[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Brahmandapurana](https://indike.org/pramana/in.purana.brahmanda) › 2.50 # Brahmandapurana 2.50 Brahmāṇḍapurāṇa 2.50 - **Language:** Sanskrit ## Contents - [2.50.58](https://indike.org/pramana/in.purana.brahmanda.2.50.58) — 1 part ### [2.50.1](https://indike.org/pramana/in.purana.brahmanda.2.50.1) jaiminiruvāca evaṃ sa rājā vidhivatpālayāmāsa medinīm / saptadvīpavatīṃ samyaksākṣāddharma ivāparaḥ // ### [2.50.2](https://indike.org/pramana/in.purana.brahmanda.2.50.2) brāhmaṇādīṃstathā varṇānsvesve dharme pṛthakpṛthak / sthāpayitvā yathānyāyaṃ rarakṣāvyāhatendriyaḥ // ### [2.50.3](https://indike.org/pramana/in.purana.brahmanda.2.50.3) prajāśca sarvavarṇeṣu yathāśreṣṭhānuvarttinaḥ / varṇāścaivānulomyena tadvadartheṣu ca kramāt // ### [2.50.4](https://indike.org/pramana/in.purana.brahmanda.2.50.4) na sati sthavire bālaṃ mṛtyurabhayupagacchati / sarvavarṇeṣu bhūpāle mahīṃ tasminpraśāsati // ### [2.50.5](https://indike.org/pramana/in.purana.brahmanda.2.50.5) sphītānyapetabādhāni tadā rāṣṭrāṇi kṛtsnaśaḥ / teṣvasaṃkhyā janapadāścāturvarṇyajanāvṛtāḥ // ### [2.50.6](https://indike.org/pramana/in.purana.brahmanda.2.50.6) te cāsaṃkhyāgṛhagrāmaśatopetā vibhāgaśaḥ / deśāścāvāsabhuyiṣṭā nṛpe tasminpraśāsati // ### [2.50.7](https://indike.org/pramana/in.purana.brahmanda.2.50.7) anāśramī dvijaḥ kaścinna babhūva tadābhuvi / prajānāṃ sarvavarṇeṣu prāraṃbhāḥ phaladāyinaḥ // ### [2.50.8](https://indike.org/pramana/in.purana.brahmanda.2.50.8) svocitānyeva karmāṇi prārabhante ca mānavāḥ / puruṣārthopapannāni karmāṇi ca tadā nṛṇām // ### [2.50.9](https://indike.org/pramana/in.purana.brahmanda.2.50.9) mahotsavasamudyuktāḥ puragrāmavrajākarāḥ / anyonyapriyakāmāśca rājabhaktisamanvitāḥ // ### [2.50.10](https://indike.org/pramana/in.purana.brahmanda.2.50.10) nanindito 'bhiśasto vā daridro vyādhito 'pi vā / prajāsu kaścillubdho vā kṛpaṇo vāpi nābhavat // ### [2.50.11](https://indike.org/pramana/in.purana.brahmanda.2.50.11) janāḥ paraguṇaprītāḥ svasaṃparkābhikāṅkṣiṇāḥ / guruṣu praṇatā nityaṃ sadvidyāvyasanādṛtāḥ // ### [2.50.12](https://indike.org/pramana/in.purana.brahmanda.2.50.12) parāpavādabhītāśca svadāraratayo 'niśam / nisargātkhalasaṃsargaviratā dharmatatparāḥ // ### [2.50.13](https://indike.org/pramana/in.purana.brahmanda.2.50.13) āstikāḥ sarvaśo 'bhūvan prajāstasminpraśāsati / evaṃ subāhutanye svapratāpārjitāṃ mahīm // ### [2.50.14](https://indike.org/pramana/in.purana.brahmanda.2.50.14) ṛtavaśca mahābhāga yathākālānuvartinaḥ / śālibhūyiṣṭhasasyāḍhyā sadaiva sakalā mahī // ### [2.50.15](https://indike.org/pramana/in.purana.brahmanda.2.50.15) babhūva nṛpaśārdūle tasmin rājyāni śāsati // ### [2.50.16](https://indike.org/pramana/in.purana.brahmanda.2.50.16) yasyāṣṭādaśamaṇḍalādhipatibhiḥ sevārthamabhyāgataiḥ prakhyātoruparākramairnṛpaśatairmūrddhābhiṣiktaiḥ pṛthak / saṃviṣṭairmaṇiviṣṭareṣu nitarāmadhyāsyamānāmaraiḥ śakrasyeva virājate divi sabhā ratnaprabhodbhāsitā // ### [2.50.17](https://indike.org/pramana/in.purana.brahmanda.2.50.17) saṃketāviṣayāntarābhyupagamāḥ sarve 'pi sopāyanāḥ kṛtvā sainyaniveśanāni paritaḥ puryāḥ pṛthak pārthivāḥ / draṣṭuṃ kāṅkṣitarājakāḥ satanayāvijñāpayanto muhurdvāsthaireva nareśvarāya suciraṃ vatsyantamantaḥpure // ### [2.50.18](https://indike.org/pramana/in.purana.brahmanda.2.50.18) namannaredramukuṭaśreṇīnāmatigharṣaṇāt / kiṇīkṛtau virājete caraṇau tasya bhūbhujaḥ // ### [2.50.19](https://indike.org/pramana/in.purana.brahmanda.2.50.19) sevāgatanaredraughavinikīrṇaiḥ samantataḥ / ratnairbhāti sabhā tasya guhā some ravī yathā // ### [2.50.20](https://indike.org/pramana/in.purana.brahmanda.2.50.20) evaṃ sa rājā dharmeṇa bhānuvaṃśaśikhāmaṇiḥ / ananyaśāsanāmurvīmanvaśāsadarindamaḥ // ### [2.50.21](https://indike.org/pramana/in.purana.brahmanda.2.50.21) itthaṃ pālayataḥ pṛthvīṃ sagarasya mahīpateḥ / na cāpapāta mut putramukhālokanajṛṃbhitā // ### [2.50.22](https://indike.org/pramana/in.purana.brahmanda.2.50.22) vinā tāṃ duḥkhito 'tyarthaṃ citayāmāsa naikadhā / aho kaṣṭamaputro 'hamasminvaṃśe dhruvaṃ tu yat // ### [2.50.23](https://indike.org/pramana/in.purana.brahmanda.2.50.23) prayānti nūnamasmākaṃ pitaraḥ piṇḍaviplavam / nirayādapi satputre saṃjāte pitaraḥ kila // ### [2.50.24](https://indike.org/pramana/in.purana.brahmanda.2.50.24) prītyā prayānti tadgehaṃ jātakarmakriyotsukāḥ / mahatā sukṛtenāpi saṃprāptasya divaṃ kila // ### [2.50.25](https://indike.org/pramana/in.purana.brahmanda.2.50.25) aputrasyāmarāḥ svarge dvāraṃ noddhāṭayanti hi / pitā tu lokamubhayoḥ svarlokaṃ tatpitāmahāḥ // ### [2.50.26](https://indike.org/pramana/in.purana.brahmanda.2.50.26) jeṣyanti kila satputre jāte vaṃśadvaye 'pi ca / anapatyatayāhaṃ tu putriṇāṃ yā bhavedgatiḥ // ### [2.50.27](https://indike.org/pramana/in.purana.brahmanda.2.50.27) na tāṃ prāpkyāmi vai nūnaṃ sudurlabhatarā hi sā / padādaindrātkilābhinnamṛddhaṃ rājyamakhaṇḍitam // ### [2.50.28](https://indike.org/pramana/in.purana.brahmanda.2.50.28) mama yattadapuṇyasya yāti niṣphalatāmiha / idaṃ matpūrvajaireva siṃhāsanamadhiṣṭhitam // ### [2.50.29](https://indike.org/pramana/in.purana.brahmanda.2.50.29) aputratvena rājyaṃ ca parādhīnatvameṣyati / tasmādaurvāśramamahaṃ gatvā taṃ munipuṅgavam // ### [2.50.30](https://indike.org/pramana/in.purana.brahmanda.2.50.30) prasādayiṣye putrārthaṃ bhāryābhyāṃ sahito 'dhunā / gatvā tasmai tvaputratvaṃ vinivedya mahātmane // ### [2.50.31](https://indike.org/pramana/in.purana.brahmanda.2.50.31) sa yadvakṣyati tatsarvaṃ kariṣye nātra saṃśayaḥ / iti sañcintya manasā sagarorājasattamaḥ // ### [2.50.32](https://indike.org/pramana/in.purana.brahmanda.2.50.32) ityeṣa kṛtyavidrājangantumaurvāśramaṃ prati / sa mantripravare rājyaṃ pratiṣṭhāpya tato vanam // ### [2.50.33](https://indike.org/pramana/in.purana.brahmanda.2.50.33) prayayau rathamāruhya bhāryābhyāṃ sahito mudā / jagāma rathaghoṣeṇa meghanādātiśaṅkibhiḥ // ### [2.50.34](https://indike.org/pramana/in.purana.brahmanda.2.50.34) stabdhekṣaṇairlakṣyamāṇo mārgopānte śikhaṇḍibhiḥ / priyābhyāṃ darśayanrājansāraṅgāṃstimitekṣaṇān // ### [2.50.35](https://indike.org/pramana/in.purana.brahmanda.2.50.35) kṣamamūrdhvamukhānsadyaḥ palāyanaparānpunaḥ / vṛkṣānpuṣpaphalopetānvilokya mudito 'bhavat // ### [2.50.36](https://indike.org/pramana/in.purana.brahmanda.2.50.36) amlānakusumaiḥ svāduphalaiḥ śādvalabhūmikaiḥ / susnigdhapallavacchāyairabhitaḥ saṃbhṛtaṃ nagaiḥ // ### [2.50.37](https://indike.org/pramana/in.purana.brahmanda.2.50.37) cūtāgrapallavāsvādasnigdhakaṇṭhapikāravaiḥ / śrotrābhirāmajanakaissaṃghuṣṭaṃ sarvatodiśam // ### [2.50.38](https://indike.org/pramana/in.purana.brahmanda.2.50.38) sarvartukusumopetaṃ bhramadbhramaramaṇḍitam / prasūnastabakānamraballarīvellitadrumam // ### [2.50.39](https://indike.org/pramana/in.purana.brahmanda.2.50.39) kapiyūthasamākrāntava naspatiśatāvṛtam / unmattaśikhisāraṅgakūjatpakṣigaṇānvitam // ### [2.50.40](https://indike.org/pramana/in.purana.brahmanda.2.50.40) gāyadvidyādharavadhūgītikāsumanoharam / saṃcaratkinnarīdvandvavirājadvanagahvaram // ### [2.50.41](https://indike.org/pramana/in.purana.brahmanda.2.50.41) haṃsasārasacakrāhvakāraṇḍavaśukādibhiḥ / susvarairāvṛtopāntaiḥ sarobhiḥ parivāritam // ### [2.50.42](https://indike.org/pramana/in.purana.brahmanda.2.50.42) saraḥ svaṃbuja kahlārakumudotpalarāśiṣu / śanaiḥ parivahanmandamārutāpūrṇadiṅmukham // ### [2.50.43](https://indike.org/pramana/in.purana.brahmanda.2.50.43) evaṃvidhaguṇopetamadhigāhya tapovanam / gacchanrathenātha nṛpaḥ praharṣaṃ paramaṃ yayau // ### [2.50.44](https://indike.org/pramana/in.purana.brahmanda.2.50.44) upaśāntāśayaḥ so 'tha saṃprāpyāśramamaṇḍalam / bhāryābhyāṃ sahitaḥ śrīmānvāhādavaruroha vai // ### [2.50.45](https://indike.org/pramana/in.purana.brahmanda.2.50.45) dhuryānviśrāmayetyuktvā