brahmanda.2.49.56) phalamalpamapi prītyai syādagasyādhiropituḥ / jaiminiruvāca evaṃ saṃbhāvitaḥ samyaksageraṇa mahāmuniḥ // ### [2.49.57](https://indike.org/pramana/in.purana.brahmanda.2.49.57) abhyanujñāya taṃ bhūyaḥ prajāgāma nijāśramam / vasiṣṭe tu gate rājā sagaraḥprītamānasaḥ // ### [2.49.58](https://indike.org/pramana/in.purana.brahmanda.2.49.58) ayodhyāyāmabhivasanpraśaśāsākhilāṃ bhuvam / bhāryābhyāṃ samupetābhyāṃ rūpaśīlaguṇādibhiḥ // ### [2.49.59](https://indike.org/pramana/in.purana.brahmanda.2.49.59) bubhuje viṣayānramyānyathākāmaṃ yathāsukham / sumatiḥ keśinī cobhe vikasadvadanāṃbuje // ### [2.49.60](https://indike.org/pramana/in.purana.brahmanda.2.49.60) rūpaudāryaguṇopete pīnavṛttapayodhare / nīlakuñcitakeśāḍhye sarvābharaṇabhūṣite // ### [2.49.61](https://indike.org/pramana/in.purana.brahmanda.2.49.61) sarvalakṣaṇasaṃpanne navayauvanagocare / priye sannihite tasya nityaṃ priyahite rate // ### [2.49.62](https://indike.org/pramana/in.purana.brahmanda.2.49.62) svācārabhāvaceṣṭābhirjahratustanmano 'niśam / sa cāpi bharaṇotkarṣapratītātmā mahīpatiḥ // ### [2.49.63](https://indike.org/pramana/in.purana.brahmanda.2.49.63) ramamāṇo yathākāmaṃ saha tābhyāṃ pure 'vasat / anyeṣāṃ bhuvi rājñāṃ tu rājaśabdo na cāpyabhūt // ### [2.49.64](https://indike.org/pramana/in.purana.brahmanda.2.49.64) guṇena cābhavattasya sagarasya mahātmanaḥ / alpo 'pi dharmaḥ satataṃ yathā bhavati mānase // ### [2.49.65](https://indike.org/pramana/in.purana.brahmanda.2.49.65) rā5stasyārthakāmau tu na tathā vipulāvapi / alubdhamānasor'thaṃ ca bheje dharmamapīḍayan // ### [2.49.66](https://indike.org/pramana/in.purana.brahmanda.2.49.66) tadarthameva rājendra kāmaṃ cāpīḍayaṃstayoḥ // ### [2.49.66.p1](https://indike.org/pramana/in.purana.brahmanda.2.49.66.p1) iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde sagaradigvijayo nāmaikonapañcāśattamo 'dhyāyaḥ // 49// --- Source: [https://indike.org/pramana/in.purana.brahmanda.2.49](https://indike.org/pramana/in.purana.brahmanda.2.49) · Pramāṇa