[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.4 # Brahmandapurana 2.4 Brahmāṇḍapurāṇa 2.4 - **Language:** Sanskrit ## Contents - [2.4.30](https://indike.org/pramana/in.purana.brahmanda.2.4.30) — 1 part - [2.4.37](https://indike.org/pramana/in.purana.brahmanda.2.4.37) — 1 part ### [2.4.1](https://indike.org/pramana/in.purana.brahmanda.2.4.1) sūta uvāca brahmaṇā vai mukhātsṛṣṭā jayā devāḥ prajepsayā / sarve mantraśarīrāste smṛtā manvantareṣviha // ### [2.4.2](https://indike.org/pramana/in.purana.brahmanda.2.4.2) darśaśca paurṇamāsaśca bṛhatsāma rathantaram / citiśca sucitiścaiva hyākūtiḥ kūtireva ca // ### [2.4.3](https://indike.org/pramana/in.purana.brahmanda.2.4.3) vijñātaścaiva vijñātā manā yajñaśca dvādaśaḥ / dārāgnihotrasaṃbandhaṃ vitatya yajateti ca // ### [2.4.4](https://indike.org/pramana/in.purana.brahmanda.2.4.4) evamuktvā tu tānbrahmā tatraivāntaradhātprabhuḥ / tataste nābhyanandanta tadvākyaṃ parameṣṭhinaḥ // ### [2.4.5](https://indike.org/pramana/in.purana.brahmanda.2.4.5) saṃnyasyeha ca karmāṇi vāsanāḥ karmajāśca vai / yameṣvaṃvāvantiṣṭhante doṣaṃ dṛṣṭvā tu karmasu // ### [2.4.6](https://indike.org/pramana/in.purana.brahmanda.2.4.6) kṣayāti śayayuktaṃ ca te dṛṣṭvā karmaṇāṃ phalam / jugupsaṃtaḥ prasūtiṃ ca niḥsattvā nirmamābhavan // ### [2.4.7](https://indike.org/pramana/in.purana.brahmanda.2.4.7) ajanma kāṅkṣamāṇāste nirmuktā doṣadarśinaḥ / arthaṃ dharmaṃ ca kāmaṃ ca hitvā te vai vyavasthitāḥ // ### [2.4.8](https://indike.org/pramana/in.purana.brahmanda.2.4.8) paramaṃ jñānamāsthāya tatsaṃkṣipya susaṃsthitāḥ / teṣāṃ tu tamabhiprāyaṃ jñātvā brahmā tu kopitaḥ // ### [2.4.9](https://indike.org/pramana/in.purana.brahmanda.2.4.9) tānabravīttato brahmā nirutsāhānsurānatha / prajārthamiha yūyaṃ vai mayā sṛṣṭāḥ stha nānyathā // ### [2.4.10](https://indike.org/pramana/in.purana.brahmanda.2.4.10) prasūyadhvaṃ yajadhvaṃ cetyuktavānasmi vaḥ purā / yasmādvākyamanādṛtya mama vairāgyamāsthitāḥ // ### [2.4.11](https://indike.org/pramana/in.purana.brahmanda.2.4.11) jugupsamānāḥ svaṃ janma saṃtatiṃ nābhyanandata / karmaṇāṃ na kṛto 'bhyāso hyamṛtatvābhikāṅkṣayā // ### [2.4.12](https://indike.org/pramana/in.purana.brahmanda.2.4.12) tasmādyūyamihāvṛttiṃ saptakṛtvo hyavāpsyatha / te śaptā brahmaṇā devā jayāstaṃ vai prasādayan // ### [2.4.13](https://indike.org/pramana/in.purana.brahmanda.2.4.13) kṣamāsmākaṃ mahādeva yadajñānātmakaṃ prabho / praṇatānvai sānunayaṃ brahmā tānabravītpunaḥ // ### [2.4.14](https://indike.org/pramana/in.purana.brahmanda.2.4.14) loke 'pyathānubhuñjīta kaḥ svātantryamihārhati / mayāgataṃ tu sarvaṃ hi kathamacchandato mama // ### [2.4.15](https://indike.org/pramana/in.purana.brahmanda.2.4.15) pratipatsyanti bhūtāni śubhaṃ vā yadi vottaram / loke yadapi kiñcidvaiśaṃ vā śaṃ vā vyavasthitam // ### [2.4.16](https://indike.org/pramana/in.purana.brahmanda.2.4.16) buddhyātmanā mayā vyāptaṃ ko māṃ loke 'tivarttayet / bhūtānā mīhitaṃ yacca yaccāpyeṣāṃ vicintitam // ### [2.4.17](https://indike.org/pramana/in.purana.brahmanda.2.4.17) tathopacaritaṃ yacca tatsarvaṃ viditaṃ mama / mayā baddhamidaṃ sarvaṃ cajagatsthāvarajaṅgamam // ### [2.4.18](https://indike.org/pramana/in.purana.brahmanda.2.4.18) āśāmayena bandhena kastaṃ chettumihotsahet / yasmādvahati dṛpto vai sarvārthamiha nānyathā // ### [2.4.19](https://indike.org/pramana/in.purana.brahmanda.2.4.19) iti karmāṇyanārabhya kāmaṃ chandādvimokṣate / evaṃ saṃbhāṣya tāndevān jayānadhyātmacetasaḥ // ### [2.4.20](https://indike.org/pramana/in.purana.brahmanda.2.4.20) atha vīkṣya punaścāha dhruvaṃ daḍyānprajāpatiḥ / yasmānmānabhisaṃdhāya sanyāsādiḥ kṛtaḥ surāḥ // ### [2.4.21](https://indike.org/pramana/in.purana.brahmanda.2.4.21) tasmātsa vipulāyatto vyāpārastvatha matkṛtaḥ / bhavitā ca sukhodarke divyabhāvena jāyatām // ### [2.4.22](https://indike.org/pramana/in.purana.brahmanda.2.4.22) ātmacchandena vo janma bhaviṣyati surottamāḥ / manvantareṣu saṃsiddhāḥ saptasvāvirbhaviṣyatha // ### [2.4.23](https://indike.org/pramana/in.purana.brahmanda.2.4.23) vaivasvatānteṣu surāstathā svāyaṃbhuvādiṣu / evaṃ ca brahmaṇā tatra śloko gītaḥ purātanaḥ // ### [2.4.24](https://indike.org/pramana/in.purana.brahmanda.2.4.24) trayī vidyā brahmamayaprasūtiḥ śrāddhaṃ tapo yajñamanupradānam / etāni nityaiḥ mahasā rajobhirbhūtvā vibhurvasate 'nyatpraśastam // ### [2.4.25](https://indike.org/pramana/in.purana.brahmanda.2.4.25) evaṃ ślokārthamuktvā tu jayāndevānathābravīt / vaivasvateṃ'taretīte matsamīpamihaiṣyatha // ### [2.4.26](https://indike.org/pramana/in.purana.brahmanda.2.4.26) tato devastirobhūta īśvaro ṅyakutobhayaḥ / prapannādhāraṇāmādyāṃ yuktvā yogabalānvitām // ### [2.4.27](https://indike.org/pramana/in.purana.brahmanda.2.4.27) tatastena ruṣā śaptāste 'bhavandvādaśājitāḥ / jayā iti samākhyātāḥ kṛtā evaṃ visannibhāḥ // ### [2.4.28](https://indike.org/pramana/in.purana.brahmanda.2.4.28) tataḥ svāyaṃbhuve tasminsarge 'tīte tu vai surāḥ / punaste tuṣitā devā jātāḥ svārociṣeṃ'tare // ### [2.4.29](https://indike.org/pramana/in.purana.brahmanda.2.4.29) uttamasya manoḥ putrāḥ satyāyāṃ jajñire tadā / tataḥ satyāḥ smṛtā devā auttame cāntare manoḥ // ### [2.4.30](https://indike.org/pramana/in.purana.brahmanda.2.4.30) hariṇyāṃ nāma tuṣitā jajñire dvādaśeva tu / harayonāma te devā yajñabhājastadābhavan // ### [2.4.30.p1](https://indike.org/pramana/in.purana.brahmanda.2.4.30.p1) tataste harayo devāḥ prāpte cāriṣṭhaventare?// ### [2.4.31](https://indike.org/pramana/in.purana.brahmanda.2.4.31) vikuṇṭhāyāṃ punaste vai variṣṭhā jajñire surāḥ // ### [2.4.32](https://indike.org/pramana/in.purana.brahmanda.2.4.32) vaikuṇṭhā nāma te devāḥ pañcamasyāntare mānoḥ / tataste vai punardevā vaikuṇṭhāḥ prāpya cākṣuṣam // ### [2.4.33](https://indike.org/pramana/in.purana.brahmanda.2.4.33) tataste vai punaḥ sādhyāḥ saṃkṣīṇe cākṣuṣentare / upasthite punaḥ sarge manorvaivasvatasya ha // ### [2.4.34](https://indike.org/pramana/in.purana.brahmanda.2.4.34) aṃśena sādhyāste 'dityāṃ mārīcātkaśyapātpunaḥ / jajñire dvādaśādityā varttamānentaraṃ surāḥ // ### [2.4.35](https://indike.org/pramana/in.purana.brahmanda.2.4.35) yadā caite samutpannāścākṣuṣasyāntare manoḥ / śaptāḥ svayaṃbhuvā sādhyā jajñire dvādaśāmarāḥ // ### [2.4.36](https://indike.org/pramana/in.purana.brahmanda.2.4.36) evaṃ śṛṇoti yo martyojayastasya bhavetsadā / jayānāṃ śraddhayā yuktaḥ pratyadhyāyaṃ tu gacchati // ### [2.4.37](https://indike.org/pramana/in.purana.brahmanda.2.4.37) ityetā vṛttayaḥ sapta devānāṃ janmalakṣaṇāḥ / parikrāntā mayā vo 'dyā kiṃ bhūyaḥ śrotumicchatha // ### [2.4.37.p1](https://indike.org/pramana/in.purana.brahmanda.2.4.37.p1) iti brahmāṇḍe mahāpurāṇe vāyuprokte madhyāmabhāge tṛtīya upoddhātapāde jayābhivyāhāro nāma caturtho 'dhyāyaḥ ## Linked texts (1) - [Vāyupurāṇa](https://indike.org/pramana/in.purana.vayu.2.6.12) — Vyāsa, Sanskrit --- Source: [https://indike.org/pramana/in.purana.brahmanda.2.4](https://indike.org/pramana/in.purana.brahmanda.2.4) · Pramāṇa