yantāramavanīpatiḥ / āsasādāśramopāntaṃ maharṣerbhāvitātmanaḥ // ### [2.50.46](https://indike.org/pramana/in.purana.brahmanda.2.50.46) sa śrutvā muniśiṣyebhyaḥ kṛtanityakriyādaram / muniṃ draṣṭuṃ vinītātmā praviveśāśramaṃ tadā // ### [2.50.47](https://indike.org/pramana/in.purana.brahmanda.2.50.47) munimadhye samāsīnamṛṣivṛndaiḥ samanvitam / nanāma śirasā rājā bhāryābhyāṃ sahito mudā // ### [2.50.48](https://indike.org/pramana/in.purana.brahmanda.2.50.48) kṛtapraṇāmaṃ nṛpatimṛṣiraurvaḥ pratāpavān / upaviśeti premṇā vai saha tābhyāṃ samādiśat // ### [2.50.49](https://indike.org/pramana/in.purana.brahmanda.2.50.49) arghyapādyādibhiḥ samyakpūjayitvā mahāmuniḥ / ātithyena ca vanyena sabhāryaṃ tamatoṣayat // ### [2.50.50](https://indike.org/pramana/in.purana.brahmanda.2.50.50) athātithyopaviśrāntaṃ praṇamyā sīnamagrataḥ / rājānamabravīdaurvaḥ śanairmṛdvakṣaraṃ vacaḥ // ### [2.50.51](https://indike.org/pramana/in.purana.brahmanda.2.50.51) kuśalaṃ nanu te rājye bāhyeṣvābhyantareṣu ca / apidharmeṇa sakalāḥ prajāstvaṃ parirakṣasi // ### [2.50.52](https://indike.org/pramana/in.purana.brahmanda.2.50.52) api jetuṃ trivargaṃ tvamupāyaiḥ samyagīhase / phalanti hi guṇāstubhyaṃ tvayā samyakpracoditāḥ // ### [2.50.53](https://indike.org/pramana/in.purana.brahmanda.2.50.53) diṣṭyātvayā jitāḥ sarve ripavo nṛpasattama / diṣṭyā ca sakalaṃ rājyaṃ tvayā dharmeṇa rakṣyate // ### [2.50.54](https://indike.org/pramana/in.purana.brahmanda.2.50.54) dharma eva sthitiryeṣāṃ teṣāṃ nāstyatraviplavaḥ / na taṃ rakṣati kiṃ dharmaḥ svayaṃ yenābhirakṣitaḥ // ### [2.50.55](https://indike.org/pramana/in.purana.brahmanda.2.50.55) pūrvamevāhamaśrauṣaṃ vijitya sakalāṃ mahīm / sabalonagarīṃ prāptaḥ kṛtadāro bhavāniti // ### [2.50.56](https://indike.org/pramana/in.purana.brahmanda.2.50.56) rājñāṃ tu pravaro dharmo yatprajāparipālanam / bhavanti sukhino nūnaṃ tenaiveha paratra ca // ### [2.50.57](https://indike.org/pramana/in.purana.brahmanda.2.50.57) sa bhavānrājya bharaṇaṃ parityajya madantikam / bhāryābhyāṃ sahito rājansamāyāto 'si me vada // ### [2.50.58](https://indike.org/pramana/in.purana.brahmanda.2.50.58) jaiminiruvāca evamuktastu muninā sagaro rājasattamaḥ / kṛtāñjalipuṭo bhūtvā prāha taṃ madhuraṃ vacaḥ // ### [2.50.58.p1](https://indike.org/pramana/in.purana.brahmanda.2.50.58.p1) iti śrībrahmāṇḍe mahāpurāṇe vāyuprokte madhyamabhāge tṛtīya upoddhātapāde sagarasyaurvāśramagamanaṃ nāma pañcaśattamo 'dhyāyaḥ // 50// --- Source: [https://indike.org/pramana/in.purana.brahmanda.2.50](https://indike.org/pramana/in.purana.brahmanda.2.50) · Pramāṇa